Ikuigbe Uzuazọ

‘Oware Udidi’ nọ Ma Wuhrẹ Evaọ Iruo Usiuwoma Ota Mai

Ikuigbe Olivier Randriamora

“Mẹ riẹ epanọ a rẹ rọ omakpotọ, mẹ tẹ jẹ riẹ epanọ a rẹ rua, mẹ jọ evaọ koware koware gbe eghẹrẹ kpobi wuhrẹ edidi epanọ a rẹ rọ ovao wha ọruẹriọ hayo ọbẹwẹ . . . mẹ rẹ sai ru eware kpobi eva [ẹgba] ọnọ ọbe kẹ omẹ eri.”—Fil. 4:12, 13.

U KRI no nọ eme nana nọ Pọl ukọ na ọ ta na e be rọ kẹ omẹ avọ aye mẹ nọ a re se Oly uduotahawọ. Wọhọ Pọl, ma wuhrẹ ‘oware udidi’ na ẹkwoma Jihova nọ ma rẹroso evaọ iruo usiuwoma ota mai obọ Madagascar.

Oke nọ Isẹri Jihova a mu uwuhrẹ Ebaibol họ kugbe oni Oly evaọ ukpe 1982, yọ mẹ avọ Oly ma mu usu orọo họ ẹnya no. Mẹ tẹ ta nọ a wuhrẹ Ebaibol kugbe omẹ re, uwhremu na Oly o te kuomagbe uwuhrẹ na. Evaọ ukpe 1983, mẹ avọ Oly ma tẹ ruọ orọo, ukpe 1985 ma tẹ họ-ame, ma tẹ nwani mu iruo ọkobaro obufihọ họ. Evaọ amara Ahrẹ ọrọ ukpe 1986, ma te mu iruo ọkobaro oke-kpobi họ.

Evaọ amara Azie ọrọ ukpe 1987, ma te mu iruo ọkobaro obọdẹ họ. Oria ọsosuọ nọ a vi omai kpohọ họ, ẹmẹwho jọ evaọ obọ Madagascar nọ ukoko ovo o rrọ họ. Ewho nọ i bu te 18 gbe emewho buobu e rrọ Madagascar, yọ iruemu ewho nana i wo ohẹriẹ gaga no ohwohwo. Malagasy họ ẹvẹrẹ nọ a rẹ jẹ, rekọ a wo ọvuọ ẹrọo-unu riẹ. Fikiere ma te mu ẹrọo-unu nọ a rẹ jẹ evaọ ẹkwotọ usiuwoma ota mai họ ewuhrẹ, yọ onana u ru nọ ahwo a jẹ rọ gaviezọ kẹ omai ziezi evaọ ẹwho nọ ma jọ na.

Nọ ma tu te obei, mẹ jẹ hae kẹ ovuẹ ogbotu k’Ẹdoka k’Ẹdoka, nọ me te kuhọ no, aye mẹ Oly ọ vẹ tehe abọ. Mai imava ọvo ma jẹ hae jọ ewuhrẹ na. Ma jẹ hai ru ewuhrẹ Isukulu Odibọgba Esuo-Ọghẹnẹ na re, yọ nọ aye mẹ o te wo ẹme, ọ rẹ ta ẹme kẹ ofou wọhọ ẹsenọ ọ be ta ẹme na kẹ ohwo jọ. Eva e were omai gaga nọ ọsẹro okogho ọ nyaze jẹ vuẹ omai nọ ma rọ oghẹrẹ ofa ru iwuhrẹ na.

