Joma Ghọghọ Kugbe!

O RRỌ bẹbẹ re a wo evawere nẹnẹ. Rọkẹ ahwo buobu, re a gbiku evawere kugbe amọfa yọ oware nọ o lọhọ tere he. Uzuazọ nọ ahwo a bi yeri enẹna, maero evaọ ikpewho, o be lẹliẹ ahwo ko oma rai dhere je siomano ahwo.

Profẹsọ jọ nọ a re se Alberto Oliverio ọ ta nọ: “Ọkora yọ ẹbẹbẹ nọ ọ rrọ oria kpobi, yọ ababọ avro, oghẹrẹ uzuazọ nọ ahwo a bi yeri evaọ ikpewho o be lẹliẹ ae ko oma rai dhere. Ẹsibuobu, uzuazọ utioye na o rẹ lẹliẹ omai gbolaro kẹ ibe iruiruo mai, erivẹ mai, gbe enọ ma rẹ dẹ eware mi.” Uzuazọ utioye na o rẹ wha ọkora ze.

Rekọ Ileleikristi a re yeri uzuazọ utioye na ha. Pọl ukọ na o kere nọ: “Wha hẹ ghọghọ ẹsikpobi.” (1 Tẹs. 5:16) Ma wo ẹjiroro buobu nọ ma rẹ rọ wereva jẹ ghọghọ kugbe. Ma be gọ Jihova, Ọghẹnẹ Erumeru na; ma wo otoriẹ uzẹme nọ o rrọ Ebaibol na; ma wo ẹruore esiwo gbe uzuazọ ebẹdẹ bẹdẹ; yọ ma rẹ sai fi obọ họ kẹ amọfa wo  eghale nana re.—Ol. 106:4, 5; Jeri. 15:16; Rom 12:12.

A riẹ Ileleikristi wọhọ enọ e rẹ wereva jẹ wha oghọghọ se amọfa. Agbẹta nọ Pọl o ro kere se ahwo Filipai inọ: “Eva rẹ were omẹ, me ve lele owhai kpobi ghọghọ. Ere eva e rẹ were owhai re, wha ve lele omẹ gbẹ ghọghọ.” (Fil. 2:17, 18) Evaọ umutho eme nọ Pọl ọ jọ etenẹ ta na, isiava ọ ta kpahe evawere gbe amọfa nọ a re lele ghọghọ.

Uzẹme, Ileleikristi a rẹ yọroma re a siọ oma ba esino amọfa. Ohwo nọ o siomano amọfa ọ rẹ sae ghọghọ kugbe ibe Ileleikristi riẹ hẹ. Fikiere, ẹvẹ ma sai ro lele uthubro Pọl na re ma lele inievo mai “ghọghọ eva Ọnowo na”?—Fil. 3:1.

Ghọghọ Kugbe Ibe Ileleikristi

Okenọ Pọl o kere ileta se ahwo Filipai, ẹsejọhọ ọ jọ uwou-odi evaọ Rom fiki usiuwoma ota riẹ. (Fil. 1:7; 4:22) Ghele na, dede nọ ọ jọ uwou-odi, o gbe wo ọwhọ usiuwoma ota na. Avọ evawere, ọ rọ utho ẹgba riẹ kpobi gọ Jihova, ọ tẹ jẹ rọwo re a ku ei “wọhọ udi-idhe.” (Fil. 2:17) Uruemu Pọl u dhesẹ inọ ohwo nọ ọ maki wo ẹbẹbẹ ọ rẹ wereva ghele. Dede nọ a fi rie họ uwou-odi, ọ ta nọ: ‘Mẹ rẹ ghọghọ ẹsikpobi.’—Fil. 1:18.

Pọl họ ọnọ ọ rehọ ukoko obọ Filipai na mu, fikiere o you inievo ukoko yena gaga. Ọ riẹ nọ inievo na a te yo kpahe oghọghọ nọ o bi wo evaọ egagọ Jihova, a ti wo uduotahawọ re. Oye jabọ nọ o ro kere nọ: “Mẹ gwọlọ nọ wha riẹ, imoni, nnọ oware nọ o via kẹ omẹ, u ru rọ kẹ ẹnyaharo usiuwoma na. Fikiere a jọ eva eria isuisuẹsu kpobi riẹ onana, jegbe ahwo kpobi a riẹ nọ uwou-odi onya mẹ orọ fiki Kristi.” (Fil. 1:12, 13) Eme ezi nana nọ Pọl ọ ta na yọ edhere jọ nọ ọ rọ wereva jẹ ghọghọ kugbe inievo na. Ababọ avro, inievo obọ Filipai na a ghọghọ kugbe Pọl re. Rekọ re a sae ghọghọ, o gwọlọ nọ udu u re no inievo na awọ họ fiki ebẹbẹ nọ i te Pọl na. Ukpoye, o gwọlọ nọ a rẹ rọ aro kele oriruo riẹ. (Fil. 1:14; 3:17) Ofariẹ, inievo obọ Filipai na a rẹ sai fi Pọl họ olẹ rai, a ve je fi obọ họ kẹe evaọ edhere kpobi nọ a sai ro ru ere.—Fil. 1:19; 4:14-16.

Kọ ma be hae ghọghọ wọhọ Pọl? Kọ ma be tẹrovi abọ owoma ọrọ eware nọ ma be  rẹriẹ ovao ku evaọ uzuazọ gbe odibọgba mai? Nọ ma tẹ rrọ kugbe inievo mai, u fo re ma gbiku evawere kpahe iruo usiuwoma ota na. Orọnikọ ma rẹ hẹrẹ re ma ruẹ ikpeware evaọ odibọgba na re ma te gbiku evawere he. Ẹsejọhọ ma rọ obọdẹ onaa jọ fi obọ họ kẹ ohwo jọ wo isiuru kpahe usiuwoma na. O sae jọnọ ma rọ oria Ebaibol jọ ta usiuwoma ziezi kẹ ohwo jọ. Hayo o sae tubẹ jọnọ ahwo a vuhu omai mu wọhọ Isẹri Jihova, onana o tẹ whae ze nọ a rọ ta ẹme ezi kpahe ukoko na. Iku itieye na nọ ma re gbe kẹ inievo mai yọ edhere jọ nọ ma rẹ rọ ghọghọ kugbe.

