Gọ Ọghẹnẹ Nọ Ọ Rẹ Kẹ Ufuoma Na

“Uyoyou Ọghẹnẹ ona, nnọ ma re koko ijaje riẹ. Whaọ ijaje riẹ erọ owha ogbẹgbẹdẹ hẹ.”—1 JỌN 5:3.

KỌ WHỌ SAE K’UYO ENỌ NANA?

Ẹvẹ Setan ọ be rọ gwọlọ ru omai roro nọ izi Ọghẹnẹ e ga hrọ?

Fikieme ma rẹ rọ yọroma gaga kpahe oghẹrẹ ahwo nọ ma re lele nyusu?

Eme o ti fi obọ họ kẹ omai daji abọ Ọghẹnẹ nọ ọ rẹ kẹ ufuoma na?

1. Ẹvẹ Jihova o rri ufuoma, kọ ẹvẹ o ro dhesẹ onana via evaọ oghẹrẹ nọ o yeri kugbe Adamu avọ Ivi?

JIHOVA ọvo họ Ọnọ ufuoma riẹ u wo oba ha. Ghele na, ọ rẹ rehọ ufuoma nana ru oware nọ u fo ho ho, yọ ọ rẹ ta họ idibo riẹ obọ họ. Ukpoye, ọ kẹ rai ufuoma nọ a sae rọ jiroro kẹ omobọ rai jẹ salọ onọ a re ru. Wọhọ oriruo, uzi ọvo Ọghẹnẹ ọ kẹ Adamu avọ Ivi, inọ a re ubi-ure “ẹriẹ ewoma gbe eyoma na ha.” (Emu. 2:17) Kpahe oreva Ọghẹnẹ uruo, ufuoma nọ ọ kẹ rai o rro kẹhẹ!

2. Fikieme ọsẹgboni ọsosuọ mai a ro ku ufuoma nọ Ọghẹnẹ ọ kẹ rai fiẹ?

² Fikieme Ọghẹnẹ ọ rọ kẹ Adamu avọ Ivi ufuoma tere? Ọ ma rae evaọ uwoho riẹ jẹ kẹ ae obroziẹ-iroro, avọ irẹro inọ uyoyou nọ a wo kẹe o te wọ ae ru oware nọ u fo. (Emu. 1:27; Rom 2:15) U yoma kẹhẹ inọ Adamu avọ Ivi a dhesẹ edẹro kẹ Ọnọ ọ ma rae he nọ ọ rọ kẹ ae ufuoma. Ukpoye, a jẹ ekpehre ufuoma nọ Setan ọ kẹ rae rehọ, onọ a re ro yeri uzuazọ nọ u je rai. Rekọ uvi ufuoma u te rai obọ họ, ukpoye ọsẹgboni ọsosuọ mai a tẹ zẹ omarai gbe emọ nọ a ti yẹ kpobi fihọ igbo uzioraha, avọ uye ulogbo nọ u no rie ze.—Rom 5:12.

3, 4. Ẹvẹ Setan ọ be rọ gwọlọ viẹ omai họ kpahe izi Jihova?

³ Otẹrọnọ Setan ọ rẹ sae viẹ imava nọ e jọ gbagba họ, jẹ viẹ ijẹle buobu họ re a siọ esuo Ọghẹnẹ, koyehọ ọ rẹ sae viẹ omai họ re. Eghẹ riẹ i ri nwene he. Ọ be gwọlọ viẹ omai họ re ma roro nọ izi Ọghẹnẹ yọ owha ogbẹgbẹdẹ, onọ o rẹ whaha omai evawere. (1 Jọn 5:3) Iroro itieye na e rẹ sae ruọ omai udu nọ ma tẹ be hae jọ kugbe ahwo nọ a wo ọkpọ iroro itieye kẹse kẹse. Oniọvo-ọmọtẹ  jọ nọ ọ rrọ ikpe 24 nọ o kie ruọ ọfariẹ-ogbe ọ ta nọ: “Ekpehre egbẹnyusu nọ me wo e lẹliẹ omẹ ru oware uyoma nana, mẹ jẹ gwọlọ jọ wọhọ otu mẹ.” O sae jọnọ otu ra a gele owhẹ ruọ oware uyoma no ẹdẹjọ re.

