‘O Ruọ Ọmọ Na Re O Dhesẹ Ohwo Nọ Ọsẹ Na Ọ Rrọ Via’
‘O Ruọ Ọmọ Na Re O Dhesẹ Ohwo Nọ Ọsẹ Na Ọ Rrọ Via’
“Ohwo [ọvo ọ riẹ] ohwo nọ Ọsẹ na ọ rọ họ ajokpa Ọmọ na, gbe ọnọ ọ ruọ Ọmọ na . . . ọ rẹ te rehọ iẹe via kẹ.”—LUK 10:22.
ẸVẸ WHỌ TE K’UYO?
․․․․․
Ẹvẹ ma sae rọ ta nọ Jesu o te ohwo nọ o re dhesẹ Ọsẹ na via?
․․․․․
Ẹvẹ Jesu o ro dhesẹ Ọsẹ riẹ via kẹ amọfa?
․․․․․
Idhere vẹ whọ sae rọ rehọ aro kele Jesu dhesẹ Ọsẹ na via?
1, 2. Onọ vẹ u bi gbe ahwo buobu unu, kọ fikieme?
‘ONO họ Ọghẹnẹ?’ Onọ nana u re gbe ahwo buobu unu. Wọhọ oriruo, dede nọ ahwo buobu nọ a se omarai Ileleikristi a rọwo inọ Ọghẹnẹ yọ omọvo Esanerọvo, ibuobu rai a rẹ ta nọ ohwo ọ rẹ sai wo otoriẹ uwuhrẹ esanerọvo na ha. Osu-egagọ jọ nọ o re kere ebe ọ ta nọ: “Onana yọ uwuhrẹ nọ u kpehru vi iroro ohwo-akpọ. Ohwo ọvo ọ rẹ sai wo otoriẹ riẹ hẹ.” Evaọ abọdekọ riẹ, ahwo buobu nọ a rọwo uwuhrẹ eghrorotha a rẹ ta nọ Ọghẹnẹ ọ rrọ họ. A rẹ ta nọ eware kpobi nọ e rrọ ehrugbakpọ na i mu romavia. Dede na, ọgbaeriariẹ jọ nọ a re se Charles Darwin ọ vro ho inọ Ọghẹnẹ ọ rrọ họ, keme ọ ta nọ: “Otokiẹ kpahe Ọghẹnẹ yọ oware nọ u kpehru vi iroro ohwo-akpọ.”
2 Ghele oware nọ ahwo buobu a rọwo kẹhẹ, a roro kpahe enọ nọ i dhesẹ nọ Ọghẹnẹ ọ rrọ no. Rekọ fikinọ a duku emamọ iyo ho, a gbẹ kiẹ haro viere he. Evaọ uzẹme, Setan “o wuhu iroro enọ e rọwo ho di no.” (2 Kọr. 4:4) Agbẹta nọ ahwo buobu a rọ rrọ ogbori na, a riẹ uzẹme na kpahe Ọsẹ na ha, Ọnọ ọ ma ehrugbakpọ na.—Aiz. 45:18.
3. (a) Ono o dhesẹ Ọghẹnẹ via kẹ omai? (b) Enọ vẹ ma te t’ẹme kpahe?
3 Ghele na, u wuzou gaga re ahwo a riẹ uzẹme na kpahe Ọghẹnẹ. Fikieme? Keme ahwo nọ a bi se “odẹ Jihova” ọvo a re ti siwi. (Rom 10:13, NW) Re ohwo ọ sai se odẹ Ọghẹnẹ, o gwọlọ nọ o re wo usu okpekpe kugbe Jihova jẹ riẹe ziezi. Jesu o wuhrẹ ilele riẹ oware nana nọ u wuzou gaga na. Jesu o dhesẹ Ọsẹ na kẹ ae. (Se Luk 10:22.) Ẹvẹ Jesu ọ sai ro dhesẹ Ọsẹ riẹ vẹ kẹ ilele riẹ vi oghẹrẹ nọ omọfa kpobi ọ rẹ sai dhesẹ iẹe? Oghẹrẹ vẹ Jesu o ro dhesẹ iẹe? Ẹvẹ ma sae rọ rehọ aro kele Jesu dhesẹ Ọsẹ na via kẹ amọfa? Joma t’ẹme kpahe enọ nana.
