Enọ Ahwo Nọ A S’ebe

Kọ uruemu ifoto ẹbẹba iriwo u re yoma te epanọ a sae rọ rehọ fiki riẹ si Oleleikristi no ukoko?

▪ Ee, o rẹ sai tere. Oyejabọ nọ u ro wuzou gaga re ma whaha oghẹrẹ ifoto ẹbẹba iriwo kpobi, wọhọ enọ e rrọ ebe, emagazini, ifimu, ividio gbe itanẹte.

Oria kpobi evaọ akpọ na a sae jọ ruẹ ifoto ẹbẹba. Itanẹte u ru nọ ifoto ẹbẹba e rọ da oria kpobi fia, yọ onana u ru nọ ahwo buobu a ro kieruọ ẹta nana no. Te emaha te ekpako jọ a rovie ku ifoto ẹbẹba idudhe no evaọ itanẹte. Amọfa a kekaro fihọ rovie kpohọ eria itieye no, keme a rẹ sae lẹlẹ jọ uwou rai hayo ọfisi rai rri ifoto ẹbẹba lọlọhọ ababọ uvumọ ohwo nọ ọ rẹ rue rai. Kọ fikieme Oleleikristi ọ rẹ rọ yọroma gaga kpahe onana?

Ugogo ẹjiroro jọ họ, Jesu ọ vẹvẹ omai unu inọ: “Kohwo kohwo nọ o re ri aye rite ẹguọlọ riẹ, ọ jọ eva lele ie bruẹnwae no.” (Mat. 5:28) Uzẹme, owezẹ imava nọ e rọo no u fo, yọ o rẹ jọ oware omaweromẹ. (Itẹ 5:15-19;1 Kọr. 7:2-5) Rekọ ẹjiroro ifoto ẹbẹba u wo ohẹriẹ no onana. Ifoto itieye na i re dhesẹ ọfariẹ-ogbe nọ o rẹ kpare isiuru iyoma họ ohwo udu, onọ Jesu ọ  vẹvẹ unu kpahe na. O rrọ vevẹ inọ, ohwo o te bi se ebe ọfariẹ hayo rri ifoto ẹbẹba, yọ ọ be kpare isiuru nọ Ọghẹnẹ o mukpahe inọ: “Wha kpe abọ akpọ nọ e ro oma rai no: igberedia, egbegbe, urusio nọ o rẹ vrẹ ẹta, eware iyoma eguọlọ, gbe eware amọfa eguọlọ, onọ orọ edhọ egọ.”—Kọl. 3:5.

Kọ ẹvẹ o rẹ jọ otẹrọnọ Oleleikristi o rri ifoto ẹbẹba ẹsiẹvo hayo isiava? Oware nọ o via kẹe na o sae jọ ọkpọ oware nọ o via kẹ Asaf nọ ọ ta nọ: “Rekọ mẹ oma mẹ, ukiọkọ omojọ awọ mẹ o vru no edhere, evawọ mẹ ukiọkọ omojọ izoruẹ.” Kọ ẹvẹ Oleleikristi ọ sai ro wo emamọ obroziẹ-iroro je wo udhedhẹ kugbe Ọghẹnẹ otẹrọnọ o kekaro fihọ rri ifoto ezae hayo eyae nọ e ba fihọ hayo imava nọ i bi bruẹnwae? Asaf omariẹ o wo udhedhẹ hẹ okenọ o wo ẹbẹbẹ keme ọ ta nọ: “Kẹdẹ kẹdẹ a be fa omẹ eviaviẹ, jẹ whọku omẹ kohiohiẹ kohiohiẹ.”—Ol. 73:2, 14.

U fo re Oleleikristi nọ o ru oware utioye ọ gwọlọ obufihọ. Ukoko na o rẹ kẹe obufihọ. Ebaibol ọ ta nọ: “Otẹrọnọ uzi o thọ ohwo obọ, whai otu nọ Ẹzi ọrọ oma, u fo re wha rehọ ẹzi oma-urokpotọ se ohwo otiọye ziheze, wha ri oma rai re.” (Gal. 6:1) Ọkpako ukoko ọvo hayo ivẹ e rẹ sai fi obọ họ kẹe, yọ “olẹ orọwọ u re siwẹ ohwo nọ ọ rẹ mọ; Ọnowo na ọ vẹte kpariẹ tovrẹ.” (Jem. 5:13-15) Ahwo nọ a nya bru ekpako na kẹ obufihọ nọ a sae rọ whaha uruemu ugbegbe nana a ruẹ no inọ u woma kẹ ae re a si kẹle Ọghẹnẹ wọhọ epanọ o jọ kẹ Asaf.—Ol. 73:28.

