Daoma Fihọ Orọo Ra Nọ Ebẹbẹ E Tẹ Make Riẹ
Daoma Fihọ Orọo Ra Nọ Ebẹbẹ E Tẹ Make Riẹ
“E nọ e be rọwo, mẹ rọ fiki Ọnowo ta [kẹ].”—1 KOR. 7:10.
KỌ WHỌ SAE K’IYO ENỌ NANA VEVẸ?
Ẹvẹ ma sae rọ ta nọ Ọghẹnẹ họ ọnọ o ku imava nọ e rọo no kugbe?
Ẹvẹ ekpako ukoko a sai ro fi obọ họ kẹ Ileleikristi nọ i bi wo ebẹbẹ orọo?
Ẹvẹ u fo nọ ma re rri orọo?
1. Ẹvẹ Ileleikristi a re rri orọo, kọ fikieme?
NỌ ILELEIKRISTI a tẹ be rọo, a rẹ ya eyaa evaọ iraro Ọghẹnẹ, yọ u fo nọ a re rri eyaa yena vo ho. (Ọtausi. 5:4-6) Nọ imava e tẹ rọo yọ Jihova ọ ‘whẹ rai gbe’ keme ọye ọ to orọo họ. (Mak 10:9) Ẹsejọ izi orẹwho nọ imava a jọ rọo i re wo ohẹriẹ no izi Ebaibol, rekọ idibo Jihova a rẹ rehọ eyaa orọo wọhọ epanọ Jihova ọ rehọ e riẹ. Idibo Jihova a re rri orọo wọhọ oware nọ o rẹ jọ ribri o tẹ make rọnọ a rọo no taure a te kurẹriẹ.
2. Enọ vẹ ma te ta kpahe evaọ uzoẹme nana?
2 Emamọ orọo o rẹ wha evawere ze. Rekọ eme ohwo ọ rẹ sai ru nọ ebẹbẹ e tẹ rọ orọo riẹ? Kọ a rẹ sae ruẹrẹ orọo nọ ebẹbẹ ilogbo e rrọ? Kọ eme o re fi obọ họ kẹ ahwo nọ a be jọ orọo rai wo udhedhẹ hẹ?
KỌ ORỌO RA O TE JỌ ORỌ EVAWERE MANIKỌ ORỌ UNUOFIẸ?
3, 4. Eme ọ rẹ sae via otẹrọnọ ohwo ọ jiroro thọ evaọ okenọ ọ jẹ ruọ orọo?
3 Nọ orọo Oleleikristi u te kiehọ, o rẹ kẹ evawere jẹ wha orro se Jihova. Rekọ nọ orọo u gbe kiehọ họ, o rẹ wha ọkora gbe ebẹbẹ efa ze. Nọ Oleleikristi nọ ọ gwọlọ rọo o te bi ru lele ehrẹ Ọghẹnẹ u ti ru nọ orọo riẹ o te rọ jọ orọ evawere. Rekọ nọ ohwo ọ tẹ salọ ọrivẹ-orọo thọ o rẹ sae wha edada gbe enuobro ze. Wọhọ oriruo, izoge jọ a re muọ usu orọo họ enya dede nọ a re ruẹrẹ oma kpahe kẹ orọo ho. Ahwo jọ a rẹ jọ itanẹte ruẹ ohwo nọ a te rọo, a ve duola ruọ orọo nọ a rẹ vioja riẹ uwhremu na. Amọfa a rẹ thọ uzi ulogbo evaọ etoke usu orọo rai, a vẹ rọo ghele, onọ u re ru nọ a gbe ro wo adhẹẹ kẹ ohwohwo ho.
4 Ileleikristi jọ a rọo evaọ “Ọnowo na” ha, onana u te ru nọ a be rọ reoja ebẹbẹ nọ i re noi ze nọ ọrivẹ-orọo ohwo ọ gbẹ rrọ ukoko na ha. (1 Kọr. 7:39) Otẹrọnọ ere o rrọ kẹ owhẹ, lẹ se Ọghẹnẹ kẹ erọvrẹ gbe obufihọ. Jihova o re si edada nọ ethobọ mai e wha ze no ho, rekọ o re fi obọ họ kẹ enọ i kurẹriẹ thihakọ ebẹbẹ rai. (Ol. 130:1-4) Daoma ru oreva Jihova enẹna je rite ebẹdẹ bẹdẹ, ‘evawere ỌNOWO na e te jọ ogaga ra.’—Neh. 8:10.
