‘Mẹ Rrọ Kugbe Owhai’
‘Mẹ Rrọ Kugbe Owhai’
“Ibuobu e rẹte dhẹ kpemu-kpo-aro, eriariẹ i veti vihọ.”—DAN. 12:4.
ẸVẸ WHỌ TE K’UYO ENỌ NANA?
Evaọ oke mai na, ẹvẹ uvi “eriariẹ” e rọ roma via?
Ẹvẹ “ibuobu” e rọ jẹ uvi “eriariẹ” na rehọ?
Idhere vẹ uvi eriariẹ i ro “vihọ” no?
1, 2. (a) Ẹvẹ ma rọ riẹ nọ Jesu ọ rrọ kugbe ilele riẹ nẹnẹ gbe nnọ ọ te jọ kugbe ai evaọ obaro? (b) Wọhọ epanọ o rrọ obe Daniẹl 12:4, eme o re noi ze nọ ohwo ọ tẹ romatotọ wuhrẹ Ebaibol na?
DAE rehọ iẹe nọ whọ rrọ Aparadase. K’ohiohiẹ k’ohiohiẹ, whọ rẹ kpama sasasa keme who somahọ ziezi, kẹsena whọ vẹ ruẹrẹ oma kpahe kẹ iruo okpẹdẹ na. Who wo edada ọvuọvo ho. Ẹyao kpobi nọ who wo vẹre o kpo no. Ibiaro, ezọ, inwe, abọ, gbe ẹrọo ra i bi ru iruo ziezi. Who wo ẹgba ziezi, whọ be reawere iruo ra, who wo egbẹnyusu buobu, yọ who wo awaọruọ ọvuọvo ho. Enana họ eghale jọ nọ whọ te reawere rai evaọ otọ Uvie Ọghẹnẹ. Jesu Kristi, Ovie nọ a ro mu na, ọ te ghale ahwo nọ a rrọ otọ esuo riẹ, o ve je wuhrẹ ai kpahe Jihova.
2 Jihova ọ te jọ kugbe idibo riẹ okenọ a te jọ akpọ na kpobi wuhrẹ amọfa kpahe Ọghẹnẹ. Ọghẹnẹ avọ Ọmọ riẹ a rrọ kugbe idibo Riẹ anwọ ikpe buobu ze na. Taure Jesu o te ti zihe kpobọ odhiwu, ọ tuduhọ ilele riẹ awọ inọ ọ te jọ kugbe ai. (Se Matiu 28:19, 20.) Re eme ọ Jesu yena e sai mu omai ẹro ziezi, joma ta kpahe uhie ẹme ọvo jọ nọ ọruẹaro Ọghẹnẹ jọ o kere fihotọ evaọ Babilọn, ikpe nọ e vrẹ idu ivẹ gbe egba isoi (2,500) nọ i kpemu. Daniẹl ọruẹaro na o kere kpahe “oke urere” nana nọ ma be rria na, inọ: “Ibuobu e rẹte dhẹ kpemu-kpo-aro, eriariẹ i veti vihọ.” (Dan. 12:4) Enẹna, ma wo otoriẹ ẹme Hibru nọ a fa “dhẹ kpemu-kpo-aro” na inọ u dhesẹ epanọ ohwo ọ rẹ romatotọ kiẹ oware riwi. Eghale nọ i re noi ze nọ ohwo ọ tẹ romatotọ kiẹ Ebaibol na, a rẹ ruẹ unu gbiku riẹ hẹ. Enọ e be romatotọ wuhrẹ Ebaibol na a re wo eriariẹ egbagba erọ Ẹme Ọghẹnẹ. Eruẹaruẹ na e ta re inọ ahwo buobu a te jẹ uvi “eriariẹ” na rehọ. Ofariẹ, eriariẹ itieye na e te vọ oria kpobi. E te nya akpọ na kpobi duwu. Nọ ma be te ta kpahe oghẹrẹ nọ eruẹaruẹ nana i ro rugba na, ma te ruẹ nọ Jesu ọ rrọ kugbe ilele riẹ nẹnẹ gbe nnọ Jihova o ti ru eyaa riẹ kpobi gba.
