Fikieme U Ro Fo Re Ẹzi Ọghẹnẹ Ọ Kpọ Owhẹ?
Fikieme U Ro Fo Re Ẹzi Ọghẹnẹ Ọ Kpọ Owhẹ?
“Whẹ họ Ọghẹnẹ mẹ! Ru re ẹzi owoma ra o su omẹ.”—OL. 143:10.
1. Eme ọ rẹ lẹliẹ emagnẹte si oware nọ a rọ ayọno ru rehọ?
KỌ WHO fi ẹguede kẹle emagnẹte no ẹdẹjọ? Emagnẹte na ọ rẹ nwani si ẹguede na rehọ. Fikieme onana o rẹ rọ via? Keme emagnẹte na u wo oghẹrẹ ẹgba jọ nọ a rẹ ruẹ hẹ, onọ u re si oware nọ a rọ ayọno ru rehọ. Anwọ ikpe buobu ze na, ahwo a rẹ rehọ emagnẹte gwọlọ eware wọhọ ipini hayo ẹguede nọ o kie fihọ oria.
2, 3. (a) Ẹgba vẹ Jihova ọ rọ ma eware kpobi? (b) Ẹvẹ ma rọ riẹ nọ ẹzi ọfuafo Ọghẹnẹ ọ rẹ sae kpọ omai nẹnẹ?
2 Oghẹrẹ ẹgba ọfa jọ ọ riẹ nọ a rẹ ruẹ hẹ, onọ u tube wuzou vi orọ emagnẹte. Ẹgba vẹ ọye? Oyehọ onọ a ta kpahe evaọ emuhọ Ebaibol na. Obe Emuhọ o ta kpahe eware nọ Jihova o ru evaọ ikpe buobu gbidigbidi nọ i kpemu, inọ: “Evaọ emuhọ Ọghẹnẹ ọ ma odhiwu gbe akpọ.” Nọ Ọghẹnẹ ọ jẹ ma eware, ọ rehọ ẹgba jọ ru iruo, keme obe Emuhọ u fibae nọ: “Ẹzi Ọghẹnẹ na ọ tẹ jẹ nya kpenẹ avọ enẹ.” (Emu. 1:1, 2) Ẹgba vẹ Ọghẹnẹ ọ rọ ma eware? Ẹzi ọfuafo na. Ma rrọ uzuazọ nẹnẹ fikinọ Jihova ọ rọ ẹzi nana ma eware kpobi.—Job 33:4; Ol. 104:30.
3 U te no ẹma nọ a rọ ẹkwoma ẹzi ọfuafo na ma omai no, kọ ẹzi na o wo obufihọ ofa kẹ omai? Jesu o dhesẹ nọ ẹzi ọfuafo na o wo obufihọ ofa kẹ omai keme ọ ta kẹ ilele riẹ nọ: “Ẹzi [na] o re ti su owhai ruọ uzẹme na kpobi.” (Jọn 16:13) Eme họ ẹzi na, kọ fikieme ma rẹ rọ kuvẹ re ọ kpọ omai?
Eme họ Ẹzi Ọfuafo Na?
4, 5. (a) Eriwo ọthọthọ vẹ ahwo nọ a rọwo ewuhrẹ esanerọvo a wo kpahe ẹzi ọfuafo na? (b) Kọ ginọ eme họ ẹzi ọfuafo na?
4 Ababọ avro, ahwo jọ nọ ma rẹ nyaku evaọ usiuwoma a wo eriwo ọthọthọ kpahe ẹzi ọfuafo na. Enọ e rọwo uwuhrẹ esanerọvo a re roro thọthọ inọ ẹzi ọfuafo na yọ ọghẹnẹ jọ gbe nnọ ọ rrọ ẹrẹrẹ kugbe Ọghẹnẹ Ọsẹ na. (1 Kọr. 8:6) Rekọ uwuhrẹ esanerọvo na o rọwo kugbe Ebaibol na vievie he.
