Kọ Who Bi Dhesẹ Oruaro Jihova Via?
Kọ Who Bi Dhesẹ Oruaro Jihova Via?
“Ma bi dhesẹ oruaro Jihova via wọhọ ughẹgbe.”—2 KỌR. 3:18, NW.
ẸVẸ WHỌ TE K’UYO ENỌ NANA?
Dede nọ ma gba ha, ẹvẹ ma sae rọ kẹ Jihova orro?
Ẹvẹ elẹ mai gbe iwuhrẹ ukoko nọ ma rẹ nya i re ro fi obọ họ kẹ omai dhesẹ oruaro Ọghẹnẹ via?
Eme ọ rẹ sai fi obọ họ kẹ omai ruabọhọ orro orọkẹ Jihova?
1, 2. Fikieme ma rẹ rọ ta nọ ma sae rọ aro kele Jihova?
MAI kpobi ma rọ oghẹrẹ jọ tho ọsẹgboni mai. Fikiere, u re gbe omai unu hu nọ ohwo jọ ọ tẹ ta kẹ ọmọzae inọ, ‘Who tho ọsẹ ra kẹhẹ.’ Ohwo jọ ọ rẹ sae ta kẹ ọmọtẹ inọ, ‘Who tho oni ra wo umuo ho.’ Yọ emọ a rẹ gwọlọ rọ aro kele esẹgbini rai. Kọ ẹvẹ kpahe omai? Kọ ma sae rọ aro kele Jihova, Ọsẹ obọ odhiwu mai? Dede nọ ma re ruẹ Ọghẹnẹ ẹdẹvo ho, ma rẹ sae riẹ iruemu riẹ ẹkwoma Ebaibol na nọ ma re wuhrẹ, eware nọ ọ ma nọ ma re muẹrohọ, gbe eware nọ ma jọ Ebaibol se nọ ma re roro didi kpahe maero kọ eme gbe iruẹru Jesu Kristi, Ọmọ riẹ. (Jọn 1:18; Rom 1:20) O ginẹ lọhọ re ma sai dhesẹ oruaro Jihova via.
2 Taure Ọghẹnẹ ọ tẹ te ma Adamu avọ Ivi, u mu rie ẹro inọ ahwo-akpọ a te sai ru oreva riẹ, je dhesẹ iruemu riẹ via, a vẹ rọ ere wha orro sei. (Se Emuhọ 1:26, 27.) Evaọ egagọ mai, u fo nọ ma re dhesẹ iruemu Ọnọ ọ ma omai. Nọ ma te bi ru ere, yọ uvẹ-ọghọ nọ ma sai ro dhesẹ oruaro Ọghẹnẹ via makọ oghẹrẹ nọ uruemu ẹwho mai o rrọ hayo oghẹrẹ nọ ma kpohọ isukulu te kẹhẹ. Fikieme? Keme “Ọghẹnẹ ọ rẹ jẹ ahwo [jọ] ọvo rehọ họ, rekọ evaọ korẹwho korẹwho ọnọ ọ jarae dhẹe o je ru onọ ukiẹrẹe ọ rẹ rehọ iẹe.”—Iruẹru 10:34, 35.
3. Ẹvẹ oma o rẹ jọ Ileleikristi nọ e be gọ Jihova?