UVI ILELEIKRISTI A BI WO “ERIARIẸ” EGBAGBA
3. Nọ ikọ na a whu no, eme ọ via kẹ uvi “eriariẹ”?
3 Nọ ikọ na kpobi a whu no, ikọ erue nọ a ruẹaro riẹ na e tẹ roma via evaọ udevie uvi Ileleikristi, jẹ vaha ruọ oria kpobi. (Iruẹru 20:28-30; 2 Tẹs. 2:1-3) Ikpe buobu nọ i lele i rie, uvi “eriariẹ” na o kare ahwo buobu, te enọ e riẹ oware ovo kpahe Ebaibol ho gbe enọ i se omarai Ileleikristi. Dede nọ isu ichọche Kristẹndọm a ta nọ a rọwo Ikereakere na, a bi wuhrẹ iwuhrẹ erue—‘iwuhrẹ ikọ-imuomu’ nọ e rẹ raha odẹ Ọghẹnẹ. (1 Tim. 4:1) Ahwo buobu a riẹ uzẹme na ha. Iwuhrẹ erue jọ ena: Ọghẹnẹ yọ Esanerọvo, ẹwẹ na o re whu hu, gbe nnọ a te mahe ahwo bẹdẹ bẹdẹ evaọ erae ehẹle.
4. Ẹvẹ utu Ileleikristi jọ a ro muọ uvi “eriariẹ” họ ẹkiẹ via nọ ukpe 1870 o vrẹ no?
4 Rekọ nọ ukpe 1870 o vrẹ no, koyehọ oware wọhọ ikpe udhuvẹ taure “oke urere” na u te ti muhọ, umutho Ileleikristi jọ evaọ Pennsylvania obọ America a tẹ jẹ hai kuomagbe re a romatotọ wuhrẹ Ebaibol na jẹ kiẹ gwọlọ uvi “eriariẹ” na. (2 Tim. 3:1) A je se omarai Emọ-Uwuhrẹ Ebaibol. Orọnikọ ahwo nana họ “iwoareghẹ gbe enọ e riẹ” na ha, enọ Jesu ọ ta nọ a ti wo eriariẹ na ha. (Mat. 11:25) Ileleikristi nana yọ ahwo omaurokpotọ nọ a ginẹ gwọlọ ru oreva Ọghẹnẹ. A jẹ lẹ, romatotọ se Ebaibol na, ta kpahe eware nọ a se, je roro didi kpahe ae. A jẹ rọ eria Ebaibol wawọ eria efa evaọ Ebaibol na, yọ a je rri eware nọ amọfa a kiẹ via je kere fihotọ. Ẹmẹrera na, Emọ-Uwuhrẹ Ebaibol na a te muọ otoriẹ uzẹme na họ ewo, uzẹme nọ ahwo a riẹ hẹ anwọ ikpe buobu ze na.
5. Ẹjiroro vẹ a ro kere emebe evẹvẹ nọ a je se The Old Theology na?
5 Dede nọ eva e jẹ were Emọ-Uwuhrẹ Ebaibol na gaga kpahe eware nọ a je wuhrẹ, a kuvẹ hẹ re onana u ru ai wọ oma kpehru; yọ a je ru re ahwo a jiri ai hi inọ a bi duku eware ekpokpọ jọ. (1 Kọr. 8:1) Ukpoye, a kere emebe evẹvẹ jọ nọ a je se The Old Theology (Iwuhrẹ Ọghẹnẹ Erọ Oke Anwae). Ẹjiroro nọ a ro kere emebe na họ re ahwo nọ a bi se ai a riẹ uzẹme nọ o rrọ Ebaibol na. Orọ ọsosuọ nọ a kere o ta kpahe “eware nọ who re se nọ i re fi obọ họ k’owhẹ wo otoriẹ Ebaibol, re whọ siọ iwuhrẹ erue erọ ahwo-akpọ, jẹ r’obọ k’otọ riẹ iwuhrẹ Ọghẹnẹ erọ oke anwae enọ Olori mai gbe ikọ na a wuhrẹ.”—The Old Theology, No. 1, April 1889, ẹwẹ 32.
6, 7. (a) Iwuhrẹ uzẹme vẹ a fi obọ họ k’omai wo otoriẹ rai no anwọ ikpe udhusoi gbọ nọ i kpemu na? (b) Evaọ iwuhrẹ uzẹme sa-sa nọ whọ riẹ no, evẹ e be mae k’owhẹ evawere?
