Onana Ginọ Uvitha Uwuhrẹ!

Ma wariẹ ru onaa fihọ uvitha uwuhrẹ orọ Uwou-Eroro Na re o sai siuru ziezi je fi obọ họ k’owhẹ viere evaọ ewuhrẹ Ẹme Ọghẹnẹ, Ebaibol na.—Ol. 1:2; 119:97.

Anwọ ikpe ene na nọ ma bi ro wo uvitha ivẹ erọ Uwou-Eroro Na, ọjọ rọkẹ ẹgbede, ọnọ o kiọkọ ọ rrọ rọkẹ omai Isẹri Jihova gbe emọ-uwuhrẹ Ebaibol mai nọ i bi wo ẹnyaharo.

Oniọvo-ọmọzae jọ nọ o kri ukoko na no o kere kpahe uvitha uwuhrẹ na inọ: “Nọ me tu se uvitha uwuhrẹ ọsosuọ orọ Uwou-Eroro Na u woma kẹhẹ, o daruọ omẹ oma. Oghẹrẹ nọ a rọ jọ eva riẹ ta kpahe iwuhrẹ ididi nọ e rrọ Ebaibol na u duobọte omẹ udu ziezi. Wha kobiruo gaga rọkẹ obọdẹ okwakwa okpokpọ nana.” Oniọvo-ọmọzae ọfa o kere nọ: “Mẹ be m’omaa epanọ mẹ te rọ romatotọ se uvitha uwuhrẹ na avọ Ebaibol mẹ nọ ọ rrọ omẹ obọ.” U mu omai ẹro inọ epọvo na o rrọ k’owhẹ.

Wọhọ epanọ whọ riẹ, anwọ ukpe 1879 ma bi ro kere Uwou-Eroro Na, yọ ẹkwoma ẹzi Jihova gbe uketha riẹ ma be sai ro ru onana. (Zek. 4:6) Anwọ ikpe udhozeza gbe ikpegbesa (133) nọ ma bi ro kere Uwou-Eroro Na, ma ru inwene sa-sa fihọ uke riẹ no. Evaọ ukpe 2012, uke uvitha uwuhrẹ kpobi u ti wo uwoho orọ inievo nọ e be ta usiuwoma nọ a drọ, onọ o te kareghẹhọ omai iruo nọ Ọghẹnẹ o mu họ omai obọ, koyehọ re ma romatotọ se isẹri kpahe Uvie Jihova. (Iruẹru 28:23) Whọ te jọ ẹwẹ-obe avọ 2 ruẹ uzedhe uwoho nọ a drọ fihọ obọ uke na, avọ eme nọ a kere lele iei bi ro dhesẹ oware nọ o be via gbe oria nọ o jọ via. Onana o te kareghẹhọ omai evaọ ukpe na soso inọ idibo Jihova a be ta usiuwoma na evaọ “akpọ na kpobi.”—Mat. 24:14.

Kọ inwene efa vẹ ma ru fihọ emagazini na no? Ma wọ etehe ọkiẹriwo na ziọ emuhọ uzoẹme uwuhrẹ kpobi no. Onana u ti fi obọ họ kẹ owhẹ riẹ igogo eme nọ who re wo họ iroro nọ who bi se je wuhrẹ uzoẹme na. Dede na, inievo nọ i bi ru Uwuhrẹ Uwou-Eroro na a te gbẹ hae rọ enọ nana ru ọkiẹriwo evaọ obọ urere uwuhrẹ na. Whọ te ruẹ nọ oria nọ a kere eme te he evaọ tabọ tabọ ẹwẹ-obe kpobi o dina kẹre vi epanọ o jọ vẹre yọ inọmba ewẹ-obe avọ idhe-eme na e dina kpoko vi epaọ anwẹdẹ.

Wọhọ epanọ a dhesẹ fihọ uvitha amara nana, ma bi fi uzoẹme okpokpọ na, “Iruẹru Mai Erọ Oke nọ U Kpemu” ba uvitha uwuhrẹ na, onọ o te hae roma via ẹsikpobi jẹ niyẹrẹ igogo iruẹru jọ nọ e roma via no evaọ ikuigbe Isẹri Jihova. Ofariẹ, ikuigbe uzuazọ inievo mai e te hae roma via ẹsejọ evaọ otọ uzoẹme na “A Rọ Unevaze Fialoma Via.” A te hae jọ onana ta kpahe oghọghọ gbe omaweromẹ nọ inievo mai a bi wo evaọ oria nọ ẹgwọlọ kẹ iwhowho-uvie o mae jọ rro.

Ajọ who wo omawere ziezi nọ whọ te rọ emagazini nana wuhrẹ Ẹme Ọghẹnẹ.

Enọ I Whowho I Rie

[Uwoho nọ o rrọ ẹwẹ-obe avọ 3]

1879

[Uwoho nọ o rrọ ẹwẹ-obe avọ 3]

1895

[Uwoho nọ o rrọ ẹwẹ-obe avọ 3]

1931

[Uwoho nọ o rrọ ẹwẹ-obe avọ 3]

1950

[Uwoho nọ o rrọ ẹwẹ-obe avọ 3]

1974

[Uwoho nọ o rrọ ẹwẹ-obe avọ 3]

2008