Iruẹru Mai erọ Oke nọ U Kpemu

Ẹruọsa Evuẹ Kpahe Iruẹru Mai Erọ Oke nọ U Kpemu

U KRI no nọ Idibo Jihova a be rọ gọ Ọghẹnẹ avọ evawere. Orọnikọ evaọ ebe mai ọvo ma sae jọ ruẹ ikuigbe isiuru nana ha rekọ te ifoto, ileta, eware nọ inievo e niyẹrẹ rai, gbe ekwakwa nọ i w’obọ kpahe omakugbe mai kẹ iwuhrẹ, usiuwoma ota, gbe ikuigbe mai. Rekọ erere vẹ ọ riẹ re ma sẹro eware nana jẹ wariẹ kiẹ ae riwi? Whaọ, Jihova o juzi kẹ enọ i wuzou iviuwou evaọ oke emọ Izrẹl inọ a hai se izi riẹ kẹ emọ rai je dhesẹ eware urirẹ nọ o ru no kẹ ae re emọ na e ruẹsi “fi ẹruore rai họ eva Ọghẹnẹ.”—Ol. 78:1-7.

U kri no nọ ẹkiẹriwi eware anwae u bi ro fi obọ họ evaọ erugba ẹjiroro Jihova. Wọhọ oriruo, nọ ewegrẹ e jẹ gwọlọ whaha iruo ebabọ etẹmpol obọ Jerusalẹm, a te vi ahwo kpohọ oria nọ eware anwae e rrọ evaọ okpẹwho-esuo Midia nọ a re se Ẹkbatana, a tẹ jọ etẹe kiẹ ku obe nọ Sairọs ovie na ọ whobọhọ ro kuenu kẹ ebabọ etẹmpol na. (Ẹzra 6:1-4, 12) Kẹsena a tẹ wariẹ bọ etẹmpol na wọhọ epanọ Ọghẹnẹ ọ gwọlọ. Luk, omọvo enọ i kere ebe Usiuwoma na, ọ jọ eware anwae ru ekiakiẹ re keme “o lele eware na kpobi nọ emuhọ ze ẹrẹrẹe.”—Luk 1:1-4.

Ugboma Esuo na u wo isiuru gaga kpahe ikuigbe iruẹru Uvie na. Nọ omọvo Ugboma Esuo na jọ ọ jẹ ta kpahe oware nọ u ro fo re ma sẹro eware nọ i w’obọ kugbe iruo Uvie na je dhesẹ ae kẹ idibo Jihova evaọ obaro, ọ ta nọ, “Re ma sae riẹ obonọ ma bi kpohọ, u fo nọ ma rẹ riẹ obonọ ma bi no ze.” Fiki  ẹjiroro nana, kẹle na Ugboma Esuo na o rehọ ẹko-iruo ọkpokpọ jọ mu evaọ obọ Brooklyn, New York, nọ a se “Ẹko-Iruo Ẹruọsa Evuẹ Kpahe Iruẹru Mai” onọ o rrọ otọ ẹruọsa Ogbẹgwae Ebe-Ikere.

“IFOTO UVIUWOU” GBE “EKWAKWA EKAREGHẸHỌ” MAI

Nọ oke o be nya haro na yọ eware nọ e via vrẹ no e be thọrọ omai ẹro, o vẹ jọ omai oma nọ dodo kọ ma sẹro eware nọ i re fi obọ họ k’omai kareghẹhọ eware kpobi nọ e via vrẹ no. Enẹna, Ẹko-Iruo Ẹruọsa Evuẹ Kpahe Iruẹru Mai na o be romatotọ sẹro eware nọ ma bi kere je ru n’oke t’oke evaọ iruo Uvie na. Ifoto nọ a romatotọ sẹro rai e rẹ sae jọ abọjọ “ifoto uviuwou” erọ iruẹru mai. Ebe nọ ma kere evaọ oke nọ u kpemu, iku awere nọ inievo i gbe, gbe ekwakwa nọ e rẹ kareghẹhọ omai eware nọ e via vrẹ no e rrọ usu eware nọ a be sẹro rai. Eware itieye na yọ “ekwakwa ekareghẹhọ” nọ i re ru omai riẹ eware nọ ma ru vrẹ no evaọ egagọ Jihova je fi obọ họ k’omai rọ evaifihọ rẹro eware nọ ma te jọ egagọ Jihova reawere rai evaọ obaro.

Ma zizie owhẹ re who se evuẹ erọ iruẹru mai nọ a sẹro rai evaọ uzoẹme okpokpọ na, “Iruẹru Mai Erọ Oke nọ U Kpemu.” Uzoẹme nana o te hae roma via isiane ẹgbukpe evaọ uvitha uwuhrẹ orọ Uwou-Eroro Na. Wọhọ oriruo, evaọ uvitha n’otha na, ma m’omaa inọ ma te rọ ikuigbe nọ a nabe rọ iwoho dhesẹ ziezi rọ k’iyo enọ nana: Eme họ Akẹkẹ Millennial Dawn? Ono ọ jẹ hae rehọ iẹe ru iruo? Oke vẹ a jẹ rọ rehọ iẹe ru iruo, kọ rọkẹ ẹjiroro vẹ?

