Jihova Ọ Riẹ Epanọ O Re Ro Siwi Idibo Riẹ

“Ọnowo ọ riẹ epanọ o re ro siwẹ ahwo-Ọghẹnẹ no edawọ.”—2 PITA 2:9.

ẸVẸ O SAE RO MU OMAI ẸRO INỌ JIHOVA:

O re koko oke nọ ọ tẹ gwọlọ ru ẹjiroro riẹ gba?

Ọ te rọ ogaga riẹ siwi idibo riẹ?

Ọ riẹ epanọ uye ulogbo na o te rọ romavia?

1. Eme ọ te via evaọ etoke ‘uye ulogbo’ na?

ẸDẸ nọ Ọghẹnẹ ọ te raha akpọ Setan ọ te tha idudhe. (1 Tẹs. 5:2, 3) Nọ “ẹdẹ ologbo ỌNOWO na” o te muhọ no, ozighi ọ te da akpọ na kpobi fia. (Zef. 1:14-17) Ẹgaga ọ te jọ oria kpobi. O te jọ etoke uye, “u tioye o te jọ no emuhọ akpọ na ze ri te enẹ hẹ.”—Se Matiu 24:21, 22.

2, 3. (a) Eme idibo Jihova a te rẹriẹ ovao dhe evaọ etoke ‘uye ulogbo’ na? (b) Eme ọ rẹ lẹliẹ omai wo imuẹro nọ Jihova o ti siwi idibo riẹ evaọ obaro?

² Nọ ‘uye ulogbo’ na u te bi te obọ ekuhọ no, “Gọg, nọ ọ rọ obọ otọ Magọg” ọ vẹ te rẹriẹ ovao ku idibo Ọghẹnẹ. Evaọ etoke nana, “ogbotu ẹmo” ọ vẹ te wọso idibo Ọghẹnẹ “wọhọ epanọ ẹgho o re ruru otọ.” (Izik. 38:2, 14-16) Uvumọ ohwo-akpọ ọ te thọ idibo Ọghẹnẹ hẹ. Ọghẹnẹ ọvo ọ te thọ ai. Eme a ti ru nọ a tẹ rẹriẹ ovao ku ewegrẹ nọ e gwọlọ e rai kpe?

³ Otẹrọnọ whẹ yọ odibo Jihova, kọ who wo evaifihọ inọ Jihova ọ rẹ sae thọ idibo riẹ gbe nnọ o ti ru ere evaọ etoke uye ulogbo na? Pita ukọ na o kere nọ: ‘Ọnowo ọ riẹ epanọ o re ro siwẹ ahwo riẹ no edawọ, ọ vẹ raha enọ i kiẹrẹe he kufiẹ evaọ ẹdẹ ẹdhoguo.’ (2 Pita 2:9) Ma te roro kpahe oghẹrẹ nọ Jihova o ro siwi idibo riẹ evaọ oke nọ u kpemu, o rẹ lẹliẹ omai wo imuẹro nọ o ti siwi omai evaọ obaro. Joma ta kpahe iriruo esa jọ nọ e te kẹ omai imuẹro inọ Jihova ọ rẹ sai siwi idibo riẹ.

AHWO JỌ A ZỌ EVAỌ ETOKE OWHE AKPỌ-SOSO

4. Re Owhe na o te muhọ, eme o gwọlọ nọ Noa avọ uviuwou riẹ a re ru evaọ ẹruoke?

⁴ Joma kake ta kpahe owhe ologbo nọ o ku  evaọ edẹ Noa. Re oreva Jihova o ruẹsi rugba, a re ru oware kpobi evaọ ẹruoke. U fo nọ Noa avọ uviuwou riẹ a rẹ bọ okọ na je su erao ro eva riẹ re okposo na o te muhọ. Ikuigbe obe Emuhọ na o ta ha inọ Jihova ọ hẹrẹ re a bọ okọ na re no re ọ tẹ te jiroro oke nọ ọ te rọ rehọ okposo na ze, keme ọ be ruawa ha inọ a te sae bọ okọ na re he evaọ oke nọ o fihọ. Ukpoye, oke krẹkri taure ọ tẹ ta kẹ Noa inọ jọ ọ bọ okọ na, Ọghẹnẹ o fi oke nọ Owhe na o ti ro muhọ họ no. Ẹvẹ ma rọ riẹ?