JESU KRISTI O TE OHWO NỌ O RE DHESẸ ỌSẸ NA VIA
4, 5. Ẹvẹ ma sae rọ ta nọ Jesu o te ohwo nọ o re dhesẹ Ọsẹ na via?
4 Jesu kristi o te ohwo nọ ọ rẹ sai dhesẹ Ọsẹ riẹ via. Fikieme? Keme re a tẹ ma eware efa kpobi nọ e rrọ uzuazọ, Jesu ọ jọ omama ẹzi evaọ obọ odhiwu wọhọ “ọmọ ọvo nọ Ọsẹ na o yẹ.” (Jọn 1:14; 3:18) Jesu o gine te ohwo nọ o re dhesẹ Ọsẹ na. Makọ okenọ a re ma eware efa ha, Ọmọ na ọ jọ kugbe Ọsẹ na je wuhrẹ mi ei be daoma wo ọkpọ uruemu Ọsẹ na. Ọsẹ na avọ Ọmọ na a jẹ hae t’ẹme kugbe ẹsikpobi yọ onana u ru nọ uyoyou nọ a wo kẹ ohwohwo u ro diwi gaga evaọ ikpe buobu nọ a rẹ sai kele mu hu. (Jọn 5:20; 14:31) Onana u ru nọ Ọmọ na ọ rọ riẹ uruemu Ọsẹ riẹ gaga.—Se Ahwo Kọlọsi 1:15-17.
5 Ọsẹ na ọ tẹ rọ Ọmọ na mu re ọ jọ ọtota Riẹ, ọnọ a se “Ẹme Ọghẹnẹ Na.” (Evia. 19:13) Fikiere, Jesu o te ohwo nọ o re dhesẹ Ọsẹ na via. Agbẹta nọ Jọn nọ ọ jọ omọvo enọ i kere ebe Usiuwoma na ọ rọ ta nọ “Ẹme na,” Jesu, ọ rrọ “igbama Ọsẹ na.” (Jọn 1:1, 18) Uruemu nọ ahwo a jẹ hae ru evaọ oke riẹ nọ a tẹ be re emu oye Jọn o wo họ iroro ta ẹme yena. Evaọ oke yena, ohwo ọ rẹ keria kẹle ohwo evaọ etoke emuọriọ. Nọ imava a tẹ keria kẹle ohwohwo u re ru nọ a sae rọ t’ẹme kugbe. Fikiere nọ Ọmọ na ọ jọ “igbama Ọsẹ na,” u ru nọ avọ Ọsẹ na a jẹ rọ t’ẹme kugbe.
6, 7. Ẹvẹ usu Ọsẹ na avọ Ọmọ na u je ro dhe ẹgẹga?
6 Usu nọ Ọsẹ na avọ Ọmọ na a wo u je dhe ẹgẹga. Ọmọ na ọ tẹ “jọ eva-ewerọ kẹ [Ọghẹnẹ] kẹdẹ kẹdẹ.” (Se Itẹ 8:22, 23, 30, 31.) Nọ aimava a bi ru iruo kugbe yọ Ọmọ na ọ be rọ aro kele uruemu-aghae Ọsẹ na, usu rai o tẹ te kpekpe ziezi. Nọ a ma emama efa no, Ọmọ na o muẹrohọ oghẹrẹ nọ Jihova o je ro yerikugbe ae ọvuọvo, onana u te ru nọ uyoyou gbe adhẹẹ nọ o wo kẹ Ọghẹnẹ o rọ ga viere.
7 Oware nọ Jihova o ru nọ Setan ọ wọso udu-esuo riẹ uwhremu na u rovie uvẹ fihọ nọ Ọmọ na o ro wuhrẹ epanọ Jihova o re ro dhesẹ uyoyou, uvi-ẹdhoguo, areghẹ, gbe ogaga riẹ nọ ọ tẹ rẹriẹ ovao ku ẹbẹbẹ. Avro ọ riẹ hẹ, enẹ Jesu o ro wuhrẹ epanọ ọ sai ro fi ebẹbẹ nọ ọ rẹriẹ ovao ku kparobọ evaọ usiuwoma ota riẹ okenọ ọ jọ otọakpọ.—Jọn 5:19.