Wọhọ epanọ ifoto uviuwou i re fi obọ họ kẹ ahwo uviuwou kareghẹhọ eware nọ e vrẹ na, eware kpahe iruẹru Uvie na nọ ma sẹro rai na i ti ru omai riẹ kpahe eware nọ e via evaọ oke mai na gbe enọ e via evaọ oke nọ u kpemu, koyehọ ẹrọwọ gbe udu orọ inievo mai evaọ oke nọ o vrẹ, evawere gbe ise-abọ nọ e rrọ egagọ Ọghẹnẹ, gbe epanọ Ọghẹnẹ ọ be rọ thọ jẹ sẹro idibo riẹ. (Izie. 33:27) Ma wo evaifihọ inọ Jihova o ti gbe fi obọ họ k’omai nọ ma be daoma sẹro eware nọ i kie kpahe iruẹru Uvie na re ma gbe wo okugbe gbe ẹgba nọ ma re ro ru oreva riẹ.

[Ẹkpẹti/Uwoho nọ e rrọ ẹwẹ-obe avọ 31]

Oghẹrẹ nọ Iruo Nana E Rrọ

Nọ a te bi kere ebe, ru ividio, hayo ru eware efa nọ i w’obọ kugbe iwuhrẹ Ebaibol na, inievo nọ i re kere ebe ukoko na, enọ e rẹ ruẹrẹ iwoho họ, enọ i re ru ekiakiẹ, gbe inievo mai efa a rẹ rehọ eware jọ nọ a sẹro rai na kugbe ro ru iruo rai. Fikiere Ẹko-Iruo Ẹruọsa Evuẹ Kpahe Iruẹru Mai na o rẹ romatotọ koko evuẹ sa-sa họ rono iwou ogha, ẹko-iruo sa-sa evaọ Ebẹtẹle, ikoko sa-sa, ahwo sa-sa, gbe isukulu hayo ikoko obọ akpọ sa-sa ze, a vẹ sẹro rai. Joma ta kpẹkpẹ kpahe oghẹrẹ nọ a bi ro ru iruo nana:

Oghẹrẹ nọ A re ro Wo Ai Jẹ Kiẹ Ae Riwi: Inievo na a tẹ ruẹ ugogo eware nọ i wuzou, a ve fi ai ba enọ a wo no vẹre. Ekwakwa nana jọ yọ enọ inievo nọ ahwo iviuwou rai a gọ Jihova kri no a ro ru unevaze hayo nọ a rọ kẹ ai inọ a ro ru oware nọ a gwọlọ no a ve zihe kẹ ae. Eware nana nọ a be kiẹ riwi u bi fi obọ họ kẹ omai riẹ kpahe eware nọ e via oke lelehie nọ u kpemu gbe ahwo nọ a jariẹ oke yena.

Okerefihotọ rai unọjọ utọjọ: Eware nọ utu Ẹko-Iruo Ẹruọsa Evuẹ Kpahe Iruẹru Mai na a re kokohọ i re buobu, ejọ i kri vrẹ ikpe udhusoi no. Eware na e rẹ jọ oghoghẹrẹ, ejọ e rẹ rro vi ejọ yọ u fo nọ a rẹ romatotọ kere ai fihotọ ziezi re a sae rehọ ae ru iruo evaọ obaro.

Ẹruẹrẹ gbe Ẹruorote Rai: A rẹ rehọ edhere obọdẹ jọ ruẹrẹ ebe gbe ekwakwa efa nọ e rrọ hẹhẹhẹ, kẹsena a vẹ nabe rẹrote ai. A re ru ewẹ-ebe, ifoto, evuẹ nọ a biẹ no ebe-usi ze, ekwakwa isinima gbe erọ ikporakporo fihọ ekọmputa. Onana u re ru ei lọhọ nọ a sae rọ jọ ekọmputa se hayo rri rai oke ofa ababọ uzedhe eware aghae itieye na nọ a re dhobọte keme e rrọ hẹhẹhẹ.

Ẹruọsa gbe Eroruiruo Rai: A rẹ sẹro eware aghae nana kpatiẹ evaọ edhere nọ i gbe ro vru hu, nọ ẹroro hayo edhedhẹ ọ gbẹ rọ raha ae he. A bi ru okwakwa ekọmputa jọ nọ a re fi eware na họ, onọ u re fi obọ họ nọ a jẹ ruẹ eware aghae erọ oke nọ u kpemu na vẹrẹ nọ a tẹ gwọlọ rehọ ae ru iruo.

[Uwoho nọ o rrọ ẹwẹ-obe avọ 32]

1. Obe-uzizie rọkẹ isinima ọ “Photo-Drama of Creation.” 2. Obe nọ a re kere edẹ ahwo gbe ebe nọ a yare fihọ. 3. Omoto-ọgba nọ a jẹ rọ ta usiuwoma. 4. Uke Uwou-Eroro ọ April 15, 1912. 5. Ẹwẹ-obe nọ o ta kpahe iruẹru J. F. Rutherford evaọ uwou-odi. 6. Emaekrofonu ọ WBBR. 7. Egramafonu. 8. Ẹkpẹti nọ a jẹ rọ wha ebe. 9. Eware nọ ohwo jọ o kere kẹ omobọ riẹ. 10. Ovuẹ nọ a vi se J. F. Rutherford.