6 Uzẹme nọ uvi Ileleikristi na a kiẹ via no anwọ ikpe udhusoi gbọ nọ i kpemu, a rẹ ruẹ unu gbiku riẹ hẹ! * Enana yọ iwuhrẹ nọ i re fou eho ho hayo eriariẹ isukulu hu enọ iwuhrẹ-egagọ a rẹ rọ vro avro. Enana yọ iwuhrẹ nọ e rẹ kẹ evawere, nọ i re si ohwo no ebi, ru ohwo yeri emamọ uzuazọ, jẹ kẹ oghọghọ gbe ẹruore. I re fi obọ họ kẹ omai riẹ Jihova—oghẹrẹ Ọghẹnẹ nọ ọ rrọ gbe ẹjiroro riẹ. I re je fi obọ họ k’omai riẹ Jesu ziezi, ẹjiroro nọ ọ rọ ziọ otọakpọ je whu, gbe oware nọ o bi ru enẹna. Obọdẹ iwuhrẹ uzẹme nana i dhesẹ oware nọ o wha riẹ ze nọ Ọghẹnẹ ọ rọ k’uvẹ kẹ emuemu, oware nọ ma bi ro whu, oghẹrẹ nọ ma rẹ lẹ, gbe oghẹrẹ nọ ma sai ro wo uvi evawere.
7 Enẹna ma sai wo otoriẹ eruẹaruẹ nọ a “ruru” evaọ ikpe buobu, rekọ nọ i bi rugba evaọ edẹ urere nana. (Dan. 12:9) Eruẹaruẹ nana họ enọ e rrọ evaọ Ebaibol na soso, maero kọ enọ e rrọ ebe Usiuwoma na gbe obe Eviavia. Jihova o tube fi obọ họ k’omai riẹ otoriẹ eware nọ ma rẹ sae rọ ibiaro mai ruẹ hẹ, eware wọhọ Jesu nọ a ro mu ovie no, ẹmo nọ ọ roma via evaọ obọ odhiwu, gbe Setan nọ a gele ziọ otọakpọ. (Evia. 12:7-12) Ọghẹnẹ o te je ru omai wo otoriẹ eware nọ ma rẹ sae ruẹ, eware wọhọ ẹmo, etọ nọ i bi nuhu, ẹyao, emu nọ ọ be kare, gbe ahwo omuomu nọ a bi fiba ẹgaga ọrọ “oke ẹbẹbẹ” nana.—2 Tim. 3:1-5; Luk 21:10, 11.
8. Ono ma re yere kẹ eware nọ ma be ruẹ je yo na?
8 Ma rẹ sae nwane kareghẹhọ ẹme nọ Jesu ọ ta kẹ ilele riẹ inọ: “Aro nọ e ruẹ eware nọ wha ruẹ na i wo oghale! Keme mẹ ta kẹ owhai nọ eruẹaro gbe ivie buobu a guọlọ re a ruẹ eware nọ wha ruẹ, a ruẹ rae he, jegbe re a yo eware nọ wha yo, a yo rai hi.” (Luk 10:23, 24) Ma yere Jihova Ọghẹnẹ nọ o ro fi obọ họ k’omai ruẹ je yo eware itieye na. Eva e tẹ jẹ were omai gaga inọ Ọghẹnẹ ọ k’omai ẹzi riẹ, “Ọthuke na,” re ọ kpọ ilele Jesu “ruọ uzẹme na kpobi.” (Se Jọn 16:7, 13.) Joma rri iwuhrẹ uzẹme na ghaghae ẹsikpobi jẹ hae rehọ ae ta usiuwoma kẹ amọfa.
“IBUOBU” E JẸ UVI “ERIARIẸ” NA REHỌ
9. Eme a jọ Uwou-Eroro amara Ane ọrọ ukpe 1881 tuduhọ ahwo awọ nọ a ru?
9 Evaọ amara Ane ọrọ ukpe 1881, nọ a muọ Uwou-Eroro na họ ekere te enwenọ ikpe ivẹ no, a te kere fihọ uvitha jọ inọ a gwọlọ iwhowho-uvie nọ i bu te odu ọvo (1,000). Uwou-Eroro na o ta nọ: “Ahwo nọ a rrọ oria nọ o rẹ kẹ ai uvẹ ru onana, nọ a rẹ sae rehọ abọjọ oke rai hayo oke rai kpobi kẹ iruo Olori na, ma wo omaa kẹ ae . . . , inọ: Ru iruo Ọgbaẹmo Aro hayo Ọtausiuwoma re who kpohọ ẹwho hayo iwhre, wọhọ epanọ ẹgba ra o mu, nyae jọ oria kpobi gwọlọ enọ e rrọ erọ Kristi, whọ te ruẹ nọ ibuobu rai a wo ajọwha kẹ iruo Ọghẹnẹ, rekọ a kare eriariẹ; daoma fi obọ họ kẹ ahwo nana riẹ epanọ aruoriwo Ọsẹ Mai ọ rro te gbe epanọ ẹme riẹ o woma te.”
