Jaja Aro Vi Wọhọ Epanọ Jesu O Ru
Jaja Aro Vi Wọhọ Epanọ Jesu O Ru
“Wha roro hẹ lẹ.”—MAT. 26:41.
ẸVẸ WHỌ TE K’UYO ENỌ NANA?
․․․․․
Ẹvẹ elẹ mai e sai ro dhesẹ nọ ma jaja aro vi?
․․․․․
Idhere vẹ ma sai ro dhesẹ nọ ma jaja aro vi evaọ usiuwoma ota mai?
․․․․․
Fikieme u ro wuzou re ma jaja aro vi evaọ etoke odawọ, kọ ẹvẹ ma sai ro ru ere?
1, 2. (a) Enọ vẹ e rẹ sae roma via kpahe oriruo aro ọjajavi nọ Jesu o fihotọ? (b) Kọ ahwo-akpọ nọ a gba ha a sae rọ aro kele oriruo ọgbagba Jesu? Kẹ oriruo.
O RẸ sai gb’owhẹ unu inọ: ‘Kọ o ginẹ lọhọ re ma jaja aro vi wọhọ epanọ Jesu o ru? Whaọ, Jesu ọ jọ gbagba! U te no ere no, ẹsejọ Jesu ọ rẹ riẹ eware nọ e te via evaọ obaro, makọ eware nọ e te via evaọ ikpe buobu nọ e be tha! Kọ o ginẹ gwọlọ nọ Jesu o re rroro hayo jaja aro vi?’ (Mat. 24:37-39; Hib. 4:15) Joma kake kiyo enọ yena re ma sae ruẹ epanọ uzoẹme nana u wuzou te, gbe oware nọ o jẹ gwọlọ nọ ma rẹ jaja aro vi ababọ okioraha.
2 Kọ ahwo-akpọ nọ a gba ha a sae rọ aro kele ohwo ọgbagba? Ee, keme ma rẹ sai wuhrẹ mi emamọ owuhrẹ jẹ rọ aro kele oriruo riẹ. Wọhọ oriruo, dai roro kpahe ohwo nọ ọ re sa ose ẹdẹvo ho nọ o bi wuhrẹ epanọ a rẹ sa ose. Ọ rẹ sae sa ose re u kie oware nọ ọ gwọlọ sa ha, rekọ o gbe bi wuhrẹ. Re ọ sae riẹ sa ziezi, ọ rẹ romatotọ wuhrẹ mi owuhrẹ riẹ nọ ọ riẹ ẹsa ziezi na. Ọnọ a bi wuhrẹ na o re muẹrohọ oghẹrẹ nọ owuhrẹ riẹ o dikihẹ, oghẹrẹ nọ o kru ose na, gbe oghẹrẹ nọ o si rie. Ẹmẹrera na, ọnọ a bi wuhrẹ na ọ vẹ te riẹ epanọ o re si ose keke te, muẹrohọ oghẹrẹ nọ ofou ọ rẹ sae wọ ose na, ọ vẹ te rọ ere mu ose họ esa ziezi. Epọvo na, mai Ileleikristi ma rẹ rọ ẹmẹrera kpọ uruemu mai vi ẹkwoma ehrẹ Jesu nọ ma re ru lele gbe oriruo ọgbagba riẹ nọ ma rẹ rọ aro kele.
3. (a) Ẹvẹ Jesu o ro dhesẹ nọ o gwọlọ nnọ ọ rẹ jaja aro vi? (b) Eme ma te ta kpahe evaọ uzoẹme nana?
3 Kọ o ginẹ gwọlọ nọ Jesu ọ rẹ jaja aro vi? Ee, o gwọlọ ere. Wọhọ oriruo, evaọ aso urere nọ Jesu ọ jọ otọakpọ, ọ tuduhọ ilele riẹ awọ nọ: ‘Wha lele omẹ rroro.’ O te je fibae nọ: “Wha roro hẹ lẹ, re wha siọ ẹdawọ ba ẹruọ.” (Mat. 26:38, 41) Dede nọ Jesu ọ be hae jaja aro vi anwẹdẹ, etoke yena nọ uwhu riẹ o kẹle no na ọ mae rọ gwọlọ jaja aro vi je si kẹle Ọsẹ obọ odhiwu riẹ. Ọ riẹ inọ o gwọlọ nọ ilele riẹ a rẹ jaja aro vi re, orọnikọ oke yena ọvo ho rekọ te evaọ obaro. Joma ta kpahe oware nọ Jesu ọ rọ gwọlọ nọ ma jaja aro vi. Kẹsena ma vẹ te ta kpahe idhere esa nọ ma sae rọ jaja aro vi evaọ uzuazọ ikẹdẹ kẹdẹ mai wọhọ Jesu.