NỌ ORỌO U TE BI WO EBẸBẸ ILOGBO
5. Orọo u te bi wo ebẹbẹ ilogbo, iroro vẹ u fo nọ ohwo ọ rẹ whaha?
5 Ahwo nọ a bi wo ebẹbẹ ilogbo evaọ orọo rai a rẹ sae nọ inọ: ‘Kọ u fo re mẹ gbẹ daoma fihọ orọo nana nọ evawere e rrọ họ na? Dodokọ eware e rẹ sai kurẹriẹ re mẹ rehọ omọfa.’ A rẹ sae jọ udu rai roro nọ, ‘U ti woma kẹhẹ re me no igbo nana. O gbẹ te mai woma re mẹ fa orọo nana? O tẹ make rọnọ oware nọ Ebaibol ọ ta nọ a sae rọ fa orọo o via ha, kọ mẹ gbẹ hẹriẹ re me wo evawere?’ Ukpenọ ma rẹ jọ udu mai roro eware itieye na, hayo roro epanọ u fo nọ orọo mai o hae jọ, Ileleikristi a rẹ daoma fihọ orọo na ẹkwoma ekpọvio Ọghẹnẹ nọ a re ru lele.
6. Eme họ otofa ẹme nọ Jesu ọ ta evaọ obe Matiu 19:9?
6 Otẹrọnọ Oleleikristi ọ fa orọo riẹ, Ebaibol ọ ta nọ ọ sae wariẹ rọo ho ajokpanọ ọrivẹ-orọo riẹ o bruẹnwae. Jesu ọ ta nọ: “Kohwo kohwo nọ o siobọno aye riẹ o gbẹrọ fiki ẹnwae-obro ho, ọ jẹ rehọ ọfa, o bruẹnwae.” (Mat. 19:9) Evaọ oria ikere nana “ẹnwae-obro” u kugbe omọfa nọ ohwo nọ ọ rọo no o re lele wezẹ gbe iruemu ọfariẹ-ogbe efa. Otẹrọnọ ma gwọlọ fa orọo mai yọ ọrivẹ-orọo mai o bruẹnwae he, ma rẹ lẹ je roro didi kpahe owojẹ nana.
7. Nọ orọo Oleleikristi o tẹ fa, eme amọfa a rẹ sai roro?
7 Nọ orọo Oleleikristi o tẹ fa, o rẹ sai dhesẹ nọ usu riẹ kugbe Ọghẹnẹ o ga ziezi hi. Pọl ukọ na ọ nọ inọ: “Otẹrọnọ ohwo ọ gbẹ riẹ epanọ ọ sae ro su ahwo uwou riẹ hẹ, kẹvẹ ọ sai ro muẹrohọ ukoko Ọghẹnẹ?” (1 Tim. 3:5) Nọ Ileleikristi a tẹ fa orọo rai, amọfa a sai roro nọ a bi ru lele eware nọ a be vuẹ ahwo evaọ usiuwoma ota ha.—Rom 2:21-24.
8. Nọ orọo Ileleikristi o tẹ fa, eme u dhesẹ?
8 Nọ Ileleikristi nọ e họ-ame no a tẹ be gwọlọ hẹriẹ hayo fa orọo rai yọ ọrivẹ-orọo rai o bruẹnwae he, u dhesẹ nọ oware jọ o ginẹ thọ evaọ usu rai kugbe Ọghẹnẹ. Omọvo jọ hayo aimava na a bi fi ehri-izi Ebaibol họ iruo evaọ uzuazọ rai hi. Otẹrọnọ a ginẹ rọ ‘ẹroọrọsuọ rai kpobi kpahe ỌNOWO na,’ a hae daoma fihọ orọo na re o seba ẹfa.—Se Itẹ 3:5, 6.
9. Didi erere o te Ileleikristi jọ no fikinọ a wo odiri jẹ daoma fihọ orọo rai?
9 Erọo buobu nọ e jẹ te fa vẹre, e ruẹrẹhọ uwhremu na. Ẹsibuobu eghale i re noi ze nọ Ileleikristi a tẹ gbẹ be daoma fihọ orọo rai nọ u bi wo ebẹbẹ. Dai roro kpahe oware nọ o rẹ sae via nọ ọrivẹ-orọo ohwo ọ gbẹ rrọ Oleleikristi hi. Pita ukọ na o kere inọ: “Whai eyae na, wha rọ oma kpotọ kẹ ezae rai, re otẹrọnọ ejọ e kezọ ẹme na ha, a vẹ te rọ fiki uruemu eyae rai ze edhere na, omake rọnọ a yo ẹme na ha, okenọ a ruẹ uruemu rai fuafo avọ adhẹ.” (1 Pita 3:1, 2) Ẹhẹ, emamọ uruemu ohwo u re ru nọ ọrivẹ-orọo riẹ nọ ọ rrọ ukoko ho ọ sai ro zihe ruẹ Oleleikristi. Orọo utioye nọ a daoma fihọ ghelọ ebẹbẹ na, o rẹ wha orro se Ọghẹnẹ jẹ wha eghale buobu se uviuwou na soso.