Isẹri Jihova buobu a dawo ẹgba rai kpobi no re a ruẹ nọ a wha usiuwoma na te ohwo kpobi oma, yọ a gbe bi ru ere. Ekobaro, esẹro okogho gbe erọ ubrotọ, ahwo uviuwou Ebẹtẹle, imishọnare, gbe idibo ebabọ akpọ-soso a roma kẹ iruo Uvie na oke kpobi yọ a be wereva evaọ ere oruo. Kọ ma be wereva fiki iruo rai jẹ be ghọghọ kugbe ai? Otẹrọ ere, joma dhesẹ kẹ inievo nana, enọ e rrọ “ibe iruiruo [mai] rọkẹ Uvie Ọghẹnẹ” na inọ iruo rai e da omai ẹro. (Kọl. 4:11) Ma tẹ rrọ kugbe ai evaọ iwuhrẹ ukoko hayo ikokohọ, ma rẹ sae tuduhọ ae awọ. Ma rẹ sae jẹ rọ aro kele ọwhọ rai. Ma re ru “uvẹ” nọ ma rẹ rọ gaviezọ kẹ eme ọbọga rai gbe eware nọ a rọ ẹro ruẹ no nọ ma te zizie ai ziọ uwou mai.—Fil. 4:10.

Ghọghọ Kugbe Enọ E Rẹriẹ Ovao Dhe Ebẹbẹ

Ukpokpoma gbe ebẹbẹ nọ Pọl o thihakọ rai i fi obọ họ kẹe kru ẹrọwọ riẹ te urere. (Kọl. 1:24; Jem. 1:2, 3) Fikinọ Pọl ọ riẹ nọ inievo obọ Filipai na a te rẹriẹ ovao dhe oghẹrẹ ebẹbẹ nọ i te rie na gbe nnọ ithihakọ riẹ o te kẹ ae uduotahawọ, o lẹliẹ e riẹ wereva jẹ ghọghọ kugbe ai. Fikiere o kere nọ: “A rehọ eriẹ kẹ owhai no nọ, fiki Kristi orọnikọ wha rẹ rọ ẹro suẹe ọvo ho, rekọ wha rẹ ruẹ uye fiki riẹ re, wha jọ eva ohọre ovo na, onọ wha ruerẹ, je yo nọ mẹ rọ eva riẹ enẹna.”—Fil. 1:29, 30.

Epọvo na nẹnẹ, a bi kpokpo Ileleikristi fiki usiuwoma ota rai. Ẹsejọ ukpokpoma na o rẹ jọ orọ ozighi, rekọ ẹsibuobu o rẹ jọ orọ ẹghẹ. Ikọ erue a sai gu erue fihọ omai uzou, ahwo uviuwou mai a sai mukpahe omai, enọ ma gbẹ rrọ iruo hayo isukulu a sai se omai ẹkoko. Jesu ọ vẹvẹ omai unu inọ edawọ itienana i re gbe omai unu hu hayo whrehe omai hi. Ukpoye, e rẹ lẹliẹ omai wereva. Ọ ta nọ: “Eva e were owhai nọ ahwo a tẹ la owhai eka, a vẹ kẹ owhai uye, a vẹ ta erue oghẹrẹ eware iyoma kpobi họ uzou rai fiki mẹ. Ghọghọ, eva e were owhai hrọ keme osa rai nọ o rọ obọ odhiwu o rẹ ruaro.”—Mat. 5:11, 12.

Ozọ u re mu omai hi nọ ma te yo nọ a bi kpokpo inievo mai gaga evaọ oria jọ. Ukpoye, ma rẹ ghọghọ inọ a bi thihakọ. Ma rẹ sai fi ai họ olẹ, yare Jihova re o fi obọ họ kẹ ae kru ẹrọwọ rai je thihakọ. (Fil. 1:3, 4) Dede nọ olẹ ọvo ma rẹ sae lẹ roro inievo yena, ma rẹ sai fi obọ họ kẹ inievo nọ uye o be bẹ evaọ ukoko mai. Ma rẹ sai wo ọdawẹ kẹ ae jẹ thae uke. Ma rẹ sai ru uvẹ nọ ma rẹ rọ ghọghọ kugbe ai ẹkwoma inievo nana nọ ma re zizie ziọ Egagọ Uviuwou mai ẹsejọ, usiuwoma nọ ma re lele ai nya, gbe oke nọ ma rẹ raha kugbe ai evaọ aruọzaha jọ.

Ma wo ẹjiroro buobu nọ ma rẹ rọ ghọghọ kugbe. Joma whaha ẹzi akpọ nana ọrọ omasino amọfa re ma hae ghọghọ kugbe inievo mai. Ma te ru ere, ma ti fiba uyoyou gbe okugbe nọ e rrọ ukoko na, ma vẹ jẹ reawere okugbe inievo na vọvọ. (Fil. 2:1, 2) Ẹhẹ, Pọl ọ tuduhọ omai awọ inọ: “Wha hẹ ghọghọ eva Ọnowo na kẹse kẹse.”—Fil. 4:4.

[Uwoho nọ o rrọ ẹwẹ-obe avọ 6]

Akpọ na: Courtesy of Replogle Globes