‘Sasa Ahwo Nọ A Rrọ Uweri Oma’
‘Sasa Ahwo Nọ A Rrọ Uweri Oma’
‘ỌNOWO na o wholo omẹ re mẹ sasa ahwo nọ a rrọ uweri oma.’—AIZ. 61:1, 2.
1. Eme Jesu o ru kẹ enọ e jọ uweri, kọ fikieme?
JESU KRISTI ọ ta nọ: “Emu mẹ họ oreva Ọnọ O vi omẹ ze, jegbe re me ru iruo riẹ.” (Jọn 4:34) Re ọ sai ru iruo nọ Ọghẹnẹ ọ kẹ riẹ gba, Jesu ọ jọ uzuazọ riẹ dhesẹ oghẹrẹ ekwakwa-aghae nọ Ọsẹ riẹ o wo. Usu ekwakwa nana họ uyoyou ulogbo nọ Jihova o wo kẹ ahwo. (1 Jọn 4:7-10) Pọl ukọ na o muẹrohọ edhere jọ nọ Ọghẹnẹ o ro dhesẹ uyoyou nana via nọ ọ ta nọ Jihova yọ “Ọghẹnẹ omosasọ kpobi.” (2 Kọr. 1:3) Jesu o dhesẹ uyoyou utioye nọ o ru oware nọ Aizaya ọ ruẹaro riẹ na. (Se Aizaya 61:1, 2.) Jesu o se eme eruẹaruẹ yena do via evaọ uwou-egagọ ode nọ o jọ obọ Nazarẹt je dhesẹ nọ oma riẹ eme yena e jọ rugba. (Luk 4:16-21) Evaọ etoke odibọgba riẹ kpobi, Jesu ọ rọ edhere uyoyou rehọ omosasọ kẹ enọ e jọ uweri jẹ kẹ ae uduotahawọ gbe ufuoma.
2, 3. Fikieme u ro fo re Ileleikristi a rọ aro kele Jesu evaọ amọfa nọ a rẹ sasa oma?
2 U fo re ilele Jesu kpobi a rọ aro kele oriruo riẹ ẹkwoma omosasọ nọ a rẹ rọ kẹ enọ e rọ uweri. (1 Kọr. 11:1) Pọl ọ ta nọ: “Whai ohwo ọ hẹ wha ohwo udu, ohwo ọ kpare ohwo.” (1 Tẹs. 5:11) O r’oja re ma hae sasa amọfa oma, maero nọ ahwo-akpọ kpobi a rrọ “oke ẹbẹbẹ” na. (2 Tim. 3:1) Ahwo yoma a be rọ eme gbe uruemu rai wha uweri, idhọvẹ, gbe ọkora se ahwo evezi evaọ oria kpobi.
3 Wọhọ epanọ Ebaibol na ọ ruẹaro riẹ, evaọ edẹ urere uyerakpọ omuomu nana, ahwo buobu ‘a bi you oma-obọrai, je you igho, a bi heri-oheri avọ oma-ovia gbe ekaela, a bi yoẹme enọ i yẹ rai hi, a rrọ ababọ uyere-ọghọ gbe ababọ ẹfuọ, a wo eva egaga, a bi koko eya ha, a be raha odẹ ahwo, a wo oma-onyẹ hẹ, avọ ofu-ọkpoo, a bi mukpahe ahwo ezi, otu ovivie, avọ uzou-uveghe, otu okpiroro, enọ i you enu-awere siọ Ọghẹnẹ ba.’ Ekpehre iruemu nana i yoma vi epaọ ọsosuọ no keme ‘ahwo omuomu gbe otu eviẹhọ a no eyoma ruọ onọ o mai yoma no.’—2 Tim. 3:2-4, 13.
4. Ẹvẹ akpọ na ọ rrọ nẹnẹ?
