Yọroma Kẹ Eta Setan
Yọroma Kẹ Eta Setan
“Dhẹ no ifi ukumuomu na.” —2 TIM. 2:26.
ẸVẸ WHỌ TE K’UYO ENỌ NANA?
Enọ vẹ whọ rẹ rọ kiẹ omara riwi otẹrọnọ who re mu viẹro ku amọfa?
Evaọ ikuigbe Pailet avọ Pita na, eme who wuhrẹ nọ u ti fi obọ họ k’owhẹ whaha ozodhẹ je mugba kẹ otunyẹ?
Ẹvẹ whọ sae rọ whaha udu nọ u re brukpe owhẹ vrẹta?
1, 2. Eta Ẹdhọ vẹ ma te ta kpahe evaọ uzoẹme nana?
SETAN ọ be bẹbẹ idibo Jihova. Orọnikọ ẹjiroro riẹ họ re ọ nwani kpe ai no wọhọ ozuẹ nọ ọ be gwọlọ arao kpe he. Ẹjiroro riẹ họ re o mu ahwo ọkpokpọ jẹ rehọ ai ru oreva riẹ.—Se 2 Timoti 2:24-26.
2 Re ohwo nọ ọ rẹ kpahe ẹta ọ sai mu arao ọkpokpọ, u wo oghẹrẹ ẹta nọ ọ rẹ kpahe. Ọ rẹ sai le arao na ruọ oria uvevẹ, ọ vẹ jẹ ufi họ iẹe. Ọ rẹ jẹ sae kpahe ẹta sino nọ arao na o re thihi o ve mu ei idudhe. Ẹdhọ ọ rẹ rọ oghẹrẹ eta itieye na sa-sa gwọlọ mu idibo Ọghẹnẹ ọkpokpọ. Ma gbẹ gwọlọ nọ eta na i mu omai hi, ma re rri otọ mu je ru lele unuovẹvẹ nọ a be k’omai kpahe eta hayo egbefẹ Setan nọ e wariẹ omai họ. Evaọ uzoẹme nana, ma te ta kpahe oghẹrẹ nọ ma rẹ rọ yọroma kẹ eta Ẹdhọ esa jọ nọ i bi mu gaga nẹnẹ. Eta na họ (1) Ogbẹta, (2) ozọ gbe otunyẹ, gbe (3) udu nọ u re brukpe ohwo vrẹta. Ma te ta kpahe eta Setan ivẹ efa evaọ uzoẹme nọ o rrọ aro na.
FURIE ERAE OGBẸTA
3, 4. Ma gbẹ kpọ ẹrọo mai hi, eme ọ rẹ sai noi ze? Kẹ oriruo.
3 Re ohwo nọ o re kpe erao ọ ruẹsi mu erao, ẹsejọ o re tu erae họ ẹwọ, erao e vẹ dhẹ lahwe, kẹsena ọ vẹ sai mu ai. Wọhọ odẹme, Ẹdhọ ọ rẹ gwọlọ tu erae họ ukoko Ileleikristi na. Nọ ọ tẹ sai ru ere, u re ru nọ ahwo ukoko na a rẹ rọ dhẹ no oria ufuoma yena ruọ Setan abọ. Ẹvẹ ma sae rọ rehọ ogbori fi obọ họ ru ẹgwọlọ Setan gba jẹ rọ ere kie ruọ abọ riẹ?