10, 11. Ebẹbẹ vẹ nọ a rẹro rai hi e rẹ sae romavia evaọ orọo, kọ eme Ileleikristi a wo imuẹro riẹ?
10 Ileleikristi buobu nọ e gwọlọ rọo a rẹ salọ Oleleikristi nọ ọ roma mudhe jẹ họ-ame no keme a gwọlọ ru eva were Jihova. O tẹ make rọ ere, eware e rẹ sae nya evaọ oghẹrẹ nọ ohwo o rẹro rai hi. Wọhọ oriruo, ẹsejọ ọrivẹ-orọo ọ rẹ sai wo oghẹrẹ ẹbẹbẹ iroro jọ. Hayo a tẹ rọo no, ọrivẹ-orọo ọ sai si uke kpemu evaọ ukoko na. Rehọ oriruo Linda, * Oleleikristi nọ o wo ajọwha ziezi ọ tẹ jẹ rrọ emamọ oni. Ọzae riẹ nọ ọ họ-ame no o te je ru eware nọ e rọwo kugbe izi Ọghẹnẹ hẹ, yọ fikinọ ọ rọwo kurẹriẹ hẹ a te si ei no ukoko. Kọ eme Oleleikristi o re ru nọ ẹbẹbẹ otiọye ọ tẹ romavia evaọ orọo riẹ?
11 Whọ rẹ sae jọ udu ra nọ inọ, ‘Kọ mẹ rẹ gbẹ daoma fihọ orọo mẹ ghelọ oware nọ o jariẹ via kẹhẹ?’ Ohwo ọvuọvo ọ rẹ jẹ iroro yena kẹ owhẹ hẹ. Ghele na, u fo nọ whọ rẹ gbẹ daoma fihọ orọo nọ ebẹbẹ e rrọ. Oniọvo nọ o bi thihakọ ebẹbẹ orọo fiki obroziẹ-iroro riẹ, ọ rrọ ghaghae kẹ Ọghẹnẹ. (Se 1 Pita 2:19, 20.) Jihova ọ rẹ rọ ẹkwoma Ẹme riẹ gbe ẹzi ọfuafo na fi obọ họ kẹ Oleleikristi nọ ọ be daoma fihọ orọo riẹ nọ ebẹbẹ e rrọ.
A GWỌLỌ FI OBỌ HỌ K’OWHẸ
12. Ẹvẹ ekpako na a ti rri omai nọ ma tẹ gwọlọ obufihọ rai?
12 Who te bi wo ẹbẹbẹ evaọ orọo ra, daoma gwọlọ obufihọ ekpako ukoko na. Ekpako na e wọhọ ithuru-igodẹ nọ e rẹ romatotọ sẹro uthuru rai, yọ o te were ae re a rọ iroro ra kpohọ eria ikere nọ i re fi obọ họ kẹ owhẹ. (Iruẹru 20:28; Jem. 5:14, 15) Who roro ho inọ ekpako na a ti gbe wo adhẹẹ kẹ owhẹ hẹ nọ whọ tẹ ta ebẹbẹ orọo ra kẹ ae be gwọlọ obufihọ. Uyoyou gbe adhẹẹ nọ a wo kẹ owhẹ u ti diwi viere nọ a tẹ ruẹ nọ whọ be daoma ru Ọghẹnẹ eva were.
13. Ohrẹ vẹ o rrọ 1 Ahwo Kọrint 7:10-16?
13 Nọ Ileleikristi nọ erivẹ-orọo rai a rrọ ukoko ho a tẹ nya bru ekpako na kẹ ohrẹ, ekpako na a rẹ rehọ iroro rai kpohọ ehrẹ sa-sa wọhọ epaọ onọ Pọl ọ kẹ inọ: “Rọ kẹ e nọ e be rọwo, mẹ rọ fiki Ọnowo ta nọ, aye ọ se ọzae riẹ hẹ. Rekọ o te ru ere, jọ ọ ye ọvo ọ jọ, hayo avọ ọzae riẹ a ruẹrẹ họ—ugbe fo re ọzae na o siobọ no aye riẹ hẹ. . . . Whẹ aye, ẹvẹ whọ rọ riẹ nọ who reti siwi ọzae ra? Whẹ ọzae, ẹvẹ whọ rọ riẹ nọ who reti siwi aye ra?” (1 Kọr. 7:10-16) Oghale ulogbo o ginẹ rrọ re ohwo nọ ọ rrọ ukoko ho o kurẹriẹ fiki emamọ uruemu ọrivẹ-orọo riẹ.