8. Ẹvẹ ebe Usiuwoma na i re ro fi obọ họ kẹ omai riẹ ekwakwa-aghae Jihova buobu?
8 Fiki usu okpekpe nọ o wo kugbe Jihova, Ọmọ na o dhesẹ Ọsẹ na vevẹ vi oghẹrẹ nọ omọfa kpobi ọ rẹ sai dhesẹ iẹe. Edhere nọ ọ mai woma nọ ma rẹ rọ riẹ Ọsẹ na họ, nọ ma tẹ be hai wuhrẹ kpahe eware nọ Ọmọ na o ru je wuhrẹ. Wọhọ iriruo, o hae te jọ bẹbẹ re ma wo otoriẹ “uyoyou” vọvọ o hae jọnọ obe ofeme ma jọ se kpahe otofa riẹ. Rekọ nọ ma te roro kpahe oghẹrẹ nọ a dhesẹ nọ Jesu o ro yeri kugbe ahwo evaọ ebe Usiuwoma na, ma rẹ sai wo otoriẹ viere kpahe ẹme na inọ “Ọghẹnẹ họ uyoyou.” (1 Jọn 4:8, 16) Jesu o dhesẹ ekwakwa-aghae Ọghẹnẹ efa via re kẹ ilele riẹ evaọ okenọ ọ jọ otọakpọ.
OGHẸRẸ NỌ JESU O RO DHESẸ ỌSẸ NA VIA
9. (a) Ugogo idhere ivẹ vẹ Jesu o ro dhesẹ Ọsẹ riẹ via? (b) Kẹ oriruo nọ o dhesẹ epanọ Jesu o ro dhesẹ Ọsẹ na via ẹkwoma iwuhrẹ riẹ.
9 Ẹvẹ Jesu o ro dhesẹ Ọsẹ na kẹ ilele riẹ gbe amọfa nọ a zihe ruọ ilele riẹ uwhremu na? Ọ rọ ugogo idhere ivẹ ru onana: ẹkwoma uruemu gbe iwuhrẹ riẹ. Joma kake ta kpahe iwuhrẹ Jesu. Eware nọ Jesu o wuhrẹ ilele riẹ i dhesẹ epanọ ọ riẹ iroro gbe idhere Ọsẹ na te. Wọhọ oriruo, Jesu ọ rehọ Ọsẹ na dhesẹ emamọ othuru-igodẹ nọ ọ rẹ nyae gwọlọ ogodẹ ọvo nọ o vru. Jesu ọ ta nọ, nọ othuru-igodẹ na ọ tẹ ruẹ ogodẹ nọ o vru na, “ọ rẹ ghọghọ fiki riẹ vi udhe-one gbe ikpegbizi nọ i vru hu.” Eme họ otofa ọtadhesẹ Jesu na? Jesu o ru ẹme na vẹ inọ: “Ere Ọsẹ mẹ nọ ọ rọ obọ odhiwu ọ guọlọ nọ ọvo eva emaha enana o vru hu.” (Mat. 18:12-14) Eme ọtadhesẹ nana ọ rẹ sai wuhrẹ owhẹ kpahe Jihova? O tẹ make rọnọ ẹsejọ whọ sai roro nọ who fioka ha gbe nnọ whọ thọrọ Ọghẹnẹ ẹro no, jọ u mu owhẹ ẹro inọ Jihova o wo isiuru kpahe owhẹ jẹ be daezọ ra. Evaọ aro riẹ, whẹ yọ omọvo “emaha” nana nọ o re ku ẹro fiẹ kẹ hẹ.
10. Ẹvẹ Jesu ọ rọ rehọ uruemu riẹ dhesẹ Ọsẹ na via?