OWARE NỌ JESU Ọ RỌ GWỌLỌ NỌ MA JAJA ARO VI
4. Fikieme u ro fo re ma jaja aro vi?
4 Re ma tae kpẹkpẹe, Jesu ọ gwọlọ nọ ma jaja aro vi fiki eware nọ ma riẹ gbe enọ ma riẹ hẹ. Kọ evaọ okenọ Jesu ọ jọ otọakpọ, ọ riẹ eware kpobi nọ e te jọ obaro via? Ijo, keme ọ ta avọ omaurokpotọ inọ: “Ẹdẹ ọyena gbe oke oyena ohwo ọvo ọ riẹ hẹ, makọ ikọ nọ e rọ obọ odhiwu, hayo Ọmọ dede, rekọ Ọsẹ na ọvo.” (Mat. 24:36) Evaọ oke yena, makọ Jesu nọ ọ rrọ “Ọmọ” na, ọ riẹ uzedhe oke nọ urere akpọ omuomu nana o te ze he. Kọ omai nẹnẹ? Kọ ma riẹ eware kpobi nọ e te jọ obaro via? Ijo! Ma riẹ ẹdẹ nọ Jihova o ti vi Ọmọ riẹ ze te raha eyero omuomu ọnana ha. Otẹrọnọ ma riẹ eware kpobi nọ e te jọ obaro via, o hae gbẹ gwọlọ nọ ma jaja aro vi hi. Wọhọ epanọ Jesu ọ ta, urere na o te ze idudhe, evaọ okenọ ma rẹro riẹ hẹ; fikiere o gwọlọ nọ ma rẹ jaja aro vi oke kpobi.—Se Matiu 24:43.
5, 6. (a) Ẹvẹ eware nọ ma riẹ kpahe obaro gbe ẹjiroro Ọghẹnẹ u re ro ru omai jaja aro vi? (b) Fiki oghẹrẹ ohwo nọ ma riẹ nọ Setan ọ rrọ, ẹvẹ onana u re ro ru omai jaja aro vi ziezi?
5 Evaọ abọdekọ riẹ, Jesu ọ riẹ eware iwoma buobu nọ e te jọ obaro via, eware nọ ahwo buobu evaọ oke riẹ a riẹ hẹ. Ma riẹ eware kaka Jesu hu, rekọ u woma gaga inọ Jesu o fi obọ họ k’omai riẹ eware buobu kpahe Uvie Ọghẹnẹ gbe eware nọ Uvie na u ti ru kẹlena. Ma make rrọ obọ isukulu, oria iruo, hayo ẹkwotọ usiuwoma ota mai, kọ ma gbe bi muẹrohọ inọ ahwo buobu a riẹ kpahe emamọ eware nọ e be te jọ obaro via na ha? Nọ o rrọ ere na, onana yọ ẹjiroro ọfa nọ ma rẹ rọ jaja aro vi. Wọhọ Jesu, o gwọlọ nọ ma rẹ jaja aro vi ẹsikpobi, ma vẹ rọ uvẹ kpobi nọ u rovie fihọ ta usiuwoma kẹ amọfa kpahe Uvie Ọghẹnẹ. Uvẹ utioye kpobi o rrọ ghaghae, yọ ma gwọlọ gbabọ kẹe he. Uzuazọ ahwo o rrọ ọza!—1 Tim. 4:16.
6 U wo oware ofa jọ nọ Jesu ọ riẹ nọ o lẹliẹ e riẹ jaja aro vi. Ọ riẹ nọ Setan ọ gba riẹ mu inọ ọ rẹ dawo iẹe, wha ukpokpoma sei, jẹ gwọlọ raha usu riẹ kugbe Ọghẹnẹ. Ọwegrẹ omuomu yena ọ jẹ gwọlọ uvẹ “ọfa” kpobi nọ ọ rẹ rọ dawo Jesu. (Luk 4:13) Jesu o fi oma h’otọ vievie he. Ọ ruẹrẹ oma kpahe kẹ oware nọ o te tha kpobi, o make rrọ odawọ, ọwọsuọ, hayo ukpokpoma. Ere o rrọ k’omai nẹnẹ re. Ma riẹ nọ Setan ọ gbẹ wọhọ “okpohrokpo nọ obi do enu, be guọlọ ọjọ nọ ọ rẹ ria.” Oyejabọ nọ Ebaibol na ọ rọ hrẹ Ileleikristi nọ a “jaja aro vi, he roro.” (1 Pita 5:8) Kọ ẹvẹ ma sai ro ru ere?
