Wha Yeri Uzuazọ Rai Wọhọ Emotọ Uvie na

‘Wha jọ uruemu uzuazọ rai u fo kẹ usiuwoma na.’ —FIL. 1:27.

ẸVẸ WHỌ TE K’UYO ENỌ NANA?

Amono a rẹ sae jọ emotọ Uvie Ọghẹnẹ?

Eme u fo nọ who re ru kpahe ẹvẹrẹ, ikuigbe gbe izi Uvie na?

Ẹvẹ emotọ Uvie na a re ro dhesẹ nọ izi Ọghẹnẹ e be were ae?

1, 2. Fikieme ohrẹ nọ Pọl ọ kẹ Ileleikristi obọ Filipai na u ro wo obọdẹ otofa?

PỌL ukọ na ọ tuduhọ inievo nọ e rrọ ukoko obọ Filipai awọ inọ a ‘jọ uruemu uzuazọ rai u fo kẹ usiuwoma na.’ (Se Ahwo Filipai 1:27.) Ẹme Griki nọ a fa “uruemu” evaọ oria ikere nana o rẹ sai je dhesẹ epanọ ohwo o re ‘yeri uzuazọ wọhọ ọmotọ.’ Ẹme yena o wo obọdẹ otofa kẹ inievo nọ e jọ ukoko Filipai na. Fikieme? Fikinọ o wọhọ nọ Filipai ọ rrọ usu umutho ewho nọ egọmeti ọ kẹ oghẹrẹ udu jọ nọ a sae rọ jọ emotọ Rom. Oma o jẹ hae were emotọ Rom nọ e jọ Filipai gbe ewho nọ e jọ otọ esuo Rom kpobi keme u wo obọdẹ irere jọ nọ i je te ai evaọ otọ izi Rom.

² Inievo nọ e jọ ukoko obọ Filipai a wo ẹjiroro ologbo nọ a rẹ rọ wereva. Pọl ọ kareghẹhọ Ileleikristi yena nọ a wholo na inọ ae yọ emotọ evaọ “obọ odhiwu.” (Fil. 3:20) Orọnikọ emotọ orẹwho jọ gheghe Pọl ọ ta nọ a jọ họ rekọ emotọ Uvie Ọghẹnẹ. Fikiere, a wo uketha ulogbo gbe irere buobu.—Ẹf. 2:19-22.

3. (a) Amono a wo uvẹ-ọghọ nọ a te rọ jọ emotọ Uvie Ọghẹnẹ? (b) Eme ma be te ta kpahe evaọ uzoẹme nana?

³ Enọ i ti lele Kristi su evaọ obọ odhiwu Pọl ọ kẹ ohrẹ na inọ ‘jọ uruemu uzuazọ rai u te kẹ usiuwoma na.’ (Fil. 3:20) Rekọ ohrẹ na o rẹ sai je kiekpahe ahwo nọ a te jọ otọ esuo Uvie Ọghẹnẹ evaọ obọ otọakpọ obonẹ. Fikieme? Fikinọ Ileleikristi kpobi nọ e roma mudhe no a be gbodibo kẹ Ovie ọvona, Jihova, yọ izi evona a bi koko. (Ẹf. 4:4-6) Nẹnẹ, ahwo a be daoma kpobi re a sae jọ emotọ orẹwho nọ akpọriọ ọ rrọ. Kọ u gbe fo re ma rri uvẹ nọ ma sae rọ jọ emotọ Uvie Ọghẹnẹ ghaghae? Re ma gbẹ sae riẹ epanọ uvẹ-ọghọ nana o ghare te, joma ta kpahe idhere jọ nọ  oware nọ ohwo o re ru re ọ sae jọ ọmotọ orẹwho gbe onọ ohwo o re ru re ọ sae jọ ọmotọ Uvie Ọghẹnẹ i ro thoma. Kẹsena ma vẹ te ta kpahe eware esa jọ nọ ma re ru hrọ re ma sae gbẹ jọ emotọ Uvie Ọghẹnẹ.