⁴ U yoma kẹhẹ inọ makọ evaọ ukoko ileleikristi na, ohwo ọ rẹ sae rẹriẹ ovao dhe ẹbẹbẹ otunyẹ ọhwa ẹsejọ. Oniọvo-ọmọzae jọ ọ ta nọ: “Mẹ riẹ izoge jọ nọ e jẹ nyusu orọo kugbe ahwo nọ a rrọ ukoko ho. Mẹ tẹ te ruẹ vuhumu inọ epanọ mẹ jọ kugbe izoge nana te, ere me bi wo ọkpọ uruemu rai te. Me te muhọ ewhrehe evaọ ukoko na. Iwuhrẹ ukoko e gbẹ jẹ were omẹ hẹ, yọ udugaga mẹ jẹ hai ro kpohọ usiuwoma. Me te vuhumu inọ mẹ rẹ fa usu no ai, yọ ere me gine ru!” Kọ whọ riẹ nọ egbẹnyusu e rẹ sai kpomahọ owhẹ gaga? Joma ta kpahe oriruo jọ evaọ Ebaibol na.—Rom. 15:4.

Ọ DẸ RAI KPOBI REHỌ

5, 6. Ẹvẹ Absalọm o ro su amọfa thọ, kọ oware nọ ọ jẹ gwọlọ na u te rie obọ?

⁵ Iriruo buobu erọ ahwo nọ uruemu uyoma rai u kpomahọ amọfa e rrọ Ebaibol na. Absalọm, ọmọ Devidi ovie na yọ omọvo rai jọ. Absalọm o wo erru gaga. Rekọ nọ oke o be nya haro na, Absalọm o te wo ọkpọ uruemu Setan, o te je wo isiuru kẹ oware nọ o rrọ oriẹ hẹ, jẹ gwọlọ nọ o re mi ọsẹ riẹ uvie. * Avọ oma ẹghẹ, Absalọm o te je ru wọhọ ẹsenọ o wo ọdawẹ gaga kẹ emọ Izrẹl, je bi dhesẹ nọ ọsẹ riẹ ọ be daezọ rai hi. Nwane wọhọ epanọ Ẹdhọ o ru evaọ ọgbọ Idẹn, Absalọm ọ tẹ be rọ uruemu riẹ dhesẹ nọ o bi ru akpọ lọhọ kẹ ae, yọ ọ be ta ọsẹ obọriẹ raha.—2 Sam. 15:1-5.

⁶ Kọ oware nọ Absalọm ọ jẹ rọ ẹghẹ gwọlọ na u te rie obọ? Ma sae ta nọ o le utee na te umuo jọ keme Ebaibol na ọ ta nọ: “Ere Absalom ọ rọ dẹ ahwo Izrẹl kpobi rehọ.” (2 Sam. 15:6) Rekọ evaọ ukuhọ riẹ, uzou-uveghe Absalọm na o wha uye sei. Onana u te je si uwhu kpei gbe idu ahwo buobu nọ e jọ abọ riẹ.—2 Sam. 18:7, 14-17.

