Emamọ Ohrẹ Kpahe Orọo Gbe Seba-ẹrọo
Emamọ Ohrẹ Kpahe Orọo Gbe Seba-ẹrọo
“Mẹ ta onana . . . fiki ewoma rai, re mẹ rọ iroro rai nọ e hẹriẹ hẹ ro bru Ọnowo.”—1 KỌR. 7:35.
1, 2. Fikieme ohwo ọ jẹ kiẹ ehrẹ Ebaibol nọ e ta kpahe orọo gbe seba-ẹrọo riwi?
EVAWERE, idhọvẹ, gbe awa yọ eware nọ usu ọmọtẹ avọ ọmọzae o rẹ wha ze. U fo re ma gwọlọ ọkpọvio Ọghẹnẹ re ma sai fi idhọvẹ itieye na kparobọ, rekọ orọnikọ fiki idhọvẹ itieye na ọvo ma rẹ rọ gwọlọ ọkpọvio Ọghẹnẹ hẹ. Ahwo uviuwou gbe egbẹnyusu erọ Oleleikristi nọ ọ gwọlọ rọo ho a rẹ sai kpokpo iei inọ jọ ọ rọo. Oleleikristi ọfa ọ sae gwọlọ rọo rekọ ọ re ruẹ ohwo ẹro riẹ hẹ. Ejọ e gwọlọ obufihọ re a sae ruẹrẹ oma kpahe kẹ owha-iruo orọ ọzae hayo aye uwou-orọo. Yọ Ileleikristi nọ e rọo no gbe enọ e re rọo ho a rẹriẹ ovao dhe odawọ ọfariẹ-ogbe.
2 Iroro nọ ma jẹ kpahe eware nana e rẹ sai kpomahọ evawere mai, maero kọ usu mai kugbe Jihova Ọghẹnẹ. Evaọ uzou avọ 7 orọ ileta ọsosuọ riẹ se ahwo Kọrint, Pọl ọ kẹ ohrẹ kpahe orọo gbe seba-ẹrọo. Ẹjiroro riẹ họ re ọ tuduhọ inievo yena awọ re a “rọ iroro rai nọ e hẹriẹ hẹ ro bru Ọnowo.” (1 Kọr. 7:35) Nọ ma be te ta kpahe ohrẹ nọ ọ kẹ na, daoma rri uyero ra wọhọ uvẹ nọ whọ rẹ rọ gọ Jihova vọvọ ziezi, te whọ rọo no hayo whọ re rọo ho.
Obọdẹ Iroro nọ Ohwo Kpobi Ọ rẹ Jẹ
3, 4. (a) Didi ebẹbẹ e rẹ sae roma via nọ imoni gbe egbẹnyusu a te bi kpokpo oniọvo nọ ọ re rọo ho? (b) Ẹvẹ ohrẹ Pọl o sai ro fi obọ họ kẹ ohwo wo eriwo owowa kpahe orọo?
3 A jọ eria buobu se orọo gboja gaga nẹnẹ wọhọ epanọ o jọ evaọ oke ahwo Ju erọ ikpe-udhusoi ọsosuọ. Otẹrọnọ ọmọtẹ hayo ọmọzae o te unuikpe jọ no yọ ọ re rọo ho, imoni gbe egbẹnyusu riẹ a ve mu ei ehrẹ họ ẹkẹ. A ve mu ei họ ẹtakẹ inọ jọ ọ daoma gwọlọ ohwo nọ ọ rẹ rọo. A vẹ be rọ areghẹ dhesẹ ohwo jọ nọ ọ rẹ sae rehọ kẹe. A rẹ tubẹ rọ edhere ẹghẹ ru re imava nọ e re rọo ho a ruẹ ohwohwo. Ẹsejọ, owojẹ nana o rẹ wha omovuọ gbe idhọvẹ ze, o vẹ jẹ wha ẹbẹbẹ fihọ udevie egbẹnyusu.
4 Pọl ọ gba ohwo ọvo họ họ re ọ rọo hayo ọ seba ẹrọo. (1 Kọr. 7:7) U no Pọl eva ze re ọ gọ Jihova ababọ aye, rekọ enọ e gwọlọ rọo, ọ rehọ ekpehre ubiẹro rri rai hi. Epọvo na re, Ileleikristi inẹnẹ a wo udu nọ a rẹ rọ jẹ iroro kẹ omobọ rai sọ a rẹ rọo hayo a rẹ rọo ho. Amọfa a rẹ jẹ iroro na kẹ ohwo ho.