5 Kọ ginọ eme họ ẹzi ọfuafo? Ebaibol ọ New World Translation of the Holy Scriptures—With References o wo eme oruvẹ-obotọ kpahe Emuhọ 1:2 inọ: “Ẹme Hibru na ruʹach nọ a fa ‘ẹzi’ na a rẹ sae jẹ fae ‘ofou,’ yọ eme efa e riẹ nọ a rọ fae nọ i dhesẹ ẹgba nọ a rẹ ruẹ hẹ.” (Emu. 8:1) Wọhọ epanọ a rẹ ruẹ ofou hu rekọ o wo ẹgba nọ o re ro fou eware na, ere a rẹ ruẹ ẹzi ọfuafo na ha rekiyọ o bi ruiruo. Ẹzi nana yọ ẹgba nọ Ọghẹnẹ ọ be rọ kpọ ahwo hayo eware re ọ sai ru oreva riẹ gba. Kọ o rrọ bẹbẹ re ma rọwo inọ obọdẹ ẹgba yena o bi no obọ Ọghẹnẹ Erumeru na ze? Ijo.—Se Aizaya 40:12, 13.
6. Eme Devidi ọ yare Jihova?
6 Kọ Jihova ọ sae gbẹ rọ ẹzi riẹ kpọ omai evaọ uzuazọ? Ọ ya eyaa kẹ Devidi ọso-ilezi na nọ: “Me re ti wuhrẹ owhẹ dhesẹ kẹ owhẹ edhere nọ whọ rẹ te nya.” (Ol. 32:8) Kọ Devidi ọ gwọlọ oyena? Ee, keme ọ yare Jihova nọ: “Wuhrẹ omẹ re me ru orọ eva ra, keme whẹ họ Ọghẹnẹ mẹ! Ru re ẹzi owoma ra o su omẹ.” (Ol. 143:10) Wọhọ Devidi, o rẹ jọ isiuru mai re Ọghẹnẹ ọ rọ ẹzi riẹ kpọ omai. Fikieme? Joma ta kpahe ẹjiroro ene jọ.
Ma Wo Ẹgba nọ Ma rẹ rọ Kpọ Omobọ Mai Hi
7, 8. (a) Fikieme mai ọvo ma gbẹ sae rọ kpọ omobọ mai hi? (b) Kẹ oriruo ro dhesẹ oware nọ u gbe ro fo ho re ma kpọ omobọ mai evaọ akpọ omuomu nana.
7 Orọ ọsosuọ, o rẹ jọ isiuru mai re ẹzi Ọghẹnẹ ọ kpọ omai keme ma rẹ sae kpọ omobọ mai hi. Re a “kpọ” u dhesẹ epanọ a re “su ohwo hayo dhesẹ edhere kẹe.” Rekọ Jihova ọ ma omai re ma kpọ omobọ mai hi, maero nọ ma gba ha na. Jerimaya ọruẹaro na o kere nọ: “O ỌNOWO mẹ riẹ nọ ohwo o wo iroro obọ riẹ hẹ, ohwo o wo ogaga nọ o ro su oma obọ riẹ hẹ.” (Jeri. 10:23) Eme jabọ? Ọghẹnẹ ọ ta kẹ Jerimaya oware nọ o wha riẹ ze nọ ma gbẹ sai ro su omobọ mai hi. Jihova ọ ta kpahe ahwo-akpọ inọ: “Udu na u wo ẹghẹ vi eware na kpobi, je wo uruemu ugbogbo; kọ ono ọ rẹ sai vuhu ei?”—Jeri. 17:9; Mat. 15:19.
8 Kọ o gbẹ rrọ oware ugheghẹ re ohwo nọ ọ riẹ edhere he ọ nya ruọ igbrẹwọ ababọ ohwo nọ o bi su ei hayo omaa-edhere? Fikinọ ohwo na ọ riẹ epanọ a rẹ rọ zọ evaọ igbrẹwọ họ yọ ọ riẹ edhere he, o bi fi uzuazọ riẹ họ ọza. Ere o rrọ rọkẹ ohwo nọ o roro nọ ọ rẹ sae kpọ uzuazọ riẹ evaọ akpọ omuomu nana ababọ Ọghẹnẹ nọ o re dhesẹ edhere kẹe. Re ma sae kparobọ evaọ akpọ omuomu nana, ma rẹ yare Jihova wọhọ epanọ Devidi o ru inọ: “[Jọ] ithihi mẹ e dadamu idhere ra, awọ mẹ e rẹ whra ha.” (Ol. 17:5; 23:3) Ẹvẹ Ọghẹnẹ ọ be rọ kpọ omai?
