Fievahọ Jihova, “Ọghẹnẹ Omosasọ Kpobi”

“Arọ ujiro kẹ Ọghẹnẹ jegbe Ọsẹ Ọnowo mai Jesu Kristi, Ọsẹ ohrọ kpobi jegbe Ọghẹnẹ omosasọ kpobi.”—2 KỌR. 1:3.

1. Eme ohwo-akpọ kpobi ọ gwọlọ?

NO EMAHA ze ma rọ gwọlọ omosasọ. Nọ ọmọboba ọ tẹ gwọlọ omosasọ, o ve muhọ ẹviẹ. Ẹsejọhọ ọ gwọlọ nọ a wọe hayo ohọo u bi kpei. Ma tẹ maki te ahwo no, ma gbẹ gwọlọ omosasọ ghele. O mae rrọ ere nọ ma tẹ rẹriẹ ovao dhe ebẹbẹ.

2. Imuẹro vẹ Jihova ọ kẹ inọ ọ te sasa enọ i fievahọ iẹe oma?

² Ẹsibuobu ahwo uviuwou gbe egbẹnyusu mai a rẹ sae kẹ omai omosasọ. Rekọ, ẹsejọ ma rẹ rẹriẹ ovao dhe ebẹbẹ nọ ohwo-akpọ ọvo ọ sai kuhọ họ. Oghẹrẹ kpobi nọ ebẹbẹ mai e rẹ ga te kẹhẹ, Ọghẹnẹ ọvo ọ rẹ sae kẹ omai omosasọ. Ebaibol na ọ kẹ omai imuẹro inọ: “ỌNOWO na ọ kẹle enọ i bo se ei kpobi . . . o ve je yo oviẹ rai.” (Ol. 145:18, 19) Ẹhẹ, “ibiaro ỌNOWO i bi ri ikiẹrẹe, ezọ riẹ i bi yo eviẹ rai.” (Ol. 34:15) Rekọ re Ọghẹnẹ ọ sae thọ omai jẹ sasa omai oma, ma re fievahọ iẹe. Devidi ọso-ilezi na o ru onana vẹ nọ ọ ta nọ: “ỌNOWO họ oria omofọwẹ rọ kẹ enọ a re kienyẹ; oria adhẹzọ eva oke uye. O Ọnowo, enọ e riẹ odẹ ra e rọ ẹroso owhẹ; whọ sae se ae ba ha, enọ e rọ owhẹ ẹgwọlọ.”—Ol. 9:9, 10.

3. Ẹvẹ Jesu o ro dhesẹ nọ Jihova o you ahwo riẹ?

³ Idibo Jihova a rrọ ghaghae kẹe. Jesu o ru onana vẹ nọ ọ ta nọ: “A be zẹ emevra isoi ikọpa ivẹ hẹ? Ae ọvuọvo ọ thọrọ ẹro eva aro Ọghẹnẹ hẹ. Rekọ makọ eto uzou rai dede a kele i rai. Wha dhozọ họ; wha ghare vi emevra buobu.” (Luk 12:6, 7) Jihova ọ rọ ẹkwoma Jerimaya ọruẹaro na ta kẹ emọ Izrẹl nọ: “Mẹ rehọ uyoyou ebẹdẹ bẹdẹ mẹ ro you owhẹ, fikiere mẹ tẹ ruẹrẹ abọ họ oruọzewọ mẹ kẹ owhẹ.”—Jeri. 31:3.

4. Fikieme ma sai ro fievahọ eyaa Jihova?

⁴ Ma rẹ sai wo omosasọ evaọ oke obẹbẹ nọ ma te fievahọ Jihova gbe eyaa riẹ. Fikiere, u fo re ma fievahọ Ọghẹnẹ wọhọ epanọ Joshua o ru nọ ọ ta nọ: “Eware iwoma kpobi nọ ỌNOWO na Ọghẹnẹ rai ọ yeya kẹ owhai na o ru rai gba re, ovo u fi rie abọ kie he; ai kpobi i ru gba re.” (Jos. 23:14) Ofariẹ, ma tẹ make be ruẹ uye fiki ebẹbẹ evaọ obọnana, u re mu omai ẹro inọ, ‘Ọghẹnẹ ọ vọ avọ ọtẹruo,’ ọ te siọ idibo ẹrọwọ riẹ ba ha.—Se 1 Ahwo Kọrint 10:13.