3 Ileleikristi nọ a rọ ẹzi wholo na a bi dhesẹ oruaro Jihova via. Oye jabọ nọ Pọl ukọ na, ọnọ a rọ ẹzi wholo re o ro kere nọ: “Mai kpobi avọ ovao uvevẹ ma bi dhesẹ oruaro Jihova via wọhọ ughẹgbe, nọ a ruẹrẹ fihọ oghẹrẹ oma ovo na no oruaro ruọ oruaro.” (2 Kọr. 3:18, NW) Okenọ Mosis o nwrotọ no Ugbehru Saena ze avọ ekpala ivẹ nọ a kere Ijaje Ikpe na fihọ, ovao riẹ u te je lo nwranwranwra keme Jihova o lele i rie ta ẹme. (Ọny. 34:29, 30) Dede nọ oghẹrẹ oware utioye o re via kẹ Ileleikristi hi gbe nnọ ovao rai u bi lo nwranwranwra ha, a rẹ sae jọ ovao rai ruẹ oghọghọ nọ a tẹ be ta kẹ amọfa kpahe Jihova, ekwakwa-aghae riẹ, gbe emamọ ẹjiroro riẹ kẹ ahwo-akpọ. Wọhọ oghẹrẹ ighẹgbe enwranwra jọ nọ a jẹ hai ro rri ovao evaọ oke anwae, ikpodhiwu na avọ enọ e te rọ otọakpọ na reuku a bi dhesẹ oruaro Jihova via evaọ uzuazọ gbe usiuwoma ota rai. (2 Kọr. 4:1) Kọ whọ be rọ emamọ uruemu ra gbe usiuwoma ota ikẹse kẹse ra dhesẹ oruaro Jihova via?
O RRỌ ISIURU MAI RE MA DHESẸ ORUARO JIHOVA VIA
4, 5. (a) Wọhọ Pọl, ẹbẹbẹ vẹ ma wo? (b) Ẹvẹ umuomu u bi ro kpomahọ omai?
4 Mai idibo Jihova, ma gwọlọ rọ orro gbe adhẹẹ kẹ Ọnọ ọ ma omai evaọ oware kpobi nọ ma bi ru. Rekọ ẹsibuobu, dede nọ ma gwọlọ ru eware iwoma, ma re ruthọ. Pọl o wo ẹbẹbẹ nana re. (Se Ahwo Rom 7:21-25.) Pọl o dhesẹ oware nọ o soriẹ nọ ma ro wo elọhoma nana, o kere nọ: “Ahwo na kpobi a raha uzi re no a gbe te obọ oruaro Ọghẹnẹ hẹ.” (Rom 3:23) Ẹhẹ, fiki uzioraha nọ ma reuku riẹ no obọ Adamu ze, ahwo akpọ kpobi a tẹ rrọ igbo ‘umuomu nọ u bi su wọhọ ovie.’—Rom 5:12; 6:12.
5 Eme họ umuomu? Oye họ oware kpobi nọ o wọso uruemu-aghae, idhere, itee gbe oreva Jihova. Umuomu o rẹ raha usu ohwo kugbe Ọghẹnẹ. U re ru nọ ma gbẹ rọ nya te utee nọ a gwọlọ mi omai hi, nwane wọhọ epanọ ohwo nọ ọ rẹ sa ose ọ rẹ sa thọ ẹsejọ na. Ma rẹ sae rọ ethobọ hayo aro koko ru umuomu. (Ik. 15:27-31) Uzioraha o rrọ azẹ ahwo-akpọ yọ u bi fi ohẹriẹ họ usu mai avọ Ọnọ ọ ma omai. (Ol. 51:5; Aiz. 59:2; Kọl. 1:21) Fikiere, ahwo-akpọ buobu a bi yeri uzuazọ nọ u bi ru ai hẹriẹ oma no Ọghẹnẹ, u te bi ru ei bẹbẹ kẹ ae re a dhesẹ oruaro Ọghẹnẹ. Avro ọ riẹ hẹ, oware ovo nọ u kpomahọ ahwo-akpọ yoma te uzioraha o rrọ họ.
6. Dede nọ mai yọ erahaizi, ẹvẹ ma sai ro dhesẹ oruaro Ọghẹnẹ via?
6 Dede nọ mai yọ erahaizi, Jihova yọ “Ọghẹnẹ ẹruore.” (Rom 15:13) Ọ gbẹ edhere no re o si uzioraha n’otọ riẹriẹriẹ ẹkwoma idhe ẹtanigbo Jesu Kristi. Nọ ma te fi ẹrọwọ họ idhe yena, ma rẹ gbẹ jọ igbo umuomu hu, ukpoye kọ oruaro Jihova ma ti dhesẹ via. (Rom 5:19; 6:6; Jọn 3:16) Emamọ usu utioye nọ ma re wo kugbe Ọghẹnẹ u re ru nọ Jihova ọ rẹ rọ ghale omai enẹna, evaọ obaro ma ve ti te ẹgbagba jẹ rria bẹdẹ bẹdẹ. Dede nọ ma gbẹ rrọ erahaizi, o rrọ oware evawere inọ Ọghẹnẹ o bi rri omai omomọvo wọhọ ahwo nọ a sai dhesẹ oruaro riẹ via.