5. Eme Jihova ọ ta evaọ Emuhọ 6:3, kọ ukpe vẹ ọ rọ ta ẹme yena?

⁵ Ebaibol ọ ta nọ Jihova ọ ta ẹjiroro riẹ via evaọ obọ odhiwu. Wọhọ epanọ Emuhọ 6:3 o dhesẹ, Jihova ọ ta nọ: “Ẹzi mẹ ọ gbẹ te ria eva ohwo bẹdẹ hẹ, epanọ ọ rọ uwo, rekọ ikpe riẹ e rẹ te jọ udhukpe ozeza.” Orọnikọ Jihova ọ be jọ etenẹ ta kpahe unuikpe uzuazọ ohwo-akpọ họ. Jihova ọ be ta kpahe okenọ ọ te rọ raha ahwo omuomu. * Nọ orọnọ Owhe na o muhọ evaọ ukpe 2370 re Kristi ọ tẹ te ze na, onana u dhesẹ nọ Ọghẹnẹ o whowho ẹme riẹ na via evaọ ukpe 2490 re Kristi ọ tẹ te ze. Evaọ oke yena Noa ọ jọ ikpe egba ene gbe udhone (480). (Emu. 7:6) Nọ ikpe 20 e vrẹ no, evaọ ukpe 2470 re Kristi ọ tẹ te ze, Noa o te mu emọ họ eyẹ. (Emu. 5:32) Oware wọhọ ikpe udhusoi i kiọkọ re Owhẹ na o te muhọ, yọ Jihova ọ re vuẹ Noa oware nọ Noa o re ru nọ ahwo a te rọ zọ họ. Ẹvẹ Jihova ọ te hẹrẹ kri te re ọ tẹ vuẹ Noa?

6. Oke vẹ Jihova ọ rọ vuẹ Noa nọ jọ o ku okọ?

⁶ O wọhọ nọ Jihova ọ hẹrẹ ikpe buobu taure ọ tẹ te vuẹ Noa oware nọ ọyomariẹ o bi ti ru. Fikieme ma rọ ta ere? Ebaibol ọ ta nọ emọ Noa a kpako no je wo eyae no evaọ oke nọ Jihova ọ ta kẹ Noa inọ jọ ọ bọ okọ na. Jihova ọ ta kẹe inọ: “Mẹ avọ owhẹ a be te re ọvọ; whọ vẹ te nyaze obọ okọ na, te owhẹ gbe emezae ra, gbe aye ra, gbe eyae emezae ra.” (Emu. 6:9-18) Fikiere, o sae jọnọ ikpe 40 hayo 50 ọvo i kiọkọ re Owhe na ọ tẹ te ze a rọ ta kẹ Noa nọ jọ o ku okọ na.

7. (a) Ẹvẹ Noa avọ uviuwou riẹ a ro dhesẹ nọ a wo ẹrọwọ? (b) Oke vẹ Ọghẹnẹ ọ rọ ta kẹ Noa unu edẹ nọ i kiọkọ re oso na o te muhọ?

⁷ Ababọ avro, nọ iruo ebabọ na e be nyaharo na, Noa avọ uviuwou riẹ a je roro kpahe oghẹrẹ nọ Ọghẹnẹ o ti ro ru ẹjiroro riẹ gba gbe okenọ okposo na o ti ro muhọ. Dede nọ a riẹ enana kpobi hi, a ruabọhọ ebabọ okọ na. Ebaibol na ọ ta nọ: “Noa o te ru onana; jegbe eware kpobi nọ Ọghẹnẹ ọ ta kẹ e.” (Emu. 6:22) Uwhremu na Jihova ọ tẹ ta kẹ Noa inọ edẹ ihrẹ ikiọkọ re oso na o te muhọ. Noa avọ uviuwou riẹ a tẹ rehọ omoke nọ ukiọkọ su erao ruọ eva okọ na. Fikiere, “eva ukpe avọ egba-ezeza eva uzuazọ Noa, eva amara avivẹ, edẹ kpegbihrẹ riẹ” nọ Ọghẹnẹ o siobọno ame no odhiwu ze, yọ eware kpobi e ruẹrẹ oma kpahe no.—Emu. 7:1-5, 11.

8. Ẹvẹ ikuigbe Owhe edẹ Noa o rọ kẹ omai imuẹro inọ Jihova ọ riẹ oke nọ o re ro siwi idibo riẹ?