5. Ẹvẹ o rọ lọhọ re ma sasa amọfa oma?

⁵ Pọl ukọ na ọ ta nọ Jihova yọ “Ọghẹnẹ omosasọ kpobi.” Re a “sasa ohwo oma” u dhesẹ epanọ a re ru udu ohwo nọ ọ rrọ uweri ghọghọ. A rẹ sai ru onana ẹkwoma ọbọga nọ a rẹ kẹ ọnọ o wo idhọvẹ. Ere Jihova o re ru. (Se 2 Ahwo Kọrint 1:3, 4.) Uvumọ oware hayo ohwo ọ rẹ sae da Ọsẹ obọ odhiwu mai ji hi, fikiere o re ru oware kpobi nọ u fo re ọ sae rọ omosasọ kẹ enọ i you rie. Onana o vẹ wọ omai rọ omosasọ kẹ ibe eg’Ọghẹnẹ mai nọ “erọ eva uye  kpobi.” Ma rẹ sai ru ere “fiki omosasọ nọ mai oma mai a jọ obọ Ọghẹnẹ wo.” Ohwo ọvo nọ ọ rẹ sae sasa omai oma wọhọ Jihova ọ rrọ họ!

Epanọ Ma Sai ro Thihakọ Ebẹbẹ

6. Fodẹ eware nọ e rẹ sae wha idhọvẹ ze.

⁶ Ma jọ iyero buobu evaọ uzuazọ gwọlọ omosasọ. Oware jọ nọ ọ rẹ mae wha ọkora se omai họ uwhu ohwo nọ ma you, maero kọ ọrivẹ-orọo hayo ọmọ mai. Ohwo ọ rẹ sae jẹ gwọlọ omosasọ nọ ọ tẹ be reoja omukpahọ. Ẹyao, owho, uvuhu, ebẹbẹ evaọ orọo, hayo eware idhọvẹ nọ e rrọ akpọ na via e rẹ sai ru nọ ohwo ọ jẹ gwọlọ omosasọ.

7. (a) Evaọ otọ uyero obẹbẹ, oghẹrẹ omosasọ vẹ ma rẹ gwọlọ? (b) Eme Jihova o re ru kpahe udu nọ ebẹbẹ e “nwẹ”?

⁷ Evaọ etoke uye, ma rẹ gwọlọ omosasọ re udu gbe iroro mai i kievi, re ma je wo ọbọga ugboma gbe ọrọ abọ-ẹzi. Wọhọ oriruo, roro kpahe udu na. Ebaibol na ọ ta nọ ebẹbẹ e rẹ sae “nwẹ” udu mai. (Ol. 34:18) Jihova ọ rẹ rẹrote ahwo nọ a rrọ otọ iyero itieye keme o re “siwi enọ eva rai e raha, ọ [vẹ jẹ] gba emela rai.” (Ol. 147:3) Udu o tẹ maki no omai awọ, nọ ma tẹ lẹ se Ọghẹnẹ je koko izi riẹ, ọ rẹ k’omai omosasọ evaọ otọ uyero obẹbẹ.—Se 1 Jọn 3:19-22; 5:14, 15.