OGHẸRẸ NỌ MA SAI RO DHESẸ ORUARO ỌGHẸNẸ VIA
7. Eme ma re vuhumu kpahe omobọ mai re ma sai dhesẹ oruaro Ọghẹnẹ via?
7 Re ma sai gine dhesẹ oruaro Ọghẹnẹ via, ma re vuhumu inọ mai yọ erahaizi. (2 Irv. 6:36) Ma re vuhu onana mu ẹsikpobi jẹ daoma fi uzioraha kparobọ re ma sai dhesẹ oruaro Ọghẹnẹ via. Wọhọ oriruo, otẹrọnọ ma kie ruọ uzioraha iwoho ẹbẹba iriwo, ma re vuhumu inọ ma gwọlọ obufihọ no obọ ekpako ukoko ze, ma vẹ nya bru ai kẹ obufihọ. (Jem. 5:14, 15) Onana họ oware ọsosuọ nọ ohwo otiọye o re ru re ọ sai yeri uzuazọ nọ o rẹ wha orro se Ọghẹnẹ. Mai idibo Jihova ma rẹ kiẹ omamai riwi kẹse kẹse sọ ma be nyate itee ikiẹrẹe nọ Ọghẹnẹ o fihọ. (Itẹ 28:18; 1 Kọr. 10:12) Makọ oghẹrẹ nọ uzioraha nọ ma bi lele muabọ o rrọ kẹhẹ, ma rẹ gbẹ daoma whaha iẹe re ma sai dhesẹ oruaro Ọghẹnẹ via.
8. Dede nọ ma gba ha, eme u fo nọ ma re ru?
8 Jesu ọvo họ ohwo nọ ọ rria akpọ na no nọ o ru oreva Ọghẹnẹ gbagba je dhesẹ oruaro riẹ via evaọ edẹ uzuazọ riẹ kpobi. Rekọ ma gba ha, wọhọ epanọ Jesu ọ jọ gbagba. Ghele na, ma rẹ sae rọ aro kele oriruo riẹ. (1 Pita 2:21) Jihova o re muẹrohọ oma nọ ma be dawo gbe ẹnyaharo nọ ma wo no, ọ vẹ ghale omodawọ mai re ma sae wha orro sei.
9. Didi obufihọ Ebaibol na ọ rẹ sae kẹ Ileleikristi nọ e gwọlọ koko izi Ọghẹnẹ?
9 Ebaibol na ọ sai fi obọ họ kẹ omai riẹ oghẹrẹ nọ ma sai ro dhesẹ oruaro Ọghẹnẹ via. U wuzou gaga re ma wuhrẹ Ebaibol na je roro didi kpahe eware nọ ma wuhrẹ. (Ol. 1:1-3) Ebaibol na nọ ma re se kẹdẹ kẹdẹ u re fi obọ họ k’omai dhesẹ oruaro Ọghẹnẹ ziezi. (Se Jemis 1:22-25.) Eriariẹ Ebaibol e rẹ bọ ẹrọwọ mai ga, i ve je fi obọ họ kẹ omai whaha izieraha ilogbo, ma vẹ sai ru Jihova eva were.—Ol. 119:11, 47, 48.
10. Ẹvẹ olẹ o sai ro fi obọ họ kẹ omai gọ Jihova ziezi?