EPANỌ OLẸ U RE RO FI OBỌ HỌ K’OMAI JAJA ARO VI
7, 8. Ohrẹ vẹ Jesu ọ kẹ kpahe olẹ, kọ didi oriruo o fihotọ?
7 Ebaibol o dhesẹ vevẹ inọ olẹ u re fi obọ họ k’omai jaja aro vi. (Kọl. 4:2; 1 Pita 4:7) Nọ Jesu ọ ta kẹ ilele riẹ nọ a lele iei roro no, u kri hi, ọ tẹ wariẹ ta kẹ ae nọ: “Wha roro hẹ lẹ, re wha siọ ẹdawọ ba ẹruọ.” (Mat. 26:41) Kọ ohrẹ nọ Jesu ọ kẹ ilele riẹ kpahe olẹ na u kiekpahe uyero obẹbẹ nọ a jọ evaọ oke oyena ọvo? Ijo, ẹme riẹ na yọ ohrẹ nọ ma re fihọ iruo kẹdẹ kẹdẹ evaọ uzuazọ.
8 Jesu o fi obọdẹ oriruo h’otọ k’omai evaọ abọ olẹ. Ẹsejọhọ whọ te kareghẹhọ inọ okejọ ọ lẹ se Ọsẹ riẹ aso okioke. Dae rehọ iẹe nọ whọ jọ etẹe. (Se Luk 6:12, 13.) Ẹsejọhọ Jesu ọ kẹle ẹwho Kapaniọm nọ a rẹ jọ kpe iyei no, yọ ẹkwotọ yena uwou ọsẹgboni riẹ o jọ. Evaọ owọwọ, Jesu o te kpobọ ehru ugbehru jọ nọ a sae jọ kparo ruẹ Abade Galili. Nọ oke u bi siaro họ na, ẹsejọhọ Jesu ọ be kparo ruẹ emelo ikpẹ-ewhri nọ a ro tu evaọ Kapaniọm gbe imiwhre nọ e wariẹ oyena họ. Dede na, nọ Jesu o muhọ ẹlẹ se Jihova, iroro riẹ kpobi e tẹ ziọ olẹ na. Ẹmẹrera na, oke u te muhọ ẹnya. Ọ tubẹ riẹ hẹ nọ ahwo nọ a rọ ikpẹ tu a bi furie ikpẹ rai unọjọ utọjọ fiki oke nọ o nya thabọ no, nọ ọvẹre ọ be va ze hayo nọ emerao aso i muhọ ẹdhẹ no. Ẹsejọhọ ọ jẹ lẹ kpahe oware ulogbo jọ nọ ọ gwọlọ ru, epanọ ọ te rọ salọ ilele ikpegbivẹ riẹ. Dai roro epanọ o jọ kẹ Jesu nọ ọ be ta oware nọ o riẹ eva kẹ Ọsẹ riẹ, kpahe epanọ ọ te rrọ salọ olele ọvuọvo, be yare ọkpọvio gbe areghẹ na.
9. Eme ma rẹ sai wuhrẹ no oriruo Jesu nọ ọ lẹ aso okioke ze?
9 Eme ma rẹ sai wuhrẹ no oriruo Jesu ze? Inọ ma rẹ lẹ okikpo? Ijo, keme ọ ta kpahe ilele riẹ nọ: “[Ẹzi] ọ ghinẹ rọwo rekọ uwo o lọhọ.” (Mat. 26:41) Dede na, ma rẹ sae rọ aro kele Jesu. Wọhọ oriruo, kọ ma be hae lẹ se Ọsẹ obọ odhiwu mai taure ma tẹ te jẹ iroro nọ e rẹ sai kpomahọ usu mai kugbe Ọghẹnẹ, te orọ ahwo uviuwou mai, hayo ibe Ileleikristi mai? Kọ ma be hae jọ elẹ mai fodẹ eware nọ e rrọ ọdawẹ kẹ inievo nọ ma gbẹ rrọ ukoko? Kọ ma be hae lẹ no udu ze manikọ eme nọ e reria omai unu no ọvo ma be hae wariẹ evaọ elẹ mai? Muẹrohọ re inọ Jesu o rri oke nọ o re ro lele Ọsẹ riẹ ta ẹme ghaghae. Evaọ uyerakpọ inẹnẹ nọ ahwo a be jọ dhẹ kiti kata na, o rẹ lọlọhọ re eware nọ e mai wuzou e thọrọ ahwo ẹro. Ma tẹ ruẹrẹ oke họ ziezi nọ ma rẹ rọ romatotọ lẹ, ma te jaja aro vi. (Mat. 6:6, 7) Onana u ti ru usu mai kugbe Jihova jọ kpekpekpe, ma vẹ whaha oware kpobi nọ o rẹ sae raha usu mai kugbei.—Ol. 25:14.