Wo Erere no Uzuazọ Seba-Ẹrọo Ze
5, 6. Fikieme Pọl ọ rọ tuduhọ Ileleikristi awọ inọ a rọo ho?
5 Pọl ọ jọ ileta nọ o kere se Ileleikristi obọ Kọrint na ta ẹme ezi kpahe seba-ẹrọo. (Se 1 Ahwo Kọrint 7:8.) Dede nọ Pọl ọ rọo ho, o rri oma riẹ kpehru vi enọ e rọo no ho, wọhọ epanọ isu-egagọ nọ e rọo ho a be hai ru. Ukpoye, Pọl ọ fodẹ eware nọ Ileleikristi nọ e rọwo ho a be reawere rai. Didi eware?
6 Oleleikristi nọ ọ rọo ho ọ rẹ sai wo ewha-iruo jọ evaọ ukoko Jihova nọ ọnọ ọ rọo no ọ rẹ sai wo ho. Pọl o wo uvẹ-ọghọ nọ ọ rọ jọ “ukọ rọ kẹ otu Egedhọ.” (Rom 11:13) Se obe Iruẹru Ikọ Na uzou avọ 13 rite 20, re whọ ruẹ epanọ Pọl avọ ibe imishọnare riẹ a rọ ta usiuwoma evaọ ekwotọ buobu jẹ rehọ ikoko mu. Evaọ odibọgba riẹ, Pọl o thihakọ ebẹbẹ buobu nọ ahwo buobu nẹnẹ a rẹ sai thihakọ rai hi. (2 Kọr. 11:23-27, 32, 33) Evawere nọ o wo fikinọ ibuobu nọ ọ ta usiuwoma kẹ a kurẹriẹ u ru rie kpairoro vrẹ ebẹbẹ yena. (1 Tẹs. 1:2-7, 9; 2:19) Kọ ọ hae sai ru eware nana kpobi o hae jọnọ ọ rọo hayo yẹ emọ? Ẹsejọhọ ọ hae sai ru ere he.
7. Kẹ oriruo inievo nọ e rọo ho nọ e rọ uvẹ rai wha iruo Uvie na haro.
7 Ileleikristi buobu nọ e rọo ho a be rọ uvẹ rai ru iruo ziezi evaọ ukoko na. Sara gbe Limbania, ekobaro ivẹ jọ nọ e rọo ho evaọ obọ Bolivia, a kwa kpohọ iwhre jọ nọ uvumọ ohwo ọ re jọ ta usiuwoma ikpe buobu hu. Kọ a te sae rria iwhre na nọ ikpẹ ẹlẹtriki e rrọ họ na? A ta nọ: “A jọ iwhre na wo irediyo hayo etẹlivisiọno ho, fikiere uvẹ kpobi nọ ahwo iwhre na a wo, obe a rẹ rehọ iẹe se.” Ahwo iwhre na jọ a gbe bi tube se ebe anwae mai jọ nọ ma gbe bi kporo ho. Fikinọ ahwo a jẹ gaviezọ kẹ inievo-emetẹ nana evaọ enwenọ uwou kpobi, o jọ bẹbẹ kẹ ae re a nyate uwou kpobi evaọ iwhre na. Ọkpọkuaye jọ ọ ta kẹ ae nọ: “Nọ Isẹri Jihova a ta usiuwoma te omai oma no na kiyọ urere na o kẹle no.” U kri hi, ahwo jọ evaọ iwhre na a te muọ iwuhrẹ họ ẹnya.
8, 9. (a) Eme Pọl o wo họ iroro nọ ọ ta ẹme ezi kpahe seba-ẹrọo? (b) Didi uvẹ-iruo Ileleikristi nọ e rọo ho a wo?
8 Uzẹme, Ileleikristi nọ e rọo no a re wo emamọ iyẹrẹ re nọ a tẹ be ta usiuwoma evaọ ekwotọ nọ a rẹ kake jọ gaviezọ họ. Rekọ uvẹ-iruo jọ nọ ekobaro nọ e rọo ho a wo, o rẹ jọ bẹbẹ kẹ enọ e rọo no hayo yẹ emọ no. Pọl o muẹrohọ inọ enọ e rrọ ukoko obọ Kọrint na a rẹ sai wo ẹnyaharo evaọ ewhowho usiuwoma na. Ọ gwọlọ re aikpobi a wo evawere wọhọ epanọ o wo na. Fikiere, ọ ta nọ enọ e rọo ho e te mai wo uvẹ nọ a rẹ rọ gọ Jihova vọvọ.