10. Eme ahwo a ru kpahe uzizie na inọ a gwọlọ etausiuwoma odu ọvo?
10 Uzizie yena u dhesẹ nọ Emọ-Uwuhrẹ Ebaibol na a vuhumu inọ usiuwoma ota yọ iruo nọ i wuzou gaga kẹ Ileleikristi uzẹme. Rekọ uzizie na inọ a gwọlọ etausiuwoma odu ọvo (1,000) u dhesẹ nọ Emọ-Uwuhrẹ Ebaibol na a wo irẹro inọ amọfa a ti kuomagbe ai evaọ iruo na keme evaọ oke yena ahwo nọ a jẹ hae ziọ ewuhrẹ a bu tere he. Nọ ahwo buobu a se ebe evẹvẹ gbe emagazini mai jọ no, a te vuhumu inọ a duku uzẹme na no, a tẹ jẹ uzizie na rehọ. Wọhọ oriruo, evaọ ukpe 1882 nọ ọzae jọ evaọ obọ London, England, o se uvitha Uwou-Eroro na jọ gbe omobe jọ nọ Emọ-Uwuhrẹ Ebaibol na a kere no, o te kere nọ: “Ivie wha wuhrẹ omẹ ẹme nọ mẹ rẹ ta evaọ usiuwoma gbe oghẹrẹ nọ mẹ te rọ tae re mẹ ruẹsi w’obọ evaọ emamọ iruo nana nọ Ọghẹnẹ ọ gwọlọ nọ ma ru na.”
11, 12. (a) Ẹjiroro vẹ egbaẹmo aro na a jẹ rọ ta usiuwoma nọ o be wọ omai ta usiuwoma nẹnẹ re? (b) Ẹvẹ egbaẹmo aro na a jẹ rọ rehọ “itu” hayo ikoko mu?
11 Evaọ ukpe 1885, Emọ-Uwuhrẹ Ebaibol nọ i bu te egba esa (300) i je ru iruo ọgbaẹmo aro. Ẹjiroro ọvona nọ ma be rọ ta usiuwoma nẹnẹ na a jẹ rọ ta re, koyehọ re a wuhrẹ ahwo re a jọ ilele Jesu Kristi. Rekọ oghẹrẹ nọ a jẹ rọ ta usiuwoma u wo ohẹriẹ no omai. Nẹnẹ, ma re wuhrẹ Ebaibol kugbe ahwo omomọvo. Kẹsena ma ve zizie ohwo na ziọ ukoko nọ u dikihẹ no anwẹdẹ. Evaọ oke ọsosuọ, egbaẹmo aro na a re fi ebe họ ada, a ve koko ahwo nọ a wo isiuru họ oria ovo re a wuhrẹ ae Ebaibol na. A re wuhrẹ ae omomọvo ho, rekọ a re koko ai họ “itu,” hayo ikoko sa-sa.
12 Wọhọ oriruo, evaọ ukpe 1907, egbaẹmo aro jọ a jọ okpẹwho jọ nya gwọlọ ahwo nọ a wo ebe ọ Millennial Dawn (nọ a jẹ hai se Studies in the Scriptures re). Uwou-Eroro na jọ o ta nọ: “A te koko ahwo nana [nọ i wo isiuru kẹ ẹme Ọghẹnẹ na] họ uwou omọvo rai jọ. Ọgbaẹmo aro jọ ọ tẹ rọ Ẹdoka so-so lele ai t’ẹme kpahe Ẹjiroro Ọghẹnẹ no Anwae Ze, kẹsena Ẹdoka nọ o lele i rie ọ tẹ tuduhọ ahwo na awọ inọ jọ a hai kuomagbe kẹ iwuhrẹ ẹsikpobi.” Evaọ ukpe 1911, inievo na a te nwene edhere usiuwoma ota yena. Inievo udhuvẹ gbe ikpegberee e jẹ hai no ewho ruọ ewho evaọ America gbe Canada re a kẹ evuẹ ogbotu. Inievo nana a jẹ hai kere edẹ gbe adrẹse ahwo nọ a nyaze te gaviezọ kẹ evuẹ na fihotọ, kẹsena a ve ru ọruẹrẹfihotọ kẹ ae nọ a rẹ hai ro ru iwuhrẹ evaọ uwou omọvo rai jọ, enana i ve zihe ruọ “itu” hayo ikoko ekpokpọ. Evaọ ukpe 1914, ikoko sa-sa erọ Emọ-Uwuhrẹ Ebaibol evaọ akpọ na soso i bu te odu ọvo gbe egba ivẹ (1,200).