4 Enana kpobi i re gbe omai unu hu keme Ebaibol na ọ ta vevẹ inọ “akpọ na ọsoso ọ rọ obọ ogaga oyoma na.” (1 Jọn 5:19) “Akpọ na ọsoso” u kugbe isuẹsu, egagọ, avọ ekiọthuọ akpọ na gbe idhere nọ Setan ọ be rọ vaha eriwo riẹ. Ababọ avro, Setan Ẹdhọ na họ ọnọ a se “okpohwo akpọ ọnana” gbe “ọghẹnẹ akpọ nana.” (Jọn 14:30; 2 Kọr. 4:4) Eware i bi dhe eyeyoma evaọ akpọ na keme Setan o wo ofu ọgaga, ọ riẹ nọ oke nọ u kiọkọ re Jihova ọ tẹ te raha iẹe no o re kpẹkpẹe. (Evia. 12:12) O rrọ omosasọ gaga nọ ma rọ riẹ nọ Ọghẹnẹ ọ te raha Setan avọ akpọ omuomu riẹ no kẹle, ẹme avro nọ Setan o fihotọ kpahe esuo okpehru Jihova na o ve ti kuhọ.—Emu., uzou avọ 3; Job, uzou avọ 2.
A be Jọ Akpọ na Kpobi Whowho Emamọ Usi na Nẹnẹ
5. Ẹvẹ eruẹaruẹ kpahe usiuwoma ota na u bi ro rugba evaọ edẹ urere nana?
5 Evaọ etoke obẹbẹ nana, ẹme nọ Jesu ọ ta o bi rugba. Ọ ta nọ: “A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi; kẹsena urere u te zi te.” (Mat. 24:14) A be jọ akpọ na kpobi whowho emamọ usi Uvie Ọghẹnẹ nẹnẹ. Isẹri Jihova nọ i bu vi ima ihrẹ gbe idu egba isoi (7,500,000) nọ e rrọ ikoko nọ i bu vi idu udhusoi gbe ihrẹ (107,000) evaọ akpọ na soso a be ta usiuwoma kpahe Uvie Ọghẹnẹ, wọhọ epanọ Jesu o je ru evaọ okenọ ọ jọ otọakpọ. (Mat. 4:17) Iruo usiuwoma ota mai o be wha omosasọ se enọ e rrọ uweri. Evaọ ikpe ivẹ jọ kẹle na, enọ e họ-ame a bu te 570,601!
6. Eme whọ sae ta kpahe epanọ iruo usiuwoma ota na o kẹre te no nẹnẹ?
6 Ohwo ọ rẹ sae ruẹ epanọ iruo usiuwoma ota na o kẹre te no nọ ọ tẹ riẹ nnọ Isẹri Jihova a be fa ebe rai fihọ evẹrẹ nọ i bu vi egba isoi (500). Oware utionana o re via ha anwẹnọ a rọ ma akpọ na. Epanọ abọ ukoko Jihova nọ o rrọ otọakpọ o be nya haro te u gbunu gaga. O gbẹ rrọ ẹzi ọfuafo Ọghẹnẹ hẹ, oware utionana ọ rẹ sae via ha evaọ akpọ nana nọ ọ rrọ otọ esuo Setan na. Fikinọ a bi whowho emamọ usi na nya otọakpọ na kpobi wariẹ, Ikereakere na e be wha omosasọ se inievo mai gbe enọ e rrọ uweri nọ e jẹ usiuwoma Uvie na rehọ.
Sasa Ibe Eg’Ọghẹnẹ Ra Oma
7. (a) Fikieme ma gbe ro rẹro ho inọ Jihova ọ te ko omai dhere no idabolo kpobi? (b) Ẹvẹ ma rọ riẹ inọ o lọhọ re ma thihakọ ukpokpoma gbe idabolo?
7 Evaọ akpọ nana nọ emuemu gbe uye-oruẹ e vọ na, u muẹro inọ ma te nyaku iyero nọ e rẹ sae wha idhọvẹ ze. Bọwo okenọ Ọghẹnẹ ọ te raha uyerakpọ nana, ma sai rẹro ho inọ ọ te ko omai dhere no idabolo kpobi. Obọnana, ma sai rẹro ukpokpoma wọhọ epanọ Ebaibol ọ ruẹaro riẹ na, yọ ma gbẹ yọroma ha, ukpokpoma utioye o rẹ sai ru omai kie no abọ Jihova. (2 Tim. 3:12) Rekọ fiki obufihọ gbe omosasọ Ọsẹ obọ odhiwu mai, ma rẹ sae jọ wọhọ Ileleikristi nọ a rọ ẹzi wholo erọ ukoko Tẹsalonika, enọ i thihakọ ukpokpoma gbe idabolo.—Se 2 Ahwo Tẹsalonika 1:3-5.
