Dhe Idhe Nọ I No Eva Ze Kẹ Jihova

“Rehọ eva awere, ru iruo kpobi nọ i te owhẹ, wọhọ ẹsenọ who bi ru ai kẹ Ọnowo na.”—KỌL. 3:23.

1-3. (a) Kọ uwhu Jesu u dhesẹ nọ Jihova ọ gbẹ gwọlọ uvumọ idhe mi omai hi? Ru ie vẹ. (b) Onọ vẹ o roma via kpahe idhe nọ ma re dhe nẹnẹ?

EVAỌ ikpe-udhusoi ọsosuọ, Jihova o dhesẹ kẹ idibo riẹ inọ idhe ẹtanigbo Jesu na u si Uzi Mosis n’otọ. (Kọl. 2:13, 14) Fikiere, idhe sa-sa nọ ahwo Ju a je dhe anwọ ikpe buobu ze na e gbẹ r’oja ha yọ i gbe wo aghare ọvo ho. Uzi na u ru iruo riẹ gba no wọhọ “owuhrẹ [nọ ọ] rehọ omai bru Kristi.”—Gal. 3:24.

² Rekọ orọnikọ ma be ta ha inọ Ileleikristi a re gbe dhe idhe he. Ukpoye, Pita ukọ na ọ ta nọ u fo re ma ‘giwẹ ẹzi nọ Ọghẹnẹ o re miẹ fiki Jesu Kristi.’ (1 Pita 2:5) Ofariẹ, Pọl ukọ na o ru rie vẹ inọ kabọ kabọ ọrọ uzuazọ Oleleikristi nọ ọ roma mudhe no yọ “iwẹ.”—Rom 12:1.

³ Fikiere, Oleleikristi o re dhe idhe kẹ Jihova, ẹkwoma eware jọ nọ o re ro ru unevaze kẹ Ọghẹnẹ hayo eware jọ nọ o re siobọno fiki egagọ Ọghẹnẹ. Nọ ma riẹ inọ u wo itee jọ nọ emọ Izrẹl a jẹ hae nyate re a tẹ jẹ idhe rai rehọ na, kọ eme ma re ru nẹnẹ re Jihova ọ ruẹse jẹ idhe mai rehọ?

EVAỌ UZUAZỌ MAI KẸDẸ KẸDẸ

4. Eme ma rẹ kareghẹhọ kpahe iruẹru ikẹdẹ kẹdẹ mai?

⁴ Ẹsejọhọ o sae jọ bẹbẹ k’omai re ma roro nọ iruẹru mai kẹdẹ kẹdẹ i wo oware jọ kugbe idhe mai kẹ Jihova. Ma sai roro nọ okọ-ugho, iruo-uwou, isukulu, eware-edẹ, gbe iruẹru itieye na i w’obọ ọvo kugbe egagọ mai hi. Rekọ, otẹrọnọ whọ roma mudhe kẹ Jihova no hayo who bi ti ru ere kẹle, oghẹrẹ nọ who re ru iruẹru ikẹdẹ kẹdẹ ra o r’oja. Mai yọ Ileleikristi t’aso t’uvo.  U fo re ma nya lele ehri-izi Ebaibol evaọ kabọ kabọ uzuazọ mai. Fiki onana, Pọl ọ tuduhọ omai awọ inọ: “Rehọ eva awere, ru iruo kpobi nọ i te owhẹ, wọhọ ẹsenọ who bi ru ai kẹ Ọnowo na, orọnikọ ahwo ho.”—Se Ahwo Kọlọsi 3:18-24.

5, 6. Eme u fo nọ ma re roro kpahe nọ u re kpomahọ ẹgọ gbe uruemu mai kẹdẹ kẹdẹ?

⁵ Orọnikọ iruẹru obọ mai gheghe nọ ma be hai ru kẹdẹ kẹdẹ yọ abọjọ egagọ mai hi. Ghele na, uduotahawọ Pọl na inọ ma ru eware kpobi “wọhọ ẹsenọ [ma] bi ru ai kẹ Ọnowo na” u re ru omai roro kpahe kabọ kabọ uzuazọ mai. Kọ ẹvẹ ma sai ro fi ohrẹ nana h’iruo? Kọ ẹgọ gbe uruemu mai o be hae jọ kpatiẹ ẹsikpobi? Manikọ evaọ iruẹru ikẹdẹ kẹdẹ, oma o rẹ vuọ omai re ma ta nọ mai yọ Isẹri Jihova, ẹsejọhọ fiki uruemu mai hayo oghẹrẹ ẹgọ nọ ma gọ? O rẹ th’omai wa! Idibo Jihova a re ru oware ovo nọ o rẹ wha ekpehre odẹ se Ọghẹnẹ hẹ.—Aiz. 43:10; 2 Kọr. 6:3, 4, 9.