8. Otẹrọnọ ma wo idhọvẹ iroro, ẹvẹ Jihova ọ sai ro fi obọ họ k’omai?

⁸Iroro mai e gwọlọ omosasọ ẹsikpobi keme ebẹbẹ buobu e rẹ sae wha idhọvẹ se omai. Ababọ avro, ma sae rehọ ẹgba obọ mai thihakọ ebẹbẹ itieye na ha. Oye jabọ nọ ọso-ilezi na ọ rọ so nọ: “Okenọ iroro ibuobu e vọ omẹ eva, evaewerọ ra e tẹ sasa ẹzi mẹ.” (Ol. 94:19) Ofariẹ, Pọl o kere nọ: “Wha ruawa oware ovo ho; rekọ eva koware koware rọ olẹ gbe olẹ-ayare, te uyere-okẹ he ro ruẹ, nọ iyei epanọ whọ guọlọ kẹ Ọghẹnẹ. Re udhedhẹ Ọghẹnẹ nọ uvi eriariẹ kpobi, ote yọrọ eva gbe iroro rai eva Kristi Jesu.” (Fil. 4:6, 7) Ma tẹ be hai se Ebaibol na je roro didi kpahe eware nọ ma se, ma te sai thihakọ idhọvẹ iroro.—2 Tim. 3:15-17.

9. Ẹvẹ ma sai ro thihakọ idhọvẹ iroro?

⁹ Ẹsejọ udu u re whrehe omai te epanọ iroro ethọthọ e sae rọ ruọ omai eva. Ẹsejọhọ ma wo owha-iruo jọ evaọ ukoko na nọ ma roro nọ ma sae rẹrote he. Jihova ọ sae jẹ kẹ omai omosasọ je fi obọ họ kẹ omai evaọ onana re. Wọhọ oriruo: Nọ Jihova ọ rehọ Joshua mu re o su emọ Izrẹl nya ekwotọ ewegrẹ rai vrẹ, Mosis ọ ta kẹ ae nọ: “Wha wo ogaga avọ emamọ aruọwha, wha dhozọ họ hayo ọwhọ rai o mu owhai hi: keme ỌNOWO na Ọghẹnẹ rai ọ rẹ te jọ kugbe owhai; o re ti ru owhai kie he hayo ọ rẹ sia owhai gbe he.” (Izie. 31:6) Avọ uketha Jihova, Joshua o su emọ Izrẹl ruọ Ẹkwotọ Eyaa na je fi ewegrẹ rai kpobi kparobọ. Evaọ okenọ u kpemu, Jihova ọ tha Mosis uke re evaọ Abade Ọwawae na.—Ọny. 14:13, 14, 29-31.

10. Nọ idhọvẹ i te kpomahọ ugboma mai, eme ọ rẹ sai fi obọ họ kẹ omai?

¹⁰ Ikpehre eware nọ e be via e rẹ sai kpomahọ ugboma mai. Uzẹme riẹ họ, ma tẹ be re emamọ emu, serihọ ziezi, kpohọ aruọzaha ẹsejọ je ru oma mai fuafo u re fi obọ họ k’omai. Ma te je bi roro kpahe oware nọ Ebaibol ọ ta kpahe obaro u re je fi obọ họ k’omai. Fikiere, nọ ma tẹ rẹriẹ ovao dhe ebẹbẹ jọ u re je fi obọ họ nọ ma te roro kpahe eware nọ e via kẹ Pọl gbe eme uduotahawọ riẹ inọ: “A bi kpokpo mai eva kabọ kabọ, yọ a sai kpe omai hi; a bi reghe omai,  dede oma o rọ omai hi; a kẹ uye, dede ma seba ha, ẹtehikie; dede yọ a sai kpe he.”—2 Kọr. 4:8, 9.

11. Eme ma re ru otẹrọnọ ẹbẹbẹ jọ o bi kpomahọ edikihẹ abọ-ezi mai?

¹¹ Ebẹbẹ jọ e rẹ sai kpomahọ edikihẹ abọ-ezi mai. Jihova ọ rẹ sae dhogbo bru omai ze evaọ onana re. Ebaibol ọ kẹ omai imuẹro nọ: “ỌNOWO na ọ be yọrọ enọ i re kie, ọ vẹ jẹ kpare enọ e rọ oma kpotọ.” (Ol. 145:14) Nọ eware jọ i te bi kpomahọ edikihẹ abọ-ezi mai, u fo re ma nya bru ekpako ukoko kẹ obufihọ. (Jem. 5:14, 15) Yọ ma tẹ be hai roro kpahe ẹruore uzuazọ ebẹdẹ bẹdẹ na u re fi obọ họ kẹ omai thihakọ ebẹbẹ.—Jọn 17:3.