Fikinọ ileta e rẹ kaki te obonọ ma rrọ họ, ugho nọ ukoko o rẹ k’omai k’amara k’amara o jẹ hae kaki te omai obọ họ. Fikiere ma te wuhrẹ epanọ ma re ro thihakọ nọ eware e tẹ kare omai. Oke jọ o jariẹ nọ ma wo ugho nọ ma rẹ rọ j’ofa kpohọ okokohọ họ, onọ o rehọ emaele 80 thabọ no oria nọ ma jọ. Ma tẹ kareghẹhọ emamọ ohrẹ jọ nọ oniọvo jọ ọ k’omai okejọ inọ: “Ta ebẹbẹ ra kẹ Jihova, keme iruo riẹ wha bi ru.” Fikiere nọ ma lẹ no, ma tẹ jiroro nọ ma te rọ owotọ nya. Rekọ taure ma tẹ nwane ruọ edhere, oniọvo jọ ọ tẹ kpahe omai jẹ k’omai ugho, nwanọ unuigho nọ u re te omai j’ofa kpohọ okokohọ na.

IRUO ỌSẸRO OKOGHO

Evaọ amara Ava ọrọ ukpe 1991, a tẹ rọ omẹ mu ọsẹro okogho. Eva oke yena, mai ahwo nọ a jọ  ukoko na ma bu te iwhowho-uvie izii no, yọ imasa e họ-ame no, rekọ ahwo nọ a jẹ hae nyaze ewuhrẹ a jẹ hai bu te ahwo 50. Nọ a wuhrẹ omai fihọ iruo ọsẹro okogho no, a te vi omai kpohọ okogho jọ evaọ Antananarivo, okpẹwho-esuo Madagascar. Evaọ ukpe 1993, a tẹ wariẹ vi omai kpohọ okogho ọfa evaọ orẹwho na. Uzuazọ uyero okogho nana u wo ohẹriẹ gaga no orọ Antananarivo nọ ma jọ vẹre.

Re ma sai te ikoko gbe utu inievo sa-sa, ma jẹ hae nya owotọ, yọ ẹsejọ ma rẹ nya emaele nọ i bu te 90 evaọ igbehru nọ ire e vọ. Ma jẹ hae daoma wha umutho eware. Dede na, o tẹ gwọlọ nọ ma dhesẹ isinima kẹ ukoko, wọhọ epanọ ọruẹrẹfihotọ na ọ jẹ hae jọ ẹsejọ evaọ oke yena, owha mai o jẹ hae gbẹdẹ. Aye mẹ ọ rẹ wha ẹkpẹti nọ a re ro dhesẹ isinima na, mẹ vẹ wọ ebatri omoto nọ ma re ro rri ughe na.

Ẹsibuobu re ma sai te ukoko nọ ma bi rri, ma rẹ nya emaele 25 evaọ okpẹdoke. Nọ ma tẹ rrọ edhere, ma rẹ nya igbehru vrẹ, fa ithẹ vrẹ, jẹ nya ọloho. Ẹsejọ, ma rẹ wezẹ akotọ edhere, rekọ ẹsibuobu ma rẹ gwọlọ iwhre jọ nọ ma rẹ wezẹ aso hẹrioke. Ẹsejọ ma rẹ ta kẹ ahwo nọ ma riẹ ẹdẹvo ho inọ jọ a k’omai oria jọ nọ ma rẹ wezẹ hẹrioke. Nọ a tẹ k’omai oria no, ma vẹ gwọlọ epanọ ma re ro there emu. Oly aye mẹ o ve momo epọto, ọ vẹ rehọ iẹe kpohọ ethẹ nyai vo ame. Evaọ oke yena, me ve momo ehwe je mu ire họ ẹbẹre. Onana kpobi o jẹ hae raha oke. Ẹsejọ, ma rẹ dẹ arifẹ ọkpokpọ, ọnọ ma re kpe ro there ẹbẹ.

Nọ ma tẹ re emu no, ma vẹ nyai vo ame nọ ma rẹ rọ họ. Ẹsejọ ikichini ma rẹ wezẹ. Nọ oso ọ tẹ be rrọ, ma re kiẹzẹ tamu ugbẹhẹ, re oso ọ siọ omai ba ekie fihọ fiki uwou na nọ u bi fi.