10 Edhere avivẹ nọ Jesu o ro dhesẹ Ọsẹ na via kẹ ilele riẹ họ ẹkwoma uruemu riẹ. Fikiere nọ Filip ukọ na ọ nọ Jesu nọ: ‘dhesẹ Ọsẹ na kẹ omai,’ Jesu ọ tẹ ta nọ: “Ọ nọ ọ ruẹ omẹ ọ ruẹ Ọsẹ na” no. (Jọn 14:8, 9) Joma ta kpahe iriruo jọ erọ epanọ Jesu o ro dhesẹ ekwakwa-aghae Ọsẹ na via. Okenọ ọzae jọ nọ o wo ẹyao oti ọ lẹ Jesu re o siwi ei, Jesu ọ tẹ rọ obọ te ọzae nọ “oti ọ vọ oma” na jẹ ta kẹe inọ: ‘O ruọ omẹ, jọ a ru owhẹ fo.’ Nọ o siwi ọzae na no, ọzae na ọ ruẹ iruo gbunu Jihova evaọ oware nọ Jesu o ru kẹe na. (Luk 5:12, 13) Ofariẹ, okenọ Lazarọs o whu, ilele na a ruẹ uyoyou Ọsẹ na okenọ Jesu o “dimẹ eva ẹzi,” nọ ọ ‘rova’ gbe okenọ ọ “viẹ.” Dede nọ Jesu ọ riẹ nọ ọ te kpare Lazarọs, o da riẹ gaga wọhọ epanọ o jọ kẹ ahwo uviuwou gbe egbẹnyusu Lazarọs. (Jọn 11:32-35, 40-43) Ẹsejọhọ u wo ikuigbe Ebaibol nọ i re si owhẹ urru nọ u fi obọ họ k’owhẹ ruẹ Ọsẹ ohrọ na evaọ oghẹrẹ nọ Jesu ọ rọ uruemu riẹ dhesẹ iẹe via.
11. (a) Nọ Jesu o ru etẹmpol na fo, eme o dhesẹ via kpahe Ọsẹ na? (b) Fikieme oware nọ Jesu o ru na o rọ rrọ uduotahawọ k’omai?
11 Eme who wo otoriẹ riẹ kpahe oghẹrẹ nọ Jesu o ro ru etẹmpol na fo? Dae rehọ iẹe nọ whọ jọ etẹe: Jesu o ru oviaviẹ, o te le ahwo nọ a jẹ zẹ igodẹ gbe iruẹ no etẹmpol na. O te gele igho ahwo nọ a je nwene igho na kufiẹ jẹ gale emẹjẹ rai vi. (Jọn 2:13-17) Oware nana nọ Jesu o ru na, o lẹliẹ ilele na kareghẹhọ eruẹaruẹ Devidi Ovie na nọ ọ ta nọ: “Oriori uwou ra ọ re omẹ re.” (Ol. 69:9) Oware nọ Jesu o ru na u dhesẹ nọ o wo ọwhọ gaga kẹ egagọ uzẹme. Kọ whọ gbẹ jọ ikuigbe yena ruẹ okwakwa-aghae ofa nọ Ọsẹ na o wo? Oyena o kareghẹhọ omai inọ, orọnikọ Ọghẹnẹ o wo gaga nọ o re ro si emuomu no akpọ na ọvo ho, rekọ o ginẹ rrọ isiuru riẹ re o ru ere. Oware nọ Jesu o ru evaọ okenọ ọ ruẹ oware uyoma, u dhesẹ epanọ Ọsẹ na o bi rri emuemu nọ ọ da akpọ kpobi fia nẹnẹ. Onana o rẹ jọ uduotahawọ k’omai nọ a te bi kienyẹ omai.
12, 13. Eme whọ rẹ sai wuhrẹ kpahe Jihova evaọ edhere nọ Jesu o ro yeri kugbe ilele riẹ?
12 Joma ta kpahe oriruo ọfa, oghẹrẹ nọ Jesu o ro yeri kugbe ilele riẹ. Kẹse kẹse ilele na a jẹ hai si ikẹ kpahe ohwo nọ ọ mae rro. (Mak 9:33-35; 10:43; Luk 9:46) Fikinọ Jesu ọ jọ kugbe Ọsẹ na evaọ ikpe buobu, ọ riẹ oghẹrẹ nọ Jihova o mukpahe uruemu omorro utioye te. (2 Sam. 22:28; Ol. 138:6) Ofariẹ, Jesu ọ ruẹ nọ ẹdhọ o dhesẹ uruemu ovona. Setan nọ o wo isiuru kpahe omobọ riẹ ọvo na, o bi roro kpahe epanọ o re ro wo ọkwa gbe okpodẹ. Fikiere o kẹ Jesu uye gaga nọ ọ ruẹ nọ ilele riẹ nọ ọ nabi wuhrẹ ziezi na a bi dhesẹ ẹzi omorro. Ikọ riẹ nọ ọ salọ na a wo uruemu nana. A dhesẹ ẹzi omorro nana rite ẹdẹ urere uzuazọ Jesu evaọ otọakpọ. (Luk 22:24-27) Ghele na, Jesu ọ jẹ rọ edhere uyoyou kpọ ae họ n’oke t’oke, bi rẹro nọ ẹdẹjọ a ti nwene jẹ rọ aro kele oriruo omarokpotọ riẹ.—Fil. 2:5-8.