4 Jemis olele na ọ ta nọ ẹrọo na ọ wọhọ erae. (Se Jemis 3:6-8.) Ma gbẹ kpọ ẹrọo mai hi, ma rẹ sai tu erae họ ukoko na, wọhọ odẹme. Ẹvẹ onana o sae rọ via? Ma rehọ iẹe nọ a ru owhowhovia jọ evaọ obọ ewuhrẹ inọ oniọvo-ọmọtẹ jọ ọ rehọ iruo ọkobaro oke-kpobi. Nọ a ku iwuhrẹ họ no, inievo-emetẹ ivẹ jọ a tẹ be t’ẹme kpahe owhowhovia na. Eva e tẹ be were ọjọ kẹ oniọvo nọ ọ rehọ iruo ọkobaro na. Oniọvo ọdekọ na ọ tẹ be ta nọ emamọ eva oniọvo na ọ rọ rehọ iruo ọkobaro na ha, rekọ ọ gwọlọ dhesẹ oma evaọ ukoko na. Ọvẹ evaọ usu inievo ivẹ nana whọ te gwọlọ mu ogbẹnyusu kugbe? O bẹ hẹ re whọ riẹ ọnọ ọ rẹ sae rọ ẹrọo riẹ tu erae họ ukoko na.
5. Re ma sai furie erae ogbẹta, didi enọ u fo nọ ma rẹ nọ omamai?
5 Ẹvẹ ma sai ro furie erae ogbẹta? Jesu ọ ta nọ: “Eme ibuobu nọ erọ eva na unu a rẹ rọ tae via.” (Mat. 12:34) Fikiere, oware ọsosuọ nọ ma re ru họ, ma rẹ kiẹ udu mai riwi. Kọ ma be whaha ekpehre iroro nọ e rẹ wha ogbẹta tha? Wọhọ oriruo, nọ ma te yo nọ oniọvo-ọmọzae jọ ọ be daoma re o wo owha-iruo jọ evaọ ukoko na, kọ ma ti roro nọ emamọ eva o bi ro ru onana, manikọ ma ti viẹro ku ei inọ ọ gwọlọ rehọ iẹe dhesẹ oma? Otẹrọnọ ma rẹ gwọlọ viẹro ku inievo mai, joma kareghẹhọ inọ uruemu utioye Ẹdhọ o wo nọ ọ rọ ta nọ Job ọ be rọ emamọ eva gọ Ọghẹnẹ hẹ. (Job 1:9-11) Ukpenọ ma re viẹro ku inievo mai, u fo re ma kiẹ omamai riwi kpahe oware nọ o be wọ omai rọ ubiẹro utioye rri rai. Kọ ma gine wo emamọ ẹjiroro nọ ma re ro wo iroro itieye kpahe inievo mai? Manikọ ẹzi akpọ nana nọ ọ kare uyoyou evaọ edẹ urere nana u bi kpomahọ omai?—2 Tim. 3:1-4.
6, 7. (a) Eware jọ vẹ e rẹ sai ru omai ta eme iyoma kpahe amọfa? (b) Eme ma re ru nọ a tẹ ta eme iyoma kpahe omai?
6 Joma ta kpahe eware efa jọ nọ e rẹ sai ru omai viẹro ku amọfa. Ojọ họ, ma sae gwọlọ nọ a muẹrohọ omai vi amọfa evaọ eware nọ ma bi ru. O wọhọ ẹsenọ who bi go amọfa họ akotọ re a ruẹsi muẹrohọ owhẹ. O sae jẹ jọnọ ma be fo amọfa ro gu unoma kẹ oware nọ ma hai ru nọ ma be sai ru hu. Nọ ma te bi viẹro ku amọfa fiki omorro, ihri-eriọ, hayo fikinọ a bi ru oware nọ ma sai ru hu, uruemu utioye o rẹ wha enwoma ze.
7 O sae jọnọ ma roro nọ uruemu ohwo u gine te epanọ ma rẹ rọ ta eme iyoma kpahe iẹe. Ẹsejọhọ oniọvo na ọ ta eme iyoma kpahe omai. Otẹrọ ere, orukele họ ifue na ha. Ere oruo o rẹ wọhọ ẹsenọ ma bi ku ekrasi fihọ erae, bi ru oreva Ẹdhọ orọnikọ orọ Ọghẹnẹ hẹ. (2 Tim. 2:26) U fo nọ ma rọ aro kele Jesu evaọ abọ nana. Okenọ a jẹ poviẹe “ọ rẹriẹ unu poviẹ ifo ho.” Ukpoye “o fi oma riẹ họ-otọ kẹ ọnọ o re bruoziẹ kiete.” (1 Pita 2:21-23) Jesu o wo imuẹro inọ Jihova ọ te kpọ eware vi evaọ oghẹrẹ nọ ọ gwọlọ gbe oke nọ o fihọ. Evaifihọ itieye na ma re wo kpahe Ọghẹnẹ re. Nọ ma tẹ be rọ ẹrọo mai bọ amọfa ga, u re fi obọ họ ‘yọrọ okugbe avọ udhedhẹ’ evaọ ukoko na.—Se Ahwo Ẹfẹsọs 4:1-3.
