Joma Ghọghọ Fiki Ẹruore Mai
Joma Ghọghọ Fiki Ẹruore Mai
“Ẹruore uzuazọ ebẹdẹ bẹdẹ [ọ rrọ], onọ Ọghẹnẹ nọ ọ rẹ ya-erue he, ọ kpaokpa riẹ ugbanwẹdẹe.”—TAIT. 1:2.
ỌKIẸKPEMU
․․․․․
Ẹvẹ ma rọ riẹ nọ oghọghọ o rẹ jọ obọ odhiwu nọ omọvo ikpodhiwu na o te kru ẹrọwọ riẹ te urere?
․․․․․
Oghẹrẹ vẹ ẹruore ikpodhiwu na u ro kpomahọ ẹruore enọ e te rria otọakpọ?
․․․․․
Re ẹruore mai ọ ruẹsi rugba, didi oghẹrẹ “uzuazọ ẹfuọ gbe orọ Ọghẹnẹ” u fo nọ ma re yeri?
1. Ẹvẹ ẹruore nọ Jihova ọ kẹ omai o sai ro fi obọ họ kẹ omai thihakọ?
PỌL ukọ na ọ ta nọ Jihova yọ “Ọghẹnẹ ẹruore.” O fibae nọ Jihova ọ rẹ sae rehọ ‘oghọghọ gbe udhedhẹ vọ eva mai eva ẹrọwọ, re ma sai wo ẹruore eva ogaga ẹzi ọfuafo.’ (Rom 15:13) Nọ ma te wo ẹruore, ma rẹ sai thihakọ oware kpobi nọ ma rẹriẹ ovao ku, yọ ma re ti wo oghọghọ avọ udhedhẹ. Wọhọ epanọ o rrọ kẹ Ileleikristi nọ a rọ ẹzi wholo na, ẹruore otiọye ọ rẹ sae jọ ‘obọdẹ imuẹro’ rọkẹ ogbotu obuobu na. (Hib. 6:18, 19) Ẹruore mai ọ rẹ sai ru udu kie omai vi evaọ etoke ebẹbẹ uzuazọ, u re fi obọ họ kẹ omai kru ẹrọwọ mai.—Se Ahwo Hibru 2:1; 6:11.
2. Ẹruore ivẹ vẹ Ileleikristi a wo nẹnẹ, kọ fikieme “igodẹ efa” na a be rọ ta ẹme kpahe ẹruore otu nọ a rọ ẹzi wholo na?
2 Ẹruore ivẹ e rrọ rọkẹ Ileleikristi erọ oke mai na, yọ ọvo ohwo ọ rẹ sai wo. Enọ i kiọkọ otọakpọ nẹnẹ evaọ usu “uthuru okakao” na a wo ẹruore uzuazọ sebaewhuo evaọ obọ odhiwu, a re ti lele Kristi su wọhọ ivie gbe izerẹ. (Luk 12:32; Evia. 5:9, 10) “Otu obuobu” ọrọ “igodẹ efa” na a wo ẹruore uzuazọ ebẹdẹ evaọ aparadase otọakpọ evaọ otọ esuo Uvie Mesaya na. (Evia. 7:9, 10; Jọn 10:16) Igodẹ efa na a rẹ kareghẹhọ inọ re a sae zọ, a rẹ rọ uketha kẹ “imoni” Kristi nọ i wo ẹruore obọ odhiwu nọ e gbẹ rrọ otọakpọ. (Mat. 25:34-40) Wọhọ epanọ eyaa nọ a ya kẹ Ileleikristi nọ i wo ẹruore obọ odhiwu e te seba erugba ha na, ere ọvona o rrọ kẹ igodẹ efa nọ i wo ẹruore otọakpọ. (Se Ahwo Hibru 11:39, 40.) Joma kake ta kpahe ẹruore nọ Ọghẹnẹ o fihọ kẹ enọ a rrọ ẹzi wholo na.
ENỌ I TI KPOBỌ ODHIWU A WO “ẸRUORE EBẸDẸ”
3, 4. Oghẹrẹ vẹ a be rọ wariẹ uthuru okakao na “yẹ zihe ruọ ọkpokpọ, e ruọ ẹruore ebẹdẹ,” kọ ẹruore vẹ ọye?
