“Wha Yọrọ Oma Rai Obọ Ẹvi Otu E Farisi”

Jesu ọ vẹvẹ ilele riẹ unu nọ: “Wha yọrọ oma rai obọ ẹvi otu e Farisi, enọ e rọ eviẹwẹ na.” (Luk 12:1) Obe Usiuwoma nọ Matiu o kere kpahe ẹme ọvona u ru rie vẹ inọ Jesu ọ jẹ kẹ unuovẹvẹ kpahe “ewuhrẹ” otu Farisi.—Mat. 16:12.

Ẹsejọ Ebaibol ọ rẹ rehọ “ẹvi” dhesẹ egbogbo hayo ọraha. Avro ọ riẹ hẹ, iwuhrẹ gbe uruemu ahwo Farisi e jẹ raha uruemu ahwo nọ a jẹ gaviezọ kẹ ae. Fikieme iwuhrẹ ahwo Farisi i ro yoma tere?

1 Ahwo Farisi a wo omorro a te je rri omarai inọ a kiẹrẹe vi ahwo nọ a kiọkọ.

Jesu ọ t’ẹme kpahe oma-udhesẹ ẹrẹreokie nana evaọ ọtadhesẹ riẹ jọ. Ọ ta nọ: “Ohwo otu Farisi na o te dikihẹ, ọ tẹ lẹ enẹ kẹ oma riẹ, nọ, ‘Ọghẹnẹ, me yere owhẹ epanọ mẹ wọhọ ahwo ọdekọ họ, ifruriọ, e nọ ikiẹrẹe he, ibruẹnwae, hayo tubọ wọhọ omiazọhọ ọnana. Mẹ rẹ siọ emuọriọ ba isiava ẹkpoka ọvo, mẹ be jẹ ẹkẹ eware nọ me bi wo kpobi’. Rekọ omiazọhọ na, o dikihẹ ugbo thabọ, ọ sai bi ru re ọ kpare aro riẹ kpo ehru hu, rekọ ọ tẹ tehe igbama riẹ, anọ ‘Ọghẹnẹ, ohrọ mẹ ọ rahaizi na, o re ohwẹ.’”—Luk 18:11-13.

Jesu ọ ta ẹme owoma omaurokpotọ omiazọhọ na inọ: “Mẹ ta kẹ owhai nọ, ohwo ọnana ọnya kpo obọ uwou riẹ, o kiẹrẹe vi ohwo ọdekọ; keme kohwo kohwo nọ o re ti ruẹ oma ororo a re ti hrẹ i kpo otọ, rekọ ohwo nọ ọ rọ oma kpo otọ a re ti ru ei rua.” (Luk 18:14) Dede nọ imiazọhọ a jẹ hae wha amọfa re, Jesu o fi obọ họ kẹ enọ e jọ usu rai gaviezọ kẹe. Ma riẹ kpahe imiazọhọ ivẹ nọ i zihe ruọ ilele riẹ, eye họ Matiu avọ Zakiọs.

Kọ ẹvẹ otẹrọnọ ma rẹ jọ udu mai roro nọ ma woma vi amọfa fiki oghẹrẹ onaa hayo owha-iruo jọ nọ ma wo hayo fiki ethobọ amọfa? U fo nọ ma si iroro itieye na no udu vẹrẹ vẹrẹ keme Ebaibol ọ ta nọ: “Uyoyou u re wo odiri krẹkri, avọ ọriẹruo; uyoyou u wo ihrieriọ họ hayo eha-ise he; u wo omovia ha, hayo u re ru eware etọtọ họ oma riẹ hẹ. Uyoyou o rẹ guọlọ orọ obọ riẹ hẹ; o rẹ kpare ẹme ọgaga avọ ofu hu; o rẹ ghọghọ eva oware othọthọ họ, rekọ o rẹ ghọghọ eva oware nọ u kiete.”—1 Kọr. 13:4-6.

Ma re wo ọkpọ uruemu Pọl ukọ na. Pọl ọ ta nọ “Kristi Jesu ọ ze eva akpọ na ti siwi erahaizi,” o fibae nọ: “Mẹ [họ] ọnọ ọ rọ aro erahaizi na.”—1 Tim. 1:15, 16

Enọ nọ ma re roro didi kpahe:

Kọ mẹ be kareghẹhọ inọ mẹ yọ ọrahauzi, gbe nnọ fiki aruoriwo Jihova me ti ro wo esiwo? Manikọ me bi roro nọ me woma vi amọfa fikinọ mẹ rrọ ukoko na kri no, gbe nnọ me wo onaa hayo ewha-iruo jọ evaọ ukoko na?