9. Wọhọ epanọ o rrọ ẹwẹ-obe avọ 17 na, ẹvẹ ẹzi Ọghẹnẹ ọ sae rọ kpọ omai?
9 Ma tẹ roma kpotọ jẹ be rẹroso Jihova rọkẹ ọkpọvio, ọ te rọ ẹzi ọfuafo riẹ kpọ omai. Ẹvẹ ẹzi ọfuafo na o ti ro fi obọ họ kẹ omai? Jesu ọ ta kẹ ilele riẹ nọ: “Ọthuke na, Ẹzi Ẹri na, ọnọ Ọsẹ ọ rẹ te rehọ odẹ mẹ viẹ, o re ti wuhrẹ owhai eware kpobi, ọ vẹ te rehọ eware nọ mẹ ta kẹ owhai kpobi kareghẹhọ owhai.” (Jọn 14:26) Nọ ma be romatotọ wuhrẹ Ebaibol ẹsikpobi na, onọ u kugbe eware nọ Kristi ọ ta kpobi, ẹzi ọfuafo na o ti fi obọ họ k’omai wo otoriẹ ereghẹ ididi Jihova re ma sai ru oreva riẹ vọvọ. (1 Kọr. 2:10) Ofariẹ, nọ ma tẹ nyaku ebẹbẹ jọ evaọ uzuazọ, ẹzi na o re dhesẹ oware nọ u fo nọ ma re ru kẹ omai. Ẹzi na o re fi obọ họ k’omai kareghẹhọ eware nọ ma wuhrẹ no vẹre gbe epanọ ma rẹ rọ rehọ ae kpọ omobọ mai.
Ẹzi Ọghẹnẹ Ọ Kpọ Jesu
10, 11. Irẹro vẹ Ọmọ Ọghẹnẹ o wo kpahe ẹzi ọfuafo na, kọ ẹvẹ irẹro na i ro rugba?
10 Ẹjiroro avivẹ nọ ma rẹ rọ kuvẹ re ẹzi ọfuafo na ọ kpọ omai họ, Ọghẹnẹ ọ rọ ẹzi na kpọ Ọmọ riẹ. Taure Ọmo Ọghẹnẹ ọ tẹ te ziọ otọakpọ, ọ riẹ kpahe eruẹaruẹ nọ e ta nọ: “Ẹzi ỌNOWO na ọ rẹte jariẹ oma, ẹzi areghẹ gbe otọ-oriẹ, ẹzi isuẹsu avọ ogaga, ẹzi eriẹariẹ gbe ẹzi ozodhẹ kẹ ỌNOWO na.” (Aiz. 11:2) Dai roro epanọ o jọ Jesu oja te re ẹzi Ọghẹnẹ ọ kpọe evaọ obọ otọakpọ obonẹ.
11 Ẹme Jihova o rugba. Ebaibol ọ ta kpahe oware nọ o via nọ Jesu ọ nwane họ-ame nọ inọ: “Nọ Ẹzi Ẹri ọ vọ Jesu, o te no Jọdan zihe ze, Ẹzi o te su ei kpo obọ eva ẹwọ.” (Luk 4:1) Nọ Jesu ọ jọ obei ababọ emu, yọ ọ be lẹ je roro didi, ababọ avro Jihova ọ ta kẹe eware nọ ọ be te rẹriẹ ovao dhe. Ẹzi ọfuafo Ọghẹnẹ ọ jẹ kpọ udu gbe iroro-ejẹ Jesu. Fikiere, Jesu ọ riẹ oware nọ o re ru evaọ uyero kpobi, yọ o ru oreva Ọsẹ riẹ.
12. Fikieme u ro wuzou re ma yare Ọghẹnẹ re ọ rọ ẹzi riẹ kpọ omai?
12 Fikinọ Jesu ọ riẹ epanọ ẹzi ọfuafo na o fi obọ họ kẹe te evaọ uzuazọ riẹ, ọ ta kẹ ilele riẹ re a lẹ se Ọghẹnẹ re ọ kẹ ae ẹzi ọfuafo na jẹ rehọ iẹe kpọ ae. (Se Luk 11:9-13.) Fikieme onana u ro wuzou k’omai? Keme o rẹ sae kpọ iroro mai re ma wo ọkpọ iroro Kristi. (Rom 12:2; 1 Kọr. 2:16) Ma tẹ kuvẹ re ẹzi Ọghẹnẹ ọ kpọ omai, ma rẹ sai wo ọkpọ eriwo Kristi ma vẹ jẹ rọ aro kele oriruo riẹ.—1 Pita 2:21.