7. Eme ma rẹ sai wuhrẹ no oware nọ o via kpahe Absalọm na ze? (Rri ifoto nọ e rrọ ẹwẹ-obe avọ 14 na.)

⁷ Ẹvẹ ọ rọ sae viẹ ahwo na họ lọlọhọ ere? Ẹsejọhọ eware nọ Absalọm ọ ya eyaa riẹ kẹ ae i je si ai urru. O sae jẹ jọnọ erru riẹ ọ viẹ rae họ. Oghẹrẹ nọ o jọ kpobi kẹhẹ, ma wo imuẹro inọ: A daji abọ Jihova gbe ovie nọ o ro mu hu. Nẹnẹ, Setan ọ be rehọ ahwo nọ a wọhọ Absalọm rọ dẹ idibo Jihova rehọ. Ahwo otiọye a rẹ sae ta nọ: ‘Izi Jihova e ga hrọ. Rri ahwo nọ a be gọ Jihova ha, a bi wo omawere ẹsikpobi.’ Kọ who ti vuhumu inọ eme nana kpobi yọ erue koikoi jẹ daji ukoko Ọghẹnẹ? Kọ who ti vuhumu inọ “uzi ufuoma nọ o gba kiete,” uzi Kristi na, o rẹ sae kẹ owhẹ uvi ufuoma? (Jem. 1:25) O tẹ rrọ ere, jọ uzi na o jọ ghaghae kẹ owhẹ, whọ rọ ufuoma Ileleikristi na ruiruo thọthọ họ.—Se 1 Pita 2:16.

8. Iriruo vẹ i dhesẹ nọ izi Jihova nọ a rẹ la vrẹ o rẹ kẹ evawere he?

⁸ Setan ọ rẹ mae gwọlọ tẹrovi izoge. Oniọvo-ọmọzae jọ nọ ọ rrọ ikpe 30 enẹna ọ ta kpahe oke nọ ọ jọ ikpe ikpegbọ inọ: “Me je rri izi Jihova wọhọ nọ e be whaha omẹ omawere, orọnikọ e be thọ omẹ hẹ.” Onana u te su ei ruọ ọfariẹ-ogbe. Rekọ o wha evawere sei hi. Ọ ta nọ: “Onana o jẹ lẹliẹ udu brukpe omẹ ikpe buobu.”  Oniọvo-ọmọtẹ jọ ọ ta kpahe oke nọ ọ jọ ikpe ikpegbọ inọ: “Nọ ohwo o te gbe-ọfariẹ, onana o rẹ wha ọkora sei. Dede nọ onana o via kẹ omẹ anwọ ikpe 19 nọ i kpemu, mẹ gbẹ be kareghẹhọ iẹe.” Oniọvo-ọmọtẹ ọfa ọ ta nọ: “O rẹ k’omẹ idhọvẹ iroro je tube kpomahọ iruẹru mẹ evaọ ukoko na nọ me te roro te epanọ uruemu mẹ u kpomahọ ahwo nọ me you gaga. Re ohwo o siomano Jihova, a rẹ ruẹ oware nọ u yoma tei hi.” Setan ọ gwọlọ nọ who roro kpahe ẹbẹbẹ otiọye nọ uzioraha o rẹ sae wha ze he.

9. (a) Enọ vẹ e rẹ sai fi obọ họ k’omai kiẹ omamai riwi kpahe oghẹrẹ nọ ma rehọ Jihova gbe izi riẹ? (b) Fikieme u ro wuzou re ma riẹ Ọghẹnẹ ziezi?

⁹ U yoma gaga inọ izoge jọ, makọ ekpako soso jọ dede evaọ ukoko na a ruẹ uye no re u te ti mu ae ẹro inọ uzioraha nọ a bi se omaweromẹ na o rẹ wha uye ulogbo ze. (Gal. 6:7, 8) Fikiere, nọ omara nọ: ‘Kọ me bi vuhu eghẹ Setan mu? Kọ mẹ rehọ Jihova wọhọ Ogbẹnyusu nọ ọ mae kpekpe omẹ oma, ọnọ ọ rẹ ta uzẹme ẹsikpobi gbe ọnọ ọ gwọlọ nọ eware i woma kẹ omẹ? Kọ u mu omẹ ẹro inọ oware kpobi nọ u gine woma nọ o rẹ wha evawere se omẹ, Jihova ọ rẹ sai si ei no omẹ ẹdẹvo ho?’ (Se Aizaya 48:17, 18.) Re whọ sai yo nọ Ee kẹ enọ yena, o gwọlọ nọ whọ rẹ riẹ Jihova didi. U fo nọ usu ra kugbei o rẹ kpekpe gaga, who ve je vuhumu inọ uyoyou o wọ riẹ fi izi họ kẹ omai orọnikọ ọ be rehọ ae gba omai ifi hi.—Ol. 25:14.

