Enọ Ahwo nọ A s’Ebe

Kọ o lọhọ re ma riẹ unu eruẹaruẹ nọ e ta kpahe Mesaya na nọ e rrọ Ikereakere Hibru?

Nọ ma tẹ roma totọ se Ikereakere Hibru na, ma re vuhu eruẹaruẹ buobu nọ e jọ oma Jesu Kristi rugba. Eruẹaruẹ nana e ta kpahe eyẹ Mesaya na gbe uzuazọ emaha riẹ, oke nọ o ti ro zihe ruọ Mesaya, iruẹru riẹ, oghẹrẹ nọ ahwo a ti ru ei, gbe owha-iruo riẹ evaọ ọruẹrẹfihotọ Jihova Ọghẹnẹ. Enana kpobi i re fi obọ họ k’omai vuhumu inọ Jesu họ Mesaya na. Rekọ, ma rẹ yọroma otẹrọnọ ma gwọlọ riẹ dẹẹ unu ọ eruẹaruẹ nọ e ta kpahe Mesaya na nọ e rrọ Ikereakere Hibru na.

Eruẹaruẹ nọ ahwo jọ a rẹ ta nọ i kie kpahe Mesaya na, amọfa a re rri rai ere he. Alfred Edersheim ọ jọ obe riẹ The Life and Times of Jesus the Messiah, ta inọ ebe nọ isu egagọ ahwo Ju a kere i dhesẹ nọ eria 456 evaọ Ikereakere Hibru na e ta kpahe Mesaya na, dede nọ ibuobu rai e nwane fodẹ Mesaya na dẹẹ hẹ. Nọ ohwo ọ tẹ kiẹ eria 456 na riwi ziezi, ọ sai wo avro sọ i gine kie kpahe Jesu Kristi. Wọhọ oriruo, Edersheim ọ ta nọ ahwo Ju a rehọ Emuhọ 8:11 wọhọ nọ o ta kpahe Mesaya na. A rehọ e riẹ nnọ “erueruẹ na ọ kọrọ obe olivi na no Ugbehru Mesaya ze.” Edersheim ọ tẹ jẹ fodẹ Ọnyano 12:42. O dhesẹ nọ ahwo Ju a fotọ oria Ikereakere yena thọ nọ o kere nọ: “Ahwo Ju a rọwo nọ wọhọ epanọ Mosis o no udhude ze na, ere Mesaya na o ti no Rom ze.” O rrọ bẹbẹ re egba-eriariẹ gbe amọfa a rọwo inọ eria Ebaibol ivẹ nana e ta kpahe Jesu Kristi.

O tẹ make rọnọ ma tẹrovi eruẹaruẹ nọ e jọ oma Jesu Kristi rugba, o te jọ bẹbẹ ghele re ma riẹ uzedhe unu eruẹaruẹ nọ e ta kpahe iẹe. Wọhọ oriruo, eruẹaruẹ buobu nọ i kie kpahe Mesaya na e rrọ Aizaya uzou avọ 53. Aizaya 53:2-7 o ta nọ: “O wo eru . . . hu. Ahwo a riri riei vo jẹ se iẹe . . . Ọye ọ wọ edada mai . . . Fiki iruthọ mai a jẹ nwae oma . . . A su rie vrẹ wọhọ omogodẹ nọ a bi kpe.” Kọ o gba re ma ta nọ eruẹaruẹ nana kpobi nọ e rrọ Aizaya uzou avọ 53 na yọ ọvo, manikọ yọ eruẹaruẹ sa-sa nọ i kie kpahe Mesaya na?

Je roro kpahe Aizaya 11:1 nọ o ta nọ: “Ohwo o ti no ugboma Jẹsi tha, evaọ udevie iruọmọ riẹ ohwo jọ o reti muẹ.” Eruẹaruẹ nana e wariẹ roma via evaọ owọ avọ 10. Kọ ma re kele eruẹaruẹ nana wọhọ ivẹ manikọ eruẹaruẹ ọvo nọ a wariẹ? Epanọ ohwo o kele eruẹaruẹ nọ e rrọ Aizaya uzou avọ 53 gbe Aizaya uzou avọ 11 i ti kpomahọ unu eruẹaruẹ nọ ọ ta nọ i kie kpahe Mesaya na.

Fikiere, ma rẹ fodẹ gbiae he uzedhe unu eruẹaruẹ nọ i kie kpahe Mesaya na nọ e rrọ Ikereakere Hibru na. Ukoko Jihova u kere eruẹaruẹ buobu nọ i kie kpahe Jesu gbe epanọ i ro rugba fihọ ebe no. * Eria ebe itieye na e rẹ sae tuduhọ omai awọ evaọ uwuhrẹ omobọ mai gbe orọ uviuwou mai, i ve je fi obọ họ k’omai evaọ odibọgba mai. Ofariẹ, eruẹaruẹ nọ i kie kpahe Mesaya na kpobi, makọ epanọ i bu te kẹhẹ, e kẹ imuẹro ivevẹ inọ Jesu họ Kristi na, hayo Mesaya na.

[Oruvẹ-obotọ]