10 Oware ofa nọ ma re ru re ma sai dhesẹ oruaro Ọghẹnẹ via họ, ma rẹ “lẹ kẹse kẹse.” (Rom 12:12) Ma rẹ lẹ re Jihova o fi obọ họ kẹ omai gọe evaọ edhere nọ ọ jẹ rehọ. Fikiere, ma rẹ sae lẹ re ọ kẹ omai ẹzi ọfuafo, re ọ tua ẹrọwọ mai, fi obọ họ kẹ omai fi edawọ kparobọ jẹ kẹ omai ẹgba nọ ma sae rọ “yọrọ ẹme uzẹme na ziezi.” (2 Tim. 2:15; Mat. 6:13; Luk 11:13; 17:5) Wọhọ epanọ ọmọ ọ rẹ rẹroso ọsẹ riẹ kẹ obufihọ na, ere u fo nọ ma rẹ rẹroso Jihova, Ọsẹ obọ odhiwu mai. Ma tẹ lẹ se Jihova re o fi obọ họ kẹ omai ru oreva riẹ ziezi, u re mu omai ẹro inọ o ti gine ru ere. Ajọ ma roro vievie he inọ ma bi kpokpo iei. Ukpoye, evaọ elẹ mai, ma re jiri iei, yere iei, gwọlọ ekpọvio riẹ maero nọ ma tẹ rọ otọ edawọ, ma vẹ jẹ yare iẹe re o fi obọ họ kẹ omai gọe evaọ edhere nọ o rẹ sae wha orro se odẹ ofuafo riẹ.—Ol. 86:12; Jem. 1:5-7.
11. Ẹvẹ iwuhrẹ ukoko i re ro fi obọ họ kẹ omai dhesẹ oruaro Ọghẹnẹ via?
11 Ọghẹnẹ o muọ idibo eghaghae riẹ họ obọ ọrigbo nọ o wo ẹrọwọ avọ areghẹ na re a rẹrote ai. (Mat. 24:45-47; Ol. 100:3) Utu ọrigbo na o gwọlọ fi obọ họ kẹ omai kpobi dhesẹ oruaro Jihova via ziezi. Wọhọ epanọ ma rẹ ta kẹ ohwo nọ o re ko iwu re o kru ewu mai re o ruẹsi kiehọ omai oma ziezi na, ere iwuhrẹ ukoko e rẹ ruẹrẹ omai họ ziezi. (Hib. 10:24, 25) Fikiere, u fo re ma hae kaki kpohọ iwuhrẹ, keme otẹrọnọ a be hai muhọ no re ma te te obei, ma ti wo erere no iwuhrẹ na ze vọvọ họ.
JOMA RỌ ARO KELE ỌGHẸNẸ
12. Ẹvẹ ma sae rọ rehọ aro kele Ọghẹnẹ?
12 Re ma sai dhesẹ oruaro Jihova, u fo nọ ma rẹ ‘jọ ahwo nọ a be rọ aro kele Ọghẹnẹ.’ (Ẹf. 5:1) Edhere jọ nọ ma rẹ rọ rehọ aro kele Jihova họ, nọ ma tẹ be hai rri eware wọhọ epanọ Jihova o rri rai. Nọ ma gbe bi yeri uzuazọ wọhọ epanọ Jihova ọ gwọlọ họ, o rẹ wha ekela se odẹ riẹ jẹ wha enwoma se omai. Nọ orọnọ Setan Ẹdhọ na o bi su akpọ na soso na, o gwọlọ nọ ma rẹ daoma mai kpobi re ma mukpahe eware nọ Jihova o mukpahe je you eware nọ o you. (Ol. 97:10; 1 Jọn 5:19) U re mu omai ẹro inọ edhere nọ ọ mai woma nọ ma rẹ rọ gọ Ọghẹnẹ họ, nọ ma te bi ru eware kpobi rọ kẹe oruaro.—Se 1 Ahwo Kọrint 10:31.