 LẸ RE ỌGHẸNẸ O FI OBỌ HỌ K’OWHẸ WO AREGHẸ JE YOẸME

10. Fikieme ma rẹ rọ daoma rọ aro kele oware nọ Solomọn ovie na o ru evaọ oke nọ ọ jọ uzoge?

¹⁰ Nọ Solomọn ọ gbẹ jọ uzoge, ọ lẹ se Ọghẹnẹ avọ omaurokpotọ inọ: “Mẹ rọ ọmaha ọsese; mẹ riẹ epanọ mẹ [rẹ] ruọ otafe me je zihe ze he.” Kẹsena ọ tẹ lẹ re Ọghẹnẹ o fi obọ họ kẹe wo areghẹ je yoẹme. (1 Iv. 3:7-9, 12) Jihova ọ k’uyo olẹ yena, yọ o ti ru ere kẹ owhẹ re, whọ make rrọ ọmaha hayo ọkpako. Uzẹme, Jihova ọ te rọ edhere igbunu kẹ owhẹ areghẹ hayo otoriẹ hẹ. Rekọ o ti ru owhẹ wo areghẹ nọ whọ tẹ be romatotọ wuhrẹ Ebaibol na, lẹ kẹ ẹzi ọfuafo na, je ru lele ekpọvio nọ a be kẹ owhẹ evaọ obọ iwuhrẹ ukoko. (Jem. 1:5) Ẹhẹ, ẹkwoma eruẹrẹfihotọ nana, Jihova ọ rẹ sai ru idibo riẹ nọ e rrọ emaha tube wo areghẹ vi ohwo kpobi nọ ọ siọ ehrẹ riẹ, makọ enọ a bi se “iwoareghẹ gbe erieriariẹ” akpọ na.—Luk 10:21; se Olezi 119:98-100.

11-13. (a) Obọdẹ eware vẹ ma rẹ sai wuhrẹ nọ ma te roro kpahe eme nọ e rrọ obe Olezi 26:4, Itẹ 13:20, gbe 1 Ahwo Kọrint 15:33? (b) Ẹvẹ who ti ro fi eria Ebaibol nana họ iruo?

¹¹ Joma ta kpahe eria Ebaibol jọ nọ u dhesẹ nọ, ma tẹ be hai se Ebaibol na je roro didi kpahe oware nọ ma se, ma rẹ sae riẹ Jihova ziezi. Eria Ebaibol nana i wuhrẹ omai oware nọ u ro wuzou re ma salọ emamọ egbẹnyusu: “Mẹ be keria gba otu ogbẹta ha; hayo lele eviẹwẹ na jẹ iroro ho.” (Ol. 26:4) “Ọnọ ọ nya lele ahwo owareghẹ o re wo areghẹ, rekọ usu igheghẹ o rẹ nwa ohwo oma.” (Itẹ 13:20) “Usu uyoma o rẹ raha uruemu ezi.”—1 Kọr. 15:33.

¹² Obọdẹ eware vẹ ma rẹ sai wuhrẹ no eria ikere nana ze? (1) Jihova ọ gwọlọ nọ ma salọ ahwo nọ ma re lele nyusu. Ọ gwọlọ nọ ma wo ekpehre uruemu hu hayo raha usu mai kugbei hi. (2) Oghẹrẹ usu nọ ma nya u re dhesẹ oghẹrẹ uruemu mai, te uwoma hayo uyoma; a rẹ vro avro riẹ hẹ. Oghẹrẹ nọ a kere eme eria Ebaibol yena u dhesẹ nọ Jihova ọ be ta ẹme na evaọ oghẹrẹ nọ u re ro duobọte omai udu. Evaọ oghẹrẹ vẹ? Muẹrohọ inọ orọnikọ eria Ebaibol nọ ma fodẹ na e ta ha inọ “who re ru onana ha” hayo “ona who re ru hrọ.” Ukpoye, a kere i rai wọhọ uzẹme nọ a rẹ sae vro avro rai hi. O wọhọ nọ Jihova ọ be ta kẹ omai nọ: ‘Uzẹme na ona. Eme who ti ru kpahe iẹe? Eme ọ rrọ owhẹ udu?’