⁸ Ikuigbe nana i dhesẹ nọ Jihova yọ Ọnọ o re koko oke gbe Osiwi. Nọ Jihova o bi kele oke nọ uyero-akpọ  nana u ti ro kuhọ na, o rẹ sai mu omai erọ inọ ẹjiroro Jihova o ti rugba evaọ ‘ẹdẹ gbe oke’ nọ o fihọ.—Mat. 24:36; se Habakuk 2:3.

ỌGHẸNẸ O SIWI RAI EVAỌ ABADE ỌWAWAE NA

9, 10. Ẹvẹ Jihova ọ rọ rehọ emọ Izrẹl bẹbẹ egbaẹmo Ijipti ruọ ẹta?

⁹ Obọnana ma ruẹ no inọ Jihova o re koko oke nọ ọ tẹ gwọlọ ru ẹjiroro riẹ gba. Oriruo avivẹ nọ ma te ta ẹme kpahe na o dhesẹ ẹjiroro ọfa nọ ma sai ro fievahọ Jihova inọ ọ te rehọ ogaga ulogbo riẹ siwi idibo riẹ je ru ẹjiroro riẹ gba. Ẹsikpobi Jihova o re siwi idibo riẹ, rekọ ẹsejọ ọ rẹ kẹ ae uvẹ te epanọ ewegrẹ rai i re ro keke ae ba re ọyomariẹ ọ ruẹsi kpe ewegrẹ na. Ere o ru okenọ o siwi emọ Izrẹl no igbo Ijipti.

¹⁰ Ẹsejọhọ emọ Izrẹl nọ i no Ijipti a bu te ima esa (3,000,000). Jihova ọ rọ Mosis su ae evaọ oghẹrẹ nọ Fẹro o je ro roro nọ emọ Izrẹl a riẹ edhere he. (Se Ọnyano 14:1-4.) Fẹro o kie ẹta na, o te su egbaẹmo riẹ le emọ Izrẹl, o te ko ae họ Abade Ọwawae na. O wọhọ nọ a gbẹ sae vabọ họ. (Ọny. 14:5-10) Uzẹme riẹ họ, emọ Izrẹl a jọ ọza ha. Fikieme? Oke yena Jihova ọ ruẹrẹ oma kpahe no re o siwi ae.

11, 12. (a) Ẹvẹ Jihova ọ rọ dhogbo bru idibo riẹ? (b) Eme ọ via nọ Ọghẹnẹ ọ dhogbo bru ai, kọ eme ikuigbe nana i wuhrẹ omai kpahe Jihova?

¹¹ “Ẹgho ọlala” nọ o je su emọ Izrẹl na ọ ruọ emu rai, u te fi ebi họ udevie rai avọ egbaẹmo Fẹro nọ a gbẹ jẹ rọ ruẹ ae he. Rekọ ẹgho ọlala na ọ jẹ rọ edhere igbunu kẹ emọ Izrẹl elo makọ evaọ aso. (Se Ọnyano 14:19, 20.) Kẹsena Jihova ọ tẹ rehọ ofou ọgaga no obọ ovatha-ọre ze rọ hẹriẹ abade na, “zihe abade na họ otọ oyaya.” Onana o rehọ oke keme ikuigbe na e ta nọ: “Ahwo Izrẹl a tẹ nya otọ oyaya ruọ eva abade.” Whọ tẹ rehọ oghẹrẹ nọ egbaẹmo Fẹro a je siawọ vẹrẹ te wawọ onya emọ Izrẹl, o rẹ  wọhọ nọ emọ Izrẹl a dikihẹ oria ovo. Ghele na, oghẹrẹ ovuovo nọ a re ro le emọ Izrẹl mu o rrọ họ keme Jihova ọ jẹ họre kẹ ae. Ọghẹnẹ ọ tẹ “rẹriẹ ovawo ku ogbotu Ijipti, ọ tẹ kparobọ vi ogbotu Ijipti na. Oluhu ọ tẹ tamu etẹ ekẹkẹ rai fikiere e gbẹ jẹ sai siawọ họ.”—Ọny. 14:21-25.

¹² Nọ emọ Izrẹl a te abọdekọ abade na no, Jihova ọ tẹ ta kẹ Mosis inọ: “Riẹ obọ ra ri abade na, re ame na o zihe bru ahwo Ijipti, gbe ekẹkẹ rai, gbe ahwo-isi rai.” Nọ egbaẹmo na a be gwọlọ epanọ a rẹ rọ dhẹ no ame nọ o bi zurie bru ae ze na, “ỌNOWO na ọ tẹ jo eva ethẹ reghe ae aro.” A gbẹ sae vabọ họ. “Ọvuọvo rai o kiọkọ họ.” (Ọny. 14:26-28) Enẹ Jihova o ro dhesẹ nọ o wo ogaga nọ o re ro siwi idibo riẹ evaọ otọ ẹbẹbẹ kpobi.

