Enọ Ahwo nọ A s’Ebe

Eme me re ru otẹrọnọ me wo onọ kpahe oware jọ nọ me se evaọ Ebaibol hayo nọ mẹ tẹ gwọlọ ohrẹ kpahe ẹbẹbẹ jọ?

Obe Itẹ 2:1-5 o tuduhọ omai awọ inọ ma ‘hae gwọlọ’ areghẹ gbe otoriẹ wọhọ ẹsenọ ma be gwọlọ “efe nọ a sino.” Onana u dhesẹ inọ ma rẹ daoma ru ekiakiẹ re ma ruẹ iyo kẹ enọ Ebaibol nọ ma wo re ma jẹ ruẹ eme nọ i re fi obọ họ k’omai ku ebẹbẹ mai họ. Ẹvẹ ma sai ro ru ere?

Obe na Wo Erere no Ewuhrẹ ọ Isukulu Odibọgba Esuo-Ọghẹnẹ Ze, ẹwẹ-obe avọ 33 rite 38 u dhesẹ “Epanọ A re Ro Ru Ekiakiẹ” evaọ ebe ‘ọrigbo nọ o wo ẹrọwọ avọ areghẹ na.’ (Mat. 24:45) Ẹwẹ-obe avọ 36 ọ fodẹ epanọ a rẹ rọ Watch Tower Publications Index ru iruo gbe epanọ a rọ ghale obe nana fihọ abava: abọjọ o ta kpahe izoeme sa-sa, abọ odekọ o fodẹ eria ikereakere gbe ebe nọ i ru eria Ikereakere yena vẹ. Onana u re fi obọ họ kẹ ohwo riẹ obe nọ ọ sae jọ se kpahe ugogo ẹme hayo owọ Ebaibol nọ ọ gwọlọ. Wo odiri nọ whọ be kiẹ kpahe uyo hayo ọkpọvio nọ whọ gwọlọ na. Kareghẹhọ inọ whọ be gwọlọ “efe nọ a sino,” onọ o rẹ rehọ oke gbe omodawọ.

Eme jọ hayo eria Ebaibol jọ e riẹ nọ ebe mai i ri dhunu te he. Yọ o tẹ make rọnọ ma jọ obe mai jọ ta kpahe oria Ebaibol jọ, ẹsejọhọ ma dhunu te uzedhe onọ nọ o rrọ owhẹ udu na ha. Ofariẹ, ahwo a rẹ sai wo onọ kpahe oria Ebaibol jọ keme oria na u gbiku na totọ họ. Fikiere, ma rẹ sae ruẹ uyo onọ kpobi nọ o rẹ roma via ha. Otẹrọ ere, ma rẹ kuyo oware nọ u mu omai ẹro ho ho, ma te ru ere kiyọ ma be ta eme nọ e rẹ ‘kpare iroro je brobọno uvi uwuhrẹ nọ o rọ eva ẹrọwọ na.’ (1 Tim. 1:4; 2 Tim. 2:23; Tait. 3:9) Ohwo jọ ọ tẹ nọ onọ nọ a re jọ ebe mai dhunu te he, uwou ogha hayo oria-uzou ukoko na o rẹ sae kpahe ẹme fihọ onọ utioye na ha. Eme nọ ma gwọlọ nọ e rẹ sae kpọ omai evaọ uzuazọ e rrọ Ebaibol na, rekọ Ebaibol o dhunu te eme jọ họ re ma sai dhesẹ inọ ma wo ẹrọwọ ọgaga fihọ Jihova, ọnọ a rọ ẹkwoma ẹzi riẹ kere Ebaibol na.—Rri ẹwẹ-obe avọ 185 rite 187 ọrọ obe na Si Kẹle Jihova.

Rekọ ẹvẹ otẹrọnọ whọ daoma bẹ no re whọ kiẹ kpahe ẹme jọ nọ ọ be k’owhẹ uye rekọ whọ re ruẹ uvumọ obe nọ o ta kpahe ẹme na ha? Whọ sae ta ẹbẹbẹ ra na kẹ oniọvo jọ nọ ọ kpako ziezi evaọ abọ-ẹzi hayo ọkpako ukoko jọ. Inievo nana a wo eriariẹ Ebaibol ziezi, a tẹ jẹ riẹ uzuazọ nọ u fo nọ Oleleikristi o re yeri. Obufihọ rai u ti kiehọ maero nọ whọ tẹ gwọlọ ohrẹ kpahe ẹbẹbẹ jọ keme a riẹ owhẹ gbe ebẹbẹ nọ whọ be rẹriẹ ovao ku. Hae lẹ ẹsikpobi se Jihova kpahe eware nọ e rrọ owhẹ oja, jẹ yare iẹe re ọ rehọ ẹzi ọfuafo riẹ kpọ iroro ra, “keme ỌNOWO na ọ rẹ kẹ areghẹ . . . gbe otoriẹ.”—Itẹ 2:6; Luk 11:13.