EPANỌ MA RẸ RỌ JAJA ARO VI EVAỌ USIUWOMA OTA NA
10. Oriruo vẹ o dhesẹ nọ Jesu o fiẹrohotọ kẹ uvẹ kpobi nọ ọ rẹ rọ ta usiuwoma?
10 Jesu ọ jaja aro vi evaọ iruo nọ Jihova ọ kẹ riẹ. Nọ ohwo ọ tẹ rrọ oghẹrẹ iruo jọ, iroro riẹ e sae dhẹ kpenẹ avọ enẹ ababọ ẹbẹbẹ nọ o re noi ze. Rekọ iruo buobu e riẹ nọ o gwọlọ nọ ohwo ọ rẹ jọ jaja aro vi ẹsikpobi, ere iruo usiuwoma ota na e rrọ. Jesu ọ jaja aro vi ẹsikpobi evaọ iruo riẹ, o je fiẹrohọ uvẹ kpobi nọ ọ rẹ rọ ta usiuwoma. Wọhọ oriruo, Jesu avọ ilele riẹ a nya ohiohiẹ ẹdẹjọ soso bẹsenọ a ro te ẹwho nọ a re se Saeka, ilele na a tẹ nyae dẹ emu. Jesu o te je serihọ kẹle ozae ẹwho na, rekọ ọ jaja aro vi, kẹsena ọ tẹ ruẹ uvẹ nọ ọ rẹ rọ ta usiuwoma. Aye Sameria jọ ọ nyaze ti vo ame. Jesu ọ hẹ sae rehọ uvẹ yena wezẹ omojọ. U wo eware nọ Jesu ọ hai ro gu inoma nọ o hae whaha iẹe ẹmeọta kugbe aye na. Rekọ o ru ere he, ọ tẹ ta usiuwoma kẹ aye na, onọ o lẹliẹ ahwo buobu kurẹriẹ evaọ ẹwho na. (Jọn 4:4-26, 39-42) Kọ ma sae rọ aro kele oriruo aro ọjajavi Jesu vi epaọ anwẹdẹ, ẹsejọhọ ẹkwoma ẹro nọ ma re muhotọ viere kẹ uvẹ nọ ma rẹ rọ ta usiuwoma kẹ ahwo nọ ma be nyaku kẹdẹ kẹdẹ?
11, 12. (a) Eme Jesu ọ ta kẹ ahwo nọ a jẹ gwọlọ si iroro riẹ no iruo riẹ? (b) Ẹvẹ ma rọ riẹ nọ Jesu o gbabọkẹ abọ ọvuọvo ho evaọ uzuazọ?
11 Ẹdẹjọ, ahwo nọ a wo emamọ eva kpahe Jesu a jẹ gwọlọ si iroro riẹ no iruo riẹ. Evaọ Kapaniọm, iruo usiwo igbunu nọ Jesu o je ru i mu ahwo na urirẹ te epanọ a rọ gwọlọ nọ Jesu ọ rẹ jọ etẹe kugbe ai. Ma riẹ nọ ohwo kpobi ọ rẹ sai gine wo eriwo otiọye. Rekọ iruo Jesu họ re ọ nyae ta usiuwoma na kẹ “igodẹ nọ ivru eva uwou Izrẹl” kpobi orọnikọ ẹwho jọ ọvo ho. (Mat. 15:24) Fikiere ọ tẹ ta kẹ ahwo ẹwho na nọ: “Mẹ rẹ vuẹovuẹ usiuwoma uvie Ọghẹnẹ [kẹ] ewho efa re; keme fiki onana a je vi omẹ ze.” (Luk 4:40-44) O rrọ vevẹ inọ Jesu ọ rọ uzuazọ riẹ kpobi kẹ iruo usiuwoma ota na. Ọ kuvẹ hẹ re oware ofa o whaha iẹe iruo na.
