Iruẹru mai erọ oke nọ u kpemu

Erẹ Inievo nọ E jẹ Hai Weze Bru Itu Emọ-Uwuhrẹ Ebaibol

“MẸ SAE ta usiuwoma n’uwou ruọ uwou vievie he!” Ere o jọ inievo buobu nọ i kurẹriẹ obọ oma nọ a yo nọ a be te hae ta usiuwoma n’uwou ruọ uwou. Rekọ o rẹ sai gbe owhẹ unu inọ ohwo nọ ọ ta ẹme yena yọ oniọvo nọ o re ru ẹme ziezi nọ ọ jẹ hai weze bru itu emọ-uwuhrẹ Ebaibol.

Ahwo nọ a jẹ hai se Uwou-Eroro mai nọ a je se Zion’s Watch Tower oke yena nọ i no ichọche rai sa-sa ze a jẹ gwọlọ ahwo nọ a wo isiuru kẹ uzẹme Ebaibol wọhọ ae omarai. Emagazini na o jẹ hae tuduhọ enọ i bi sei awọ inọ jọ a gwọlọ amọfa nọ a wo ẹrọwọ ọvona kpahe iwuhrẹ Ọghẹnẹ re a hai kuomagbe kẹ uwuhrẹ Ebaibol ẹsikpobi. Muhọ no oware wọhọ ukpe 1894 ze, ehri ukoko o jẹ hai vi ahwo bru itu emọ-uwuhrẹ Ebaibol nọ e yare inọ jọ ohwo jọ o weze bru ai ze. Inievo nọ a re vi kpohọ iweze itieye na e jọ ahwo omaurokpotọ, nọ i wo eriariẹ Ebaibol ziezi, nọ i wo onaa ewuhrẹ ziezi, gbe enọ i fi ẹrọwọ họ ọruẹrẹfihotọ ẹtanigbo na. Inievo nọ a vi kpohọ iweze na a jẹ hae jọ kugbe utu ẹdẹ ọvo hayo edẹ ivẹ. Usiuwoma ota ọsosuọ nọ inievo buobu a nya, a nyae ghale emebe ro zizie ahwo ziọ ovuẹ ogbotu nọ oniọvo nọ o weze bru ai ze ọ be te kẹ. Nọ Brọda Hugo Riemer nọ o zihe ruọ omọvo Ugboma Esuo na uwhremu na ọ kẹ ovuẹ no owọwọ ẹdẹjọ evaọ uwou isukulu nọ a kokohọ, ọ tẹ jẹ k’uyo enọ nọ ahwo a jẹ nọe no Ebaibol ze bẹsenọ udevie aso u ro te. Dede nọ oma o rrọ riẹ no, ọ ta avọ evawere inọ uwuhrẹ na u woma gaga.

Uwou-Eroro na o ta nọ ugogo ẹjiroro nọ inievo na a bi ro weze bru itu na họ re a bọ “idibo Ọghẹnẹ” ga ẹkwoma iwuhrẹ nọ a re koko oma họ ru evaọ iwou rai. Emọ-uwuhrẹ Ebaibol nọ e be rria kẹle uwou nọ a koko họ a rẹ nya ze te kezọ kẹ ovuẹ oniọvo nọ o weze bru ai na kẹsena a ve ru uwuhrẹ enọ-gbe-iyo. Uwuhrẹ yena u te kuhọ no, u ve te oke emuọriọ. Okenọ Maude Abbott ọ jọ ọmọtẹ, o kpohọ iwuhrẹ itieye, nọ a kuhọ no ẹdẹjọ a tẹ keria wariẹ emẹjẹ othethei jọ họ kẹ emuọriọ. Ọ ta nọ: “Emu ọ da fia—esi, arifẹ nọ a fra, oghoghẹrẹ ebrẹdi, ikeki, gbe eware efa! Ohwo kpobi ọ re bẹ, oware wọhọ ighọjọ ivẹ uvo, ma tẹ wariẹ koko oma họ kẹ ovuẹ ofa. Rekọ nọ ovuẹ na u muhọ no, owezẹ u te bi su enwenọ ohwo kpobi.” Benjamin Barton nọ o ru iruo iweze na kri no ọ ta nọ, ‘O hae jọnọ mẹ re emu kpobi nọ a ruẹrẹhọ k’omẹ, enẹ yọ okpore u kpe omẹ no.’ A kere ileta no ehri ukoko obọ Brooklyn ze uwhremu na se inievo-emetẹ nọ i bi there emu kẹ inievo na inọ o rẹ mai woma re a siọ oghẹrẹ emu obọdẹ jọ ba ethere, rekọ o hae jọ “oghẹrẹ emu nọ ahwo a rẹ re kẹdẹ kẹdẹ” re a hae jẹ “wezẹ owezẹ d’oma.”

Inievo nana nọ e rrọ iruo iweze na, a jẹ hae rọ eware sa-sa nọ a drọ, gbe eware efa kpobi nọ i te rai obọ wuhrẹ ahwo ẹme Ọghẹnẹ. Ovuẹ kpobi nọ Brọda R. H. Barber ọ kẹ “o jẹ hae were gaga.” W. J. Thorn nọ ọ jọ wọhọ ọsẹ kẹ ahwo kpobi ọ jẹ hae t’ẹme “wọhọ esẹ anwae nọ a gbiku rai fihọ Ebaibol na.” Ẹdẹjọ nọ Brọda Shield Toutjian ọ jọ omoto, o te bo ẹsiẹvo kẹ ohwo nọ ọ be dhẹe nọ, “Daji!” Ọ tẹ la no omoto na ruotọ nyae kọrọ idodo jọ nọ e rrọ akotọ edhere kẹ ahwo nọ a gbẹ rrọ usu, ọ tẹ jọ etetẹe na rọ ododo na wuhrẹ ai kpahe emama Jihova.