Iriruo Ahwo Jọ nọ Ọghẹnẹ Ọ Kẹ Omosasa

12. Dhesẹ oghẹrẹ nọ Jihova ọ rọ kẹ Abraham omosasọ.

¹² Ọso-ilezi jọ o kere nọ: “Ru odibo ra ọ kareghẹhọ eme ra, onọ me je wo ẹruore. Onana họ o nọ o rẹ sasa omẹ oma eva uye mẹ, nọ eya ra e kẹ omẹ uzuazọ.” (Ol. 119:49, 50) Nẹnẹ ma rẹ jọ Ebaibol na ruẹ iriruo ahwo buobu nọ Ọghẹnẹ ọ kẹ omosasa. Wọhọ oriruo, o kẹ Abraham uye nọ ọ riẹ inọ Jihova ọ gwọlọ raha Sọdọm avọ Gomora. Abraham ọ tẹ nọ Ọghẹnẹ nọ: “[Whọ] rẹ te ghinẹ raha ikiẹrẹe na kugbe iru-umuomu?” Jihova ọ kẹ Abraham imuẹro nọ otẹrọnọ ọ rẹ ruẹ ahwo 50 nọ i kiẹrẹe, ọ rẹ raha ẹwho Sọdọm ho. Abraham ọ wariẹ nọ Jihova isiasoi efa inọ: Kọ otẹrọnọ ahwo okiẹrẹe 45 ọvo a riẹe? Kọ otẹrọnọ 40? Kọ otẹrọnọ 30? Kọ otẹrọnọ 20? Kọ otẹrọnọ 10? Jihova o thihakọ evaọ etoke enọ nọ Abraham ọ nọ riẹ na kpobi jẹ kẹe imuẹro inọ otẹrọnọ ọ ruẹ ahwo okiẹrẹe nọ i bu tere, ọ te raha Sọdọm ho. Dede nọ ahwo okiẹrẹe nọ e jọ ewho na a bu te imakpe he, Jihova o siwi Lọt avọ emetẹ riẹ.—Emu. 18:22-32; 19:15, 16, 26.

13. Ẹvẹ Hana o ro dhesẹ nọ o fievahọ Jihova?

¹³Hana aye Ẹlkena ọ jẹ gwọlọ ọmọ gaga. Rekọ ọ jọ ọga, yọ onana o jọ idhọvẹ kẹe. Ọ lẹ se Jihova kpahe onana, Ilai Ozerẹ Okpehru na ọ tẹ ta kẹe nọ, jọ “Ọghẹnẹ Izrẹl ọ kẹ owhẹ ayare ra.” Onana o kẹ Hana omosasọ, “o gbe mu ovao họ ofa ha.” (1 Sam. 1:8, 17, 18) Hana o  fievahọ Jihova, je vu eware kpobi wa kẹe. Dede nọ Hana ọ riẹ oware nọ u ti noi ze he, o wo udhedhẹ iroro. Ukuhọ riẹ, Jihova ọ tẹ k’uyo olẹ riẹ. O dihọ, o te yẹ ọmọzae nọ o se odẹ riẹ Samuẹle.—1 Sam. 1:20.