AHWO JỌ A ZỌ OKE NỌ A RAHA JERUSALẸM

13. Eme Jesu ọ ta kẹ ilele riẹ, kọ onọ vẹ o rẹ sae jọ ilele riẹ udu kpahe ẹme nọ ọ ta kẹ ae na?

¹³ Jihova ọ riẹ epanọ eware e te via nọ ẹjiroro riẹ o re ro rugba. Epanọ onana u wuzou te u dhesẹ oma via evaọ oriruo avesa nọ ma be te ta ẹme te na, okenọ a ko Jerusalẹm họ evaọ ikpe-udhusoi ọsosuọ. Jihova ọ rehọ ẹkwoma Ọmọ riẹ kẹ Ileleikristi nọ e jẹ rria Jerusalẹm gbe Judia unuovẹvẹ kpahe epanọ a sae rọ zọ nọ ọraha o ti te Jerusalẹm evaọ ukpe avọ 70 ọrọ ekele oke omai na. Jesu ọ ta nọ: “Nọ wha ruẹ oware aghọ ofofe nọ Daniẹl ọruẹaro ọ ta na, [nọ] u dikihẹ eva oria ẹri . . . kẹsena enọ e rọ eva Judia a vẹ te dhẹ kpobọ igbehru.” (Mat. 24:15, 16) Rekọ ẹvẹ ilele Jesu a sae rọ riẹ nọ eruẹaruẹ nana i te bi rugba?

14. Ẹvẹ eware nọ e jẹ via i ro ru ẹme Jesu na vẹ?

¹⁴ Nọ eware i muhọ ẹvia no, ẹme nọ Jesu ọ ta na o te ti muhọ evẹ kẹ ilele riẹ. Evaọ ukpe 66 ọrọ ekele oke omai na, Cestius Gallus o te su egbaẹmo Rom ziọ Jerusalẹm te whaha ọwọsuọ nọ ọ jọ udevie ahwo Ju. Nọ otu ọwọsuọ ahwo Ju nọ a je se Zilọt a dhẹ dhere etẹmpol na, egbaẹmo Rom a te muọ igbẹhẹ etẹmpol na họ ekporo. Rọkẹ Ileleikristi nọ e jaja aro vi, oware nọ o be via na o rrọ vevẹ. Egbaẹmo Rom avọ iruẹru edhọgọ rai nọ a dikihẹ kẹle igbẹhẹ etẹmpol na họ “oware aghọ” nọ o rrọ “oria ẹri” na. Oke u te no nọ ilele Jesu a rẹ rọ “dhẹ kpobọ igbehru.” Kọ ẹvẹ a te sae rọ dhẹ no okpẹwho nọ egbaẹmo e wariẹ họ na? Oware nọ a rẹro riẹ hẹ o be te via.

15, 16. (a) Uthubro vẹ Jesu ọ kẹ, kọ ẹvẹ o rọ roja re ilele riẹ a ru lele ẹme riẹ? (b) Eme ma re ru re ma sai wo esiwo?

¹⁵ Gheghe gheghe Cestius Gallus  avọ egbaẹmo riẹ a te kuomarẹriẹ no Jerusalẹm. Otu Zilọt na a te mu ai họ ele. Obọnana nọ itu ivẹ na a no okpẹwho na no na, uvẹ u te rovie fihọ nọ ilele Jesu a rọ dhẹ no okpẹwho na. Jesu ọ ta kẹ ilele riẹ vevẹ inọ jọ a nyase eware rai kpobi ba re a dhẹ no okpẹwho na ababọ oke oraha. (Se Matiu 24:17, 18.) Kọ o ginẹ gwọlọ nọ a re no okpẹwho na ababọ oke oraha? U kri hi, uyo onọ na o tẹ romavia. Nọ edẹ jọ e ruemu no, otu Zilọt na a te zihe ze, a tẹ jẹ gba ahwo Jerusalẹm gbe Judia họ re a kuomagbe ae. Ozighi ọ tẹ te da okpẹwho na fia keme itu ọwọsuọ buobu erọ ahwo Ju e tẹ jẹ họre ohwohwo. Re ohwo ọ sae dhẹ no okpẹwho na o tẹ jọ bẹbẹ. Nọ ahwo Rom a ti zihe ze evaọ ukpe avọ 70 C.E., ohwo ọvo ọ gbẹ sae dhẹ no okpẹwho na ha. (Luk 19:43) A ko ohwo kpobi nọ a dihọ okpẹwho na họ. Ileleikristi nọ a gaviezọ kẹ ẹme Jesu jẹ dhẹ kpobọ igbehru a zọ. Ileleikristi yena a rọ ẹro ruẹ inọ Jihova ọ riẹ epanọ o re ro siwi idibo riẹ. Eme ma re wuhrẹ no onana ze?