8. Imuẹro vẹ e rrọ Ikereakere na inọ Jihova ọ rẹ sasa ahwo riẹ oma?
8 Avro ọ riẹ hẹ inọ Jihova ọ be sasa idibo riẹ oma. Wọhọ oriruo, okenọ Jezibẹl, aye ọgeva na, ọ jẹ gwọlọ Elaeja ọruẹaro na kpe, ozọ u mu ọruẹaro na ọ tẹ dhẹ, tubẹ ta inọ ọ gwọlọ whu. Jihova ọ whọku Elaeja ha, ukpoye ọ sasa Elaeja oma jẹ kẹe aruọwha nọ o re ro ru iruo riẹ gba. (1 Iv. 19:1-21) Oware nọ o via evaọ ukoko Ileleikristi orọ ikpe-udhusoi ọsosuọ na u te je dhesẹ inọ Jihova ọ rẹ sasa ahwo riẹ oma. Wọhọ oriruo, Ebaibol ọ ta nọ evaọ etoke jọ udhedhẹ o ruọ ikoko “soso nọ e rọ evaọ Judia gbe Galili gbe Sameria.” Ofariẹ, nọ a jẹ nya “evaọ ozọ-odhẹ kẹ Ọnowo na, gbe evaọ ogaga Ẹzi Ẹri a te je vihọ.” (Iruẹru 9:31) Eva e be were omai inọ ma wo “ogaga Ẹzi Ẹri” na re.
9. Fikieme ewuhrẹ kpahe Jesu o sae rọ jọ omosasọ kẹ omai?
9 Mai Ileleikristi ma wo omosasọ no ẹkwoma Jesu Kristi nọ ma bi wuhrẹ kpahe gbe oriruo riẹ nọ ma bi lele. Jesu ọ ta nọ: “Whai e ruẹ uye gbe enọ e wha owha ogbẹgbẹdẹ kpobi, wha bru omẹ ze, mẹ rẹ kẹ owhai udhedhẹ. Rehọ owhowha mẹ wha, wha wuhrẹ mi omẹ, keme me re wowolẹ jegbọ eva i ro kpotọ, wha rẹ te ruẹ udhedhẹ kẹ izi rai. Keme owhowha mẹ o rẹ lọlọhọ, owha mẹ u re vovovo.” (Mat. 11:28-30) Ma te wuhrẹ kpahe ẹwo nọ Jesu o je ro yeri kugbe ahwo je lele emamọ oriruo riẹ o ti fi obọ họ gaga si idhọvẹ no uzuazọ mai.
10, 11. Amono a rẹ sae jọ ukoko na kẹ amọfa omosasọ?
10 Ibe Ileleikristi mai a rẹ sae jẹ sasa omai oma. Wọhọ oriruo, roro kpahe epanọ ekpako ukoko a bi ro fi obọ họ kẹ enọ uye o be bẹ. Jemis o kere nọ: ‘Kọ ọjọ ọ be mọ ẹyao abọ-ẹzi evaọ udevie rai? Jọ o se ekpako ukoko na re a lẹ kẹe.’ Eme o ti noi ze? “Olẹ orọwọ u re siwẹ ohwo nọ ọ rẹ mọ; Ọnowo na ọ vẹte kpariẹ tovrẹ; re otẹrọnọ ọ raha izi, o reti wo erọvrẹ.” (Jem. 5:14, 15) Amọfa evaọ ukoko na a rẹ sae kẹ omosasọ re.
11 O rẹ mae lọhọ kẹ eyae na re a lele ibe eyae rai ta ẹme kpahe ebẹbẹ sa-sa. O mae r’oja re eyae nọ e kpako no nọ i wo eriariẹ ziezi a kẹ uvovo eyae emamọ ohrẹ. O sae jọnọ eyae nọ e kpako no na a nyaku oghẹrẹ iyero itieye na no evaọ uzuazọ. Ọdawẹ gbe ẹwo rai e rẹ sai fi obọ họ ziezi. (Se Taitọs 2:3-5.) U te no ere no, ekpako ukoko gbe amọfa a rẹ sae jẹ “ta udu họ enọ udu u re bro awọ.” (1 Tẹs. 5:14, 15) Ma rẹ jẹ kareghẹhọ inọ Ọghẹnẹ ọ be k’omai “omosasọ eva uye mai, re ma ruẹse sasa enọ erọ eva uye kpobi oma.”—2 Kọr. 1:4.
