Enọ Ahwo nọ A s’Ebe

Ẹvẹ ma re wo otoriẹ eware nọ a be hai kere fihọ iyẹrẹ ẹgbukpe mai na?

Kukpe kukpe, ma re rẹro iyẹrẹ iruo mai nọ e rẹ roma via evaọ Yearbook na. O rẹ k’omai evawere gaga nọ ma tẹ ruẹ iyẹrẹ omodawọ idibo Jihova evaọ iruo usiuwoma ota akpọ-soso na. Rekọ re ma wo erere no iyẹrẹ na ze ziezi, o gwọlọ nọ ma re wo otoriẹ eware nọ a kere na. Joma ta kpahe iriruo jọ.

Ukpe iruo. Ukpe iruo u re muhọ evaọ amara Azie ukpe jọ rite amara Aria ukpe ọfa. Iyẹrẹ nọ e rẹ roma via evaọ Yearbook họ erọ ukpe iruo nọ o vrẹ. Fikiere, iyẹrẹ nọ e rrọ 2011 Yearbook na yọ erọ ukpe iruo 2010, nọ u muhọ evaọ ẹdẹ 1 ọrọ amara Azie, 2009 rite ẹdẹ avọ 31 ọrọ amara Aria, 2010.

Iwhowho-uvie nọ e mai bu gbe unu iwhowho-uvie. “Iwhowho-uvie” yọ Isẹri Jihova nọ e họ-ame no gbe enọ e re họ-ame he nọ e rrọ eta-usiuwoma. “Iwhowho-uvie nọ e mai bu” họ unu ahwo nọ o mai bu nọ e niyẹrẹ evaọ amara jọ evaọ ukpe iruo na yọ unu nana u kugbe iyẹrẹ nọ a kake nẹ hẹ nọ a kele kugbe iyẹrẹ amara nọ ọ kẹle riẹ. Onana o rẹ sai ru nọ a re ro kele iwhowho-uvie jọ isiava. Rekọ, nọ a te bi kele iwhowho-uvie nọ e mai bu, enọ i kpohọ usiuwoma rekọ nọ e kareghẹhọ niyẹrẹ iruo rai hi a re kele ai kugbe he. Onana u dhesẹ epanọ o r’oja te re owhowho-uvie kpobi ọ niyẹrẹ iruo riẹ evaọ ẹruoke kamara kamara. “Unu iwhowho-uvie” yọ enọ e niyẹrẹ iruo rai evaọ amara yena.

Unu euwa. Wọhọ epanọ 2011 Yearbook u dhesẹ, Isẹri Jihova a rehọ euwa nọ i bu vi ima-odu ọvo gbe ima egba ezeza (1,600,000,000) rọ ta usiuwoma. Rekọ orọnikọ euwa nana ọvo ma raha evaọ egagọ mai hi, keme euwa nana i kugbe enọ ma ro ru iweze ekpako na ha, hayo kọ enọ ma ro kpohọ iwuhrẹ, hayo ru uwuhrẹ Ebaibol omobọ mai.

Ugho nọ ma raha. Evaọ ukpe iruo 2010 na, Isẹri Jihova a raha igho nọ i bu vi isiso ima udhusoi gbe ikpegbihrẹ (₦23,400,000,000) rọ rẹrote ekobaro obọdẹ, imishọnare, gbe esẹro okogho gbe erọ ubrotọ evaọ iruẹru Uvie na. Rekọ unu igho nọ ma ro kporo ebe gbe enọ ma rọ rẹrote inievo nọ i bu vi idu udhe (20,000) nọ e rrọ iruo Ebẹtẹle wariẹ akpọ na soso họ e rrọ usu igho nana ha.

Enọ e re emu owọwọ. Enana họ unu inievo nọ e họ-ame no nọ e re ebrẹdi jẹ da udi Ekareghẹhọ na wariẹ akpọ na soso họ. Kọ unu enọ e re ebrẹdi jẹ da udi na kpobi họ enọ e ginẹ rrọ ikpodhiwu? O nwane rrọ ere he. Eware buobu e rẹ sae whae ze nọ ahwo jọ a je roro thọthọ inọ a wo use obọ odhiwu, eware wọhọ iwuhrẹ ethọthọ erọ egagọ nọ a jọ vẹre, hayo ẹyao ẹvori. Fikiere u wo uvumọ edhere nọ ma rẹ rọ riẹ uzedhe unu ikpodhiwu nọ i kiọkọ otọakpọ họ; yọ u du gwọlọ nọ ma rẹ riẹ hẹ. Ugboma Esuo na u re kere edẹ ahwo kpobi nọ a re emu owọwọ na fihotọ họ, yọ a riẹ oria nọ ikpodhiwu kpobi e rrọ evaọ otọakpọ na ha. *

Oware nọ ma riẹ họ “idibo Ọghẹnẹ” jọ nọ a rọ ẹzi wholo a te gbẹ jọ otọakpọ na okenọ uye ulogbo na u ti muhọ. (Evia. 7:1-3) Bọo oke yena, enọ a rọ ẹzi wholo na a te gbẹ kobaro evaọ iruo usiuwoma ota na onọ a be hai dhesẹ fihọ iyẹrẹ ẹgbukpe mai na.

[Oruvẹ-obotọ]