3 Pita ukọ na o kere ileta ivẹ se Ileleikristi nọ i wo ẹruore obọ odhiwu na, o se rai enọ a “sanọ.” (1 Pita 1:1, 2) Pita o fi obọ họ kẹ omai riẹ eware buobu kpahe ẹruore nọ uthuru okakao na a wo. Pita o kere evaọ ileta ọsosuọ riẹ nọ: “Oghale u te Ọghẹnẹ na gbe Ọsẹ Ọnowo mai Jesu Kristi; fiki ohrọ ulogbo riẹ a rọ wariẹ omai yẹ zihe ruọ ọkpokpọ, e ruọ ẹruore ebẹdẹ fiki ẹkparomatha Jesu kristi no iwhuowhu, je wo ukuoriọ nọ o rẹ raha ha, nọ o kare izue, onọ o rẹ hiẹ hẹ, nọ a ruẹrẹ kpahe obọ odhiwu kẹ owhai, enọ a rehọ fiki ogaga Ọghẹnẹ rọ orọwọ rẹriẹ e ruọ usiwo nọ a ruẹrẹ kpahe i no, nọ o rẹ te jọ kẹ ae ẹdẹ urere. Wha ghọghọ eva onana.”—1 Pita 1:3-6.
4 Umutho Ileleikristi nọ Jihova ọ salọ re a lele Kristi su evaọ obọ odhiwu na, a ‘wariẹ e rai yẹ’ wọhọ emọ Ọghẹnẹ. Ẹzi ofuafo a rọ salọ ae re a su kugbe Jesu wọhọ ivie gbe izerẹ. (Evia. 20:6) Pita ọ ta nọ ‘ọwariẹ yẹ’ na u rovie uvẹ “ẹruore ebẹdẹ” fihọ kẹ ae, onọ o se “ukuoriọ nọ o rẹ raha ha, nọ o kare izue, onọ o rẹ hiẹ hẹ,” onọ a ruẹrẹhọ kẹ ae evaọ “obọ odhiwu.” Agbẹta nọ Ileleikristi nọ a wholo na a be rọ “ghọghọ” evaọ ẹruore rai na. Dede na, re ẹruore yena ọ sai rugba o gwọlọ nọ a re kru ẹrọwọ rai te urere.
5, 6. Fikieme o rọ gwọlọ nọ Ileleikristi nọ i wo ẹruore obọ odhiwu a re kru ẹrọwọ rai te urere?
5 Evaọ ileta avivẹ nọ Pita o kere, ọ tuduhọ ikpodhiwu na awọ inọ a ‘wo ajọwha re a sai ru use avọ esanọ rai ga.’ (2 Pita 1:10) O gwọlọ nọ a rẹ daoma gaga re a sai wo ẹrọwọ, omarọkẹ iruo Ọghẹnẹ, gbe uyoyou. Pita ọ ta nọ: “Enana kpobi e tẹ rọ oma rai . . . i re si owhai no oyẹlẹ, wha gbẹ jọ ababọ ubi eva ẹriẹ Jesu Kristi Ọnowo mai hi.”—Se 2 Pita 1:8.
6 Evaọ ovuẹ Jesu se ekpako ukoko nọ a rọ ẹzi wholo evaọ obọ Filadelfia, Esia Minor, ọ ta nọ: “Fiki epanọ who koko eme mẹ nọ who je dikihẹ ga na, me ti si owhẹ no ukpokpoma akpọ na, nọ u ti te ahwo nọ a riẹ eva. Mẹ te tha vẹrẹ; kru o nọ who wo ga, re ohwo ọvo ọ se owhẹ etu-uvie ra ba emio.” (Evia. 3:10, 11) Nọ Oleleikristi nọ o wo ẹruore obọ odhiwu o gbe kru ẹrọwọ riẹ te urere he ọ rẹ sai wo “etu-uvie oruaro” nọ a ya eyaa riẹ kẹ ae na ha.—1 Pita 5:4; Evia. 2:10.
