“Iviena Rehọ Omai Ifoto”

Josué nọ ọ rrọ omọvo uviuwou Ebẹtẹle obọ Mexico o kpohọ okokohọ ubrotọ jọ. Nọ ẹdẹ avivẹ okokohọ na o kuhọ no, oniọvo nana ọ tẹ nyai rri ughe evaọ okpẹwho nọ a re se Querétaro. Ọzae-avọ-aye jọ nọ a re se Javier avọ Maru a tẹ ta kẹ Josué re ọ rẹhọ ae ifoto. Fikinọ ẹgọ oniọvo nana avọ inievo efa nọ i lele i rie e rrọ kpatiẹ ziezi yọ a fi ebaje okokohọ na họ, ọzae-avọ-aye na a tẹ nọ ae sọ ehaa jọ a bi no ze. Josué ọ tẹ ta kẹ ae nọ a rrọ okokohọ Isẹri Jihova, o te zizie ọzae-avọ-aye na re a nya ziọ okokohọ na evaọ Ẹdoka.

Ọzae-avọ-aye na a roro nọ oma o te vo ae nọ a tẹ nya keme iwu rai i fo iwu nọ a rẹ wha kpohọ oria utioye he. Ghele na, Josué o te se odẹ riẹ kẹ ae jẹ kẹ ae inọmba ifonu orọ uwou ogha nọ ọ be jọ ru iruo na.

U gbe Josué unu nọ Javier ọzae na ọ rọ ifonu sei nọ emerae ene e vrẹ. Javier avọ aye riẹ a kpohọ okokohọ na yọ a gwọlọ nọ Isẹri Jihova a nyaze ti wuhrẹ obe kugbe ai evaọ Okpẹwho Mexico nọ a jẹ rria. U kri hi, oniọvo jọ o te muọ Ebaibol họ ewuhrẹ kugbe Javier avọ Maru, aimava a te muọ iwuhrẹ họ ẹnya. Nọ emerae ikpe e vrẹ no, a te zihe ruọ iwhowho-uvie. Dede nọ aimava a kwa kpohọ ẹwho nọ a re se Toronto evaọ obọ Canada uwhremu na, a wo ẹnyaharo te epanọ a rọ họ-ame.

Uwhremu na, Javier ọ tẹ jọ ileta nọ o kere se Josué vuẹe oware nọ u ru rie kurẹriẹ. Ọ ta nọ: “Taure ma te ti kpohọ okokohọ na, mẹ avọ aye mẹ ma jiroro inọ ma rẹ gọ Ọghẹnẹ. Nọ ma ruẹ epanọ ẹgọ rai ọ kpatiẹ te, ma te roro nọ obọdẹ ẹgwae jọ wha bi no ze. Nọ ma te okokohọ na, oghẹrẹ nọ a ro dhesẹ oria nọ ma rẹ keria kẹ omai avọ uyoyou, nọ a ro fi obọ họ k’omai rri lele eria Ebaibol nọ a je se, gbe uruemu ahwo nọ a jọ okokohọ na u duobọte omai udu. O kẹ rai uye he inọ iwu nọ ma wha kpohọ ugheriwo e jọ omai oma.”

Eme ọ Solomọn ovie owareghẹ na i gine rugba evaọ oma Josué. Solomọn o kere nọ: “Evaọ ohiohiẹ kọ ibi ra, gbe evaọ owọwọ who si obọ ra no ho; keme whọ riẹ onọ u re ti woma ha, onana hayo oyena, hayo ai ivẹ i re ti woma.” (Ọtausi. 11:6) Kọ whọ sae rọ uvẹ kpobi nọ u rovie fihọ ta kẹ amọfa kpahe okokohọ nọ ọ be tha hayo ovuẹ ogbotu nọ a te kẹ? Jihova ọ sae rọ owhẹ si ahwo nọ ohọo gbe uruame orọ ẹme Ọghẹnẹ u be kpe ziọ ukoko na, wọhọ epanọ o via kẹ Javier avọ Maru.—Aiz. 55:1.

[Uwoho nọ o rrọ ẹwẹ-obe avọ 32]

No ẹkpẹlobọ kpohọ obọze: Alejandro Voeguelin, Maru Pineda, Alejandro Pineda, Javier Pineda, gbe Josué Ramírez evaọ uwou ogha Mexico