Itanẹte Epanọ A rẹ rọ Rehọ iẹe Ru Iruo Ziezi

IJINI nọ a re ro kporo ebe nọ a bi ku anwọ ikpe egba buobu nọ i kpemu ze na i nwene oghẹrẹ nọ ahwo a bi ro kpeze evuẹ se ohwohwo no. Ere Itanẹte i nwene oghẹrẹ nọ ahwo a bi ro kpeze evuẹ se ohwohwo nẹnẹ. A rẹ sae rehọ Itanẹte vi ovuẹ se ohwo evaọ oria kpobi evaọ otọakpọ na. Nẹnẹ, whọ rẹ sae jọ oria kpobi nọ Itanẹte e rrọ wo oghẹrẹ ovuẹ kpobi nọ whọ gwọlọ.

Re ahwo a ta ẹme hayo kpeze evuẹ se ohwohwo yọ obọdẹ okẹ jọ nọ Ọmemama na ọ kẹ omai. Fiki okẹ nana, o lọhọ gaga re ma ta oware nọ ma riẹ kẹ amọfa, a vẹ jẹ ta onọ a riẹ k’omai. Jihova họ ọnọ ọ kake ta ẹme kẹ ahwo-akpọ; ọ vuẹ rai vevẹ epanọ a sai ro yeri emamọ uzuazọ. (Emu. 1:28-30) Rekọ a rẹ sae rehọ okẹ ẹmeọta ru iruo thọthọ, wọhọ epanọ o via evaọ oke Adamu avọ Ivi na. Setan o gu ọrue kẹ Ivi. Ivi ọ rọwo eme nọ Setan ọ ta kẹe, ọ tẹ ta eme na kẹ Adamu, ọnọ ọ wha okpẹtu se ahwo-akpọ kpobi.—Emu. 3:1-6; Rom 5:12.

Kọ ẹvẹ kpahe eroruiruo Itanẹte? Dede nọ Itanẹte e rẹ sai fi obọ họ k’omai ma vẹ jẹ jọ eva riẹ wo evuẹ vẹrẹ vẹrẹ, o rẹ sai je su omai thọ, raha oke mai kufiẹ, je gbe iroro mai ku. Joma ta kpahe epanọ ma sae rọ rehọ Itanẹte ru iruo evaọ emamọ edhere.

Kọ Evuẹ na Emamọ Manikọ Ikpehre?

Orọnikọ evuẹ kpobi nọ e rrọ Itanẹte họ emamọ họ. Evuẹ nọ e rrọ Itanẹte e wọhọ itiowo nọ a kwa fihọ omodhe k’owhẹ re whọ lalọ, ejọ emamọ, ejọ igbogbo. Kọ who gbe ti rri ọvuọvo ziezi re whọ tẹ lalọ iẹe? Ababọ avro, who ti ru ere. Nọ whọ tẹ be jọ Itanẹte gwọlọ oware jọ, eware nọ whọ rẹ ruẹ i re bu gaga, ejọ emamọ, ejọ ikpehre. O gwọlọ orimuo re ma sae whaha evuẹ nọ e rẹ sae nua iroro mai.

Evaọ 1993, uwoho erakọ ivẹ nọ e rrọ aro ekọmputa o jọ emagazini jọ nọ a riẹ ziezi. Arakọ jọ ọ ta kẹ ọdekọ nnọ: “Evaọ Itanẹte, ohwo ọvo ọ rẹ riẹ nọ whẹ yọ arakọ họ.” Evaọ ikpe buobu nọ i kpemu, Setan ọ rehọ araomuomu ta ẹme kẹ Ivi inọ Ivi ọ rẹ sae jọ wọhọ Ọghẹnẹ. Nẹnẹ, ohwo kpobi nọ ọ riẹ epanọ a rẹ rọ Itanẹte ru iruo ọ rẹ sae rehọ iẹe viẹ ahwo họ, ababọ odẹ riẹ nọ ọ rẹ tubẹ fodẹ. Yọ uvẹ u rovie fihọ kẹ ohwo kpobi re o fi eme gbe iwoho họ Itanẹte.