13. Fikieme ma re ro mukpahe umuomu, kọ eme onana o rẹ lẹliẹ omai ru?
13 Jihova o mukpahe umuomu, yọ ere u fo nọ ma re mukpahe iẹe re. Ẹhẹ, ma te mukpahe umuomu, ma rẹ kẹnoma kẹ oware kpobi nọ o rẹ lẹliẹ omai raha uzi lelele. Wọhọ oriruo, o gwọlọ nọ ma rẹ kẹnoma kẹ ahwo nọ a kie no ẹrọwọ na no, keme ahwo otiọye a rẹ sae kẹ Ọghẹnẹ oruaro ho. (Izie. 13:6-9) Fikiere, joma ru oware ovo kugbe ahwo nọ a kie no ẹrọwọ na ha hayo ohwo nọ o se omariẹ oniọvo rekiyọ ọ be rọ uruemu riẹ wha ekela se odẹ Ọghẹnẹ. Epọvo na ma re ru nọ ọ tẹ make rrọ ohwo uviuwou mai. (1 Kọr. 5:11) Erere ọvo o re noi ze he nọ ma tẹ be vravro kugbe ohwo nọ o kie no ẹrọwọ na no hayo enọ e be hae ta eme iyoma kpahe ukoko Jihova. Evaọ uzẹme, nọ ma te bi se ebe rai hayo evuẹ nọ a fihọ Itanẹte o rẹ sai fi usu mai kugbe Jihova họ ọza.—Se Aizaya 5:20; Matiu 7:6.
14. Nọ ma tẹ be daoma dhesẹ oruaro Ọghẹnẹ via, uruemu vẹ ma re wo, kọ fikieme?
14 Emamọ edhere jọ nọ ma sae rọ rehọ aro kele Ọsẹ obọ Odhiwu mai họ, nọ ma tẹ be hai dhesẹ uyoyou. Ẹhẹ, ma rẹ daoma jọ yoyou wọhọ Ọghẹnẹ omariẹ. (1 Jọn 4:16-19) Evaọ uzẹme, uyoyou nọ ma wo kẹ ohwohwo na u dhesẹ nọ mai yọ ilele Jesu gbe idibo Jihova. (Jọn 13:34, 35) Dede nọ umuomu nọ ma reuku riẹ na o rẹ lẹliẹ omai zoruẹ ẹsejọ, ma rẹ daoma kpobi re ma ruẹ nọ ma dhesẹ uyoyou ẹsikpobi. Nọ ma te bi dhesẹ uyoyou gbe iruemu ezi efa, u re fi obọ họ kẹ omai whaha eware nọ i fo ho gbe umuomu.—2 Pita 1:5-7.
15. Nọ ma te wo uyoyou kẹ amọfa, ẹvẹ ma re yeri kugbe ai?
15 Uyoyou o rẹ wọ omai ru eware ezi kẹ amọfa. (Rom 13:8-10) Wọhọ oriruo, uyoyou nọ ma wo kẹ ọrivẹ-orọo mai u re fi obọ họ kẹ omai whaha ẹnwae-obro. Uyoyou nọ ma wo kẹ ekpako ukoko gbe ovuhumuo kẹ iruo nọ a bi ru, u re fi obọ họ kẹ omai yoẹme kẹ ae jẹ nya lele ekpọvio rai. Emọ nọ i you esẹgbini rai a re yoẹme jẹ rọ adhẹẹ kẹ ae, yọ a rẹ ta eme iyoma kpahe esẹgbini rai hi. Nọ ma te you erivẹ mai, ma re rri rai wọhọ ahwo nọ a fioka ha ha yọ ma re mu kpahe eme kẹ ai hi. (Jem. 3:9) Ekpako ukoko nọ i you idibo Ọghẹnẹ, a re tete ai.—Iruẹru 20:28, 29.
16. Ẹvẹ uyoyou u re ro fi obọ họ kẹ omai evaọ iruo usiuwoma ota na?
16 U fo nọ uyoyou u re dhesẹ oma via re evaọ iruo usiuwoma ota mai. Fiki uyoyou udidi nọ ma wo kẹ Jihova, ma rẹ siọ usiuwoma na ba ẹta ha o tẹ make rọnọ ahwo jọ a be rọwo gaviezọ họ. Ukpoye, ma rẹ ruabọhọ iruo na. Uyoyou o te wọ omai ruẹrẹ oma kpahe jẹ daoma wo onaa ziezi evaọ usiuwoma ota na. Ma te gine you Ọghẹnẹ gbe erivẹ mai, ma ti rri iruo usiuwoma ota Uvie na wọhọ oware ọgbahọ họ. Ukpoye, ma ti rri rie wọhọ uvẹ-ọghọ ulogbo, ma vẹ te rọ evawere ru iruo na.—Mat. 10:7.