Iruo iweze na i wo ise-abọ buobu, maero rọkẹ inievo  nọ e dina kpako no. Rekọ ẹbẹbẹ ologbo nọ otu jọ a rẹriẹ ovao dhe họ, epanọ a ti ro ru lele enwene ọkpokpọ jọ nọ ọ romavia. Ehri ukoko ọ ta kẹ inievo nọ i bi ru iruo iweze na inọ a be te hae kobaro evaọ iruo usiuwoma ota n’uwou ruọ uwou na. Uwou-Eroro ọ March 15, 1924 o ta nọ “ugogo iruo jọ nọ a muhọ” uvi Ileleikristi obọ họ “re a se isẹri kẹ Uvie na. Ẹjiroro nana a bi ro vi inievo nọ i bi ru iruo iweze na kpohọ otafe enẹna.”

Enwene nana ọ were inievo jọ buobu hu, fikiere a te no iruo iweze na no, ejọ e tẹ hẹrioma no ukoko na jẹ rọ egagọ obọrai mu. Robie D. Adkins ọ ta nọ oniọvo jọ nọ o je ru iruo iweze na vẹre nọ ọ jẹ hae riẹ ovuẹ kẹ ziezi o je bruenu inọ: “Ẹme nọ a rẹ jọ eplatfọmo ru ọvo mẹ riẹ kpahe. Mẹ te sae ta usiuwoma n’uwou ruọ uwou hu!” Brọda Adkins o fibae nọ: “Okokohọ nọ ma ru evaọ obọ Columbus, Ohio evaọ ukpe 1924 mẹ jọ wariẹ ruẹ e riẹ. Ọ jọ ọkọkora, ọye ọvo ọ jọ otọ ure jọ goli, yọ inievo nọ i kiọkọ kpobi a be wereva. Oyena họ orọ urere nọ mẹ ruẹ e riẹ. U kri hi, o te no ukoko na.” Evaọ abọdekọ riẹ, mẹ jọ okokohọ na ruẹ “inievo buobu nọ e be wọ ebe fihọ imoto rai avọ evawere,” avọ ọwhọ nọ a rọ gwọlọ ta usiuwoma n’uwou ruọ uwou nọ a te te obọ uwou.—Iruẹru 20:20, 21.

Dede nọ ozọ usiuwoma n’uwou ruọ uwou u je mu inievo buobu nọ e jọ iruo iweze na wọhọ epanọ u je mu inievo nọ a be nyai wuhrẹ kẹ usiuwoma ota na, a fi udu dhe iruo na. Brọda Maxwell G. Friend (Freschel) nọ ọ rrọ ohwo Germany nọ ọ jọ iruo iweze na ọ ta kpahe usiuwoma ọ n’uwou ruọ uwou inọ, “Abọ nana ọrọ iruo iweze na o wha eghale buobu ze no.” Brọda John A. Bohnet nọ ọ rrọ iruo iweze na re ọ ta nọ inievo na buobu a fi oma họ iruo usiuwoma ota na wọhọ epanọ ukoko o gwọlọ. Ọ ta nọ inievo buobu a “vọ avọ ọwhọ re a kobaro evaọ iruo na.”

Inievo nọ i wo ẹrọwọ nọ i kri no evaọ iruo iweze na a fi obọ họ kẹ inievo na gaga. Norman Larson nọ o kri ukoko na no ọ ta nọ: “Dede nọ mẹ jọ ọmaha evaọ oke yena, me muẹrohọ nọ inievo nọ e jọ iruo iweze na a jọ obufihọ ulogbo k’omai. A fi obọ họ k’omẹ kruga ziezi evaọ ukoko na.” Rite inẹnẹ, inievo itieye nọ i bi ru iruo ọsẹro ọnyawariẹ avọ ẹzi omolahiẹ a bi fi ajọwha usiuwoma ota họ ibe Ileleikristi rai oma nọ a be rọ ta nọ, “Ma sae ta usiuwoma n’uwou ruọ uwou!”

[Ẹme nọ a fi ẹgba họ nọ ọ rrọ ẹwẹ-obe avọ 32]

O jọ oware evawere nọ oniọvo nọ ọ rrọ iruo iweze na ọ nya bru omai ze!

[Uwoho nọ o rrọ ẹwẹ-obe avọ 31]

Evaọ ukpe 1905 omaa Benjamin Barton u dhesẹ nọ itu 170 o ti rri wariẹ

[Uwoho nọ o rrọ ẹwẹ-obe avọ 32]

Walter J. Thorn ọ jọ iruo iweze, yọ a jẹ hae ghrẹghrẹe Pappy (Ọsẹ) keme ọ jọ wọhọ ọsẹ kẹ inievo na je wo ọkpọ uruemu Kristi

[Uwoho nọ o rrọ ẹwẹ-obe avọ 32]

J. A. Browne nọ a vi kpohọ iruo iweze evaọ obọ Jamaica evaọ ukpe 1902 re ọ rọ uduotahawọ kẹ itu 14

[Uwoho nọ o rrọ ẹwẹ-obe avọ 32]

Iruo iweze na e jẹ bọ ẹrọwọ inievo na ga, jẹ wha okugbe họ udevie rai, je si ai kẹle ukoko na