Ẹsikpobi ma jẹ hae ta usiuwoma kẹ ahwo nọ ma wohọ iwou rai. Nọ ma tẹ nya te ukoko nọ ma bi kpohọ no, ẹwo inievo na gbe oghẹrẹ nọ a re ro dede omai rehọ o jẹ hae kẹ omai evawere gaga. Oghẹrẹ nọ a jẹ hae wereva te fiki iweze mai, o jẹ hae lẹliẹ omai kpairoro vrẹ uye nọ o bẹ omai evaọ edhere.

Nọ ma te wohọ iwou inievo, o jẹ hae were omai re ma lele ai ru iruo uwou. Onana u ve ru ei lọhọ kẹ ai re a kuomagbe omai evaọ usiuwoma ota. Ma je rẹro ikpeware gbe obọdẹ emu hu, onọ ahwo nọ ma wohọ iwou rai a wo ho.

NỌ MA JẸ NYAI RRI UTU INIEVO SA-SA NỌ E RRỌ IWHRE

O jẹ hae were omai gaga re ma nyai rri utu inievo sa-sa nọ e rrọ iwhre, a jẹ hai dede omai rehọ ziezi jẹ ruẹrẹ omaa iruẹru sa-sa fihọ. O jẹ hae jọ bẹbẹ re ma ruẹ uvẹ nọ ma re ro “serihọ omojọ.” (Mak 6:31) Evaọ oria jọ, ọzae-avọ-aye jọ nọ a rrọ ukoko na a zizie emọ-uwuhrẹ Ebaibol rai kpobi nọ i bu te 40 ziọ uwou rai, re ma kuomagbe ai wuhrẹ ai. Oly aye mẹ o kuomagbe oniọvo-ọmọtẹ na wuhrẹ ahwo 20, mẹ avọ ọzae riẹ ma te wuhrẹ ahwo 20 nọ i kiọkọ. Nọ ma te kuhọ kugbe ọmọ-uwuhrẹ Ebaibol jọ no, ọfa ọ vẹ nwane rueva. Evaọ abọ owọwọ, ma tẹ dobọji je ru iwuhrẹ ukoko, kẹsena ma tẹ wariẹ mu obe uwuhrẹ na họ kugbe ai. Ẹsejọ, oke u re te ighọjọ eree aso re ma te ku iruẹru okpẹdẹ na họ.

Nọ ma weze kpohọ utu inievo ofa jọ, ighọjọ eree irioke mai kpobi ma tẹ tehe usu họ bi kpohọ iwhre jọ nọ e kẹle omai. Iwu nọ e who no mai kpobi ma kuhọ. Nọ ma nya ugbothabọ evaọ igbrẹwọ no, ma  te ti te ẹkwotọ na oware wọhọ ighọjọ ikpegbivẹ uvo. Ma te nwene emamọ iwu je mu usiuwoma họ ẹta n’uwou ruọ uwou. Iwou na i tulo ho, rekọ iwhowho-uvie e jọ buobu. Fikiere ma ru ẹkwotọ na kpobi re evaọ oware wọhọ iminiti 30 ọvo. Kẹsena ma te kpohọ iwhre nọ e kẹle riẹ. Nọ ma jọ iwhre nana ta usiuwoma no, ma tẹ wariẹ nya ugbothabọ na zihe kpo. Evaọ oke ọsosuọ oghẹrẹ usiuwoma ota nana o jẹ hae wha oyẹlẹ fihọ omai oma. Ma ruẹ uye jẹ raha oke gaga re ma sae te obei rekọ ma ta usiuwoma ọ n’uwou ruọ uwou na vrẹ auwa ọvo ho. Rekọ inievo na a jẹ go ho. A gbẹ jẹ ta usiuwoma na avọ ọwhọ.