ẸRUỌ UVIE NA
7. Obọdẹ ẹruore vẹ Jud ọ ta ẹme te evaọ ileta riẹ?
7 Oware wọhọ ukpe avọ 65 ọrọ ekele oke mai na, Jud nọ avọ Jesu a rrọ oniọvo ọ ta evaọ ileta riẹ inọ ibe ileleikristi riẹ nọ a rọ ẹzi wholo na yọ “otu ahwo nọ a se.” (Jud 1; Hib. 3:1) O je ti kere se ai kpahe ẹruore uzuazọ ọrọ ‘usiwo nọ a wo kugbe’ wọhọ ikpodhiwu. (Jud 3) Ukpoye o te kere kpahe eware efa nọ i wuzou gaga, evaọ obọ urere ileta na ọ ta kpahe uvi ẹruore nọ a wo inọ: “Enẹna, a jọ ọye nọ ọ rẹ sae yọre owhai no ekie, ọ vẹ jẹ sai ru owhai ewata avọ oghọghọ, eva oruaro riẹ, rọkẹ Ọghẹnẹ ọvuọvo na, Osiwi mai fiki Jesu Kristi Ọnowo mai, oruaro, ogaga, adhẹ gbe udu-ogaga i tei ẹsikpobi gbe enẹna je rite bẹdẹ bẹdẹ.”—Jud 24, 25.
8. Wọhọ epanọ o rrọ obe Jud 24, eme u dhesẹ nọ oghọghọ o rẹ jọ obọ odhiwu nọ omọvo enọ a salọ na o te kru ẹrọwọ riẹ te urere?
8 Avro ọ riẹ hẹ, okpodhiwu kpobi ọ gwọlọ nọ Ọghẹnẹ ọ sẹro riẹ re ọ seba ezoruẹ. Ẹruore nọ a wo no Ebaibol na ze họ, Jesu Kristi ọ te kpare ai no uwhu ze, a vẹ te jọ gbagba evaọ obọ odhiwu kugbe Ọghẹnẹ avọ oghọghọ ulogbo. Nọ omọvo enọ a rọ ẹzi wholo na o te whu, imuẹro e riẹ inọ Ọghẹnẹ ọ te “kpare iẹ eva oma ẹzi” oma nọ “u re gbo ho . . evaọ oruaro.” (1 Kọr. 15:42-44) Otẹrọnọ “a rẹ ghọghọ obọ odhiwu fiki ọrahaizi ọvo nọ o kurẹriẹ,” dai roro epanọ oghọghọ o rẹ jọ obọ odhiwu te nọ omọvo inievo Kristi o te kru ẹrọwọ riẹ evaọ otọakpọ rite ẹdẹ uwhu. (Luk 15:7) Jihova avọ ikọ odhiwu riẹ a re lele ọnọ a rọ ẹzi wholo “ghọghọ” nọ o te kpohọ odhiwu.—Se 1 Jọn 3:2.
9. Ẹvẹ ẹthẹ uzuazọ nọ o rovie fihọ kẹ ileleikristi nọ a wholo na o rọ rrọ “vevẹ,” kọ ẹvẹ ẹruore nana o bi kpomahọ ikpodhiwu na nọ e gbẹ rrọ otọakpọ?
9 Epọvo na Pita o kere kpahe Ileleikristi nọ a salọ na inọ a te kru ẹrọwọ rai te urere, a ti “rovie ẹthẹ uzuazọ ebẹdẹ bẹdẹ uvie Ọnowo gbe Osiwi mai Jesu Kristi fihọ vevẹ kẹ [ai].” (2 Pita 1:10, 11) “Ẹthẹ uzuazọ” nọ a ti rovie fihọ kẹ ae evaọ obọ odhiwu na o te lẹliẹ ai lo evaọ oruaro Ọghẹnẹ. Ẹthẹ uzuazọ na nọ o ti rovie fihọ kẹ ae “vevẹ” o rẹ sai je dhesẹ eghale buobu nọ a ti wo nọ a te kru ẹrọwọ rai te urere. O te kẹ ae oghọghọ nọ a te kareghẹhọ epanọ a ro kru ẹrọwọ rai te urere. Avro ọ riẹ hẹ, ẹruore nana ọ be kẹ Ileleikristi nọ a salọ nọ e gbẹ rrọ otọakpọ ẹgba nọ a bi ro “kru iroro rai ga.”—1 Pita 1:13.
“ẸRUORE” NỌ IGODẸ EFA NA A WO
10, 11. (a) Ẹruore vẹ ọ rrọ kẹ igodẹ efa na? (b) Oghẹrẹ vẹ Kristi gbe “odhesẹvia emọ Ọghẹnẹ” u ro kpomahọ ẹruore enọ e te rria otọakpọ?