13 Kọ whọ sae ruẹ okwakwa-aghae Jihova ofa evaọ edhere nọ Jesu ọ rọ rehọ odiri kpọ uruemu uyoma nọ ilele riẹ a wo vi? Kọ whọ gbẹ jọ ẹme Jesu gbe uruemu riẹ ruẹ inọ Ọsẹ na ọ rẹ siọ idibo riẹ ba ha dede nọ a re ruthọ n’oke t’oke? Fiki ekwakwa-aghae Ọghẹnẹ nọ ma riẹ na, kọ oma o gbẹ wọ omai lẹ sei kẹ erọvrẹ nọ ma tẹ raha uzi?
O RUỌ ỌMỌ NA RE O DHESẸ ỌSẸ NA
14. Ẹvẹ Jesu o ro dhesẹ nọ ọ ginẹ gwọlọ dhesẹ Ọsẹ na via?
14 Isu egeva buobu a rẹ gwọlọ ta eware kpobi kẹ ahwo nọ a rrọ otọ rai hi keme a riẹ inọ a te ru ere, ahwo na a gbẹ te roma kpotọ kẹ ae he. Wo ohẹriẹ, o ruọ Jesu re o dhesẹ eware nọ ọ riẹ kpahe Ọsẹ riẹ, ọ ta eware buobu kpahe Ọsẹ na kẹ ahwo. (Se Matiu 11:27.) Ofariẹ, Jesu ọ kẹ ilele riẹ “otọoriẹ, re [a riẹ] ọnọ ọ rọ uzẹme” na, Jihova Ọghẹnẹ. (1 Jọn 5:20) Eme oyena u dhesẹ? Jesu o fi obọ họ kẹ ilele riẹ re a sai wo otoriẹ iwuhrẹ riẹ kpahe Ọsẹ na. Jesu ọ rehọ iwuhrẹ nọ a rẹ sai wo otoriẹ rai hi ko Ọsẹ na dhere he inọ Ọsẹ na yọ omọvo eghẹnẹ esanerọvo nọ a rẹ riẹ otọ riẹ hẹ.
15. Fikieme Jesu ọ gbẹ rọ vuẹ ilele na eware kpobi nọ ọ riẹ kpahe Ọsẹ na ha?
15 Kọ Jesu o dhesẹ eware kpobi nọ ọ riẹ kpahe Ọsẹ na via? Ijo, ọ rọ orimuo whaha eware buobu nọ ọ riẹ nọ ọ hae te ta kpahe Ọsẹ na. (Se Jọn 16:12.) Fikieme? Keme evaọ oke yena, ilele na a “sae wha” hayo wo otoriẹ iwuhrẹ riẹ kpobi hi. Wọhọ epanọ Jesu ọ ta, ilele na a ti wo otoriẹ eware buobu nọ “Ọthuke na” koyehọ ẹzi ọfuafo na o te te ai obọ, nọ o ti ru ai wo otoriẹ ‘uzẹme na kpobi.’ (Jọn 16:7, 13) Wọhọ epanọ esẹgbini nọ i wo orimuo a rẹ ko eme jọ dhere emọ rai bẹsenọ emọ na a rẹ kpako te epanọ a sai ro wo otoriẹ rai na, ere Jesu ọ hẹrẹ re ilele na a kpako ziezi evaọ otoriẹ re a sai wo otoriẹ iwuhrẹ sasa kpahe Ọsẹ na. Jesu ọ riẹ eware nọ ilele na a sai wo otoriẹ rai evaọ oke yena.