Utu inievo jọ nọ e jọ iwhre Taviranambo o jọ kẹle ehru ugbehru. Ma jọ etẹe ruẹ uviuwou Isẹri Jihova jọ nọ o be rria ubruwou ovo. Umuwou jọ nọ o kẹle etẹe a jẹ jọ ru iwuhrẹ. Ẹsiẹvo na, ọsẹ uwou na o muhọ ese nọ, “Inievo!” Omọfa ọ tẹ jọ ehru ugbehru nọ o kẹle etẹe yo nọ, “O!” Ọnọ ma wohọ uwou riẹ na ọ tẹ wariẹ bo nọ, “Ọsẹro okogho na ọ nyaze no!” Ohwo ọdekọ na o te yo nọ, “Ẹhẹẹ!” U muẹro nọ ere a rọ wha ovuẹ na te amọfa nọ a thabọ no etẹe. U kri hi, ahwo a te muhọ ekokohọ, yọ okenọ ewuhrẹ na o muhọ, ahwo nọ a jariẹ a bu te 100.

EBẸBẸ NỌ MA JẸ RẸRIẸ OVAO KU NỌ MA TE BI KPOHỌ ERẸ

Evaọ ukpe 1996, a te vi omai kpohọ okogho ọfa nọ ọ kẹle Antananarivo, oria nọ igbehru e rrọ. Ma rẹriẹ ovao ku oghẹrẹ ẹbẹbẹ ọfa evaọ okogho nana. Ẹsibuobu a rẹ ruẹ uvumọ omoto nọ o bi kpohọ eria nọ i thabọ họ. Omaa nọ a kẹ omai u dhesẹ nọ ma re kpohọ Beankàna (ẹwho Besakay), nọ o rehọ oware wọhọ emaele udhuhrẹ gbikpe (150) thabọ no Antananarivo. Nọ ma lele edraeva na thuọ unuigho nọ ma te hwa no, ma tẹ ruọ omoto nọ o bi kpohọ ẹwho na. Ahwo nọ a jọ omoto na a bu te 30, ejọ e ruọ obeva, ejọ e gadiẹ obehru, efa i thuru rie.

U kri hi, omoto na ọ tẹ raha wọhọ epanọ o rẹ via ẹsibuobu, ma te mu owotọ họ ẹnya. Nọ ma nya owotọ euwa jọ no, omoto ologbo jọ ọ tẹ dhẹ ze. Ahwo gbe ewha e vọ riẹ eva rekọ edraeva na ọ daji k’omai ghele. Ma tẹ rueva je dikihẹ keme oria o riẹ nọ ma rẹ keria ha. Uwhremu na ma te ti te ethẹ jọ, rekọ akwa riẹ ọ raha no nọ a be ruẹrẹ. Ma tẹ wariẹ ruọ otọ, je mu owotọ họ ẹnya bẹsenọ ma ro te iwhre ọsese jọ nọ ekobaro obọdẹ jọ a be rria. Dede nọ a riẹ nọ ma be nyaze he, ma kuomagbe ai jẹ ta usiuwoma be hẹrẹ oke nọ a rẹ ruẹrẹ akwa na no re ma gwọlọ oghẹrẹ ofa nọ ma re ro te obonọ ma be nya.

 Ẹkpoka soso ọ vrẹ taure omoto ọfa ọ tẹ te dhẹ ze, kẹsena ma tẹ ruọ edhere. Egọdọ e vọ edhere na. Ẹsibuobu ma je he tu omoto na nya ame nọ o te ighilawọ vrẹ, yọ ma jẹ hai kie jẹ kpama nọ ma bi tu ei na. Evaọ irioke frifri, ma te ti te iwhre jọ nọ ma jọ ruotọ. Ma tẹ rọ owotọ wẹriẹ kpohọ obeva, nya udhu isikapa vrẹ avọ ame ọloho nọ o te omai eku bi kpohọ iwhre nọ ma be nya na.