Ẹzi Akpọ na O re Su Omai Thọ
13. Eme họ ẹzi akpọ na, kọ eme ọ be wọ ahwo ru?
13 Ẹjiroro avesa nọ ma rẹ rọ kuvẹ re ẹzi Ọghẹnẹ ọ kpọ omai họ, ababọ ẹzi ọfuafo na ekpehre ẹzi nọ o bi su ahwo buobu thọ nẹnẹ na ọ rẹ sai su omai thọ re. Akpọ na o wo ẹkẹ ẹzi riẹ nọ ọ be wọ ahwo ru eware nọ i wo ohẹriẹ gaga no enọ ẹzi ọfuafo na ọ be wọ omai ru. Ẹzi akpọ na o bi fi obọ họ kẹ ahwo wo ọkpọ iroro Kristi hi, ukpoye, o bi ru ahwo wo iroro gbe uruemu nọ e wọhọ erọ Setan, osu akpọ na. (Se Ahwo Ẹfẹsọs 2:1-3; Taitọs 3:3.) Nọ ohwo ọ tẹ kuvẹ re ẹzi akpọ na ọ kpọe, jẹ be roma kẹ iruo iwo, ọ rẹ sae ruọ Uvie Ọghẹnẹ hẹ.—Gal. 5:19-21.
14, 15. Ẹvẹ ma sae rọ whaha ẹzi akpọ na?
14 Jihova ọ ruẹrẹ omai kpahe no re ma sae whaha ẹzi akpọ na. Pọl ukọ na ọ ta nọ: “Wha kru oma ga eva Ọnowo na gbe eva ogaga eri riẹ . . . re wha ruẹse mudhe eva edẹ oyoma.” (Ẹf. 6:10, 13) Jihova ọ be rọ ẹkwoma ẹzi riẹ fi obọ họ k’omai re ma ruẹsi mugba kẹ edawọ Setan. (Evia. 12:9) Ẹzi akpọ na ọ re gaga, yọ ma rẹ sae whaha iẹe riẹriẹriẹ hẹ. Rekọ, ma rẹ kuvẹ hẹ re ẹzi na o gbe omai ku. Ẹzi ọfuafo na ọ ga vi ẹzi akpọ na, yọ o ti fi obọ họ k’omai.
15 Pita ukọ na o kere kpahe enọ i kieno ukoko evaọ ikpe-udhusoi ọsosuọ inọ: “A biobọno edhere okiẹrẹe a tẹ nya vru no.” (2 Pita 2:15) Eva e rẹ were omai ẹsikpobi inọ “orọnikọ ẹzi akpọ na ma wo ho, rekọ ẹzi nọ o no obọ Ọghẹnẹ ze.” (1 Kọr. 2:12) Nọ ma tẹ kuvẹ re ẹzi na o su omai jẹ be rehọ eruẹrẹfihọ Jihova kpobi ru iruo ziezi, ma rẹ sae whaha ekpehre ẹzi akpọ omuomu nana.—Gal. 5:16.
Ẹzi Ọfuafo na O re Ru Ohwo Wo Emamọ Uruemu
16. Iruemu vẹ ẹzi ọfuafo na o re fi obọ họ k’omai wo?
16 Ẹjiroro avene nọ ma rẹ rọ kuvẹ re ẹzi Ọghẹnẹ ọ kpọ omai họ, o re fi obọ họ kẹ enọ ọ be kpọ wo emamọ uruemu. (Se Ahwo Galesha 5:22, 23.) Kọ ono evaọ usu mai ọ rẹ gwọlọ wo uyoyou, oghọghọ, je ru udhedhẹ kugbe amọfa ha? Kọ ono ọ gwọlọ dhesẹ uye-oruẹ-krẹkri, ẹwo, je ru ewoma ha? Kọ ono ọ gwọlọ wo ẹrọwọ, ẹwolẹ, gbe oma-oriẹsuo ho? Ẹzi Ọghẹnẹ o re fi obọ họ k’omai wo emamọ uruemu nọ o rẹ wha erere se omai, erivẹ mai, gbe ibe eg’Ọghẹnẹ mai. Ma rẹ daoma hai gbe dhesẹ iruemu ezi nana ẹsikpobi keme oghẹrẹ kpobi nọ ma dhesẹ iruemu ezi nana kẹhẹ, o rẹ sae ga hrọ họ.
17. Ẹvẹ ma sai ro wo abọjọ ubi ẹzi na vọvọ ziezi?