EWARE NỌ O GWỌLỌ RE OHWO Ọ JỌ ỌMOTỌ

4. Eme họ emamọ ẹrọunu na, kọ ẹvẹ ma rẹ rọ “jẹ” ẹvẹrẹ yena?

⁴ Wuhrẹ ẹvẹrẹ na. Egọmeti erẹwho jọ e rẹ gwọlọ nọ re ohwo ọ tẹ jọ ọmotọ, ọ rẹ jẹ ẹvẹrẹ nọ ahwo orẹwho na a rẹ mae jẹ. Nọ ahwo a tẹ maki zihe ruọ emotọ no evaọ orẹwho jọ, a re gbe wuhrẹ ẹvẹrẹ na ikpe buobu re a sae riẹe ta ziezi. O rẹ bẹ ae tere he re a wuhrẹ oghẹrẹ nọ a rẹ whẹ eme gbe evaọ ẹvẹrẹ na, rekọ re a sae riẹe ta gbagba, o rẹ rehọ oke. Epọvo na, o gwọlọ nọ emotọ Uvie Ọghẹnẹ a re wuhrẹ oware nọ Ebaibol na o se ‘emamọ ẹrọunu.’ (Se Zefanaya 3:9.) Eme họ ẹvẹrẹ yena? Oyehọ uzẹme na kpahe Ọghẹnẹ gbe ẹjiroro riẹ nọ ọ rrọ Ebaibol na. Nọ ma te bi koko izi Ọghẹnẹ yọ ma be “jẹ” emamọ ẹrọunu na. O rẹ lọhọ re emotọ Uvie Ọghẹnẹ a riẹ igogo iwuhrẹ nọ e rrọ Ebaibol na jẹ họ-ame. Rekọ nọ a tẹ make họ-ame no, a rẹ gbẹ daoma re a “jẹ” emamọ ẹvẹrẹ na gbagba. Evaọ edhere vẹ? Mai omomọvo ma rẹ gbẹ daoma ru lele eware nọ ma bi wuhrẹ evaọ Ebaibol na.

5. Fikieme ma rẹ rọ dawo oma mai kpobi re ma wuhrẹ kpahe ikuigbe abọ otọakpọ ọrọ ukoko Jihova?

⁵ Se ikuigbe na. Ohwo nọ ọ gwọlọ jọ ọmotọ orẹwho jọ ọ rẹ gwọlọ se ikuigbe isuẹsu orẹwho na. Epọvo na, ahwo nọ a gwọlọ jọ emotọ Uvie Ọghẹnẹ a rẹ daoma riẹ kpahe Uvie Ọghẹnẹ. Roro kpahe oriruo emezae Kora nọ i je ru iruo Ọghẹnẹ evaọ Izrẹl. A wo evawere gaga kpahe Jerusalẹm gbe oria egagọ Ọghẹnẹ nọ o jọ etẹe, yọ o rẹ were ae gaga re a gbiku okpẹwho na. Orọnikọ erru itho nọ a rọ bọ okpẹwho na gbe oria egagọ na họ oware nọ o mai si ai urru hu rekọ oware nọ okpẹwho na avọ oria egagọ na i dikihẹ kẹ. Jerusalẹm họ “okpẹwho Ovie ologbo na,” Jihova, keme etẹe họ ehri egagọ uzẹme. Etẹe a jẹ jọ wuhrẹ izi Jihova. Jihova o je dhesẹ aruoriwo kẹ ahwo nọ a jọ otọ esuo Ovie obọ Jerusalẹm na. (Se Olezi 48:1, 2, 9, 12, 13.) Wọhọ emezae Kora, kọ o rẹ were owhẹ re who wuhrẹ kpahe ikuigbe abọ otọakpọ ọrọ ukoko Jihova jẹ tae kẹ amọfa? Epanọ who wuhrẹ kpahe ukoko Ọghẹnẹ te gbe epanọ Jihova o bi ro fi obọ họ kẹ idibo riẹ, ere Uvie Ọghẹnẹ u ti mu owhẹ ẹro te re. Ọwhọ nọ whọ be rọ ta usiuwoma Uvie na ọ vẹ te ga ziezi.—Jeri. 9:24; Luk 4:43.