9 Oniọvo-ọmọtẹ jọ nọ ọ rrọ ọkobaro evaọ obọ America nọ ọ re rọo ho ọ ta nọ: “Ahwo jọ a re roro nọ enọ e rọo ho a rẹ sai wo evawere he. Rekọ mẹ ruẹ no inọ re ohwo o gine wo evawere o roma hwa usu riẹ kugbe Jihova. Dede nọ seba-ẹrọo o lọhọ họ, yọ obọdẹ okẹ otẹrọnọ whọ rehọ e riẹ ru iruo ziezi.” Rọ kpahe epanọ a sai ro wo evawere, oniọvo nana ọ ta nọ: “Seba-ẹrọo o rẹ wha evawere ze orọnikọ o rẹ whaha ohwo evawere he. Mẹ riẹ inọ Jihova o you ohwo kpobi, te enọ e rọo no gbe enọ e rọo ho.” Obọnana ọ be rọ evawere ta usiuwoma evaọ oria nọ a jọ mae gwọlọ iwhowho-uvie. Otẹrọnọ whọ re rọo ho, kọ whọ sae rọ uvẹ ra wo ẹnyaharo evaọ usiuwoma ota na? Whọ te ruẹ nọ seba-ẹrọo yọ obọdẹ okẹ nọ u no obọ Jihova ze.
Enọ E Gwọlọ Rọo
10, 11. Ẹvẹ Jihova o re ro fi obọ họ kẹ enọ e gwọlọ rọo rekiyọ a re ruẹ ọrọ ẹro rai hi?
10 Nọ Ileleikristi buobu a tẹ rria ikpe jọ no, a vẹ jẹ iroro inọ a rẹ rọo. Fikinọ a gwọlọ salọ thọ họ, a vẹ lẹ se Jihova kẹ obufihọ re a sae ruẹ emamọ ọrivẹ-orọo.—Se 1 Ahwo Kọrint 7:36.
11 Otẹrọnọ whọ gwọlọ rọo ohwo nọ whai imava wha rẹ gbẹ gọ Jihova kugbe, lẹ se Jihova kpahe onana. (Fil. 4:6, 7) O tẹ make rọnọ whọ te hẹrẹ oke krẹkri, jọ o bẹ owhẹ hẹ. Fievahọ Ọghẹnẹ oyoyou mai na, o ti ru ẹgwọlọ ra kẹ owhẹ.—Hib. 13:6.
12. Fikieme Oleleikristi ọ rẹ rọ yọroma nọ ohwo jọ ọ tẹ ta ẹme orọo kẹe?
12 O sae jọnọ oniọvo-ọmọtẹ ọ gwọlọ rọo rekọ enọ e be t’ẹme orọo kẹe kpobi a kruga evaọ ukoko na ha, hayo a rrọ ukoko dede he. Otẹrọnọ ere o rrọ k’owhẹ, kareghẹhọ inọ idhọvẹ nọ i re no ekpehre orọo ze i yoma vi oma nọ o rẹ jọ ohwo goli evaọ okenọ ọ re rọo ho. Yọ whọ tẹ rọo no, oghẹrẹ nọ o rrọ kpobi kẹhẹ, whọ rẹ siọ orivẹ-orọo ra ha. (1 Kọr. 7:27) Whọ varioma ruọ orọo ho re whọ te vioja riẹ evaọ obaro.—Se 1 Ahwo Kọrint 7:39.
Ruẹrẹ Oma Kpahe kẹ Orọo
13-15. Didi eware e rẹ sae wha ẹbẹbẹ ze nọ imava a rẹ ta kpahe re a tẹ te rọo?
13 Dede nọ Pọl ọ ta nọ enọ e rọo ho a rẹ mai wo uvẹ evaọ egagọ Jihova, rọkẹ enọ e gwọlọ rọo, ọ rehọ ekpehre ubiẹro rri rai hi. Ukpoye, ohrẹ nọ ọ kẹ u re fi obọ họ kẹ enọ e rọo no rẹrote ewha-iruo rai ziezi re orọo rai o ruẹse tọ.