14, 15. Eme o rẹ whae ze nọ Oleleikristi ọ sae rọ jiroro kpahe ẹhẹriẹ, kọ fikieme u ro wuzou re ọ lẹ je roro didi kpahe onana?
14 Eme o rẹ whae ze nọ oniọvo-ọmọtẹ ọ sae rọ hẹriẹ no ọrivẹ-orọo riẹ? Otujọ a salọ nọ a rẹ hẹriẹ keme ọrivẹ-orọo rai ọ be rọwo ko uviuwou na ha. Amọfa a hẹriẹ keme ọrivẹ-orọo rai o bi kpe ai hayo ọ be kẹ ae uvẹ gọ Jihova ha.
15 Ohwo ọvo ọ rẹ jiroro na kẹ omobọ riẹ sọ ọ rẹ hẹriẹ hayo ọ rẹ daji orọo na. Dede na, ọrivẹ-orọo nọ ọ be gọ Jihova na, ọ rẹ lẹ je roro didi kpahe ẹme na. Wọhọ oriruo, kọ ọrivẹ-orọo nọ ọ rrọ ukoko ho na ọvo ọ be whaha owhẹ Ọghẹnẹ ọgọ, manikọ who bi gbabọkẹ uwuhrẹ omobọ ra, iwuhrẹ ukoko, hayo usiuwoma ota ikẹse kẹse?
16. Fikieme Ileleikristi a gbẹ rọ rehọ okpakpa fa orọo rai hi?
16 Fikinọ ma rri usu mai kugbe Jihova ghaghae je rri orọo wọhọ okẹ nọ u no obọ riẹ ze, u fo nọ ma rẹ rọ okpakpa fa orọo mai hi. O rrọ omai idibo Jihova oja re ma ru odẹ riẹ fo. U fo ho re ma rọ edhere ẹghẹ fa orọo mai re ma ruẹse rọo omọfa nọ ọ rrọ omai iroro.—Jeri. 17:9; Mal. 2:13-16.
17. Edhere vẹ ma sae rọ ta nọ Ọghẹnẹ o se Oleleikristi nọ ọ rọo no ziọ udhedhẹ?
17 Oleleikristi nọ ọrivẹ-orọo riẹ ọ rrọ ukoko ho ọ rẹ daoma gaga re orọo na o ruẹse tọ. Rekọ otẹrọnọ Oleleikristi ọ daoma bẹ yọ ọrivẹ-orọo nọ ọ rrọ ukoko ho ọ fa orọo na ghele, jọ udu u bru kpei hi. Pọl o kere inọ: “Otẹrọnọ ọgẹdhọ na ọ guọlọ nọ ọ rẹ fa orọwo na, jọ o ru ere; rekọ evaọ oghẹrẹ utioye na, uzi ovo o gba ọmọzae hayo ọmọtẹ na ha. Keme Ọghẹnẹ o se omai ze ria evaọ udhedhẹ.”—1 Kọr. 7:15. *
FIEVAHỌ JIHOVA
18. O tẹ make rọnọ orọo o fa dede nọ Oleleikristi ọ daoma bẹ, ewoma vẹ o rẹ sai noi ze?
18 Nọ who te wo ebẹbẹ evaọ orọo ra, lẹ se Jihova re o fi obọ kẹ owhẹ kru udu ga je fievahọ iẹe. (Se Olezi 27:14.) Joma wariẹ ta kpahe Linda nọ ma fodẹ ẹsiẹ na. Orọo riẹ o fa uwhremu na dede nọ ọ daoma ikpe buobu re orọo na o ruẹsi woma. Kọ o jariẹ oma inọ omodawọ riẹ na uvrẹvru? Ọ ta nọ: “Vievie. Ahwo buobu a ruẹ epanọ mẹ daoma fihọ orọo na te. Udu mẹ u bi brukpe omẹ hẹ. Mai woma na, ikpe yena kpobi u ru nọ ọmọtẹ mai o ro wo ẹnyaharo ziezi evaọ ukoko na. Ọ tẹ te roma mudhe jẹ họ-ame wọhọ Osẹri Jihova.”