RỌ ARO KELE JESU FI OBỌ HỌ KẸ AMỌFA RIẸ JIHOVA
16, 17. Ẹvẹ who ro te ohwo nọ ọ rẹ sai dhesẹ Ọsẹ na kẹ amọfa?
16 Nọ whọ tẹ riẹ ohwo ziezi jẹ ruẹ emamọ iruemu nọ o wo vuhumu, kọ oma o gbẹ te wọ owhẹ ta kẹ amọfa kpahe iẹe? Okenọ Jesu ọ jọ otọakpọ, ọ jẹ ta kẹ amọfa kpahe Ọsẹ na. (Jọn 17:25, 26) Kọ o lọhọ re ma rọ aro kele Jesu ta kẹ amọfa kpahe Jihova?
17 Wọhọ epanọ ma ta no vẹre na, Jesu ọ riẹ kpahe Ọsẹ na vi amọfa kpobi. Ghele na, o ro riẹ re ọ ta eware jọ nọ ọ riẹ kpahe Ọsẹ na, jẹ kẹ ilele riẹ ẹgba nọ a sai ro wo otoriẹ eware ididi kpahe ekwakwa-aghae Ọghẹnẹ. Avọ obufihọ Jesu, kọ ma gbẹ riẹ Ọsẹ na vi amọfa kpobi no nẹnẹ? U woma kẹhẹ inọ Jesu ọ rọ iwuhrẹ gbe uruemu riẹ dhesẹ Ọsẹ riẹ via k’omai. Evaọ uzẹme, ma rẹ sai se-eha inọ ma riẹ Ọsẹ na. (Jeri. 9:24; 1 Kọr. 1:31) Nọ ma daoma si kẹle Jihova no na, ọyomariẹ o si kẹle omai no re. (Jem. 4:8) Fikiere, ma wo uvẹ nọ ma sai ro dhesẹ oware nọ ma riẹ kpahe Ọsẹ na kẹ amọfa. Ẹvẹ ma sai ro ru ere?
18, 19. Idhere vẹ whọ sai ro dhesẹ Ọsẹ na via kẹ amọfa? Ru ei vẹ.
18 U fo re ma rọ aro kele Jesu dhesẹ Ọsẹ na kẹ amọfa ẹkwoma eme gbe uruemu mai. Kareghẹhọ inọ ahwo buobu nọ ma rẹ nyaku evaọ usiuwoma ota a riẹ ohwo nọ Ọghẹnẹ ọ rrọ họ. O sae jọnọ iwuhrẹ erue i bi ru ei bẹbẹ kẹ ae re a riẹ uzẹme na kpahe Ọghẹnẹ. Ma rẹ daoma ta kẹ ae kpahe oware nọ ma riẹ kpahe odẹ Ọghẹnẹ, ẹjiroro riẹ kẹ ahwo-akpọ, gbe ekwakwa-aghae riẹ nọ a jọ Ebaibol na dhesẹ via. Ofariẹ, ma rẹ sai wo otoriẹ ikuigbe Ebaibol jọ nọ i re fi obọ họ k’omai riẹ kpahe ekwakwa-aghae Ọghẹnẹ evaọ oghẹrẹ nọ ma riẹ vẹre, u fo nọ ma rẹ rọ enana gbiku kugbe ibe Ileleikristi mai. Enẹ ae omarai a sai ro wo erere re.
19 Kọ whọ gbẹ daoma rọ aro kele Jesu rọ uruemu ra dhesẹ Ọsẹ na via? Nọ ahwo a tẹ be jọ uruemu mai ruẹ nọ ma bi dhesẹ ọkpọ uyoyou Kristi, onana u re ru nọ a re ro si kẹle Ọsẹ na gbe Jesu. (Ẹf. 5:1, 2) Pọl ukọ na ọ tuduhọ omai awọ inọ ma rọ ‘aro kele iei, wọhọ epanọ ọ rọ aro kele Kristi.’ (1 Kọr. 11:1) Uvẹ-ọghọ riẹ o rro kẹhẹ nọ ma re ro fi obọ họ kẹ amọfa riẹ Jihova ẹkwoma uruemu mai. Ẹhẹ, joma hae rọ aro kele Jesu dhesẹ Ọsẹ na via kẹ amọfa.
[Enọ Uwuhrẹ]