¹³ Ofariẹ, fikinọ eria Ebaibol nọ ma fodẹ na yọ eme uzẹme, eme na i re kiekpo ho, yọ i kie kpahe eware buobu evaọ uzuazọ. Wọhọ oriruo, nọ omara nọ: Ẹvẹ ma sae rọ whaha usu “eviẹwẹ”? Oria vẹ mẹ sae jọ nyaku eghẹrẹ ahwo otiọye? (Itẹ 3:32; 6:12) Amono họ “ahwo owareghẹ” nọ Jihova ọ gwọlọ nọ me lele nyusu? Kọ amono họ “igheghẹ” nọ ọ gwọlọ nọ me lele nyusu hu? (Ol. 111:10; 112:1; Itẹ 1:7) “Uruemu ezi” vẹ o rẹ raha nọ mẹ tẹ nyusu kugbe ikpehre ahwo? Kọ obọ akpọ ọvo mẹ jẹ sai mu ekpehre usu? (2 Pita 2:1-3) Ẹvẹ whọ te k’uyo enọ nana?

14. Ẹvẹ whọ sai ro ru re Egagọ Uviuwou ra e kẹ erere ziezi?

¹⁴ Nọ who roro kpahe eria ikere nana no na, daoma kiẹ eria Ebaibol efa riwi nọ i dhesẹ eriwo Ọghẹnẹ kpahe eware nọ i kpomahọ owhẹ hayo uviuwou ra. * Esẹgbini, wha hae rọ eware itieye na jiroro evaọ Egagọ Uviuwou rai. Kareghẹhọ inọ ẹjiroro nọ wha bi ro ru ere họ, re wha fi obọ họ kẹ  ahwo uviuwou rai vuhumu ziezi inọ izi Ọghẹnẹ i dhesẹ uyoyou ulogbo nọ o wo kẹ omai. (Ol. 119:72) Ẹhẹ, uwuhrẹ utioye u re si ahwo uviuwou na kẹle ohwohwo jẹ kẹle Jihova vi epaọ ọsosuọ.

15. Ẹvẹ whọ sae rọ riẹ sọ who wo areghẹ je bi yoẹme?

¹⁵ Ẹvẹ whọ sae rọ riẹ sọ who wo areghẹ je bi yoẹme? Edhere jọ họ, nọ whọ tẹ be rọ iroro ra wawo erọ idibo Ọghẹnẹ oke anwae wọhọ Devidi ovie na, ọnọ o kere nọ: ‘Mẹ gwọlọ ru oreva ra, O Ọghẹnẹ mẹ; uzi ra o rọ udu mẹ.’ (Ol. 40:8) Ọnọ o kere Olezi avọ 119 ọ ta re inọ: ‘O, epanọ me you uzi ra! O rọ eva iroro mẹ kẹdẹ kẹdẹ.’ (Ol. 119:97) Re ohwo ọ sai you uzi Ọghẹnẹ, o gwọlọ iruo. Ohwo ọ rẹ romatotọ wuhrẹ Ebaibol, lẹ, je roro didi, kẹsena ọ vẹ te jọ uzuazọ riẹ ruẹ eghale buobu nọ i re te ohwo nọ o bi koko izi Ọghẹnẹ.—Ol. 34:8.