6. Fikieme o rọ rrọ oware areghẹ re Jihova ọ gwọlọ nọ ma wuhrẹ izi Uvie na je koko ai?

 ⁶ Riẹ izi na. Egọmeti ahwo-akpọ a rẹ gwọlọ nọ ahwo nọ a rrọ otọ isuẹsu rai a rẹ riẹ izi orẹwho na, a ve je koko ai. Epọvo na re, Jihova ọ gwọlọ nọ ma re wuhrẹ izi nọ e rrọ rọkẹ emotọ Uvie na, ma ve je koko ai. (Aiz. 2:3; Jọn 15:10; 1 Jọn 5:3) Ẹsibuobu izi ahwo-akpọ e rẹ gba ha yọ a rẹ sae rehọ ai kienyẹ amọfa. Wo ohẹriẹ, “uzi ỌNOWO o gbakiete.” (Ol. 19:7) Kọ izi Ọghẹnẹ e rẹ were omai, ma ve je se Ẹme riẹ kẹdẹ kẹdẹ? (Ol. 1:1, 2) Edhere ọvuọvo nọ ma sae rọ riẹ izi Ọghẹnẹ họ, ma re wuhrẹ kẹ omobọ mai. Ohwo ọvo ọ rẹ sai ru onana kẹ omai hi.

EMOTỌ UVIE NA A WO EVAWERE KPAHE IZI ỌGHẸNẸ

7. Ẹvẹ emotọ Uvie na a ro wo ohẹriẹ evaọ oghẹrẹ nọ a re koko izi?

⁷ Re ma gbẹ jọ emotọ Uvie na, orọnikọ ma rẹ riẹ izi Ọghẹnẹ ọvo ho rekọ ma re wo evawere kpahe ae. Ahwo buobu nọ a rrọ otọ egọmeti ohwo-akpọ a rẹ ta nọ a rọwo kpahe izi gbe ijaje orẹwho nọ a be rria. Rekọ, otẹrọnọ uzi jọ o be te jọ ai ru oware nọ a gwọlọ họ, yọ a roro nọ uvumọ ohwo ọ be ruẹ e rai hi, a vẹ la uzi na vrẹ. Ẹsibuobu, “iraro” amọfa ọvo ahwo otiọnana a rẹ jọ koko uzi. (Kọl. 3:22) Uzuazọ uyero emotọ Uvie na u wo ohẹriẹ no onana. Ma re koko izi Ọghẹnẹ avọ evawere makinọ uvumọ ohwo ọ be ruẹ omai hi. Fikieme? Fikinọ ma you Jihova, Ọnọ o re fi izi họ na.—Aiz. 33:22; se Luk 10:27.

8, 9. Ẹvẹ whọ sae rọ riẹ sọ who gine you izi Ọghẹnẹ?

⁸ Ẹvẹ whọ sae rọ riẹ sọ who gine wo evawere kpahe izi Ọghẹnẹ? Hai muẹrohọ oghẹrẹ nọ who re ru nọ omọfa ọ tẹ k’owhẹ ohrẹ kpahe oware nọ who roro inọ ẹme obọra, wọhọ oriruo, kpahe ẹme ẹgọ gbe osẹ. Ẹsejọhọ taure who te ti zihe ruọ ọmotọ Uvie na, osẹ nọ o rrọ kpatiẹ hẹ hayo nọ o rẹ dina rovie abọjọ oma ohwo fihọ o jẹ hae were owhẹ. Nọ uyoyou nọ who wo kẹ Ọghẹnẹ o be rro haro na, who te ti wuhrẹ epanọ a rẹ g’ẹgọ nọ o rẹ wha orro sei. (1 Tim. 2:9, 10; 1 Pita 3:3, 4) Enẹna, o rẹ sae jọ owhẹ oma nọ osẹ ra o rrọ kpatiẹ. Rekọ eme who ti ru nọ ọkpako ukoko ra jọ ọ tẹ ta kẹ owhẹ nọ ẹgọ ra ọ be kẹ inievo jọ uye evaọ ukoko na? Eme who ti ru? Kọ who ti gu inoma, dheva, hayo veghe uzou? Uzi jọ nọ u wuzou gaga nọ emotọ Uvie na kpobi a re koko họ, aro nọ a re ro kele Kristi. (1 Pita 2:21) Pọl ukọ na o kere kpahe oriruo Kristi inọ: ‘Wha jọ mai kohwo kohwo o ru ọrivẹ riẹ evawere evaọ oware uwoma nọ o rẹ kẹe ọbọga. Keme Kristi o ru eva were omobọ riẹ hẹ.’ (Rom 15:2, 3) Re udhedhẹ o ruẹse jọ ukoko na, Oleleikristi nọ o wo orimuo ọ rẹ rọ unevaze kpairoro vrẹ oware nọ o rrọ isiuru riẹ fiki obroziẹ-iroro amọfa.—Rom 14:19-21.