12 Kọ Jesu ọ roma kpobi kẹ iruo riẹ te epanọ ọ gbẹ jẹ rọ daezọ oware ofa vievie he? Kọ ọ roma kẹ usiuwoma na te epanọ ọ rọ tehe ezọ di kẹ ẹgwọlọ iviuwou? Ijo, Jesu o gbabọkẹ abọ ọvuọvo ho. Ọ reawere uzuazọ, ọ jọ kugbe egbẹnyusu riẹ evaọ etoke omawere. O rri iviuwou ghaghae, o wo ọdawẹ kpahe ebẹbẹ gbe ẹgwọlọ rai, o te je you emaha na.—Se Mak 10:13-16.
13. Ẹvẹ ma sae rọ rehọ aro kele Jesu evaọ aro ọjajavi je dhesẹ nọ ma bi gbabọkẹ abọ ọvuọvo evaọ uzuazọ họ nọ ma be ta usiuwoma na?
13 Nọ ma be rọ aro kele Jesu evaọ aro ọjajavi na, ẹvẹ ma sai ro dhesẹ nọ ma bi gbabọkẹ abọ ọvuọvo evaọ uzuazọ họ wọhọ ọyomariẹ? Ma rẹ kuvẹ re akpọ nana o si iroro mai no usiuwoma ota na ha. Makọ egbẹnyusu hayo imoni mai nọ i wo emamọ eva kpahe omai a rẹ sae ta kẹ omai nọ ma dina rolo obọ kẹ usiuwoma ota hayo iruẹru ukoko na re ma le eware nọ ahwo kpobi a bi le nẹnẹ. Dede na, ma tẹ be rọ aro kele Jesu, ma re rri usiuwoma ota na wọhọ emuore. (Jọn 4:34) Iruo mai i re ru omai jọ gaga evaọ ukoko na, e vẹ jẹ k’omai evawere. Ghele na, orọnikọ ma rẹ tẹrovi iruo na dhẹ siọ ewha-iruo efa kpobi ba ha, yọ ma re ru wọhọ ẹsenọ ma mai kiẹrẹe gbe he. Wọhọ Jesu, ma rẹ wereva, yọ ma re gbabọkẹ abọ ọvuọvo ho evaọ uzuazọ keme mai yọ idibo Ọghẹnẹ evawere na.—1 Tim. 1:11.
EPANỌ MA RẸ RỌ JAJA ARO VI EVAỌ ETOKE ODAWỌ
14. Evaọ etoke odawọ, eme ma rẹ daoma whaha, kọ fikieme?
14 Wọhọ epanọ ma ruẹ no na, etoke nọ Jesu ọ rẹriẹ ovao dhe odawọ ulogbo ẹsiẹe ọ jẹ mae rọ kpakpa ilele riẹ oma inọ a jaja aro vi. (Se Mak 14:37.) Nọ ma tẹ rẹriẹ ovao ku ebẹbẹ, oke yena o tubẹ mai gwọlọ nọ ma rẹ rọ aro kele oriruo Jesu. Nọ ahwo buobu a tẹ rẹriẹ ovao ku odawọ, ugogo uzẹme jọ nọ u wuzou gaga o rẹ thọrọ ae ẹro, oware nana u wuzou te epanọ obe Itẹ o rọ wariẹe isiava inọ: “Edhere jọ ọ rọ nọ ọ wọhọ nọ o kiehọ kẹ ohwo, rekọ urere riẹ kọ edhere uwhu.” (Itẹ 14:12; 16:25) Ma tẹ rẹroso iroro obọ mai, maero nọ ma tẹ rẹriẹ ovao ku ebẹbẹ ilogbo, ma sai fi uzuazọ mai gbe orọ ahwo nọ ma you họ ọza.