14. Fikieme Devidi ọ rọ gwọlọ omosasọ, kọ ono o bo se?

¹⁴Devidi ovie Izrẹl yọ omọfa nọ Jihova ọ kẹ omosasọ. Nọ o rọnọ “obọ eva” ohwo Jihova o re riwi na, okenọ ọ salọ Devidi re ọ jọ ovie Izrẹl, ọ riẹ nọ Devidi yọ ohwo nọ ọ roma kẹ egagọ riẹ. (1 Sam. 16:7; 2 Sam. 5:10) Uwhremu na, Devidi o bruẹnwae kugbe Batshẹba, kẹsena o te kpe ọzae aye na re ọ ruẹse ko umuomu na dhere. Rekọ nọ Devidi ọ te riẹ epanọ umuomu riẹ na o gbẹdẹ te, ọ tẹ lẹ se Jihova nọ: “Epanọ ehrọ ibuobu ra e rọ; rehọ ere si iruthọ mẹ kpobi no. Fa imuemu mẹ no, re who ru omẹ fo u no izieraha mẹ. Keme mẹ riẹ iruthọ mẹ, jegbe uzioraha mẹ o rọ aro mẹ ẹsikpobi.” (Ol. 51:1-3) Devidi o gine kurẹriẹ no eva ze, yọ Jihova ọ rọ vrẹ riẹ. Ghele na Devidi ọ ruẹ uye ebẹbẹ nọ i no umuomu riẹ na ze. (2 Sam. 12:9-12) Rekọ ohrọ-oriọ Jihova o jọ omosasọ kẹ Devidi.

15. Didi obufihọ Jihova ọ kẹ Jesu taure a te ti kpei?

¹⁵ Okenọ Jesu ọ jọ otọakpọ, ọ rẹriẹ ovao dhe ebẹbẹ. Ọghẹnẹ ọ kuvẹ kẹ ebẹbẹ nana, rekọ Jesu o kru ẹgbakiete riẹ. Ọ jọ ohwo ọgbagba nọ o fievahọ Jihova ẹsikpobi je yoẹme kẹe. Kẹle okenọ a ro viviei je kpei, Jesu ọ lẹ se Jihova nọ: “Orọ eva mẹ hẹ, rekọ orọ eva ra, a re ruẹ.” Ukọ-odhiwu jọ o te bru Jesu ze jẹ bọe ga. (Luk 22:42, 43) Ọghẹnẹ ọ kẹ Jesu omosasọ, ẹgba, gbe uketha nọ ọ gwọlọ evaọ oke yena.

16. Otẹrọnọ ma rẹriẹ ovao dhe uwhu fiki ẹgbakiete mai, didi obufihọ Ọghẹnẹ ọ rẹ kẹ?

¹⁶ O tẹ make rọnọ mai Ileleikristi ma rẹriẹ ovao dhe uwhu fiki ẹrọwọ mai, Jihova o ti fi obọ họ k’omai kru ẹgbakiete mai. Ofariẹ, ẹruore ẹkparomatha na ọ be k’omai omosasọ. Yọ ma bi rẹro okenọ a ti si uwhu nọ o rrọ “ọwegrẹ urere” na no. (1 Kọr. 15:26) Idibo Ọghẹnẹ nọ i whu no, gbe amọfa, a rrọ ekareghẹhọ Jihova, yọ a te kpare ae ze. (Jọn 5:28, 29; Iruẹru 24:15) Eva nọ ma fihọ eyaa Jihova erọ ẹkparomatha na e rẹ kẹ omai omosasọ gbe ẹruore evaọ etoke ukpokpoma.

17. Ẹvẹ Jihova ọ sae rọ sasa omai oma nọ ohwo nọ ma you o te whu?

¹⁷ O rrọ oware omosasọ gaga inọ a te kpare iyoyou mai nọ i whu no zihe ziọ uzuazọ, a vẹ te rria akpọ ọkpokpọ nọ ọ kare ebẹbẹ nọ e rrọ akpọ na nẹnẹ na. “Otu obuobu” nọ e te zọ ruọ akpọ ọkpokpọ na a ti wo uvẹ-ọghọ nọ a ti ro dede enọ a te kpare ziọ uzuazọ na, a ve je wuhrẹ ai.—Evia. 7:9, 10.