DAOMA GAGA RE UFUOMA RA O SEBA EVRU

16. Nọ ma be daoma gaga re ufuoma mai o seba evru na, eme u fo nọ ma rẹ kareghẹhọ?

¹⁶ N’otọ avọ otọ ze, erẹwho a bi fi ẹmo re a ruẹsi wo ufuoma. Kọ whọ gbẹ ruẹ nọ u wuzou re whọ daoma gaga re ufuoma nọ who wo evaọ usu ra kugbe Ọghẹnẹ o seba evru? Kareghẹhọ inọ Setan, akpọ na, gbe ẹzi omuomu akpọ na yọ ewegrẹ ra. U te no ere no, eware efa nọ who re lele muabọ họ, oma sebaẹgba ra, gbe udu ra nọ o rẹ sae viẹ owhẹ họ. (Jeri. 17:9; Ẹf. 2:3) Rekọ avọ obufihọ Jihova, whọ sae kparobọ. Oke kpobi nọ who fi ọjọ evaọ usu ewegrẹ nana kparobọ, eware ezi ivẹ jọ i re noi ze. Orọ ọsosuọ, who ti ru eva were Jihova. (Itẹ 27:11) Orọ avivẹ, who ti wo omofọwẹ nọ “uzi ufuoma nọ o gba kiete na” o rẹ kẹ, onana u ve ti ru owhẹ gbaemu ziezi inọ whọ rẹ daji ‘edhere ọhwahwa’ nọ o bi su kpohọ uzuazọ ebẹdẹ bẹdẹ na. Evaọ obaro, who ve ti wo ufuoma nọ u vi onana, onọ idibo Jihova kpobi a bi rẹro riẹ na.—Jem. 1:25; Mat. 7:13, 14.

17. Fikieme ma gbẹ kuvẹ re udu u whrehe omai hi fiki eware nọ e thọ omai obọ, kọ obufihọ vẹ Jihova ọ rẹ kẹ omai?

¹⁷ Uzẹme, eware e rẹ sae thọ omai obọ ẹsejọ. (Ọtausi. 7:20) Nọ o tẹ via ere, whọ jọ oma o lọhọ owhẹ hẹ hayo roro ho inọ who fioka ha. Who te zoruẹ, wọhọ odẹme, wariẹ dikihẹ ga who mu onya họ, o tẹ make gwọlọ nọ whọ ta kẹ ekpako ukoko ra re a fi obọ họ k’owhẹ. Jemis o kere nọ: “Olẹ orọwọ u re siwẹ ohwo nọ ọ rẹ mọ; Ọnowo na ọ vẹte kpariẹ tovrẹ; re otẹrọnọ ọ raha izi, o reti wo erọvrẹ.” (Jem. 5:15) Ajọ o thọrọ owhẹ ẹro ho inọ Ọghẹnẹ ọ vọ avọ ohrọ, gbe nọ o si owhẹ ziọ ukoko na fikinọ ọ ruẹ nọ who wo udu ẹmeoyo. (Se Olezi 103:8, 9.) Fikiere, nọ whọ tẹ be daoma rọ eva efuafo gọ Jihova ẹsikpobi, o ti kiuke ku owhẹ hẹ.—1 Irv. 28:9.

18. Ẹvẹ ma sai ro ru lele olẹ Jesu nọ o rrọ obe Jọn 17:15 na?

¹⁸ Aso urere nọ Jesu ọ jọ kugbe ikọ ikpegbọvo riẹ, ọ yare Ọsẹ riẹ kpahe ikọ na inọ: “Siwi ai no obọ oyoma na.” (Jọn 17:15) Orọnikọ ikọ riẹ ọvo Jesu o wo ọdawẹ kẹ hẹ, rekọ te omai ilele riẹ kpobi. Fikiere, o rẹ sai mu omai ẹro inọ Jihova o ti yo olẹ Jesu, rẹrote omai evaọ edẹ muomu nana. “[Jihova] họ ojese rọ kẹ enọ e be nya evaọ ẹrẹreokie, [ọ te] yọrọ edhere erezi riẹ.” (Itẹ 2:7, 8) Ẹhẹ, nọ ma be daoma nya edhere ẹrẹreokie na, ma ti wo ebẹbẹ, rekọ edhere yena ọvo họ onọ u bi su kpohọ uzuazọ ebẹdẹ bẹdẹ je ru omai wo uvi ufuoma. (Rom 8:21) Whọ jọ ohwo ọvo o si owhẹ no edhere na ha.

[Oruvẹ-obotọ]

[Enọ Uwuhrẹ]

[Iwoho nọ e rrọ ẹwẹ-obe avọ 14]

Ẹvẹ ma sai ro vuhu ahwo nọ a wọhọ Absalọm nẹnẹ je siomano ai?