  2 Ahwo Farisi a jẹ hae jọ ẹgbede dhesẹ oma inọ ae a mai kiẹrẹe. A jẹ hae gwọlọ ekwa gbe okpodẹ.

Jesu ọ kẹ unuovẹvẹ nọ: “A re ru eware kpobi re ahwo a rue rae; keme a re ru igbelẹ rai kẹkẹe a ve je ru efẹhọ iwu rai thetheri. A rẹ guọlọ eria nọ ikpehru keria evaọ eha gbe emamọ eria evaọ iwou-egagọ, gbe re a diguẹ kẹ ae eva eria eki, je se ae nọ iwuhrẹ.” (Mat. 23:5-7) Uruemu Jesu u wo ohẹriẹ no orai gaga. Dede nọ ọye yọ Ọmọ Ọghẹnẹ nọ ọ rrọ gbagba, o wo omaurokpotọ. Nọ ọzae jọ o sei “ọ rọ ezi,” Jesu ọ ta kẹe nọ: “Eme who je se omẹ ọ rọ ezi? Ọvuọvo ọrọ ọ rezi hi, ajokpa Ọghẹnẹ ọvo.” (Mak 10:18) Evaọ oke ofa jọ, Jesu ọ wozẹ awọ ilele riẹ, ọ tẹ rọ ere fi oruiruo omaurokpotọ h’otọ kẹ ae.—Jọn 13:1-15.

U fo nọ uvi Oleleikristi ọ rẹ gbodibo kẹ ibe Ileleikristi riẹ. (Gal. 5:13) Inievo nọ e gwọlọ te kẹ owha-iruo ekpako ukoko ae u fo nọ a rẹ mai ru onana. U woma gaga re ohwo “ọ guọlọ ọkwa ọsẹro,” rekọ ẹjiroro nọ u fo nọ ohwo o re ro le utee nana họ, re o fi obọ họ kẹ amọfa evaọ ukoko na. Orọnikọ “ọkwa” ọnana yọ ọrọ okpodẹ hayo omorro ho. Ekpako ukoko a rẹ jọ “wowolẹ jegbọ eva i ro kpotọ,” wọhọ epanọ Jesu ọ jọ.—1 Tim. 3:1, 6; Mat. 11:29.

Enọ nọ ma re roro didi kpahe:

Kọ mẹ rẹ thuẹthuẹ gba ahwo nọ a wo ewha-iruo evaọ ukoko na, avọ irẹro inọ a te kẹ omẹ ewha-iruo? Kọ eware nọ amọfa a re ro muẹrohọ omẹ je jiri omẹ ọvo mẹ rẹ gwọlọ ru evaọ ukoko na? Kọ mẹ rẹ gwọlọ ru re me woma vi amọfa?

  3 Iruẹru gbe ijaje ahwo Farisi i je ru ei bẹbẹ kẹ ahwo nọ i kiọkọ re a koko Uzi Mosis na.

Uzi Mosis na oye u dhesẹ oghẹrẹ nọ emọ Izrẹl a rẹ gọ Jihova. Rekọ Ọghẹnẹ ọ vuẹ rai oware kpobi nọ o rrọ emu Uzi na ha. Wọhọ oriruo, Uzi na o ta nọ a re ru iruo evaọ Ẹdijala ha, rekọ o fodẹ hẹ oware nọ o rrọ iruo gbe onọ o rrọ iruo ho. (Ọny. 20:10) Ahwo Farisi a jẹ rọ iruẹru gbe ijaje obọrai ba Uzi na evaọ oria nọ a roro nọ Uzi na u dhunu te he. Jesu o je koko Uzi Mosis na rekọ o je lele izi ibuobu nọ ahwo Farisi a fiba Uzi na ha. (Mat. 5:17, 18; 23:23) Jesu ọ riẹ ẹjiroro nọ a rọ kẹ ae Uzi na, ọ riẹ nọ Ọghẹnẹ ọ gwọlọ nọ a dhesẹ ohrọ-oriọ gbe uyoyou. O dhesẹ orimuo makọ ẹsenọ ilele riẹ a ru oware nọ ọ gwọlọ họ. Wọhọ oriruo, dede nọ ọ ta kẹ ikọ esa riẹ inọ jọ a jaja aro vi evaọ aso nọ a ro mu ei, a kie ruọ owezẹ unuẹse buobu. Ghele na, ọ ta kẹ ae avọ ororokẹ inọ: “O ghinẹ ruọ ẹzi, rekọ uwo o [lọhọ].”—Mak 14:34-42.

Enọ nọ ma re roro didi kpahe:

Kọ me bi fi izi ikeke họ je rẹro inọ amọfa a re ru lele ae hayo gwọlọ nọ amọfa a ru eware nọ me roro inọ e gba? Kọ me re rẹro inọ amọfa a ru eware nọ a rẹ sai ru hu?

Roro kpahe ohẹriẹ nọ o rrọ iwuhrẹ Jesu avọ erọ ahwo Farisi. Kọ who muẹrohọ idhere jọ nọ whọ sai ro ru inwene? O tẹ rrọ ere, gbaemu inọ who ti ru ere.

[Uwoho nọ o rrọ ẹwẹ-obe avọ 28]

Ahwo Farisi a rẹ gba igbelẹ nọ ikerakere e rrọ si aruezo.—Mat. 23:2, 5

[Iwoho nọ e rrọ ẹwẹ-obe avọ 29]

Wo ohẹriẹ no ahwo Farisi nọ a wo omorro, ekpako ukoko nọ i wo omaurokpotọ a rẹ gbodibo kẹ amọfa

[Uwoho nọ o rrọ ẹwẹ-obe avọ 30]

Wọhọ Jesu, kọ who bi dhesẹ orimuo evaọ oware nọ who re rẹro riẹ mi amọfa?