14 O rẹ gwọlọ re inievo-emezae gbe erọ emetẹ jọ a nwene eriwo rai kpahe orọo. Nọ imava a tẹ be nyusu orọo, a re roro nọ uyoyou rai o ga thesiwa, inọ a ti wo uvumọ ebẹbẹ hẹ nọ a tẹ rọo no. A vẹ rọ iroro itienana ruọ orọo. Iroro itieye na e thọ. Uyoyou u re gine mu enọ e rọo obọ, rekọ oyena ọvo u te he re ọzae avọ aye a sae ruẹrẹ oma kpahe kẹ ebẹbẹ nọ e rẹ jọ orọo kpobi.—Se 1 Ahwo Kọrint 7:28. *
15 U re gbe ibuobu nọ e rọo obọ unu inọ oware jọ nọ a se gboja gaga o rẹ were ọrivẹ-orọo rai hi. A rẹ sai wo ọvuọ eriwo riẹ kpahe araha ugho gbe oware nọ a rẹ rehọ uvẹ nọ a wo ro ru, oria nọ a rẹ rria, gbe epanọ a re weze bru ahwo uviuwou rai kiti te. Yọ aimava na a wo ọvuọ ekpehre uruemu riẹ nọ o rẹ sae dha ọdekọ eva. Nọ imava a tẹ be nyusu orọo, a rẹ sai rri eware itieye na vo, rekọ uwhremu na e rẹ sae jọ ẹbẹbẹ ologbo evaọ orọo. U re woma re enọ e be nyusu orọo a t’ẹme kpahe ebẹbẹ itieye na re a tẹ te rọo.
16. Fikieme ọzae avọ aye a rẹ rọ rọwo kugbe evaọ oghẹrẹ nọ a re ro ku ebẹbẹ orọo họ?
16 Re imava orọo a sae kparobọ je wo evawere evaọ orọo rai, a rẹ rọ okugbe rẹriẹ ovao dhe ebẹbẹ rai. A rẹ rọwo kugbe evaọ oghẹrẹ nọ a rẹ rọ whọku emọ rai gbe epanọ a rẹ rọ rẹrote esẹgbini rai nọ e kpako no. A rẹ kuvẹ hẹ re ebẹbẹ i fi ẹhẹriẹ họ udevie rai. Ẹkwoma efihiruo ehrẹ Ebaibol, a rẹ sai ku ebẹbẹ buobu họ, thihakọ enọ a sai kuhọ họ, a vẹ rọ evawere rria kugbe.—1 Kọr. 7:10, 11.
17. “Eware akpọ na” vẹ enọ e rọo no a rẹ ruawa rai?
17 Pọl ọ jọ 1 Ahwo Kọrint 7:32-34 fodẹ oware ofa nọ o rẹ sae via evaọ orọo. (Sei.) Enọ e rọo no a “rẹ ruawa eware akpọ na,” wọhọ emuore, emuẹgọ, oria nọ a rẹ rria, gbe eware efa nọ e rrọ eware abọ-ẹzi hi. Fikieme? Oniọvo-ọmọzae nọ ọ re rọo ho ọ rẹ sae raha oke ziezi evaọ odibọgba na. Rekọ nọ ọ jẹ rọo no, ọ vẹ raha oke yena jọ rọ rẹrote aye riẹ re o ru ei eva were. Epọvo na o rrọ kẹ aye na re. Jihova ọ riẹ nọ enẹ o rrọ. Ọ riẹ nọ re orọo o sae kparobọ, ọzae avọ aye na a rẹ raha oke jọ nọ a jẹ raha fihọ egagọ Riẹ vẹre rọ kẹ ohwohwo.
18. Inwene vẹ u fo nọ otujọ a re ru nọ a tẹ rọo no?
18 Rekọ ẹme na ọ jọ etenẹ kuhọ họ. Otẹrọnọ enọ e rọo no a rẹ rehọ oke jọ no egagọ Ọghẹnẹ ze rọ rẹrote ohwohwo, a re ru epọvo na kpahe oke nọ a jẹ hai ro ru eware efa. Ẹvẹ o rẹ jọ aye oma otẹrọnọ ọzae riẹ ọ be raha oke buobu kugbe egbẹnyusu nọ o wo? Aye na ọ rẹ sae jọ goli, jọ ababọ evawere, je tube roro nọ ọzae na o you rie he. Epọvo na o rẹ jọ kẹ ọzae otẹrọnọ aye riẹ ọ rẹ raha enwenọ oke riẹ kpobi kugbe egbẹnyusu riẹ. Ezae avọ eyae a rẹ sae whaha onana otẹrọnọ a rẹ dawo ẹgba rai kpobi re a ru orọo rai ga.—Ẹf. 5:31.
Jihova Ọ Gwọlọ nọ Ma rẹ Jọ Fuafo Evaọ Uruemu
19, 20. (a) Fikieme orọo o gbẹ whaha ọfariẹ-ogbe he? (b) Ẹbẹbẹ vẹ ọ rẹ sai noi ze otẹrọnọ erivẹ-orọo a hẹrioma no ohwohwo evaọ oke krẹkri?