10 Pọl ukọ na o kere kpahe ẹruore “emọ Ọghẹnẹ” nọ a rọ ẹzi wholo na wọhọ “ereuku kugbe Kristi.” Kẹsena ọ tẹ fodẹ obọdẹ ẹruore nọ Jihova ọ kẹ igodẹ efa nọ a rẹ sai kele mu hu inọ: “Ọwhọ ẹruore enama ọ be hẹrẹ odhesẹvia emọ Ọghẹnẹ [ikpodhiwu na]. Keme enama na e jọ ọthobọ eware ifofe, orọnikọ oreva riẹ hẹ, rekọ fiki epa ọnọ o ru họ ọtahobọ eva ẹruore; kemena ukpuzou enama na a reti si [ai] no igbo egbogbo eruọ eva uvẹ oruaro emọ Ọghẹnẹ.”—Rom 8:14-21.
11 Jihova ọ kẹ ahwo-akpọ “ẹruore” okenọ ọ ta nọ ọ te rọ ẹkwoma ‘ubi’ nọ ọ ya eyaa riẹ siwi ahwo-akpọ no obọ Setan, “oriọvọ anwae na.” (Evia. 12:9; Emu. 3:15) Abọ ọsosuọ ‘ubi’ oyena họ Jesu Kristi. (Gal. 3:16) Jesu ọ rọ uwhu gbe ẹkparomatha riẹ kẹ ahwo-akpọ imuẹro inọ a ti wo ufuoma no igbo uwhu gbe uzioraha. Nọ “odhesẹvia emọ Ọghẹnẹ” o te muhọ no ẹsiẹ ẹruore igodẹ efa na o ti ro muhọ erugba. Ikpodhiwu na họ abọ avivẹ ‘ubi’ na. A ti ‘dhesẹ oma via’ okenọ a ti lele Kristi raha uyerakpọ omuomu Setan nana. (Evia. 2:26, 27) Onana u ti ru nọ igodẹ efa nọ e te zọ evaọ etoke uye ulogbo na a ti ro wo esiwo ebẹdẹ.—Evia. 7:9, 10, 14.
12. Irere vẹ ahwo-akpọ a ti wo nọ ikpodhiwu na a te dhesẹ oma via no?
12 A rẹ ruẹ unu gbiku ufuoma nọ o te jọ kẹ ahwo-akpọ evaọ etoke Esuo Odu Ikpe Kristi na ha. Evaọ oke yena, “emọ Ọghẹnẹ” nọ e rrọ utu ikpodhiwu na a te wariẹ ‘dhesẹ oma via’ nọ a ti lele Kristi ru iruo wọhọ izerẹ, nọ a ti fi obọ họ kẹ ahwo-akpọ wo erere no idhe ẹtanigbo Kristi na ze. Ahwo-akpọ a ti wo ufuoma no uzioraha gbe uwhu evaọ otọ esuo Ọghẹnẹ. A vẹ te rọ ẹmẹrera siwi ahwo-akpọ nọ a yoẹme kẹ Ọghẹnẹ “no igbo egbogbo.” Nọ a te kru ẹrọwọ rai evaọ etoke odu ikpe na soso gbe evaọ etoke odawọ urere nọ u ti lele iei, a ve ti kere odẹ rai fihọ ‘obe uzuazọ’ na bẹdẹ bẹdẹ. A ve ti wo ufuoma orọ “oruaro emọ Ọghẹnẹ.” (Evia. 20:7, 8, 11, 12) Ẹruore na o woma kẹhẹ.
JỌ ẸRUORE MAI Ọ JỌ OMAI IRORO ẸSIKPOBI
13. Fikieme ẹruore mai o ti ro rugba, kọ oke vẹ Kristi o ti ro dhesẹ oma via?
13 Ileta ivẹ nọ Pita o kere na i re fi obọ họ kẹ ikpodhiwu na gbe igodẹ efa na tẹrovi ẹruore rai. Ọ ta nọ orọnikọ fiki iruo rai a sai ro wo ẹruore nana ha rekọ fiki aruoriwo Jihova. O kere nọ: “Wha gale ẹruore rai vi aruoriwo nọ obi bru owhai tha oke ẹrọvia Jesu Kristi.” (1 Pita 1:13) Kristi o ti dhesẹ oma via okenọ ọ te nyaze te hwosa kẹ ilele riẹ nọ i wo ẹrọwọ jẹ raha ahwo nọ a riẹ Ọghẹnẹ hẹ.—Se 2 Ahwo Tẹsalonika 1:6-10.