 Nọ whọ tẹ be rehọ Itanẹte ru iruo, whọ jọ wọhọ Ivi hi, ọnọ a viẹhọ lọlọhọ na. Yọroma gaga re whọ tẹ rọwo evuẹ nọ whọ ruẹ. Re who te fievahọ evuẹ jọ, nọ oma ra nọ: (1) Ono o kere ovuẹ nana? Kọ ohwo na o wuhrẹ kpahe eware nọ o kere na? (2) Fikieme ohwo na o ro kere ovuẹ na? Fikieme a ro fi ovuẹ na họ Itanẹte? Kọ ọ rọ emamọ eva kere ovuẹ na? (3) Diẹse ọ rehọ ovuẹ na no ze? Kọ ọ fodẹ oria nọ whọ sae jọ kiẹ riwi sọ eme nọ o kere na e gba? (4) Kọ ovuẹ na u kie kpahe oke mai na? Evaọ ikpe-udhusoi ọsosuọ, Pọl ukọ na ọ kẹ Timoti ohrẹ jọ nọ o rẹ sai fi obọ họ k’omai nẹnẹ. Pọl o kere nọ: “Sẹro oware nọ a rọ kẹ owhẹ na. Si oma no eme ogbẹta nọ e kare erọ Ọghẹnẹ, jegbe avro ogbẹvrọ nọ a re se ugbese nọ eriariẹ.”—1 Tim. 6:20.

O rẹ Lẹliẹ Eware Vẹrẹ Manikọ O rẹ Raha Oke?

Ohwo ọ tẹ rọ Itanẹte ru iruo ziezi, oke, ẹgba, gbe igho nọ ọ rẹ raha fihọ eware jọ e rẹ kawo. Ohwo ọ rẹ sae dẹ oware lọlọhọ yọ ọ rrọ evaọ uwou riẹ. Ohwo ọ rẹ sae jọ Itanẹte wawo unuigho eware, ọ vẹ riẹ onọ o mai ku. Fikinọ ahwo a rẹ sae jọ Itanẹte hwa ugho fihọ ẹkpa ugho ebanke amọfa, amọfa a vẹ jẹ sai fi ugho họ ẹkpa ugho rai, u ru eware lọhọ kẹ ae no; whọ rẹ sai ru eware nọ i kie kpahe ugho evaọ uwou ra. Otẹrọnọ whọ gwọlọ kpohọ erẹ yọ whọ gwọlọ ruọ arupre, whọ rẹ sae jọ Itanẹte fi odẹ ra h’otọ jẹ hwa ugho ofa na. Whọ rẹ sae jọ Itanẹte ruẹ inọmba ifonu, adrẹse ahwo, gbe idhere efa sa-sa nọ whọ sai ro te oria nọ whọ gwọlọ nya. Evaọ akpọ na soso, fiki ọ eroruiruo Itanẹte, oke gbe ugho nọ iwou ogha erọ Isẹri Jihova a be raha fihọ eware jọ i bi bu hrọ họ.

Rekọ Itanẹte u wo abọ oyoma. O rẹ sae raha oke buobu. Ahwo jọ a rẹ jọ Itanẹte ghoro ọvo ukpenọ a rẹ jariẹ gwọlọ oware nọ u re fi obọ họ kẹ ae. A rẹ raha oke buobu rọ zaro ekọmputa, rovie riwi eware nọ ahwo a be zẹ, gbiku, vi uwou se amọfa, je mu gwọlọ eware. A vẹ rọ ere bi gbabọkẹ eware nọ i w’uzou wọhọ uviuwou rai, egbẹnyusu, gbe eware ukoko. Itanẹte e rẹ sai tube ru nọ ohwo o gbe ro wo uvẹ kẹ eware efa ha. Wọhọ oriruo, ekiakiẹ nọ a ru evaọ ukpe nukpo i dhesẹ nọ evaọ izoge Korea 10 kpobi, imava i wo ẹbẹbẹ Itanẹte. Ekiakiẹ nọ a ru evaọ Germany i dhesẹ nọ “eyae buobu a bi bru enu inọ ezae rai a bi wo uvẹ hẹ fiki Itanẹte.” Aye jọ o bru enu inọ ọzae riẹ ọ roma kẹ Itanẹte te epanọ orọo rai o rọ fa no.

Ohwo jọ nọ ọ rehọ oma kẹ Itanẹte gaga o kere ileta se uwou ogha Isẹri Jihova jọ. Ọ rẹ jọ Itanẹte raha te euwa ikpe ẹsejọ evaọ okpẹdoke. Ọ ta nọ “evaọ oke ọsosuọ mẹ riẹ hẹ inọ Itanẹte e te wha uye se omẹ.” O te fibae nọ: “Nọ oke o be nya haro na, ewuhrẹ o te muọ omẹ họ evo, mẹ tẹ jẹ siọ olẹ ba.” Ọ tẹ maki kpohọ ewuhrẹ, ọ rẹ ruẹrẹ oma kpahe he yọ iroro riẹ kpobi epanọ  o re ro te uwou re o “rovie Itanẹte.” U woma gaga inọ o vuhu ẹbẹbẹ riẹ mu ọ tẹ j’owọ re ọ kpọ eware vi. Ajọ ma kuvẹ hẹ re Itanẹte i mi omai oke mai kpobi no.