⁹ Muẹrohọ eware ivẹ efa nọ i wuzou gaga: eriwo mai kpahe owezẹ ọzae-avọ-aye gbe orọo. Enọ i ri zihe ruọ emotọ Uvie na ha, a rẹ sai wo uruemu ezae-duezae, rri ifoto ẹbẹba wọhọ oware omaweromẹ nọ u wo enwoma ọvo ho, je roro nọ ẹnwae-obro gbe orọo-ofa yọ ẹme omobọ ohwo. Emotọ Uvie na a siomano iruemu ethọthọ gbe iruemu oriobọ itieye na no. Dede nọ Ileleikristi buobu a je yeri uzuazọ ọfariẹ-ogbe evaọ oke nọ u kpemu, enẹna a rri owezẹ ọzae-avọ-aye gbe orọo wọhọ okẹ nọ u no obọ Ọghẹnẹ ze. A rri izi Jihova ghaghae jẹ rọwo inọ ohwo kpobi nọ ọ be ruabọhọ uzuazọ ọfariẹ-ogbe ọ rẹ sae jọ ọmotọ Uvie na ha. (1 Kọr. 6:9-11) Rekọ a vuhumu re inọ udu na u wo ẹghẹ. (Jeri. 17:9) Fikiere, eva e be were ai inọ a be kẹ ai unuovẹvẹ sa-sa nọ u bi fi obọ họ kẹ ai koko izi Ọghẹnẹ.

 EVA E RẸ WERE EMOTỌ UVIE NA NỌ A TẸ KẸ AE UNUOVẸVẸ

10, 11. Unuovẹvẹ ẹruoke vẹ egọmeti Ọghẹnẹ ọ be kẹ, kọ ẹvẹ who rri unuovẹvẹ itieye na?

¹⁰ Re ahwo a sai wo omakpokpọ, egọmeti ọ rẹ sae kẹ unuovẹvẹ kpahe oghẹrẹ emuore gbe ibi-imu nọ u fo nọ ahwo a rẹ whaha. Uzẹme riẹ họ, orọnikọ emuore hayo ibi-imu kpobi i yoma ha. Rekọ otẹrọnọ oghẹrẹ emuore hayo ubi-umu jọ o rẹ sae wha ẹbẹbẹ ze, egọmeti ọ rẹ sae kẹ unuovẹvẹ nọ u re fi obọ họ kẹ ahwo nọ a rrọ otọ esuo riẹ yọroma. Nọ egọmeti na ọ gbẹ kẹ unuovẹvẹ utioye he, yọ o bi gbabọkẹ ahwo nọ a rrọ otọ riẹ. Epọvo na re, egọmeti Ọghẹnẹ o be kẹ unuovẹvẹ ẹruoke kpahe iruemu nọ e rẹ sae wha enwoma se omai evaọ egagọ Ọghẹnẹ. Wọhọ oriruo, Itanẹte u bi fi obọ họ gaga evaọ ofẹ evuẹ, uwuhrẹ, gbe aruọzaha omawere. Ukoko Ọghẹnẹ o be rọ Itanẹte ruiruo, yọ u bi gine fi obọ họ kẹ ai ru eware buobu. Dede na, evie evuẹ ọ Itanẹte buobu e rẹ sae raha uruemu ohwo jẹ wha enwoma se ohwo evaọ egagọ Ọghẹnẹ. Evie evuẹ nọ a rẹ jọ dhesẹ ifoto ẹbẹba o rẹ sae raha usu nọ ọmotọ Uvie na o wo kugbe Ọghẹnẹ. Anwọ ikpe buobu ze na, utu ọrigbo nọ o wo ẹrọwọ na o be kẹ unuovẹvẹ kpahe evie evuẹ itieye na. Eva e be were omai gaga kẹ unuovẹvẹ nana.

