Enọ Ahwo nọ A s’Ebe

Kọ o lọhọ re ma riẹ uzedhe oria nọ oke o jọ nọ a kare Jesu Kristi fihọ ure oja?

Onọ nana o roma via fikinọ o wọhọ nnọ eme nọ Mak o kere kpahe uwhu Jesu i wo ohẹriẹ no erọ Jọn. Mak o kere nọ: “Nọ u te auwa avesa, [isoja na] a tẹ kare iẹ veghe.” (Mak 15:25) Yọ Jọn o kere nọ Pailet o siobọno Jesu kẹ ahwo Ju re a kpei “nọ ọre o je te-uzou,” koyehọ oware wọhọ auwa avọ ezeza. (Jọn 19:14-16) Ahwo nọ a wuhrẹ kokodo kpahe eme nọ e rrọ Ebaibol a kere eme buobu no bi ro dhesẹ inọ eria Ebaibol ivẹ nana e wọso ohwohwo ho. Dede na, a nwane jọ Ebaibol na dhesẹ oware nọ ikere ivẹ na i ro wo ohẹriẹ hẹ. Ghele na, ma te roro kpahe epanọ ahwo a je kele oke evaọ oke ahwo Ju o rẹ sai fi obọ họ.

Evaọ ikpe-udhusoi ọsosuọ, rọkẹ ahwo Ju, no okenọ oke u re ro rie rite okenọ oke u re ro kpo euwa 12. (Jọn 11:9) Fikiere, “auwa avesa” ọ rẹ jọ oware wọhọ ighọjọ eree hayo ighọjọ izii ohiohiẹ, auwa avọ ezeza ọ vẹ jọ ‘ọre t’uzou.’ Ẹsejọ okenọ ọre ọ rẹ rọ va ze je kie diwi evaọ ukpe na u re nwene. Fikiere epanọ oke aruvo u re theri te u re nwene kiehọ ezi na. Ofariẹ, oria nọ ọre na o te a je ro kele oke. Fikiere, o lọhọ họ re a fodẹ oria nọ oke o rrọ dẹẹ. Ẹsibuobu nọ Ikereakere Griki Ileleikristi o tẹ be ta kpahe oware nọ o via, o rẹ ta inọ oware na o via evaọ ole auwa avọ esa, ọrọ avọ ezeza, hayo ọrọ avọ izii. (Mat. 20:3, 5; Iruẹru 10:3, 9, 30) O tẹ gwọlọ re a fodẹ uzedhe oke na, ẹsiẹe a rẹ fodẹ oke nọ oware jọ o rọ via dẹẹ, wọhọ “auwa avọ ihrẹ.”—Jọn 4:52.

Oke nọ ebe Usiuwoma na e fodẹ inọ eware e rọ via evaọ ẹdẹ nọ a ro kpe Jesu e rọwo kugbe. Imane nọ i kere ebe Usiuwoma na a ta inọ izerẹ gbe ekpako na a kokohọ nọ oke o ke no, a tẹ rọ Jesu bru Pọntiọs Pailet, ọba Rom na. (Mat. 27:1; Mak 15:1; Luk 22:66; Jọn 18:28) Matiu, Mak, avọ Luk a kere inọ otọ u muebi no auwa avọ ezeza nọ Jesu ọ rọ jọ ehru ure oja na rite auwa avọ izii, koyehọ oware wọhọ ighọjọ esa.—Mat. 27:45, 46; Mak 15:33, 34; Luk 23:44.

Ẹsejọhọ, oware jọ nọ o lẹliẹ Mak avọ Jọn fodẹ ọvuọ oke riẹ nọ a rọ kare Jesu na ona: Evaọ oke yena, a jẹ hae rehọ ẹfa nọ a rẹ fa ohwo na wọhọ abọjọ ẹkare na. Ẹsejọ, a rẹ fa ohwo na te epanọ o re ro whu. A fa Jesu ga te epanọ, nọ ọ wọ ure oja na te oria jọ no, oma o tẹ lọhọ iẹe, omọfa ọ tẹ wọ ure na te oria nọ a jọ kare iẹe. (Luk 23:26; Jọn 19:17) Otẹrọnọ a rẹ rehọ oke nọ a rẹ rọ fa ohwo na wọhọ emuhọ ẹkare na, koyehọ oke jọ o vrẹ taure a tẹ te kare Jesu fihọ ure oja na. Ahwo jọ a rẹ sae fodẹ oke nọ a ro mu ohwo na họ ẹfa, efa kọ oke nọ a rọ kare iẹe.

Nọ Matiu, Mak gbe Luk a kere ebe Usiuwoma rai no, ikpe buobu e vrẹ re Jọn ukọ na o te ti kere obe Usiuwoma riẹ. Fikiere Jọn o se ebe nọ imasa edekọ na a kere no. Ginọ uzẹme inọ o wọhọ nnọ oke nọ Jọn ọ fodẹ inọ a rọ kare Jesu u wo ohẹriẹ no onọ Mak ọ fodẹ. Onana o kẹ imuẹro inọ orọnikọ oware nọ Mak o kere oye Jọn ọ wariẹ hẹ. Ọghẹnẹ ọ rehọ ẹzi riẹ kẹ Jọn avọ Mak. Dede nọ a nwane jọ Ebaibol na fodẹ oware nọ eme ọ Mak i ro wo ohẹriẹ no erọ Jọn he, ma rẹ sai fievahọ ebe Usiuwoma na.