⁶ Joma ta kpahe epanọ ‘eva kpobi nọ ma re ro ru iruo wọhọ ẹsenọ ma bi ru ai kẹ Ọnowo na’ o sai ro kpomahọ abọ sa-sa ọrọ uzuazọ mai. Nọ ma bi ti ru ere na, kareghẹhọ inọ eware nọ e mai woma kpobi o gwọlọ nọ emọ Izrẹl a re ro dhe idhe kẹ Jihova evaọ oke rai.—Ọny. 23:19.

OGHẸRẸ NỌ U RO KPOMAHỌ UZUAZỌ RA

7. Eme omaromudhe Oleleikristi u dhesẹ?

⁷ Okenọ whọ roma mudhe kẹ Jihova, whọ gba riẹ mu inọ who re ru oreva riẹ, ogbẹrọ ere? Koyehọ, whọ ta nọ whọ rẹ rọ Jihova karo evaọ kabọ kabọ uzuazọ ra. (Se Ahwo Hibru 10:7.) Emamọ iroro whọ jẹ na. Ababọ avro whọ ruẹ no inọ okenọ whọ tẹ kiẹ kpahe eriwo Jihova je ru lele iei evaọ iroro-ejẹ ra, emamọ iyẹrẹ i re noi ze. (Aiz. 48:17, 18) Idibo Ọghẹnẹ a rrọ fuafo jẹ be wereva ẹsikpobi keme a be daoma dhesẹ oghẹrẹ iruemu Ọnọ o bi wuhrẹ ae.—Izerẹ 11:44; 1 Tim. 1:11.

8. Ma te roro kpahe oghẹrẹ nọ Jihova ọ jẹ hai rri idhe emọ Izrẹl fuafo, eme onana u re wuhrẹ omai?

⁸ Jihova ọ jẹ hai rri idhe nọ emọ Izrẹl a jẹ hai dhe kẹe fuafo. (Izerẹ 6:25; 7:1) Ẹme Hibru nọ a fa “ọrẹri” hayo ọfuafo na u dhesẹ oware nọ o hẹriẹ oma no eware efa, onọ a ruẹrẹhọ rọkẹ Ọghẹnẹ ọvo. Re Ọghẹnẹ ọ sae jẹ idhe mai rehọ, e rẹ kare epe jẹ hẹriẹ oma no ogbekuo akpọ na. Ma re you oware ovuovo nọ Jihova o mukpahe he. (Se 1 Jọn 2:15-17.) Onana u dhesẹ nọ ma rẹ whaha usu hayo oware kpobi  nọ u re gbe omai ku evaọ aro Ọghẹnẹ. (Aiz. 2:4; Evia. 18:4) U te je dhesẹ nọ ma re rri ighe eware igbegbe hayo erọ ọfariẹ hẹ yọ ma re roro kpahe ae gbe he.—Kọl. 3:5, 6.

9. Ẹvẹ oghẹrẹ nọ ma re yeri kugbe amọfa u wuzou te, kọ fikieme?

⁹ Pọl ọ tuduhọ ibe eg’Ọghẹnẹ riẹ awọ inọ: ‘Wha se oware uwoma gbe ọghoruo ba ha, keme iwẹgọ itieye na e rẹ were Ọghẹnẹ gaga.’ (Hib. 13:16) Fikiere, eware ezi nọ ma re ru kẹ amọfa yọ idheidhe nọ Jihova ọ rẹ jẹ rehọ. Ọdawẹ nọ ma re wo kẹ amọfa yọ oka jọ nọ a re ro vuhu uvi Ileleikristi.—Jọn 13:34, 35; Kọl. 1:10.

IDHEIDHE EVAỌ EGAGỌ

10, 11. Ẹvẹ Jihova o rri usiuwoma ota gbe egagọ mai, kọ eme onana o rẹ wọ omai ru?