¹¹ Anwọ imikpe jọ ze na, evie evuẹ ọfa jọ o kie ze nọ ahwo a bi kpohọ gaga, onọ o rẹ sai fi obọ họ ziezi nọ a tẹ be rehọ iẹe ruiruo avọ omoyọrọ. Rekọ evie evuẹ Itanẹte enana nọ a sae jọ wo usu kugbe amọfa na e rẹ sae wha enwoma ze re. E rẹ sai ru ohwo mu usu kugbe ikpehre ahwo. (1 Kọr. 15:33) Agbẹta nọ ukoko Ọghẹnẹ o be rọ ta nọ ma yọroma kpahe eroruiruo evie evuẹ itieye na. Kọ who se evuẹ kpobi nọ ọrigbo nọ o wo ẹrọwọ na o kere kẹle na kpahe eroruiruo evie evuẹ Itanẹte nọ a sae jọ wo usu kugbe amọfa na no? O kare areghẹ gaga re ohwo ọ rehọ evie evuẹ Itanẹte itieye na ruiruo ababọ ese evuẹ nọ ọrigbo nọ o wo ẹrọwọ na o kere. * O rẹ wọhọ ẹsenọ whọ be lọ umu jọ nọ u wo ẹgba gaga yọ who se unuovẹvẹ nọ a kẹ kpahe umu na ha.

12. Fikieme o rọ rrọ oware ugheghẹ re ma rri unuovẹvẹ vo?

¹² Ahwo nọ a re gbolaro kẹ unuovẹvẹ ọrigbo nọ o wo ẹrọwọ na a rẹ wha enwoma se omobọ rai gbe ahwo nọ a you. Ahwo jọ a be hai rri ifoto ẹbẹba n’oke t’oke hayo thuzi ẹnwa-obro no, rekọ a vẹ be viẹ oma rai họ roro inọ Jihova ọ be ruẹ oware nọ a bi ru hu. O rrọ oware ugheghẹ gaga re ma roro nọ ma sae ko oware jọ nọ ma bi ru dhere Jihova! (Itẹ 15:3; se Ahwo Hibru 4:13.) Ọghẹnẹ ọ gwọlọ fi obọ họ kẹ ahwo otiọye na yọ ọ be daoma rọ ẹkwoma ekpako ukoko na ru onana. (Gal. 6:1) Dede na, wọhọ epanọ egọmeti ohwo-akpọ o re mi ohwo obe-udu nọ ọ rọ rrọ ọmotọ nọ ohwo na ọ tẹ thọ oghẹrẹ uzi jọ na, ere Jihova o re mi ohwo uvẹ nọ ọ rẹ rọ jọ ọmotọ Uvie na nọ ohwo na ọ tẹ be ruabọhọ uzioraha. * (1 Kọr. 5:11-13) Dede na, Jihova ọ vọ avọ ohrọ-oriọ. Ahwo nọ a nwene uruemu uyoma rai a rẹ sae wariẹ wo emamọ usu kugbe Jihova jẹ gbẹ jọ emotọ Uvie na. (2 Kọr. 2:5-8)  Uvẹ-ọghọ ulogbo o rrọ nọ ma be rọ gọ Ọghẹnẹ oyoyou otiọye.

EMOTỌ UVIE NA A RRI UWUHRẸ GHAGHAE

13. Ẹvẹ emotọ Uvie na a re ro dhesẹ nọ a rri uwuhrẹ ghaghae?

¹³ Egọmeti ahwo-akpọ buobu a be daoma gaga re a ruẹ nọ ahwo orẹwho rai a kpohọ isukulu. A rovie isukulu sa-sa nọ a rẹ jọ wuhrẹ ahwo epanọ a rẹ rọ riẹ se je kere gbe onaa iruo sasa. Emotọ Uvie na a re kpohọ isukulu nana, a ve wuhrẹ epanọ a re se, kere, je ru iruo nọ a rẹ rọ rẹrote omarai. Rekọ eware nọ e mae ghare kẹ ae họ, enọ Jihova ọ be rọ ẹkwoma ukoko riẹ wuhrẹ ai. Jihova ọ be rọ ẹkwoma ukoko Ileleikristi na wuhrẹ emotọ Uvie na epanọ a re se je kere. A be tuduhọ esẹgbini awọ re a hai se kẹ emọ eboba rai. Kamara kamara, utu ọrigbo na o bi kere Uwou-Eroro Na. Nọ whọ tẹ be hai se ewẹ-ebe jọ kẹdẹ kẹdẹ, whọ te sai se Uwou-Eroro kpobi nọ a siobọno.