12. Fikieme o rọ r’oja re ma kpohọ iwuhrẹ ukoko?
12 Emamọ edhere jọ nọ ma rẹ sai ro wo omosasọ họ iwuhrẹ nọ ma re kpohọ, oria nọ a rẹ jọ rehọ evuẹ Ebaibol tuduhọ omai awọ. Ebaibol ọ ta inọ Judas avọ Sailas a “rọ eme buobu ta udu họ ahwo na awọ re a ruẹse dikihẹ whawha.” (Iruẹru 15:32) Taure iwuhrẹ i te ti muhọ gbe okenọ e fa no, ma rẹ rọ ẹmeọta bọ ohwohwo ga. Fikiere otẹrọnọ eware jọ e be make wha idhọvẹ se omai, ajọ ma ko oma mai dhere he, keme ere oruo o ti fi obọ họ k’omai hi. (Itẹ 18:1) Ukpoye, u re woma re ma lele ohrẹ Pọl ukọ na: “Jọ mai ohwo o he roro epanọ ọ rẹrọ jaja ọrivẹ riẹ oma, re o wo uyoyou, je ru iruo ezi kpobi, wha hẹ se oma ba e kugbe he, wọhọ epanọ uruemu otu jọ o rọ, rekọ whai ohwo ọ hẹ ta udu họ ohwo awọ, ofa riẹ, wha riẹ nọ ẹdẹ na ọ kẹlino.”—Hib. 10:24, 25.
Wo Omosasọ no Ebaibol Ze
13, 14. Dhesẹ epanọ Ikereakere na e sae rọ sasa omai oma.
13 O tẹ make rọnọ mai yọ Ileleikristi nọ e họ-ame no hayo ma bi wuhrẹ kpahe Ọghẹnẹ gbe ẹjiroro riẹ obọ, Ebaibol ọ rẹ sae kẹ omai omosasọ. Pọl o kere nọ: “Eware kpobi nọ a kere oke anwae, a kere ai rọ kẹ omai ohrẹ, re ma rehọ fiki odiri gbe eri ikereakere na, wo ẹruore.” (Rom 15:4) Ikereakere Efuafo na e rẹ sae kẹ omai omosasọ je ru omai “thomavẹre kẹ iruo iwoma i ruo kpobi.” (2 Tim. 3:16, 17) Ma tẹ riẹ kpahe ẹjiroro Ọghẹnẹ je wo uvi ẹruore, ma ti wo omosasọ. Fikiere, joma rehọ Ẹme Ọghẹnẹ gbe ebe ukoko na ru iruo ziezi, enọ e rẹ sae kẹ omai omosasọ je fi obọ họ kẹ omai evaọ idhere buobu.
14 Jesu o fi emamọ oriruo h’otọ ẹkwoma Ikereakere na nọ o je ro wuhrẹ amọfa jẹ sasa ae oma. Wọhọ oriruo, nọ ọ roma via kẹ ilele ivẹ riẹ jọ evaọ okenọ ọ kparoma ze no, o ‘dhesẹ ikerakere na kẹ ai ziezi.’ Eme nọ ọ ta i duobọte ai udu gaga. (Luk 24:32) Evaọ aruorokele Jesu, Pọl ukọ na ọ rọ Ikereakere na jẹ iroro kugbe ahwo. Ahwo Bẹria nọ ọ ta usiuwoma kẹ a ‘rehọ oghọghọ jẹ ẹme na rehọ, yọ a kiẹ Ikerakere na riwi kẹse kẹse.’ (Iruẹru 17:2, 10, 11) O r’oja gaga re ma se Ebaibol na kẹdẹ kẹdẹ jẹ hai se ebe ukoko na, enọ a nabi kere re e kẹ omai omosasọ gbe ẹruore evaọ oke idabolo nana.
Idhere Efa nọ Ma Sae rọ Sasa Amọfa Oma
15, 16. Eme ma rẹ sai ru ro fi obọ họ kẹ ibe Ileleikristi mai jẹ rọ sasa ae oma?