¹⁰ Obọdẹ edhere jọ nọ mai Ileleikristi ma re ro ru eware ezi họ, “ẹruore mai” nọ ma re whowho via kẹ amọfa. Kọ whọ be rehọ uvẹ kpobi nọ u rovie fihọ ta usiuwoma? Pọl o se usiuwoma ota Ileleikristi na “okẹ iwẹegọ ejiro rọ kẹ Ọghẹnẹ . . . , koyehọ, ma rẹ rọ enu mai jiri odẹ [Ọghẹnẹ].” (Hib. 10:23; 13:15; Hos. 14:2) O r’oja re ma roro kpahe epanọ ma rẹ raha oke te, gbe epanọ ma re ro wo onaa ziezi evaọ usiuwoma ota na, yọ a ruẹrẹ abọ sa-sa ọrọ Ewuhrẹ Odibọgba na họ re u fi obọ họ k’omai ru onana. Rekọ oware nọ ma rẹ kareghẹhọ họ, nọ o rọnọ usiuwoma ota mai kugbe ukoko na gbe orọ oke gheghe yọ “okẹ iwẹegọ ejiro” hayo abọjọ egagọ mai na, u fo nọ ma rẹ rọ eva mai kpobi ru ei. Dede nọ uyero mai kpobi o rrọ epọvo na ha, oghẹrẹ nọ ma rẹ raha oke fihọ usiuwoma ota na te u re dhesẹ epanọ ma wo edẹro kẹ eware abọ-ẹzi te.

¹¹ Ileleikristi a rẹ ruẹrẹ oke họ ẹsikpobi rọkẹ egagọ Ọghẹnẹ evaọ obọ uwou hayo evaọ iwuhrẹ ukoko. Enẹ Jihova ọ gwọlọ. Uzẹme, ma gbe bi koko uzi Ẹdijala ha yọ ma gbe bi kpohọ ehaa sa-sa evaọ obọ Jerusalẹm hu. Ghele na, mai Ileleikristi ma rẹ sai wuhrẹ eware jọ no iruẹru yena ze. Ọghẹnẹ ọ gwọlọ nọ ma whaha iruẹru nọ i fioka ha, re ma ruẹrẹ oke fihọ nọ ma re ro wuhrẹ Ebaibol na, lẹ, je kpohọ iwuhrẹ Ileleikristi. Enọ i wuzou iviuwou a re ru egagọ uviuwou  kugbe ahwo uviuwou rai. (1 Tẹs. 5:17; Hib. 10:24, 25) Rọ kpahe usu mai kugbe Ọghẹnẹ, u fo re ma nọ oma mai inọ, ‘Kọ mẹ sai si kẹle Ọghẹnẹ viere evaọ egagọ mẹ?’

12. (a) Eme ma bi ru nẹnẹ nọ o wọhọ insẹnse nọ emọ Izrẹl a jẹ hae mahe evaọ oke rai? (b) Kọ eme ma re ru re Ọghẹnẹ ọ jẹ elẹ mai rehọ?

¹² Devidi ovie na ọ suole kẹ Jihova nọ: “Jọ a kele olẹ mẹ họ olẹ ukiẹrẹe eva aro ra.” (Ol. 141:2) Dhizu omojọ re who roro kpahe elẹ ra, kpahe epanọ e be hae kpekpe je woma te. Obe Eviavia o ta nọ “elẹ erezi na” e wọhọ insẹnse, nọ i re gbore awere kẹ Jihova. (Evia. 5:8) Evaọ oke emọ Izrẹl, insẹnse nọ a jẹ hae mahe ẹsikpobi evaọ etẹmpol Jihova a jẹ hae nabe ruẹrẹ ae họ ziezi. Okenọ ọnọ ọ be mahe insẹnse na ọ tẹ nya lele ọkpọvio Jihova kpahe oghẹrẹ nọ a rẹ rọ mahe insẹnse, ẹsiẹ Jihova ọ rẹ jẹ ae rehọ. (Ọny. 30:34-37; Izerẹ 10:1, 2) Epọvo na re, nọ ma tẹ be hai dhesẹ oghẹrẹ uruemu ovona evaọ etoke olẹ, ma sai wo imuẹro inọ Jihova o ti yo elẹ mai.

ẸKẸ GBE EMI

13, 14. (a) Eme Epafrodaitọs avọ inievo ukoko obọ Filipai na a ru ke Pọl, kọ ẹvẹ ukọ na o rri onana? (b) Ẹvẹ ma sae rọ rehọ aro kele Epafrodaitọs gbe inievo obọ Filipai na?