17 Ma rẹ kiẹ oma mai riwi re ma ruẹ nọ ẹmeunu gbe uruemu mai i bi dhesẹ nọ ẹzi ọfuafo na ọ be kpọ omai gbe nnọ ma be mọ ibi riẹ. (2 Kọr. 13:5a; Gal. 5:25) Ma tẹ ruẹ nọ o gwọlọ re ma mọ abọjọ ọrọ ubi ẹzi na, ma rẹ nya lele ọkpọvio ẹzi ọfuafo na re ma sai ru ere. Ma rẹ sai ru onana ẹkwoma ese eria Ebaibol gbe ebe ukoko na nọ e ta kpahe abọ sa-sa ọrọ ubi ẹzi na. Ma vẹ te rọ ere riẹ epanọ ma sai ro dhesẹ ubi ẹzi na via ziezi evaọ uzuazọ nọ ma bi yeri kẹdẹ kẹdẹ. * Nọ ma be jọ uzuazọ mai gbe orọ ibe eg’Ọghẹnẹ mai ruẹ inwene nọ ẹzi Ọghẹnẹ o bi fi obọ họ k’omai ru na, ma te ruẹ oware nọ u ro fo re ẹzi na ọ kpọ omai.
Kọ Whọ be kẹ Ẹzi Ọghẹnẹ Uvẹ re Ọ Kpọ Owhẹ?
18. Oriruo vẹ Jesu o fihotọ k’omai?
18 Okenọ Ọghẹnẹ ọ ma ehrugbakpọ, Jesu ọ jọ “osu iruo” riẹ. Fikiere, Jesu ọ riẹ kpahe eware kpobi nọ e rrọ akpọ na. (Itẹ 8:30; Jọn 1:3) Rekọ Jesu ọ kuvẹ hẹ re eware nọ e rrọ akpọ na e kpọ uzuazọ riẹ evaọ okenọ ọ jọ otọakpọ. Ebaibol ọ ta nọ evaọ okenọ Jesu ọ jọ otọakpọ, ọ ruẹ epanọ ẹzi Ọghẹnẹ o wo ẹgba te evaọ uzuazọ riẹ. Ọ kuvẹ re ẹzi na ọ kpọe. (Mak 1:12, 13; Luk 4:14) Ere whọ rrọ?
19. Eme ma re ru re ẹzi ọfuafo na ọ sae kpọ omai?
19 Ẹzi ọfuafo Ọghẹnẹ o re fi obọ họ kẹ enọ e kuvẹ kẹe re ọ kpọ ae. Ẹvẹ whọ sae rọ kuvẹ re ẹzi na ọ kpọ owhẹ ru oware nọ u woma? Hae lẹ se Jihova re ọ k’owhẹ ẹzi riẹ re o je fi obọ họ k’owhẹ nya lele ekpakpọ riẹ. (Se Ahwo Ẹfẹsọs 3:14-16.) Hai ru lele elẹ ra ẹkwoma Ebaibol na nọ who re se kẹse kẹse onọ a rọ ẹkwoma ẹzi ọfuafo na kere. (2 Tim. 3:16, 17) Hai fi ehrẹ nọ e rrọ Ebaibol na họ iruo jẹ nya lele ekpakpọ ẹzi ọfuafo na. Wo ẹrọwọ inọ Jihova o wo ẹgba nọ ọ rẹ rọ kpọ owhẹ ziezi evaọ akpọ omuomu nana.
[Oruvẹ-obotọ]
^ edhe-ẹme 17 Rọkẹ ẹmeọta-kugbe kpahe abọ sa-sa ọrọ ubi ẹzi na, rri uzoẹme na “Fruitage of God’s Spirit” [Ubi Ẹzi Ọghẹnẹ] gbe uzoẹme na “List by Aspect” [Ọruẹrẹhọ Abọ Sa-Sa] evaọ Watch Tower Publications Indexes.
Kọ Who Wo Otoriẹ Igogo Eme Na?
• Ẹvẹ ẹzi ọfuafo na ọ sae rọ kpọ omai?
• Fiki ẹjiroro ene vẹ ma jẹ kẹ ẹzi Ọghẹnẹ uvẹ re ọ kpọ omai?
• Ẹvẹ ma sai ro ru ẹkabọ mai re ma wo erere vọvọ no ekpakpọ ẹzi ọfuafo na ze?
[Enọ Uwuhrẹ]
[Uwoho nọ o rrọ ẹwẹ-obe avọ 15]
Ẹzi Ọghẹnẹ ọ kpọ Jesu evaọ okenọ ọ jọ otọakpọ
[Uwoho nọ o rrọ ẹwẹ-obe avọ 17]
Ẹzi Ọghẹnẹ o re fi obọ họ kẹ enọ e kuvẹ kẹe re ọ kpọ ae