15 Ma rẹ sai fi obọ họ kẹ ibe Ileleikristi mai evaọ idhere sa-sa, ma vẹ rọ ere sasa ae oma. Wọhọ oriruo, ma rẹ sai kpohọ eki kẹ ibe eg’Ọghẹnẹ mai nọ e kpako no hayo enọ e be mọ. Ma rẹ sai ru eware kẹ amọfa, ma vẹ rọ ere dhesẹ nọ ma wo ọdawẹ kẹ ae. (Fil. 2:4) Ma rẹ sai jiri ibe eg’Ọghẹnẹ mai kẹ uruemu ezi rai, wọhọ uyoyou, aruọwha, gbe ẹrọwọ nọ a bi dhesẹ.
16 Re ma rọ omosasọ kẹ enọ e kpako no, ma rẹ sai weze bru rai ma vẹ jẹ gaviezọ nọ a be ta k’omai kpahe eware nọ a rọ ẹro ruẹ evaọ okenọ u kpemu gbe eghale nọ a jọ ukoko na wo no. Onana o rẹ tubẹ tuduhọ omai awọ jẹ sasa omai oma. Ma rẹ sai se Ebaibol gbe ebe ukoko na kugbe enọ ma weze bru. Ma rẹ sai se oria Uwou-Eroro nọ ma ti wuhrẹ evaọ oka yena hayo oria nọ ma ti wuhrẹ evaọ Uwuhrẹ Ebaibol Ukoko. Ma rẹ sai lele ai rri ividio mai jọ. Ma rẹ sae jẹ jọ ebe mai se iku uduotahawọ jọ hayo ta kpahe iku jọ nọ ma se no.
17, 18. Ẹvẹ o sai ro mu omai ẹro inọ Jihova o ti fi obọ họ k’omai jẹ sasa omai oma?
17 Ma te muẹrohọ inọ ibe Oleleikristi mai jọ ọ gwọlọ omosasọ, ma rẹ sai fi ei họ olẹ. (Rom 15:30; Kọl. 4:12) Nọ ma be daoma thihakọ ebẹbẹ uzuazọ jẹ gwọlọ oghẹrẹ nọ ma rẹ rọ sasa amọfa oma na, ma rẹ sai wo ọkpọ ẹrọwọ gbe imuẹro erọ ọso-ilezi na nọ o kere nọ: “Gbolo owha ra kẹ ỌNOWO na, o re ti fiobọhọ kẹ owhẹ; ọ rẹ rọwa re okiẹrẹe na o kie he.” (Ol. 55:22) Evaọ uzẹme, Jihova ọ te sasa idibo riẹ oma o ve je fi obọ họ kẹ ae.
18 Ọghẹnẹ ọ ta kẹ idibo riẹ evaọ oke anwae nọ: “Mẹ na, mẹ họ ọnọ ọ be sasa owhẹ oma.” (Aiz. 51:12) Jihova o ti ru epọvo na kẹ omai ọ vẹ jẹ ghale omai nọ ma be rọ iruo gbe ẹmeunu mai sasa enọ i bi weri oma na. Makọ mai yọ ikpodhiwu hayo enọ e te rọ otọakpọ na reuku, eme nọ Pọl o kere se ibe Ileleikristi riẹ nọ a rọ ẹzi wholo na e rẹ sasa omai oma: “Enẹna u je Ọnowo mai Jesu Kristi omariẹ, gbe Ọghẹnẹ Ọsẹ mai, ọnọ o you omai ọ jẹ rọ fiki aruoriwo kẹ omai oghọghọ ebẹdẹ bẹdẹ gbe emamọ ẹruore, re ọ sasa eva rai, o je ru owhai ga eva iruo iwoma gbe ẹme owoma.”—2 Tẹs. 2:16, 17.
Kọ Whọ Kareghẹhọ?
• Ẹvẹ iruo usiuwoma ota mai nọ ma be rọ sasa amọfa oma o kẹre te no?
• Eware jọ vẹ ma rẹ sai ru rọ sasa amọfa oma?
• Imuẹro vẹ e rrọ Ikereakere na inọ Jihova ọ rẹ sasa ahwo riẹ oma?
[Enọ Uwuhrẹ]
[Uwoho nọ o rrọ ẹwẹ-obe avọ 28]
Kọ whọ be sasa enọ e rrọ uweri oma?
[Uwoho nọ o rrọ ẹwẹ-obe avọ 30]
Te emaha te ekpako a rẹ sae sasa amọfa oma