13. Eme o gbe owhẹ unu kpahe iruo usiuwoma ota na?
13 Nẹnẹ, ma wo ikoko nọ i bu te oware wọhọ 109,400 evaọ akpọ na soso, yọ inievo nọ i bu te 895,800 e rrọ ekobaro oke-kpobi. Ahwo nọ a bu te enwenọ ima eree a jẹ uvi “eriariẹ” na rehọ no je bi fi ei họ iruo evaọ uzuazọ rai. (Se Aizaya 60:22.) * Ẹnyaharo nana o gbunu gaga keme Jesu ọ ta nọ “ahwo kpobi a reti mukpahe” ilele riẹ fiki odẹ riẹ. Ọ ta re inọ a ti kpokpo ilele riẹ, fi ai họ uwou-odi, je tube kpe ai no. (Luk 21:12-17) Dede nọ Setan, ikọ imuomu riẹ, gbe ahwo-akpọ a be wọso idibo Jihova, ma gbe bi wo ẹnyaharo ologbo evaọ iruo usiuwoma ota na. Nẹnẹ, ma be ta usiuwoma na evaọ “akpọ na kpobi,” te ekwotọ uvo ogaga, gbe erọ ekpahe egaga, igbehru, udhude, ikpewho, gbe iwhre. (Mat. 24:14) Ababọ obufihọ Jihova, a rẹ sai ru onana kpobi hi.
UVI “ERIARIẸ” I BI “VIHỌ”
14. Ẹvẹ “eriariẹ” i bi ro vihọ ẹkwoma ebe nọ a bi kere?
14 Uvi “eriariẹ” i bi vihọ ẹkwoma usiuwoma na nọ ahwo buobu a be ta. Eriariẹ i te je vihọ no ẹkwoma ebe nọ a bi kere. Evaọ amara Ahrẹ ọrọ ukpe 1879, Emọ-Uwuhrẹ Ebaibol na a ro kere Uwou-Eroro ọsosuọ, oke yena a je se Uwou-Eroro na Zion’s Watch Tower and Herald of Christ’s Presence (Uwou-Eroro Zayọn gbe Ewhowho Ọzino Kristi). Unu uvitha yena nọ a kere i bu te idu ezeza (6,000) evaọ ẹvẹrẹ Oyibo, yọ ekọmpene nọ i re printi ebe a hwa igho kẹ nọ i printi riẹ. Charles Taze Russell nọ ọ jọ ikpe udhegbihrẹ evaọ oke yena a salọ re ọ rẹrote ekere emagazini na, a tẹ jẹ salọ inievo isoi efa nọ i kruga ziezi evaọ ukoko na re a hai kere eware ze nọ a re fiba emagazini na n’oke t’oke. Enẹna a bi kere Uwou-Eroro na evaọ evẹrẹ nọ i bu te 195. Uwou-Eroro na họ emagazini nọ ahwo a be mai se evaọ akpọ na, keme unu nọ u bi te ahwo obọ evaọ uvitha kpobi u bu te 42,182,000. Emagazini nọ ọ rọ kpahe ọnana họ Awake!, onọ unu nọ u bu te 41,042,000 u bi te ahwo obọ kamara kamara evaọ evẹrẹ 84. U te no ere no, k’ukpe k’ukpe, ebe gbe Ebaibol nọ ma bi siobọno i bu te ima ẹgba ọvo (100,000,000).
