Kọ “Obufihọ” kẹ Amọfa O rẹ Were Owhẹ?

A RIẸ Ileleikristi nọ e jọ obọ Filipai rọkẹ unevaze nọ a je ru fiki egagọ uzẹme. Pọl ukọ na ọ jọ ileta nọ o kere se ai ta nọ: “Me re yere Ọghẹnẹ mẹ ẹsikpobi nọ mẹ kareghẹ họ owhai, kẹse kẹse eva olẹ mẹ, mẹ rẹ lẹ kẹ owhai avọ oghọghọ, jẹ kẹ uyere fiki [unevaze nọ wha ru] no eva ẹdẹ ọsosuọ rifi enẹna.” (Fil. 1:3-5) Pọl ọ kareghẹhọ okenọ Lidia avọ uviuwou riẹ soso a rọ họ-ame, gbe epanọ Lidia o ro sikẹ inọ Pọl avọ ibe etausiuwoma riẹ a wohọ uwou riẹ.—Iruẹru 16:14, 15.

Nọ omoke jọ o vrẹ no, ukoko obọ Filipai nọ a ro mu obọ na u vi ekẹ se Pọl isiava soso evaọ eka buobu nọ ọ jọ kugbe inievo obọ Tẹsalonika nọ o rọ emaele udhusoi (100) thabọ no Filipai. (Fil. 4:15, 16) Nọ ikpe jọ e ruọ emu no, dede nọ inievo obọ Filipai gbe Masidonia a jọ otọ  ukpokpoma gbe “uvuhu ogaga,” nọ a yo kpahe ukpokpoma nọ u te inievo nọ e jọ obọ Jerusalẹm, a tẹ gwọlọ nnọ a re fi obọ họ. Pọl ọ ta inọ onana o ro vi ae abọ. Ghele na, o kere nọ: ‘A jẹ lẹ omai re a jọ obufihọ kẹ erezi na.’—2 Kọr. 8:1-4; Rom 15:26.

Nọ inievo obọ Filipai na a maki kurẹriẹ te oware wọhọ ikpe ikpe no, ẹzi ọghọruo nọ a wo na o ri no ai obọ họ. Nọ inievo na a yo nọ a mu Pọl fihọ uwou-odi evaọ obọ Rom, onọ o rehọ emaele egba eree (800) thabọ no ẹwho rai, a te vi Epafrodaitọs re ọ rọ ekẹ se Pọl. O rọ vevẹ inọ, inievo obọ Filipai na a gwọlọ nọ a re ru oware kpobi ro fi obọ họ kẹ Pọl re ọ gbẹ tuduhọ inievo na awọ jẹ ruabọhọ usiuwoma na makọ evaọ uwou-udi.—Fil. 1:12-14; 2:25-30; 4:18.

Nẹnẹ, uvi Ileleikristi a rehọ e riẹ wọhọ uvẹ-ọghọ re a ru unevaze rọ tha iruo usiuwoma ota na uke. (Mat. 28:19, 20) A rẹ rọ oke, ẹgba, gbe igho rai rọ tha iruo Uvie na uke. Ẹkpẹti nọ ọ rrọ obotọ na o dhesẹ idhere nọ whọ sae rọ tha iruo usiuwoma ota nọ Ọghẹnẹ ọ k’omai na uke.

[Ẹkpẹti nọ o rrọ ẹwẹ-obe avọ 22]

Idhere Nọ Otujọ A Bi Ro Ru Azọhọ Unevaze

AZỌHỌ UNEVAZE KẸ IRUO AKPỌ-SOSO

Ahwo buobu a wo omaa unuigho jọ nọ a re ro ru azọhọ unevaze fihọ ẹkpẹti nọ a kpoka họ nnọ “Iruo Akpọ-Soso.”

Kamara kamara, ikoko i re vi igho nọ a jọ ekpẹti nana ruẹ se uwou ogha Isẹri Jihova nọ o be rẹrote iruẹru orẹwho rai. Ohwo ọ rẹ sai je vi azọhọ unevaze ovavo se uwou ogha Isẹri Jihova nọ o rrọ orẹwho riẹ. Ohwo nọ o bi vi echẹke o re kere fihọ iẹe inọ jọ a hwa ugho na kẹ “Watch Tower.” A rẹ sae jẹ zọhọ ifiare hayo oghẹrẹ eware eghaghae itieye na efa. Ohwo nọ ọ zọhọ eware itieye na o re kere obe-ovuẹ okpẹkpẹe lele eware itieye na onọ u re dhesẹ inọ onana yọ ẹkẹ unevaze riẹ.

IDHERE SA-SA NỌ A SAI RO RU AZỌHỌ UNEVAZE

U te no ugho nọ a re ro ru azọhọ unevaze no, idhere efa e riẹ nọ a re ro ru azọhọ unevaze nọ a rẹ rọ wha iruo Uvie na haro evaọ akpọ-soso. Ejọ họ:

Insurance [Azọhọ kẹ Okpẹtu Idudhe]: Ahwo jọ a rẹ hwa igho fihọ ekọmpene Ishọranse n’oke t’oke re a te whu ekọmpene na e vẹ hwa unuigho nọ a ta mu kẹ ohwo nọ a kere nọ a hwa igho na kẹ. Ahwo jọ a rẹ sai kere inọ jọ a hwa igho na kẹ Watch Tower. Amọfa a rẹ sai je kere inọ jọ a hwa igho arutẹriọ rai kẹ Watch Tower.

Igho nọ A Fihọ Ebanke: Ahwo jọ a re kere inọ a te whu a hwa igho jọ nọ a wo fihọ ebanke hayo erere nọ o bi no igho rai jọ ze kẹ Watch Tower.

Shares, Debentures Stocks, gbe Bonds: Ahwo jọ a rẹ jẹ igho fihọ ebanke, ekọmpene, hayo iruẹru egọmeti jọ nọ ebanke hayo ekọmpene itieye a re kugbe rọ thueki rai, a ve kere inọ a hwa erere nọ o ti te ai kẹ Watch Tower hayo a rẹ sae ta inọ a hwa erere rai kẹ Watch Tower Bible and Tract Society of Pennsylvania nọ uwhu u te kpe ai.

Etọ Hayo Iwou: A rẹ sae zọhọ etọ hayo iwou nọ a rẹ sae zẹ; kpahe otọ nọ a bọ iwou fihọ no, ohwo ọ rẹ sae rehọ iwou na ru azọhọ kẹ ukoko na ọ vẹ nya siọ ofẹ nọ ọ gwọlọ rria ba bẹsenọ o re whu, o je whu no a vẹ rehọ uwou nọ ọ jẹ rria na kugbe. Re whọ tẹ te whobọhọ obe jọ inọ whọ gwọlọ rehọ uwou hayo otọ ra jọ ru azọhọ kẹ iruo akpọ-soso na, whọ rẹ jọ uwou ogha riẹ tao.

Obe Uku-Oghale gbe Oware nọ A Rọ Kẹ Ohwo Kru: Ohwo ọ rẹ sai kere inọ o te whu no jọ a rehọ igho hayo ekwakwa riẹ jọ kẹ Watch Tower.

Rọkẹ evuẹ efa, whọ rẹ sae rehọ adrẹse nọ ọ rrọ obotọ na kere se Uwou Ogha Isẹri Jihova nọ o rrọ Nigeria hayo rehọ ifonu lele ai t’ẹme hayo kere se uwou ogha nọ o rrọ orẹwho ra.

Jehovah’s Witnesses

P.M.B. 1090,

Benin City 300001,

Edo State, Nigeria.

Telephone: 07080662020