Rekọ Pọl ukọ na ọ ta nọ ahwo jọ nọ a raha uzi a rọwo kurẹriẹ no ‘egbegbe rai hi, te igberedha gbe ẹnwae-obro.’ * (2 Kọr. 12:21) Profẹsọ jọ nọ a re se Marvin R. Vincent o kere nọ ẹme Griki nọ a se “egbegbe” na “o whomahọ oghẹrẹ egbegbe nọ ọ rrọ tọtọtọ.” Oghẹrẹ ifoto ẹbẹba jọ i tube yoma vi uwoho ọzae avọ aye nọ a bi bruẹnwae. Ejọ nọ i tube yoma gaga họ, iwoho ezae nọ i re du ezae, eyae nọ i re lele eyae wezẹ, ahwo buobu nọ a re kuomagbe lele ohwohwo wezẹ, ahwo nọ a re lele erao wezẹ, emaha nọ a re lele wezẹ, ahwo buobu nọ a rẹ gba omọvo du, eyae nọ a re gb’oja kẹ yọ a bi lele ai wezẹ, hayo ohwo nọ a re thuru si lele wezẹ. Ahwo jọ a jariẹ evaọ oke Pọl “nọ otoriẹ rai u re biebi,” nọ i ‘zihe ruọ igheghẹ, jẹ rehọ oma rai kẹ eheri, jẹ rọ ogbogbọ ru eghẹrẹ eware igbegbe kpobi.’—Ẹf. 4:18, 19.

Pọl ọ fodẹ “egbegbe” re evaọ obe Ahwo Galesha 5:19. Ọzae jọ nọ o wuhrẹ kpahe egagọ evaọ obọ Britain o muẹrohọ inọ egbegbe nọ Pọl ọ fodẹ na “o rẹ sae jọ etenẹ dhesẹ oghẹrẹ isiuru nọ ohwo o re wo kẹ oware aghọ.” Oleleikristi vẹ ọ rẹ ta nọ iruemu ọfariẹ nọ ma fodẹ no na yọ ‘eware aghọ’ họ gbe nnọ e rẹ tọtọ oma ha? Pọl o ku ẹme na họ evaọ obe Ahwo Galesha 5:19-21 inọ “enọ ibi ru eware” igbegbe itieye na “a rẹ sai reuku uvie Ọghẹnẹ hẹ.” Fikiere, nọ ohwo o te wo uruemu ifoto ẹbẹba etọtọ iriwo, ẹsejọhọ yọ u kri no nọ o bi ro ru onana, yọ o bi siobọno hayo kurẹriẹ hẹ, ọ rẹ sae gbẹ jọ ukoko na ha. A re si ei no ukoko re a sae yọrọ ẹfuọ gbe emamọ ẹzi nọ ọ rrọ ukoko na.—1 Kọr. 5:5, 11.

U woma gaga inọ inievo jọ nọ i je rri ifoto ẹbẹba etọtọ vẹre a nya bru ekpako na, a te fi obọ họ kẹ ae siọ uruemu na ba. Jesu ọ hrẹ Ileleikristi obọ Sadis inọ: “Ru o nọ u kiọkọ ga gbe ọ nọ ọ hae ti whu no na, . . . Kareghẹhọ uwuhrẹ nọ who mi gbe o nọ who yo i, kru oyena re who kurẹriẹ, whọ gbẹ kparoma ha . . . whọ rẹ te riẹ oke nọ me ti bru owhẹ tha ha.” (Evia. 3:2, 3) Ohwo ọ rẹ sai kurẹriẹ, a vẹ rọ ere si ei no erae ze, wọhọ odẹme.—Jud 22, 23.

O tubẹ mai woma re mai omomọvo ma gbaemu inọ ma re fou kẹle oware ovo nọ u w’obọ kugbe iwoho ẹbẹba ha. Ẹhẹ, ma rẹ daoma mai kpobi re ma whaha uruemu iwoho ẹbẹba iriwo.

[Oruvẹ-obotọ]

[Ẹme nọ a fi ẹgba họ nọ ọ rrọ ẹwẹ-obe avọ 30]

U fo re Oleleikristi nọ o ru oware uyoma ọ gwọlọ obufihọ