15. Bovẹ igho nọ ma bi ro printi ebe mai na u bi no ze?
15 Azọhọ unevaze ma be rọ wha iruo ilogbo nana haro. (Se Matiu 10:8.) Onana o tubẹ rrọ igbunu kẹ ahwo nọ a bi ru iruo evaọ ekọmpene nọ i re printi ebe, keme a riẹ epanọ ijini nọ a re ro kere ebe, ewẹ-ebe, ame-ugbẹ nọ a re ro kere ebe, gbe eware itieye na efa e ghare te. Oniọvo-ọmọzae jọ nọ ọ rrọ usu inievo nọ e rẹ dẹ eware nọ ukoko na u re ro printi ebe ọ ta nọ: “Nọ ehreki nọ e riẹ kpahe ekwakwa nọ a re ro kere ebe a tẹ nya ziọ oria nọ a be jọ printi ebe evaọ uwou ogha mai, akpọ o re gbe ai unu inọ obọdẹ ijini ọgbọna nọ ma bi ro printi ebe na avọ ebe buobu nọ i bi printi ẹsiẹvo na yọ eware nọ a be rọ azọhọ unevaze ru. U te bi je gbe ai unu gaga inọ ahwo buobu nọ i bi ru iruo evaọ Ebẹtẹle yọ izoge nọ eva e be were.”
ERIARIẸ ỌGHẸNẸ E TE VỌ AKPỌ NA
16. Ẹjiroro vẹ a bi ro wuhrẹ ahwo uvi “eriariẹ” na?
16 U wo emamọ ẹjiroro nọ uvi “eriariẹ” e rọ vọ oria kpobi. Oreva Ọghẹnẹ họ “re ahwo kpobi a wo usiwo, re a ze te riẹ uzẹme na.” (1 Tim. 2:3, 4) Jihova ọ gwọlọ nọ ahwo a riẹ uzẹme na re a gọe evaọ edhere nọ ọ gwọlọ re a je wo eghale riẹ. Jihova ọ rọ ẹkwoma “eriariẹ” nọ a bi ro wuhrẹ ahwo na koko okiọkotọ ọrọ Ileleikristi nọ a rọ ẹzi wholo na họ no. O te je koko “otu obuobu” họ no rono “erẹwho kpobi ze, erua gbe ahwo gbe erọo-unu,” enọ i wo ẹruore uzuazọ ebẹdẹ bẹdẹ evaọ otọakpọ.—Evia. 7:9.
17. Eme ẹnyaharo nọ ọ be roma via evaọ egagọ uzẹme na o kẹ imuẹro riẹ?
17 Ẹnyaharo nọ ma bi wo evaọ egagọ uzẹme anwọ ikpe udhozeza gbikpe (130) ze na u dhesẹ vevẹ inọ Ọghẹnẹ avọ Jesu Kristi Ovie nọ o romu na a rrọ kugbe idibo Ọghẹnẹ evaọ otọakpọ, bi koko ai họ, kpọ ae, be thọ ae, je bi wuhrẹ ai. Ẹnyaharo rai na ọ tẹ jẹ kẹ imuẹro inọ eware nọ Jihova ọ ya eyaa inọ o ti ru evaọ obaro e te seba erugba ha. “Akpọ na ọ te vọ avọ eriariẹ ỌNOWO na wọhọ epanọ ame ọ vọ abade.” (Aiz. 11:9) Eghale nọ ahwo-akpọ a te reawere rai evaọ oke yena i ti wo umuo ho.
[Oruvẹ-obotọ]
^ edhe-ẹme 6 Whọ te riẹ eware efa nọ who te rri DVD na Jehovah’s Witnesses—Faith in Action, Part 1: Out of Darkness gbe Jehovah’s Witnesses—Faith in Action, Part 2: Let the Light Shine.
^ edhe-ẹme 13 Rri obe na Isaiah’s Prophecy—Light for All Mankind II, ẹwẹ-obe avọ 320.
[Enọ Uwuhrẹ]
[Uwoho nọ o rrọ ẹwẹ-obe avọ 6]
Emọ-Uwuhrẹ Ebaibol oke ọsosuọ a jọ ahwo omaurokpotọ nọ a ginẹ gwọlọ ru oreva Ọghẹnẹ
[Uwoho nọ o rrọ ẹwẹ-obe avọ 7]
Oma nọ whọ be dawo re amọfa a ruẹsi wo uvi “eriariẹ” na o da Jihova ẹro fia