14. (a) Eme a be hai wuhrẹ omai n’oke t’oke? (b) Ehrẹ vẹ nọ a kẹ kpahe Egagọ Uviuwou who fihọ iruo no?

¹⁴ Koka koka, a bi wuhrẹ emotọ Uvie na evaọ obọ Ọgwa Uvie rai. Wọhọ oriruo, anwọ ikpe udhosa ze na, Isukulu Odibọgba Esuo-Ọghẹnẹ o bi fi obọ họ kẹ inievo nọ i re ru ẹme evaọ isukulu na wuhrẹ amọfa Ebaibol na ziezi. Kọ whọ rrọ omọvo emọ-uwuhrẹ isukulu nana? Anwọ imikpe jọ ze na, odibo nọ o wo ẹrọwọ na ọ be tuduhọ omai awọ inọ ma hai ru Egagọ Uviuwou koka koka evaọ owọwọ jọ nọ ma fihọ. Ọruẹrẹfihotọ nana o bi ru ahwo uviuwou si kẹle ohwohwo. Kọ who bi fi ehrẹ nọ a kẹ evaọ ebe mai kpahe Egagọ Uviuwou h’iruo? *

15. Uvẹ-ọghọ ulogbo vẹ ma wo?

¹⁵ Emotọ orẹwho a rẹ tuduhọ amọfa awọ re a votu kẹ ohwo nọ a gwọlọ, yọ a re tube ru onana no uwou ruọ uwou. Emotọ Uvie Ọghẹnẹ a bi ru onana evaọ edhere ologbo, a be rọ ajọwha vuẹ amọfa kpahe Uvie Ọghẹnẹ evaọ iyẹrẹ gbe n’uwou ruọ uwou. Evaọ uzẹme, wọhọ epanọ ma ta evaọ uzoẹme no o vrẹ na, Uwou-Eroro Na họ emagazini nọ ahwo a be mai se evaọ akpọ na soso. Amọfa nọ ma be vuẹ kpahe Uvie Ọghẹnẹ yọ uvẹ-ọghọ ulogbo. Kọ whọ be ta usiuwoma avọ ajọwha?—Mat. 28:19, 20.

16. Ẹvẹ whọ sai ro dhesẹ nọ whẹ yọ emamọ ọmotọ ọrọ Uvie Ọghẹnẹ?

¹⁶ Kẹle na, Uvie Ọghẹnẹ o te jọ egọmeti ọvuọvo nọ o ti su akpọ na. Uvie na o te rẹrote iruẹru ikẹdẹ kẹdẹ mai, te usu mai kugbe Jihova gbe eware efa kpobi. Kọ whọ te jọ emamọ ọmotọ Uvie Ọghẹnẹ evaọ oke yena? Enẹna họ okenọ who re ro dhesẹ iẹe via. Evaọ iroro kpobi nọ whọ be jẹ kẹdẹ kẹdẹ, hai ru eware kpobi rọ kẹ Jihova oruaro re whọ rọ ere dhesẹ nọ who bi yeri uzuazọ ra wọhọ emamọ ọmotọ ọrọ Uvie Ọghẹnẹ.—1 Kọr. 10:31.

[Oruvẹ-obotọ]

[Enọ Uwuhrẹ]

[Ẹme nọ a fi ẹgba họ nọ ọ rrọ ẹwẹ-obe avọ 14]

Kọ who bi ru lele unuovẹvẹ nọ a kẹ no Ebaibol ze kpahe eroruiruo Itanẹte?

[Uwoho nọ o rrọ ẹwẹ-obe avọ 12]

Wọhọ emọ Kora, kọ egagọ uzẹme avọ ikuigbe riẹ e be were owhẹ eva?

[Uwoho nọ o rrọ ẹwẹ-obe avọ 15]

Egagọ Uviuwou nọ wha re ru evaọ owọwọ jọ nọ wha fihọ u ti fi obọ họ kẹ owhẹ avọ ahwo uviuwou ra jọ emamọ emotọ erọ Uvie na