¹⁶ Nọ uye ulogbo na u te muhọ no, o te gwọlọ nọ Ileleikristi a re ru lele Ẹme Ọghẹnẹ gbe ekpọvio ukoko riẹ. Wọhọ oriruo, ẹme nọ Jesu ọ ta inọ jọ a “dhẹ kpobọ igbehru” na u wo otofa kẹ omai nẹnẹ. Ma re riẹ oghẹrẹ nọ odhẹ mai o te jọ họ. * Dede na, ma wo imuẹro inọ Jihova o ti fi obọ họ kẹ omai riẹ oghẹrẹ nọ o te jọ gbe oware nọ u fo nọ ma re ru. Nọ orọnọ ẹmeoyo o ti siwi omai na, u fo re ma nọ omamai nọ: ‘Kọ mẹ be gaviezọ kẹ ehrẹ nọ Jihova ọ be kẹ idibo riẹ nẹnẹ? Kọ me re yoẹme vẹrẹ manikọ o rẹ jọ bẹbẹ k’omẹ?’—Jem. 3:17.

A BE RUẸRẸ OMAI HỌ KẸ OWARE NỌ O RRỌ OBARO THA

17. Eme eruẹaruẹ Habakuk i dhesẹ kpahe ohọre nọ a te wọ bru idibo Ọghẹnẹ?

¹⁷ Joma wariẹ ta kpahe ọwọsuọ Gọg nọ ma fodẹ evaọ emuhọ na. Evaọ eruẹaruẹ nọ i wobọ kugbe onana, Habakuk ọ ta nọ: “Me yo, oma mẹ u te nuhu, igbenu mẹ e tẹ variẹ nọ me yo edo na; enwa mẹ i te gbo no, ẹ jẹ owọ mẹ u te nuhu. Mẹ rẹ te rọ oma totọ hẹrẹ ẹdẹ nọ uye [Ọghẹnẹ] u ti te ahwo [egbaẹmo ewegrẹ] nọ a te tha te raha omai.” (Hab. 3:16) Nọ Habakuk o yo nọ ewegrẹ e be wọ ohọre bru idibo Ọghẹnẹ ze, oma riẹ u te je nuhu, igbenu riẹ e tẹ jẹ variẹ, ẹgba o te noi oma. Oware nọ o via kẹ Habakuk na u dhesẹ nọ okenọ Gọg ọ te wọ ẹmo bru omai ze ozọ o sai mu omai re. Dede na, o ruọ ọruaro na inọ ọ rẹ hẹrẹ ẹdẹ ologbo Jihova avọ evaifihọ inọ Jihova o ti siwi idibo riẹ. Ma rẹ sai wo evaifihọ evona.—Hab. 3:18, 19.

18. (a) Fikieme ma gbẹ dhozọ uye nọ o rrọ obaro tha na ha? (b) Eme ma te ta kpahe evaọ uzoẹme nọ o rrọ aro na?

¹⁸ Iriruo esa nọ ma ta kpahe no na i dhesẹ vevẹ inọ Jihova ọ riẹ oghẹrẹ nọ o re ro siwi idibo riẹ. Ẹjiroro riẹ ọ rẹ seba erugba ha, o ti fi ewegrẹ riẹ kparobọ. Rekọ re ma sae jọ usu ahwo nọ a te ghọghọ evaọ oke yena, ma re kru ẹrọwọ te urere. Ẹvẹ Jihova o bi ro fi obọ họ kẹ omai kru ẹrọwọ mai enẹna? Onana ma te ta kpahe evaọ uzoẹme nọ o rrọ aro na.

[Oruvẹ-obotọ]

[Enọ Uwuhrẹ]

[Uwoho nọ o rrọ ẹwẹ-obe avọ 24]

Kọ egbaẹmo Fẹro a te sai ru emọ Izrẹl oware jọ?