14, 15. (a) Re ma sai wo ẹruore mai họ iroro ẹsikpobi, eme ma rẹ tẹrovi? (b) Didi ohrẹ Pita ọ kẹ?
14 Re ẹruore mai ọ ruẹse jọ omai iroro, ma re wo “ẹdẹ Ọnowo” na họ iroro ẹsikpobi, jẹ rọ uzuazọ mai dhesẹ onana via. Ẹdẹ Jihova ọ te raha “ihru” hayo esuo ahwo-akpọ, gbe “akpọ” koyehọ ahwo omuomu gbe “ekwakwa” nọ e rrọ eva akpọ na. Pita o kere nọ: “Didi oghẹrẹ ahwo wha [te] jọ . . . , nọ owha be hẹrẹ je bi rẹro ẹtha ẹdẹ Ọghẹnẹ vẹrẹ vẹrẹ [na], keme eva oyena ihru e jẹ te wara e vẹ to, ekwakwa na erae e vẹte ghra ae no!”—2 Pita 3:10-12.
15 “Ihru ekpokpọ [Uvie Kristi] avọ akpọ ọkpokpọ [ahwo okiẹrẹe]” e rẹ te rehọ ẹta “ihru” gbe “akpọ” nọ e rrọ enẹna. (2 Pita 3:13) Pita ọ tẹ ta kẹ omai oware nọ u fo nọ ma re ru nọ ma be “hẹrẹ” hayo tẹrovi ẹruore akpọ ọkpokpọ nọ a ya eyaa riẹ na inọ: “Fikiere, iyoyou, fiki epanọ wha bi rẹro eware nana, wha fi-ududhe re ọ ruẹ owhai ababọ epe hayo afuẹwẹ, rekọ udhedhẹ.”—2 Pita 3:14.
RỌ UZUAZỌ RA DHESẸ ẸRUORE RA VIA
16, 17. (a) Didi oghẹrẹ “uzuazọ ẹfuọ gbe orọ Ọghẹnẹ” u fo nọ ma re yeri? (b) Ẹvẹ ẹruore mai o ti ro rugba?
16 Orọnọ ma re wo ẹruore mai họ iroro ọvo ho, o gwọlọ nọ ma re yeri uzuazọ nọ o rọwo kugbe ẹruore mai. Ma rẹ daoma yeri uzuazọ nọ o rẹ were Jihova. Re ma yeri “uzuazọ ẹfuọ” o gwọlọ nọ ma rẹ “yọrọ uruemu ezi udevie otu Egedhọ” ẹsikpobi. (2 Pita 3:11; 1 Pita 2:12) Mai ‘ohwo o re you ohwo.’ Onana u dhesẹ nọ ma rẹ whaha oware nọ u re fi ẹhẹriẹ họ okugbe nọ ọ rrọ udevie inievo akpọ-soso mai, gbe inievo nọ e rrọ ukoko mai. (Jọn 13:35) “Uzuazọ ẹfuọ gbe orọ Ọghẹnẹ” u dhesẹ eware nọ ma re ru nọ i re ru usu mai kugbe Jihova ga viere. Eware wọhọ olẹ, isase Ebaibol ikẹdẹ kẹdẹ, uwuhrẹ omobọ ohwo, egagọ uviuwou, gbe “ovuẹ usiuwoma uvie na” nọ ma re whowho ẹsikpobi.—Mat. 24:14.
17 Ma gwọlọ jọ oghẹrẹ ahwo nọ Jihova ọ rẹ jẹrehọ, enọ e te zọ evaọ okenọ a te “raha” uyerakpọ omuomu nana. Ẹruore mai o ve ti rugba, “ẹruore uzuazọ ebẹdẹ bẹdẹ, onọ Ọghẹnẹ nọ ọ rẹ ya-erue he, ọ kpaokpa riẹ ugbanwẹdẹe.”—Tait. 1:2.
[Enọ Uwuhrẹ]
[Uwoho nọ o rrọ ẹwẹ-obe avọ 22]
A rẹ wariẹ ikpodhiwu na “yẹ zihe ruọ ọkpokpọ, e ruọ ẹruore ebẹdẹ”
[Uwoho nọ o rrọ ẹwẹ-obe avọ 24]
Fi obọ họ kẹ ahwo uviuwou ra wo ẹruore na họ iroro ẹsikpobi
