Epanọ Ma Sai ro Wo Erere Ziezi no Uwuhrẹ Ebaibol Mai Ze

Ẹvẹ ma sae rọ reawere uwuhrẹ Ebaibol mai ziezi? Ẹvẹ ma sai ro wo erere ziezi no uwuhrẹ Ebaibol mai ze? Joma ta kpẹkpẹ kpahe eware esa jọ nọ i wuzou nọ i re fi obọ họ k’omai wo erere ziezi no uwuhrẹ Ebaibol omobọ mai ze.

1 LẸ: Olẹ họ oware ọsosuọ. (Ol. 42:8) Fikieme? U fo re ma rehọ uwuhrẹ Ebaibol omobọ mai inọ yọ abọjọ egagọ mai. Fikiere, u fo re ma lẹ se Jihova re o fi obọ họ k’omai re oware nọ ma bi ti wuhrẹ na o daruọ omai oma, re ọ jẹ kẹ omai ẹzi ọfuafo riẹ. (Luk 11:13) Oniọvo jọ nọ a re se Barbara nọ ọ rrọ iruo imishọnare kri no ọ ta nọ: “Ẹsikpobi nọ mẹ tẹ gwọlọ se hayo wuhrẹ Ebaibol na, olẹ me re ro muhọ. Nọ mẹ tẹ lẹ no, o rẹ jọ omẹ oma inọ Jihova ọ rrọ kugbe omẹ gbe nnọ ọ jẹ oware nọ me bi ru na rehọ.” Olẹ u re rovie udu gbe iroro mai re oware nọ ma bi wuhrẹ o sae daruọ omai oma ziezi.

2 RORO DIDI: Fiki uvẹ nọ ma bi wo tere he, ahwo jọ a re se Ebaibol na ehruehru. Fikiere, a gbe bi wo erere ziezi no uwuhrẹ Ebaibol na ze he. Oniọvo jọ nọ a re se Carlos nọ ọ gọ Jihova vrẹ ikpe 50 no o vuhumu inọ re ọ sai wo erere ziezi rono uwuhrẹ Ebaibol ze, u wuzou gaga re ọ rehọ oke roro didi kpahe eware nọ o bi wuhrẹ. Ọ ta nọ: “Me gbe bi se bu te epanọ mẹ jẹ hai se vẹre he, ewẹ-ebe ivẹ ọvo me bi se kẹdẹ kẹdẹ. Kẹsena mẹ vẹ rehọ oke ziezi ro roro didi kpahe eware nọ me se re mẹ sai wo erere noi ze.” (Ol. 77:12) Nọ ma tẹ be rehọ oke roro didi kpahe eware nọ ma bi wuhrẹ, u re fi obọ họ k’omai riẹ ziezi kpahe oware nọ oreva Ọghẹnẹ o rrọ.—Kọl. 1:9-11.

3 FI AI HỌ IRUO: Ma tẹ riẹ erere nọ ma ti wo no oware jọ ze ẹsiẹ ma mai ro wo ajọwha kpahe iẹe. Oniọvo-ọmọzae jọ nọ a re se Gabriel nọ ọ be hai wuhrẹ Ebaibol na kẹse kẹse ọ ta nọ: “Uwuhrẹ Ebaibol u bi fi obọ họ k’omẹ fi ebẹbẹ kparobọ kẹdẹ kẹdẹ, yọ u bi ru ei lọhọ k’omẹ nọ me bi ro fi obọ họ kẹ amọfa.” O fibae nọ: “Mẹ be daoma fi eware kpobi nọ me bi wuhrẹ h’iruo evaọ uzuazọ mẹ.” (Izie. 11:18; Jos. 1:8) Ẹhẹ, eriariẹ nọ i no obọ Ọghẹnẹ ze nọ ma rẹ sai fi h’iruo i bu wo umuo ho.—Itẹ 2:1-5.

ỌKIẸRIWO: Uvẹ-ọghọ riẹ o rro kẹhẹ re ma kiẹ gwọlọ eriariẹ Jihova, Ọnọ ọ vọ avọ areghẹ na! (Rom. 11:33) Fikiere, oke kpobi nọ who bi ti wuhrẹ Ebaibol na, kake lẹ re Jihova o ru oware nọ who bi ti wuhrẹ na daruọ owhẹ oma, re ọ jẹ kẹ owhẹ ẹzi ọfuafo riẹ. Nọ who te wuhrẹ te oria jọ, daoma roro didi kpahe oware nọ who bi wuhrẹ na. Ofariẹ, eware nọ who bi wuhrẹ na, hai fi ai họ iruo evaọ uzuazọ ra kẹdẹ kẹdẹ. Nọ whọ tẹ be hai ru eware nana nọ i wuzou na, whọ te reawere uwuhrẹ Ebaibol ra, who ve ti wo erere ziezi.