Kọ Whọ Kareghẹhọ?

Kọ whọ reawere ese Uwou-Eroro nọ i kpozi kẹle na? Dai rri sọ whọ sae kẹ iyo enọ nọ e rrọ obotọ na:

Ẹvẹ oriruo Solomọn o sae rọ jọ unuovẹvẹ kẹ omai?

Ọghẹnẹ ọ ghale Solomọn ovie na, ọ tẹ jẹ rehọ iẹe ru iruo. Uwhremu na evaọ etoke isuẹsu Solomọn, o te gbabọkẹ izi Ọghẹnẹ. Ọ rehọ ọmọtẹ Fẹro nọ ọ rrọ ọgẹdhọ, o wo eyae buobu, ọ tẹ jẹ kuvẹ re eyae egedhọ nọ ọ rehọ a rọ ẹmẹrera su ei ruọ edhọ egọ. Ma rẹ yọroma gaga re ma siọ ẹmẹrera ba ero kie ruọ ekpehre uruemu. (Izie. 7:1-4; 17:17; 1 Iv. 11:4-8)—12/15, ẹwẹ-obe avọ 10-12.

Eme o dhesẹ nọ no etoke ikpe-udhusoi ọsosuọ na ze, uvi Ileleikristi nọ a rọ ẹzi wholo a jọ otọakpọ?

Evaọ ọtadhesẹ Jesu ọrọ “eka” gbe “ikpoko” na, “ibi iwoma na họ emọ uvie na.” (Mat. 13:24-30, 38) Eka avọ ikpoko na e te rro kugbe bọwo oke ivuẹvu. Fikiere, dede nọ ma rẹ sae fodẹ enọ a rọ ẹzi wholo evaọ oke yena gbiae he, ma sae ta nọ ahwo otiọye jọ a riẹ no oke oyena ze rite enẹna.—1/15, ẹwẹ-obe avọ 7.

Eme ma re ru re ma sae whaha uruemu ihri-eriọ?

Eware nọ ma re ru ena: Daoma wo uyoyou, hai kuomagbe ibe Ileleikristi, hai ru ewoma kẹ amọfa, “lele enọ e rẹ ghọghọ gbẹ ghọghọ.” (Rom. 12:15)—2/15, ẹwẹ-obe avọ 16-17.

Nọ ma tẹ be kẹ ohwo ohrẹ, eme u fo nọ ma re wo họ iroro?

Ma rẹ daoma wo otoriẹ ẹme nọ ọ rrọ otọ. Ma rẹ rọ okpakpa kẹ ohrẹ hẹ. Ma rẹ rọ omaurokpotọ rehọ ẹme Ọghẹnẹ ru iruo. O tẹ lọhọ, ma rẹ rehọ ebe ukoko na ru ekiakiẹ. Ma rẹ ta oware nọ amọfa a re ru kẹ ae he.—3/15, ẹwẹ-obe avọ 7-9.