Iruẹru Mai erọ Oke nọ U Kpemu

“U Ru nọ Ahwo Buobu A je ro Rri Omẹ”

Nọ oniọvo-ọmọtẹ jọ nọ ọ rrọ ọkobaro oke-kpobi nọ a re se Charlotte White o te ẹwho Louisville, Kentucky, evaọ America, yọ o bi ghelie ẹkpẹti nọ a ku etẹ fihọ, ahwo buobu a te je rri rie.

EVAỌ ukpe 1908, nọ oniọvo na White o je ghelie ẹkpẹti nọ a ku etẹ fihọ nọ a rẹ rọ wha ebe na, ahwo ẹwho na a te je rri rie keme o jọ oware okpokpọ nọ a re ruẹ ẹdẹvo ho, onọ inievo na a mu odẹ kẹ inọ Akẹkẹ Millennial Dawn. Oniọvo-ọmọtẹ na ọ ta nọ, “ahwo a jẹ ta ẹme kpahe iẹe, yọ u ru nọ ahwo buobu a je ro rri omẹ.”

Isẹri Jihova nọ a je se Emọ-Uwuhrẹ Ebaibol evaọ oke yena, a ruẹ nọ u fo re a vuẹ amọfa eware nọ a wuhrẹ no Ebaibol ze. Inievo na a wo eriariẹ Ebaibol ẹkwoma iko-ebe na Millennial Dawn nọ a jẹ hai se (iko-ebe nọ a se uwhremu na Studies in the Scriptures). Inievo nọ o were gbe enọ ẹgba rai o te a jẹ nya kpohọ ewho gbe iwhre sa-sa nyai fi iko-ebe nana họ ada, enọ inievo na a je dhesẹ wọhọ “Obufihọ Rokẹ Emọ-Uwuhrẹ Ebaibol.”

Evaọ ukpe 1908, unuigho nọ oniọvo-ọmọtẹ na White avọ ibe Ileleikristi riẹ a jẹ hai ro fi iko ezeza obe na họ ada u bu te ẹsiso gbọ. Inievo na a jẹ hae rọ ebe na kẹ ahwo okioke nọ a rọ nyaku ahwo na ha, rekọ a jẹ hai kere edẹ ahwo nọ a gwọlọ ebe na fihotọ, kẹsena a vẹ rọ ebe na se ai evaọ ẹdẹ nọ a te rọ hwa umutho ugho nọ a bi ro fi ebe na họ ada na. Ọzae jọ nọ ọ jẹ wọso inievo na ọ ta nọ ebe na i ku hrọ.

Oniọvo-ọmọtẹ nọ a re se Malinda Keefer ọ ta nọ evaọ oka ọvo ọ jẹ hai fi iko-ebe nọ i bu te egba ivẹ hayo egba esa họ ada. Rekọ isiuru egaga nọ ahwo a wo kpahe iko-ebe nana o wha use-abọ jọ ze. Whaọ,  uko-obe avọ ezeza na ọvo u wo ewẹ-ebe egba ihrẹ gbe udhuvẹ (740) soso. Uwou-Eroro na jọ o ta nọ ‘iko-ebe udhuvẹ gbe ikpe e joma gbẹdẹ te ubro ẹkpa isimeti’ yọ owha rai o “gbẹdẹ hrọ” maero rọkẹ inievo-emetẹ.

Re inievo na a sae wha ebe egbẹgbẹdẹ nana te ahwo oma, Brọda James Cole o te ku oware jọ nọ u wo etẹ ivẹ nọ a rẹ sae thahe mu ẹkpẹti, onọ a re ghelie. Nọ oniọvo nana o ku oware na no, ọ gbẹ be rọ abọ wọ ebe egbẹgbẹdẹ na ha, ọ ta nọ: “Mẹ te sai wiri ẹkoko mẹ kufiẹ hẹ.” Nọ o dhesẹ oware nọ o ku na kẹ inievo na evaọ okokohọ nọ a ru evaọ obọ Cincinnati, Ohio, evaọ ukpe 1908, eva e were rai gaga. A fi epoto họ tabọ tabọ oware nọ a ku na, yọ odẹ nọ a kere fihọ epoto na họ Akẹkẹ Millennial Dawn, keme iko-ebe Millennial Dawn na a jẹ mae rehọ oware na wha. Ẹmẹrera na, eghelie oware nana avọ iko-ebe nọ e vọ riẹ eva o tẹ te reria inievo na obọ no te epanọ a sae rọ rehọ obọ ovo ghelie ei. A ku rie evaọ oghẹrẹ nọ a sai ro ru ei kpotọ hayo kpehru wọhọ epanọ ohwo nọ o bi ghelie ei ọ gwọlọ, yọ etẹ na e rẹ sai ghelie evaọ otọ ogaga kpobi. Nọ a tẹ ta usiuwoma kuhọ no, a rẹ sai kpiri etẹ na fihọ oma ẹkpẹti na, a vẹ wọ ẹkpẹti ofofe na.

A jẹ hae rọ ẹkpẹti nana nọ o wo etẹ na kẹ inievo-emetẹ nọ e rrọ ekobaro oke-kpobi ọvọvẹ. Rekọ omọfa ọ rẹ dẹe enwenọ isiso ivẹ. Oniọvo-ọmọtẹ na Keefer nọ uwoho riẹ o rrọ etenẹ na ọ riẹ Akẹkẹ Millennial Dawn na eghelie te epanọ ọ sae rọ rehọ obọ ovo ghelie ei jẹ rehọ obọ nọ u kiọkọ wha ebe efa. Fikinọ oniọvo na ọ ruẹ ahwo buobu nọ a wo isiuru evaọ ẹwho Pennsylvania, America nọ a rẹ jọ tọ iwizi, ọ jẹ hae fa akwa jọ nọ ọ rrọ ẹwho na vrẹ isiasa hayo isiane okpẹdẹ nyai fi iko-ebe na họ ada.

Evaọ ukpe 1987, ọzae jọ nọ ọ rẹ dhẹ arupre o ku ẹkpa nọ a re ghelie, onọ a rẹ jọ ogege arupre hayo iyẹrẹ nọ ahwo a rẹ jọ zurie ruẹ nẹnẹ. Rekọ anwọ ikpe udhusoi nọ i kpemu, Emọ Uwuhrẹ Ebaibol nọ e jẹ rọ ajọwha whowho usi Uvie na a jẹ hae rọ ẹkpẹti nọ o wo etẹ ghelie iko-ebe se ahwo, onọ a je se Akẹkẹ Millennial Dawn yọ ahwo a jẹ hai rri rai.

[Ẹme nọ a fi ẹgba họ nọ ọ rrọ ẹwẹ-obe avọ 32]

Oniọvo-ọmọtẹ na Keefer ọ jẹ hae fa akwa vrẹ isiasa hayo isiane okpẹdẹ nyai fi iko-ebe na họ ada

[Ẹme nọ a fi ẹgba họ nọ ọ rrọ ẹwẹ-obe avọ 32]

U si ẹbẹbẹ owha ebe egbẹgbẹdẹ na n’otọ