Ẹwo O re Furie Evedha

ẸDẸJỌ nọ inievo ivẹ nọ a re se George avọ Manon nọ e be rria obọ Netherlands a nyae ta usiuwoma kẹ ọkpọkuaye jọ, ọ rọwo nọ a ta kẹe he. Inievo na a tẹ te riẹ nọ ọzae o whu ku aye nana isiava no, ọmọzae riẹ jọ o whu no, yọ ọnyokpa-enwa ọ be kẹe uye. Dede nọ ọ dina gaviezọ kẹ ae, o wo ẹgwọlọ kẹ usiuwoma na tere he.

George ọ tẹ ta kẹ Manon inọ jọ a rọ idodo se aye na re i ru eva were iẹe keme o wọhọ nọ ọ rrọ goli. Nọ a ru ere, eva e tẹ were ọkpọkuaye na gaga. Fikinọ a ruẹ uvẹ keria t’ẹme he, a te fi oke ofa họ nọ a re ro zihe bru ei. Nọ George avọ Manon a zihe nya evaọ oke nọ a fihọ, ohwo ọvo ọ jọ uwou hu. A wariẹ zihe nya unuẹse buobu rekọ a di rie họ uwou hu. A te je tube roro nọ aye na ọ be ruẹ e rai dhẹ.

Ẹdẹjọ, George o te di aye na họ uwou. Aye na o te wounu fikinọ a be hai di ei họ uwou hu, inọ ọ jọ ẹsipito oke yena. Ọ tẹ ta nọ: “Nọ wha kpo no evaọ ẹdẹ, me te muọ Ebaibol họ ese.” A tẹ ta usiuwoma kẹ aye na ziezi je mu uwuhrẹ Ebaibol họ kugbei.

Odẹ aye nana họ, Rie, yọ Ebaibol nọ o bi wuhrẹ u ru nọ aye nana nọ ọ jẹ hae dheva je mu ovao họ na o ro zihe ruọ ohwo evawere. Dede nọ ẹyao ọ gbẹ be jọ aye nana no uwou hu, o te muọ usiuwoma họ ẹta kẹ ohwo kpobi nọ o weze bru ei. Ọ jẹ sai kpohọ ewuhrẹ ẹsikpobi hi fiki ẹyao na, rekọ eva e rẹ were iẹe nọ inievo ukoko na a te weze bru ei. Ẹdẹ nọ ọ rọ gba ikpe udhone gbe ivẹ, o kpohọ okokohọ okogho jẹ họ-ame ro dhesẹ omaromudhe riẹ via.

Nọ emerae jọ e vrẹ no o te whu, kẹsena a tẹ jọ uwou riẹ ruẹ eme jọ nọ o kere. O kere kpahe epanọ u re yoma te nọ ohwo nọ ọ kpako no ọ tẹ rrọ goli, gbe epanọ u wuzou te re a dhesẹ ẹwo. Manon ọ ta nọ: “Eme nọ aye na o kere na i duobọte omẹ gaga, yọ eva e were omẹ gaga inọ Jihova o ru nọ ma ro dhesẹ ẹwo kẹ aye na.”

Ẹhẹ, uyoyou gbe ẹwo nọ Jihova o dhesẹ kẹ omai no o be wọ omai ru epọvo na kẹ amọfa. (Ẹf. 5:1, 2) Ma ti wo emamọ iyẹrẹ evaọ usiuwoma ota mai nọ ma tẹ be rọ ẹwo “dhesẹ oma mai, wọhọ iruiruo Ọghẹnẹ.”—2 Kọr. 6:4, 6.