Enọ Ahwo Nọ A S’ebe

Oghẹrẹ vẹ uwhu idibo Ọghẹnẹ o rọ rrọ “ghaghae eva aro ỌNOWO”?

▪ Ọso-ilezi jọ ọ so nọ: “Uwhu erezi na o rọ ghaghae eva aro ỌNOWO” na. (Ol. 116:15) Uzuazọ uvi odibo Jihova kpobi o rrọ ghaghae kẹ Jihova. Dede na, orọnikọ uwhu omomọvo oye Olezi avọ 116 na o be ta kpahe he.

Nọ oniọvo o te bi ru ẹme uwhori, u fo ho re ọ ta nọ eme nọ e rrọ obe Olezi 116:15 na i kie kpahe oniọvo nọ o whu na, o tẹ make rọnọ ọ gọ Jihova bọwo ẹdẹ uwhu riẹ. Fikieme? Keme ẹme olezi na ọ kẹre vi uwhu omọvo. Oria Ebaibol yena u dhesẹ nọ Ọghẹnẹ o rri idibo riẹ kpobi ghare te epanọ ọ gbẹ rọ kuvẹ re aikpobi a whu hu.—Rri Olezi 72:14; 116:8.

Olezi 116:15 o kẹ omai imuẹro inọ Jihova ọ te kuvẹ hẹ re idibo riẹ kpobi i whu no akpọ na no. Evaọ uzẹme, ikuigbe mai erọ ọgbọna i dhesẹ nọ ma thihakọ ebẹbẹ ilogbo gbe ukpokpoma no, onọ u dhesẹ vevẹ inọ Ọghẹnẹ ọ te kuvẹ ẹdẹvo ho re a kpe omai muotọ.

Fikinọ Jihova o wo ogaga ulogbo gbe nnọ ẹjiroro riẹ ọ rẹ seba erugba ha, ọ te kuvẹ hẹ re a kpe omai idibo riẹ kpobi no otọakpọ na no. Ọghẹnẹ ọ tẹ kuvẹ kẹ oware utioye, o vẹ te wọhọ nọ ewegrẹ riẹ a wo ẹgba vi ei, yọ o rrọ ere vievie he. O tẹ via nnọ idibo Jihova kpobi a no otọakpọ na no, ẹjiroro riẹ inọ idibo riẹ nọ i bi yoẹme kẹe a te rọ otọakpọ na reuku o gbe ti rugba ha, yọ oware ovo o rẹ whaha erugba ẹjiroro Ọghẹnẹ hẹ. (Aiz. 45:18; 55:10, 11) Ẹhẹ, Ọghẹnẹ ọ tẹ kuvẹ kẹ oware utioye, a gbẹ te ruẹ ohwo ọvo nọ ọ te rọ egagọ efuafo kẹ Jihova ha evaọ otọakpọ. Ohwo ọvo ọ te gbẹ jariẹ hẹ nọ ọ rẹ jọ otọhotọ “akpọ ọkpokpọ” na, koyehọ ahwo omaurokpotọ nọ e te jọ otọ esuo “odhiwu ọkpokpọ” na. (Evia. 21:1) Ofariẹ, Esuo Odu Ikpe Kristi na ọ rẹ sae gbabọ họ ababọ ahwo nọ a te jọ otọ esuo na evaọ otọakpọ.—Evia. 20:4, 5.

Ahwo a te vro sọ Ọghẹnẹ o wo ogaga hayo ọ be ginẹ daezọ mai otẹrọnọ ọ kuvẹ re ewegrẹ riẹ a kpe idibo riẹ kpobi nọ e rrọ akpọ na no. Oware utioye o rẹ wha ekela se ọkwa ologbo Jihova, ọnọ ọ rrọ Ọghẹnẹ Erumeru na. Ofariẹ, fikinọ Jihova o wo adhẹẹ kẹ omariẹ gbe odẹ ofuafo riẹ, ọ rẹ kuvẹ hẹ re a kpe idibo riẹ kpobi muotọ. Ẹme ọfa ọna: Nọ o rọnọ Ọghẹnẹ “ọ kare eyoma” na, ọ te kuvẹ vievie he re a kpe idibo riẹ kpobi nọ e be roma kpotọ gọe. (Izie. 32:4; Emu. 18:25) Ofariẹ, re a kpe idibo Ọghẹnẹ kpobi no o wọso ẹme Ebaibol na inọ: “ỌNOWO na ọ sai ku ahwo riẹ fiẹ hẹ, fiki odẹ ulogbo riẹ na.” (1 Sam. 12:22) Evaọ uzẹme, “ỌNOWO ọ rẹ sia ahwo riẹ hẹ, hayo kọ ọ rẹ sae ku ereuku riẹ fiẹ hẹ.”—Ol. 94:14.

O rrọ oware omosasọ gaga inọ a te sai kpe idibo Jihova kpobi no otọakpọ na riẹriẹriẹ hẹ. Fikiere, joma daoma mai kpobi re ma yoẹme kẹ Ọghẹnẹ je fievahọ eyaa riẹ inọ: “Ekuakua ẹmo ọvo nọ a gali vi owhai nọ i re wo iruo e rọ họ, yọ wha rẹte kparobọ vi ọnọ ọ kpare ẹdhọ bru owhai ze kpobi. Onana họ ukuoriọ idibo ỌNOWO na, gbe imuẹro nọ a wo no obọ mẹ ze,—ere ỌNOWO na ọ tae.”—Aiz. 54:17.

[Ẹme nọ a fi ẹgba họ nọ ọ rrọ ẹwẹ-obe avọ 22]

Ọghẹnẹ ọ te kuvẹ vievie he re a kpe idibo riẹ muotọ