¹³ A rẹ sae rọ ekẹ unevaze nọ ma be rọ wha iruo akpọ-soso na haro dhesẹ idhe, makọ onọ ma kẹ u bu hayo o kawo. (Mak 12:41-44) Evaọ ikpe-udhusoi ọsosuọ, ukoko obọ Filipai u vi Epafrodaitọs kpo obọ Rom re o fi obọ họ rẹrote ẹgwọlọ Pọl. U muẹro inọ okenọ Epafrodaitọs ọ jẹ nya, ọ wha ugho unevaze nọ ukoko na kpobi u ro fi obọ họ kẹ Pọl lele oma. Orọnikọ onana họ orọ ọsosuọ nọ ukoko obọ Filipai u ro ru Pọl ọghọ họ. Ẹjiroro ọghọ oruo rai họ, re Pọl ọ siọ awa-ọruọ ugho ba re ọ ruẹsi wo oke ziezi kẹ odibọgba na. Ẹvẹ Pọl o rri okẹ unevaze yena? O se rie “okẹ awere, idhe nọ e rẹ jai miẹ nọ e rẹ were Ọghẹnẹ.” (Se Ahwo Filipai 4:15-19.) Ọghọ nọ inievo obọ Filipai a ru Pọl na ọ da riẹ ẹro fia, yọ Jihova o rri ọghọ na ghaghae re.

¹⁴ Ere ọvona nẹnẹ, Jihova o bi rri unevaze nọ ma be rọ tha iruo akpọ-soso na uke ghaghae. Ofariẹ, Jihova ọ ya eyaa inọ ma tẹ be rọ iruo uvie na karo, ọ te rẹrote ẹgwọlọ abọ-ẹzi gbe ọrọ abọ-iwo mai.—Mat. 6:33; Luk 6:38.

DHESẸ EDẸRO RA

15. Eware jọ vẹ Jihova o ru kẹ owhẹ no nọ e be lẹliẹ owhẹ jiri iei?

¹⁵ Eware nọ Jihova o ru kẹ omai no nọ ma rẹ rọ kẹe uyere i bu wo umuo ho. Kọ u gbe fo re ma hai yere Jihova kẹdẹ kẹdẹ fiki uzuazọ nọ ọ kẹ omai na? Ọ kẹ omai eware kpobi nọ ma gwọlọ evaọ uzuazọ—emuore, emuẹgọ, uwou, gbe ẹwẹ nọ ma be wẹ. Ofariẹ, ẹrọwọ nọ ma wo no eriariẹ egbagba ze o be kẹ omai ẹruore. U fo nọ ma rẹ hae gọ Jihova je jiri iei fiki oghẹrẹ Ọghẹnẹ nọ ọ rrọ gbe eware nọ o ru kẹ omai no.—Se Eviavia 4:11.

16. Eme idhe ẹtanigbo Kristi na e rẹ wọ omai ru?

¹⁶ Wọhọ epanọ ma ruẹ evaọ uzoẹme nọ u kpemu na, okẹ jọ nọ o ghare gaga nọ Ọghẹnẹ ọ kẹ ahwo-akpọ họ idhe ẹtanigbo Kristi na. Onana yọ odhesẹvia ologbo ọrọ uyoyou nọ Ọghẹnẹ o wo kẹ omai. (1 Jọn 4:10) Eme u fo nọ uyoyou nana o rẹ wọ omai ru? Pọl ọ ta nọ: “Uyoyou Kristi oye o rọ omai esuo, keme umu omai  ẹro nọ ọ vo jọ o whu kẹ ahwo kpobi; . . . o te whu kẹ ahwo kpobi re enọ egbẹrọ uzuazọ egbẹ jọ kẹ oma obọ rai ofaha, rekọ a rẹ jọ kẹ e ọnọ o whu fiki rai ọ tẹ jẹ kparoma.” (2 Kọr. 5:14, 15) Ẹme nọ Pọl ọ be ta na họ, otẹrọnọ aruoriwo Ọghẹnẹ ọ d’omai ẹro, ma rẹ rrọ uzuazọ mai wha orro se Ọghẹnẹ avọ Ọmọ riẹ. Ma te you Ọghẹnẹ avọ Kristi je wo edẹro kẹ eware nọ a ru kẹ omai no, ma re yoẹme kẹ ae je wo isiuru kpahe iruo usiuwoma ota gbe ilele iruo na.—1 Tim. 2:3, 4; 1 Jọn 5:3.

17, 18. Idhere vẹ otujọ a be rọ daoma viere evaọ idhe ujiro nọ a be rọ kẹ Ọghẹnẹ? Kẹ oriruo jọ.