19 Idibo Jihova a gba riẹ mu inọ a rẹ jọ fuafo evaọ uruemu. Otujọ a jẹ iroro nọ a rẹ rọo re a sae whaha ọfariẹ-ogbe. Rekọ, orọo o rẹ whaha ọfariẹ-ogbe he. Evaọ oke anwae, okpẹwho nọ a di ogba wariẹ họ o rẹ thọ ohwo otẹrọnọ ohwo na ọ daji okpẹwho na. Nọ ohwo ọ tẹ ruọ otafe okpẹwho na nọ o je kie ruọ abọ igbulegbu, a rẹ sai tho eware mi ei je tube kpei no dede. Epọvo na re, enọ e rọo no a rẹ sae whaha ọfariẹ-ogbe otẹrọnọ a tẹrovi ọrivẹ-orọo rai ọvo, wọhọ epanọ Ọghẹnẹ o juzi riẹ.
20 Pọl ọ fodẹ izi nana eva 1 Ahwo Kọrint 7:2-5. Aye na o rẹro nọ ọye ọvo ọzae riẹ o re rri; yọ ere ọzae na ọ gwọlọ mi aye riẹ re. Rekọ, ezae gbe eyae jọ a re kpohọ erẹ hayo iruo siọ erivẹ-orọo rai ba oke krẹkri, a vẹ rọ ere gbabọkẹ erivẹ-orọo rai. Dai roro kpahe idhọvẹ nọ i re noi ze otẹrọnọ “fiki ababọ oma-ogba,” ọrivẹ-orọo na jọ o te kie ruọ ẹta Setan je bruẹnwae. Jihova ọ rẹ ghale enọ i wuzou iviuwou nọ e be rẹrote ewha-iruo rai evaọ uviuwou na ababọ orọo rai nọ a re fihọ ọza.—Ol. 37:25.
Irere nọ I re Noi Ze nọ Ma te Lele Ehrẹ Ebaibol
21. (a) Fikieme o rọ rrọ bẹbẹ re a jẹ iroro kpahe orọo gbe seba-ẹrọo? (b) Fikieme ohrẹ nọ o rrọ 1 Ahwo Kọrint uzou avọ 7 na u ro wuzou?
21 O rrọ bẹbẹ re ohwo ọ jẹ iroro na sọ ọ rẹ rọo hayo ọ rẹ rọo ho. Ahwo-akpọ kpobi a gba ha, oye jabọ nọ ma be hai ro wo ẹbẹbẹ kugbe amọfa na. Fikiere makọ idibo Jihova dede, te enọ e rọo ho hayo enọ e rọo no, a rẹ sai wo ẹbẹbẹ. Nọ who te lele ohrẹ nọ o rrọ 1 Ahwo Kọrint uzou avọ 7 na, whọ rẹ sae whaha ebẹbẹ yena buobu. Te whọ rọo hayo whọ rọo ho, Jihova o rri owhẹ wọhọ ọnọ ọ “riẹ ru.” (Se 1 Ahwo Kọrint 7:37, 38.) Re who wo ọjẹrehọ Ọghẹnẹ họ utee nọ o mae rro nọ whọ rẹ sai le t’obọ. Avọ ọjẹrehọ riẹ, who ti wo uzuazọ evaọ akpọ ọkpokpọ na. Evaọ oke yena, ahwo a gbe ti wo ebẹbẹ nọ e da oria kpobi fia nẹnẹ na ha.
[Oruvẹ-obotọ]
^ edhe-ẹme 14 Rri Edidi Evawere Uviuwou uzou avọ 2, edhe-ẹme avọ 16-19.
Kọ Whọ Sae k’Uyo?
• Fikieme ma gbe ro kpokpo oniọvo jọ họ inọ o te kẹ orọo no?
• Ẹvẹ whọ sae rọ rehọ oke ra ru iruo ziezi evaọ egagọ Jihova nọ whọ re rọo ho na?
• Ẹvẹ Ileleikristi nọ e be nyusu orọo a sae rọ ruẹrẹ oma kpahe kẹ ebẹbẹ nọ orọo o rẹ wha ze?
• Fikieme orọo o gbẹ rọ whaha ọfariẹ-ogbe he?
[Enọ Uwuhrẹ]
[Uwoho nọ o rrọ ẹwẹ-obe avọ 14]
Ileleikristi nọ e rọo ho nọ e be rehọ oke rai ru iruo ziezi evaọ odibọgba na a re wo oghọghọ
[Uwoho nọ o rrọ ẹwẹ-obe avọ 16]
Inwene vẹ otujọ a rẹ sai ru nọ a tẹ rọo no?