Kọ Ovuẹ na U Wo Erere kẹ Omai?

Ma jọ 1 Ahwo Tẹsalonika 5:21, 22 se nọ: “Rekọ jawo koware koware; yọrọ onọ uwoma ga. Si oma no oghẹrẹ eyoma kpobi.” U fo re ma riẹ sọ eware nọ ma bi se je riwi evaọ Itanẹte e were Ọghẹnẹ. E rẹ jọ eware nọ i fo kẹ Oleleikristi. Ifoto ẹbẹba e vọ Itanẹte, yọ ohwo ọ gbẹ yọroma ha ọ rẹ sai kie ruọ ẹta na.

U re woma re ma nọ oma mai nọ, ‘Kọ mẹ te ko eware nọ me bi rri evaọ ekọmputa dhere no ọrivẹ-orọo mẹ, ọsẹgboni mẹ, hayo ibe eg’Ọghẹnẹ mẹ otẹrọnọ a nyaku omẹ?’ Otẹrọ ere, u ti woma re ma gbaemu inọ oke nọ amọfa a rrọ kugbe omai ọvo ma re rovie Itanẹte. Evaọ uzẹme, Itanẹte i gine nwene oghẹrẹ nọ ma re ro vi evuẹ se amọfa jẹ dẹ eware no. Fiba onana, Itanẹte e tẹ jẹ rrọ edhere ọkpokpọ nọ ohwo ọ sae rọ ‘jọ udu riẹ bruẹnwae.’—Mat. 5:27, 28.

Kọ U Fo re Me Vi Uwou Nana se Amọfa?

Ma rẹ sae rehọ Itanẹte vi uwou se amọfa, amọfa a ve je vi se omai. Dede nọ ma wo udu nọ ma rẹ rọ gwọlọ evuẹ jọ via ma ve je vi ai se amọfa, o rrọ owha-iruo mai re ma ruẹ nọ evuẹ na e rrọ uzẹme i te je fo. Kọ ma rẹ sae rọ obọ s’udu ta nọ eware nọ ma bi vi se amọfa na ginọ uzẹme? Kọ ma mi ohwo nọ o wo ovuẹ na udu nọ ma sai ro kpeze ovuẹ na se amọfa? * Kọ ovuẹ na ọ rẹ sae bọ amọfa ga? Fikieme ma bi ro vi ovuẹ na se amọfa? Kọ ma bi ru ere ro dhesẹ oma?

A tẹ rehọ ekọmputa vi umutho evuẹ nọ i wuzou, e rẹ sae kẹ erere. Rekọ evuẹ na i te bu hrọ, e rẹ sae raha oke ohwo. Kọ ma be hai vi evuẹ buobu nọ i wuzou hu se ahwo, nọ e rẹ raha oke rai kufiẹ? Taure ma te ti vi ovuẹ jọ, kọ u gbe fo re ma kiẹ oware nọ o be lẹliẹ omai vi ovuẹ na riwi? Kọ eme họ ẹjiroro nọ ma bi ro vi ovuẹ na? Ahwo a re gbiku kpahe eware nọ e be jọ uzuazọ rai via fihọ ileta, a ve vi ileta na se ahwo uviuwou gbe egbẹnyusu rai. Kọ u gbe fo nọ evuẹ itieye ma rẹ rọ ekọmputa vi? Kọ eme jabọ ma je vi evuẹ nọ ma riẹ sọ e rrọ uzẹme he se amọfa?

Kọ eme ma re ru kpahe Itanẹte? Kọ ma rẹ kẹnoma kẹe riẹriẹriẹ? Onana u re fo evaọ ẹsejọ. Ere ohwo nọ o kere ileta kpohọ uwou ogha nọ ma fodẹ ẹsiẹe na o ru re ọ sai no igbo Itanẹte nọ ọ jọ ikpe buobu. Evaọ abọdekọ riẹ, Itanẹte e rẹ sae kẹ erere, thakpinọ ma ‘wo ovuhumuo, otoriẹ u te je bi su omai.’—Itẹ 2:10, 11.

[Oruvẹ-obotọ]

[Uwoho nọ o rrọ ẹwẹ-obe avọ 4]

Ẹvẹ whọ sae rọ whaha evuẹ nọ i re su owhẹ thọ?

[Uwoho nọ o rrọ ẹwẹ-obe avọ 5]

Eme who re roro kpahe re who te vi ovuẹ jọ?