¹⁷ Kọ whọ sae daoma viere evaọ idhe ra erọ ujiro nọ whọ be rọ kẹ Ọghẹnẹ? Nọ ibuobu i roro kpahe eware iwoma kpobi nọ Jihova o ru kẹ ae no, oma o wọ rai ruẹrẹ oke gbe iruẹru rai họ evaọ edhere nọ a re ro w’abọ viere evaọ iruo usiuwoma ota na gbe iruẹru efa evaọ ukoko na. Ejọ e be hai ru iruo ọkobaro obufihọ amara ọvo hayo viere kukpe kukpe, yọ efa i bi ru iruo ọkobaro oke-kpobi. Ejọ i w’obọ no evaọ ebabọ ukoko na. Kọ enana e gbẹ rrọ obọdẹ idhere nọ ma re ro dhesẹ edẹro? Ma tẹ rọ emamọ eva ru ai, koyehọ re ma ro dhesẹ edẹro mai jẹ kẹ Ọghẹnẹ uyere, Ọghẹnẹ ọ rẹ jẹ iruẹru nana rehọ.

¹⁸ Emamọ eware nọ Jihova o ru kẹ Ileleikristi buobu no u duobọte ai te epanọ a bi ro wo ajọwha ziezi evaọ iruo Uvie na. Omọvo rai jọ họ, aye jọ nọ a re se Morena. Ọ jọ ichọche Kathọlik whẹro, kẹsena ọ tẹ jẹ jọ egagọ na gbe eriariẹ-ikpehru ahwo obọ Esia kiẹ gwọlọ enọ nọ o wo kpahe egagọ. Rekọ o duku uvumọ uyo nọ o vọ riẹ eva ha. Nọ Isẹri Jihova a mu uwuhrẹ Ebaibol họ kugbei no ẹsiẹe o ro duku uyo enọ nọ o wo kpahe egagọ. Iyo ivevẹ nọ Morena ọ ruẹ no Ikereakere na ze rọkẹ enọ nọ o wo kpobi gbe oghẹrẹ nọ i ro fi obọ họ kẹe dhomamu evaọ uzuazọ e da riẹ ẹro te epanọ o ro yere Jihova jẹ gwọlọ rọ ẹgba riẹ kpobi gọe. Nọ Morena ọ nwane họ-ame no, o te mu iruo ọkobaro obufihọ họ n’oke t’oke, kẹsena nọ uyero riẹ o kẹe uvẹ viere ọ tẹ ruọ iruo ọkobaro oke-kpobi. Anwọ ikpẹ 30 ena nọ o bi ro ru iruo ọkobaro na yọ ọ gbẹ ruabọhọ iruo na.

19. Ẹvẹ whọ sae gbẹ rọ daoma viere evaọ idhe ujiro nọ whọ be rọ kẹ Jihova?

¹⁹ Ginọ uzẹme, idibo Jihova buobu e riẹ nọ uyero rai o kẹ rai uvẹ be sai ru iruo ọkobaro ho. Nọ ma tẹ be dawo ẹgba mai kpobi evaọ egagọ Jihova, Jihova ọ rẹ sae jẹ idhe mai rehọ. O gwọlọ nọ ma rẹ romatotọ nya lele ehri-izi ikiẹrẹe Jihova evaọ uruemu mai, avọ ekareghẹhọ inọ mai yọ idibo Jihova t’aso t’uvo. Ma re wo ẹrọwọ inọ Ọghẹnẹ o ti ru ẹjiroro riẹ kpobi gba. Ma re ru iruo iwoma ẹkwoma emamọ usi Uvie na nọ ma re whowho. Avọ evawere nọ e da udu mai fia, gbe edẹro kẹ eware kpobi nọ Jihova o ru kẹ omai no, joma gbẹ hai dhe idhe nọ i no eva ze kẹ Jihova.

DAOMA SỌ WHỌ SAE K’IYO ENỌ NANA:

Ẹvẹ ma sae rọ kẹ Jihova orro evaọ iruẹru ikẹdẹ kẹdẹ mai?

Idhe vẹ ma be hai dhe evaọ egagọ mai?

Ẹvẹ ma sae rọ rehọ eyero mai dhe idhe kẹ Jihova?

[Enọ Uwuhrẹ]

[Ẹme nọ a fi ẹgba họ nọ ọ rrọ ẹwẹ-obe avọ 25]

Kọ eware iwoma nọ Jihova o ru kẹ owhẹ no e be wọ owhẹ ru viere evaọ idhe ujiro nọ whọ be rọ kẹe?

[Uwoho nọ o rrọ ẹwẹ-obe avọ 23]

Kọ whọ be rehọ uvẹ kpobi nọ u rovie fihọ ta usiuwoma?