15. Odawọ vẹ ohwo nọ o wuzou uviuwou ọ rẹ sae rẹriẹ ovao dhe nọ eware e tẹ rrọ gaga kẹe?
15 Wọhọ oriruo, eware e rẹ sae jọ gaga kẹ ohwo nọ o wuzou uviuwou nọ ọ be daoma kuọ ahwo “uwou riẹ.” (1 Tim. 5:8) Ọ sai tube roro nọ u ti woma re ọ gwọlọ iruo nọ e rẹ kẹe igho buobu o tẹ make rọnọ iruo na e te whaha iẹe iwuhrẹ enya ẹsejọ, te egagọ uviuwou, hayo usiuwoma ota. Ọ tẹ rẹroso iroro obọriẹ ọ rẹ sai ku ei họ inọ u yoma ha re o ru iruo itieye. Rekọ iroro itieye na e rẹ sae raha usu riẹ kugbe Jihova hayo tube ru ei kie no ukoko. O rẹ mai woma kẹe otẹrọnọ o ru lele ohrẹ nọ o rrọ obe Itẹ 3:5, 6. Solomọn ọ jọ etẹe ta nọ: “Rehọ ẹroọrọsuọ ra kpobi kpahe ỌNOWO na whọ rehọ eva kpahe ẹriẹ omobọ ra ha. Eva idhere ra kpobi ọ thọrọ owhẹ ẹro ho, o ve ti ruọ idhere ra kpọvi.”
16. (a) Oriruo vẹ Jesu o fihotọ nọ u dhesẹ nọ ọ rẹroso areghẹ Jihova viukpọ areghẹ obọ riẹ? (b) Ẹvẹ ibuobu nọ i wuzou iviuwou a be rọ rẹroso Jihova evaọ etoke ẹgaga wọhọ Jesu?
16 Nọ Jesu ọ jọ odawọ, ọ rẹroso iroro obọ riẹ vievie he. Dai roro iei! Ohwo nọ ọ mai wo areghẹ kpaobọ nọ ọ rria akpọ na no ọ rẹroso areghẹ obọ riẹ hẹ. Wọhọ oriruo, ẹsibuobu nọ Setan ọ dawo iẹe, Jesu ọ jẹ hae ta nọ: “A kere nọ.” (Mat. 4:4, 7, 10) Jesu ọ rẹroso areghẹ Ọsẹ riẹ ro fi edawọ kparobọ, onọ u dhesẹ omaurokpotọ nọ Setan o wo ho. Kọ ma be rọ aro kele Jesu? Ohwo nọ o wuzou uviuwou nọ ọ rọ aro kele oghẹrẹ nọ Jesu ọ jaja aro vi ọ rẹ kuvẹ re Ẹme Ọghẹnẹ ọ kpọe, maero evaọ etoke edawọ. Ahwo buobu nọ a wuzou iviuwou evaọ akpọ na soso a bi ru ere. A be rọ Uvie Ọghẹnẹ gbe egagọ riẹ karo kẹ ẹgwọlọ iviuwou rai. Enẹ a be mae rọ rẹrote iviuwou rai. Jihova ọ be ghale ae evaọ oma nọ a be dawo re a sae rẹrote iviuwou rai wọhọ epanọ ọ ya eyaa riẹ evaọ Ebaibol na.—Mat. 6:33.
17. Eme ọ be wọ owhẹ jaja aro vi wọhọ Jesu?
17 Avro ọ riẹ hẹ, Jesu o fi oriruo nọ ọ mai woma h’otọ evaọ aro ọjajavi. Oriruo riẹ o rẹ kẹ erere, o rẹ jẹ kẹ uzuazọ. Kareghẹhọ nọ Setan ọ gwọlọ rọ ẹmẹrera whrehe ẹrọwọ ra, nọ who gbe ro se egagọ Ọghẹnẹ gboja ha, hayo siomano egagọ Ọghẹnẹ. (1 Tẹs. 5:6) Whọ kẹe uvẹ vievie he! Jaja aro vi ẹsikpobi wọhọ Jesu, koyehọ evaọ olẹ, evaọ usiuwoma ota, gbe evaọ etoke edawọ. Whọ tẹ be hai ru ere, who ti yeri uzuazọ evawere makọ enẹna nọ ma rrọ urere eyero akpọ nana. Whọ tẹ be jaja aro vi ẹsikpobi, u re je ru nọ Olori ra, Jesu, o ti ro di owhẹ họ oreva Ọsẹ riẹ uruo evaọ okenọ ọ tẹ nyaze te raha eyero akpọ nana. O te were Jihova re ọ hwosa kẹ owhẹ fiki ẹrọwọ ra nọ who kru te urere!—Evia. 16:15.
[Enọ Uwuhrẹ]
[Uwoho nọ o rrọ ẹwẹ-obe avọ 6]
Jesu ọ ta usiuwoma kẹ aye na evaọ akotọ ozae. Uvẹ vẹ whọ be hae rọ ta usiuwoma kẹdẹ kẹdẹ?
[Uwoho nọ o rrọ ẹwẹ-obe avọ 7]
Who te bi fi obọ họ kẹ ahwo uviuwou ra si kẹle Ọghẹnẹ, u dhesẹ nọ whọ jaja aro vi