Onana o jọ orọ ọsosuọ nọ ma ro te ẹkwotọ yena, fikiere ma tẹ jiroro nọ ma rẹ ta usiuwoma kẹ ahwo jọ nọ a bi ru iruo evaọ udhu isikapa jẹ nọ ai re a dhesẹ oria nọ Isẹri Jihova e rrọ kẹ omai. Eva e were omai kẹhẹ nọ ma riẹ nọ kpakọ ahwo nana nọ a bi ru iruo evaọ udhu isikapa na yọ inievo mai.

UDUOTAHAWỌ RỌKẸ AMỌFA RE A RUỌ IRUO ODIBỌGBA OKE-KPOBI NA

Anwọ ikpe buobu ze na, o rrọ oware evawere kẹ omai gaga inọ ahwo buobu nọ ma tuduhọ awọ a ruọ iruo ọkobaro oke-kpobi na. Nọ ma weze kpohọ ukoko jọ nọ ekobaro izii e rrọ, ma tẹ tuduhọ ae awọ re omomọvo rai o fi obọ họ kẹ owhowho-uvie ọfa ruọ iruo ọkobaro. Nọ emera ezeza e vrẹ no nọ ma zihe kpohọ ukoko na, ekobaro nọ e riẹ i bu te 22 no. Inievo-emetẹ ivẹ jọ nọ e rrọ ekobaro a fi obọ họ kẹ esẹ rai nọ e rrọ ekpako ukoko zihe ruọ ekobaro no. Esẹ ivẹ na omarai a te je fi obọ họ kẹ ọkpako ukoko ọfa kuomagbe ai evaọ iruo ọkobaro na. U kri hi, a tẹ rọ ọkpako nọ ọ ruọ iruo ọkobaro uwhremu na mu ọkobaro obọdẹ. A te vi ei avọ aye riẹ kpohọ iruo ọsẹro okogho. Kọ ẹvẹ kpahe ekpako ivẹ ọsosuọ na? A rọ ọjọ mu ọsẹro okogho, ọnọ o kiọkọ o te kuomagbe inievo nọ i bi ru iruo ebabọ Egwa Uvie.

Ma bi yere Jihova kẹdẹ kẹdẹ rọkẹ obufihọ riẹ, keme ma vuhumu inọ ma rẹ sae rọ ẹgba obọmai ru oware ovo ho. Uzẹme, ẹsejọ oma o rẹ rrọ omai, ma rẹ sae jẹ mọ, ghele na eva e rẹ were omai nọ ma te roro kpahe emamọ iyẹrẹ nọ i bi no iruo usiuwoma ota mai ze. Jihova o bi ru nọ iruo riẹ e be rọ nya haro. Eva e be were omai nọ ma bi ru umutho nọ ma rẹ sai ru evaọ iruo na, enẹna ma rrọ iruo ọkobaro oke-kpobi. Ẹhẹ, ma wuhrẹ ‘oware udidi’ na ẹkwoma ẹro nọ ma rọ so Jihova ‘ọnọ ọ be kẹ omai eri’ na.

[Ẹme nọ a fi ẹgba họ nọ ọ rrọ ẹwẹ-obe avọ 6]

Ma wuhrẹ ‘oware udidi’ na ẹkwoma ẹro nọ ma rọ so Jihova

[Udhesẹ-oria/Uwoho nọ o rrọ ẹwẹ-obe avọ 4]

Madagascar, nọ a re se Big Red Island họ ukoliko avọ ene nọ ọ mae rro evaọ akpọ na. Ẹkpẹ riẹ ọ rrọ wawae, yọ otọ na u re wou eware sa-sa

[Uwoho nọ o rrọ ẹwẹ-obe avọ 5]

Re ma kpohọ erẹ o jọ ẹbẹbẹ ologbo

[Iwoho nọ e rrọ ẹwẹ-obe avọ 5]

O jẹ hae were omai re ma wuhrẹ Ebaibol kugbe amọfa