Ọghẹnẹ Ọ be rọ Abọ Riẹ Thọ Omai

18, 19. Ẹvẹ idibo Ọghẹnẹ a ro wo omosasọ no evaọ oke ukpokpoma?

¹⁸ Evaọ obọdẹ ole jọ nọ Mosis ọ so, ọ kẹ emọ Izrẹl imuẹro inọ: “Ọghẹnẹ nọ ọ rẹ jọ bẹdẹ bẹdẹ họ oria ẹria ra, jegbe evaọ obọ otọ abọ riẹ nọ o wo urere he.” (Izie. 33:27) Nọ ikpe buobu e vrẹ no, Samuẹle  ọruẹaro na ọ ta kẹ emọ Izrẹl nọ: “Wha siọ ỌNOWO na ba e lele he, rekọ wha rọ eva rai kpobi gọ ỌNOWO na. . . . ỌNOWO na ọ sai ku ahwo riẹ fiẹ hẹ, fiki odẹ ulogbo riẹ na.” (1 Sam. 12:20-22) Nọ ma tẹ be gọ Jihova no udu ze, ọ te se omai ba ha. Ọ te kẹ omai uketha nọ ma gwọlọ.

¹⁹ Ọghẹnẹ o bi fi obọ họ kẹ ahwo riẹ jẹ be kẹ ae omosasọ evaọ edẹ urere ebẹbẹ nana. O vrẹ ikpe-udhusoi no nọ a bi ro kpokpo inievo mai evaọ eria sa-sa je bi fi ai họ uwou-odi fikinọ a be gọ Jihova. Eware nọ a rọ ẹro ruẹ no i dhesẹ inọ Jihova ọ rẹ ginẹ sasa idibo riẹ oma evaọ oke edawọ. Wọhọ oriruo, evaọ ofẹ obọ Russia a fi oniọvo-ọmọzae jọ họ uwou-odi ikpe 23 fiki ẹrọwọ riẹ. Ghele na, a rọ oghẹrẹ jọ whariẹ emu abọ-ẹzi sei re ọ sai gbe kru ẹrọwọ riẹ je wo omosasọ. Oniọvo na ọ ta nọ: “Evaọ ikpe yena kpobi, me fievahọ Jihova, yọ ọ k’omẹ ẹgba.”—Se 1 Pita 5:6, 7.

20. Fikieme o sai ro mu omai ẹro inọ Jihova ọ te se omai ba ha?

²⁰ Makọ ebẹbẹ nọ ma te gbẹ rẹriẹ ovao dhe kẹhẹ, joma kareghẹhọ eme omosasọ ọso-ilezi na inọ: “ỌNOWO ọ rẹ sia ahwo riẹ hẹ.” (Ol. 94:14) Dede nọ ma gwọlọ omosasọ, ma wo uvẹ-ọghọ nọ ma rẹ rọ sasa amọfa oma. Evaọ uzoẹme nọ o rrọ aro na, ma te ruẹ epanọ ma rẹ sae rọ sasa enọ e rrọ uweri oma evaọ akpọ idabolo nana.

Ẹvẹ Whọ te k’Uyo?

• Eware jọ vẹ e rẹ sae wha idhọvẹ se omai?

• Ẹvẹ Jihova ọ be rọ sasa idibo riẹ oma?

• Nọ ma tẹ rẹriẹ ovao dhe uwhu, eme ọ rẹ sae sasa omai oma?

[Enọ Uwuhrẹ]

[Ẹkpẹti/​Uwoho nọ o rrọ ẹwẹ-obe avọ 25]

EPANỌ MA SAI RO THIHAKỌ EWARE NỌ I RE KPOMAHỌ . . .

▪ udu mai Ol. 147:3; 1 Jọn 3:19-22; 5:14, 15

▪ iroro mai Ol. 94:19; Fil. 4:6, 7

▪ ugboma mai 2 Kọr. 4:8, 9

▪ edikihẹ abọ-ẹzi mai Ol. 145:14; Jem. 5:14, 15