“Oware nọ Mẹ Gwọlọ Kpobi U Te Omẹ Obọ No”

Ikpe ikpegbisoi nọ i kpemu, Emilia ọ jọ ọkobaro oke-kpobi. Rekọ uwhremu na, ọ tẹ seba. Kẹle na ọ be hae kareghẹhọ evawere nọ o wo evaọ etoke yena, jẹ gwọlọ nọ ọ rẹ wariẹ w’obọ ziezi evaọ iruo usiuwoma ota na.

Rekọ iruo Emilia e be rehọ oke riẹ gaga, yọ onana o be whaha iẹe evawere. Ẹdẹjọ nọ ọ jọ kugbe ibe iruiruo riẹ, o te bi weri oma inọ: “Dodokọ iruo mẹ na e rẹ kẹ omẹ uvẹ!” Nọ ọga-iruo riẹ o yo onana, ọ tẹ nọe sọ ere ọ ginẹ gwọlọ. Emilia o te yo nọ Ee. Rekọ re oyena o sae lọhọ, ọnọ o wuzou ekọmpene na ọ rẹ rọwo kpahe iẹe tao keme ekọmpene na o fi uzi họ inọ oruiruo kpobi ọ rẹ roma kpobi kẹ iruo na. Oniọvo-ọmọtẹ na ọ tẹ be ruẹrẹ oma kpahe epanọ o re ro lele ọnọ o wuzou ekọmpene na ta ẹme, ọ tẹ lẹ inọ Ọghẹnẹ ọ kẹe udu re udhedhẹ o jẹ jariẹ.

Nọ ọ jẹ ta ẹme kẹ ọnọ o wuzou ekọmpene na, Emilia ọ tẹ rọ onaa avọ udu yare inọ jọ a si no oke iruo riẹ. Ọ ta nọ oke eriosehọ nọ a be hae kẹe evaọ iruo na ọ be hai ro fi obọ họ kẹ amọfa, o fibae inọ: “Mẹ yọ omọvo Isẹri Jihova, yọ me re wuhrẹ amọfa ẹme Ọghẹnẹ. Enẹna, ahwo buobu a gbe bi dhesẹ emamọ uruemu hu. O gwọlọ nọ a rẹ riẹ uruemu ezi nọ u fo nọ a re dhesẹ, yọ eware nọ e rrọ Ebaibol nọ mẹ be hae rọ ta usiuwoma kẹ amọfa i wuzou kẹ ae gaga. Mẹ gwọlọ nọ usiuwoma nọ mẹ be hae ta nọ iruo i te kuhọ no, i kpomahọ epanọ mẹ hai ti ru te evaọ iruo mẹ hẹ, yọ mẹ gwọlọ gbe wo oke kẹ omamẹ viere nọ me re ro fi obọ họ kẹ amọfa. Fiki oye mẹ rọ gwọlọ nọ a si no oke iruo mẹ.”

Ọnọ o wuzou iruo na ọ roma totọ gaviezọ kẹe, kẹsena ọ tẹ ta nọ oke jọ nọ u kpemu ọyomariẹ o je roro epanọ o re ro fi oma họ iruo obufihọ kẹ amọfa. Ọ tẹ ta nọ: “Fiki ẹjiroro nana nọ who wo na, o gba omẹ họ nọ me re ru ayare ra na gba kẹ owhẹ. Rekọ whọ riẹ nọ a ti si no osa ra re?” Emilia ọ tẹ kuyo nọ ọ riẹ, gbe nnọ o tẹ gwọlọ nọ o ru uzuazọ riẹ lọhọ, o ti ru ere. Ọ ta re nọ: “Oware nọ o mai wuzou kẹ omẹ kpaobọ họ, re me ru oware nọ o rẹ ginẹ kẹ amọfa erere.” Ọnọ o wuzou iruo na ọ tẹ ta kẹe nọ: “Ahwo nọ a rẹ rehọ oke rai fi obọ họ kẹ amọfa a rẹ were omẹ.”

A ri ru oware utioye kẹ omọfa ẹdẹvo ho evaọ ekọmpene na. Enẹna, a kẹ Emilia uvẹ inọ o ru iruo edẹ ene ọvo evaọ ẹkpoka. Oware nọ o mae gbei unu họ, osa ovona a be hwae enẹna! Emilia ọ ta nọ: “Oware nọ mẹ gwọlọ kpobi u te omẹ obọ no, enẹna mẹ rẹ sae wariẹ ruọ iruo ọkobaro oke-kpobi!”

Kọ who roro kpahe epanọ whọ rẹ rọ ruẹrẹ iruẹru ra họ no re whọ ruọ iruo ọkobaro hayo wariẹ ruọ iruo na otẹrọnọ whọ jọ ọkobaro okejọ?

[Ẹme nọ a fi ẹgba họ nọ ọ rrọ ẹwẹ-obe avọ 32]

Ọnọ o wuzou iruo na ọ ta kẹe nọ: “Ahwo nọ a rẹ rehọ oke rai fi obọ họ kẹ amọfa a rẹ were omẹ”