RUABỌHỌ ORUARO ORỌKẸ JIHOVA
17. Fikieme u re ro fi obọ họ nọ ma tẹ be hae kareghẹhọ nọ ma gba ha?
17 Ahwo buobu evaọ akpọ na a riẹ epanọ uzioraha u yoma te he, rekọ ere o rrọ kẹ omai hi. Onana u ru nọ ma rẹ rọ họre ekpehre isiuru nọ e rẹ gwọlọ wọ omai raha uzi. Nọ ma tẹ be hae kareghẹhọ nọ mai yọ ahwo-akpọ nọ a gba ha, o rẹ lẹliẹ omai wuhrẹ obruoziẹ-iroro mai re o wọ omai ru oware uwoma nọ isiuru oware uyoma uruo e tẹ be ruọ omai udu. (Rom 7:22, 23) Uzẹme, oyẹlẹ o rẹ sae ruọ omai oma ẹsejọ, rekọ Ọghẹnẹ ọ rẹ sae bọ omai ga ru oware nọ u fo oke kpobi nọ ma tẹ rrọ otọ odawọ.—2 Kọr. 12:10.
18, 19. (a) Eme o re fi obọ họ kẹ omai mugba kẹ izi imuomu? (b) Eme o rẹ jọ ọtamuo mai?
18 Re ma sae kẹ Jihova oruaro, o gwọlọ nọ ma re je mugba kẹ izi imuomu. Ẹgọ-ẹmo nọ o no obọ Ọghẹnẹ ze na o re fi obọ họ kẹ omai ru onana avọ obokparọ. (Ẹf. 6:11-13) Setan ọ be dawo ẹgba riẹ kpobi re a kẹe oruaro nọ u fo nọ a rẹ rọ kẹ Jihova ọvo. Ẹdhọ ọ tẹ be jẹ dawo ẹgba riẹ kpobi re ọ raha usu mai kugbe Jihova. Rekọ o rẹ da Setan gaga nọ mai gbe ima ahwo-akpọ buobu efa nọ e gba ha, te ezae, te eyae, gbe emọ nọ ma te bi kru ẹrọwọ mai jẹ rọ orro kẹ Ọghẹnẹ. Fikiere, joma hai jiri Jihova wọhọ epanọ ikọ-odhiwu a bi ru, enọ i whowho nọ: “Who teri, eyo Ọnowo nọ o re mie oro gbe adhẹẹ gbe ogaga, keme whẹ ọ ma eware na kpobi, jegbe fiki awere ra a rọ rọ, a rọ mae na.”—Evia. 4:11.
19 Jọ o jọ ọtamuo mai inọ ma rẹ gbẹ ruabọhọ orro orọkẹ Jihova ghelọ oware kpobi nọ ma rẹriẹ ovao dhe kẹhẹ. Ababọ avro, eva e be were Jihova inọ idibo riẹ buobu a be daoma rai kpobi re a rọ aro kele iei je dhesẹ oruaro riẹ via. (Itẹ 27:11) Ajọ ma ta wọhọ Devidi ọnọ ọ so inọ: “Mẹ rẹ rọ eva mẹ kpobi jiri owhẹ, eyo Ọnowo ỌGHẸNẸ mẹ, me ve ti jiri odẹ ra bẹdẹ.” (Ol. 86:12) Ma bi rẹro oke nọ ma ti dhesẹ oruaro Jihova via gbagba je jiri odẹ riẹ bẹdẹ bẹdẹ. Ahwo nọ a yoẹme a ti ru onana. Kọ who bi dhesẹ oruaro Jihova via enẹna avọ irẹro inọ who ti ru ere bẹdẹ bẹdẹ?
[Enọ Uwuhrẹ]
[Iwoho nọ e rrọ ẹwẹ-obe avọ 27]
Kọ whọ be rọ idhere nana dhesẹ oruaro Jihova via?