19. Eme ọ rẹ via nọ ohwo ọ te daoma fihọ orọo riẹ re o ruẹsi woma?
19 Eva e were oniọvo-ọmọtẹ jọ nọ a re se Marilyn inọ o fievahọ Ọghẹnẹ jẹ daoma ru re orọo riẹ u woma. Ọ ta nọ: “Mẹ jiroro nọ me re no orọo na fikinọ ọzae mẹ ọ jẹ rọwo siobọno ugho ho yọ ọ be kẹ omẹ uvẹ gọ Ọghẹnẹ ziezi hi. Ghele na, ọzae mẹ ọ jọ ọkpako ukoko vẹre re o te ti dhomahọ iruo nọ i fo kẹ Oleleikristi hi. Iwuhrẹ e tẹ jẹ hai voi, yọ ma gbẹ jẹ ta ẹme kugbe ziezi hi. Ozighi nọ otu egbulegbu a wọ ze ẹwho mai u ru ozọ mu omẹ te epanọ me gbe je ro lele ohwo ọvo ta ẹme he. Mẹ tẹ te ruẹ vuhumu inọ me ru thọ re. Ma te ti mu ẹme họ ẹta kugbe, mu uwuhrẹ uviuwou mai họ je muọ iwuhrẹ ukoko họ ẹnya kẹse kẹse. Ekpako na a jọ wowou yọ a fi obọ họ kẹ omai gaga. Orọo mai o tẹ te ruẹrẹhọ. Nọ oke o be nyaharo na, ọzae mẹ ọ tẹ wariẹ wo ewha-iruo evaọ ukoko na. Oware nọ o via na o jọ bẹbẹ kẹ omẹ rekọ evawere i no riẹ ze uwhremu na.”
20, 21. Eme u fo nọ o rẹ jọ ọtamuo mai kpahe orọo?
20 O tẹ make rọnọ ma rọo no hayo ma re rọo ho, joma kru udu ga je fievahọ Jihova. Nọ ma te bi wo ebẹbẹ evaọ orọo mai, joma daoma ku ai họ jẹ kareghẹhọ inọ ahwo nọ a rọo no “a gbẹrọ ivẹ hẹ rekọ ọvo.” (Mat. 19:6) Joma kareghẹhọ inọ ma tẹ be daoma re orọo mai u woma dede nọ ọrivẹ-orọo mai ọ rrọ ukoko ho, ọ rẹ sai kurẹriẹ ziọ ukoko na, yọ onana o te kẹ omai evawere.
21 Oghẹrẹ ebẹbẹ nọ ma rẹriẹ ovao ku kẹhẹ, a joma yọrọ oma evaọ uruemu mai re o jọ emamọ isẹri kẹ ahwo nọ a rrọ ukoko ho. Otẹrọnọ ma bi wo ebẹbẹ ilogbo evaọ orọo mai, joma ruabọhọ olẹ, kiẹ omamai riwi ziezi, romatotọ kiẹ ikerakere na riwi, jẹ gwọlọ obufihọ ekpako ukoko. Onọ o mae rro, joma gbaemu inọ ma re ru oreva Jihova je dhesẹ nọ ma gine rri orọo ghaghae wọhọ obọdẹ okẹ nọ u no obọ Ọghẹnẹ ze.
[Oruvẹ-obotọ]
^ edhe-ẹme 10 Ma nwene edẹ na.
^ edhe-ẹme 17 Rri obe na Daji Uyoyou Ọghẹnẹ, ẹwẹ obe avọ 219-221; Uwou-Eroro Na orọ November 1, 1988, ẹwẹ-obe avọ 26-27 gbe orọ September 15, 1975, ẹwẹ-obe avọ 575 (erọ Oyibo).
[Enọ Uwuhrẹ]
[Ẹme nọ a fi ẹgba họ nọ ọ rrọ ẹwẹ-obe avọ 10]
Eghale i re noi ze nọ Ileleikristi a tẹ gbẹ be daoma fihọ orọo rai nọ u bi wo ebẹbẹ
[Ẹme nọ a fi ẹgba họ nọ ọ rrọ ẹwẹ-obe avọ 12]
Hai fievahọ Jihova jẹ rẹroso ẹe inọ ọ te kẹ owhẹ udu
[Uwoho nọ o rrọ ẹwẹ-obe avọ 9]
Jihova ọ rẹ ghale Ileleikristi nọ e be daoma fihọ orọo rai nọ ebẹbẹ e rrọ
[Uwoho nọ o rrọ ẹwẹ-obe avọ 11]
Ukoko na o rẹ sae kẹ omai omosasọ gbe obufihọ