DHẸ NO UFI NỌ SETAN O BI RO MU AHWO, OZỌ GBE OTUNYẸ
8, 9. Fikieme Pailet o ro brukpe Jesu?
8 Arao nọ o mu ufi ọ rẹ sae nya kpohọ oria nọ ọ gwọlọ họ. Epọvo na re, ohwo nọ ozọ gbe otunyẹ amọfa o rẹ wọ ru oware nọ ọ gwọlọ ru hu u dhesẹ nọ ohwo na ọvo ọ gbẹ be sae kpọ uzuazọ riẹ. (Se Itẹ 29:25.) Joma ta kpahe ezae ivẹ jọ nọ i wo ohẹriẹ gaga nọ ozodhẹ gbe otunyẹ e wọ ru oware nọ a gwọlọ ru hu, re ma ruẹ oware nọ ma rẹ sai wuhrẹ no ikuigbe na ze.
9 Pọntiọs Pailet, osu Rom na ọ riẹ nọ Jesu o ru oware ovo thọ họ, yọ ọ gwọlọ ru ei oware uyoma ovo ho. Pailet ọ tubẹ ta nọ Jesu o ru “oware nọ u te uwhu hu.” Ghele na, Pailet o bruoziẹ uwhu kpei. Fikieme? Fikinọ Pailet o kie kẹ ẹgwọlọ ogbotu na. (Luk 23:15, 21-25) Ogbotu na a je bo nọ, “who te siobọno ohwo ọnana, whọ gbẹ sae jọ ọzọ Siza ofa ha,” a tẹ rọ ere gba Pailet họ ru ẹgwọlọ rai. (Jọn 19:12) Ẹsejọhọ ozọ u je mu Pailet inọ a ti mi ei ọkwa riẹ, hayo tube kpei nọ ọ tẹ rrọ abọ Kristi. Fikiere ọ tẹ kuvẹ re a tunyei ru oreva Ẹdhọ.
10. Eme u ru nọ Pita ọ rọ ta nọ ọ riẹ Kristi hi?
10 Pita ukọ na ọ jọ ogbẹnyusu ọkpekpe Jesu. Ọ jọ ẹgbede ta nọ Jesu họ Mesaya na. (Mat. 16:16) Nọ Jesu ọ ta ẹme jọ nọ o vẹ ahwo ẹro ho, Pita ọ daji dede nọ ilele buobu a nya siọ Jesu ba. (Jọn 6:66-69) Nọ ewegrẹ a nyaze ti mu Jesu, Pita ọ rehọ ọgbọdọ thọ Olori riẹ. (Jọn 18:10, 11) Rekọ uwhremu na, Pita ọ dhozọ, ọ tẹ ta nọ ọ riẹ Jesu Kristi vievie he. Evaọ omoke jọ, ozọ ohwo-akpọ u mu ukọ na, o tẹ whae ze nọ ọ gbẹ sae rọ gbaudu ru oware nọ u fo ho.—Mat. 26:74, 75.
11. Ikpehre iruemu vẹ ma rẹ sai lele muabọ?
11 Mai Ileleikristi ma rẹ kuvẹ hẹ re oware jọ u tunye omai ru oware nọ o rẹ dha Ọghẹnẹ eva. Ega-iruo mai hayo amọfa a rẹ sae gwọlọ tunye omai ru uruemu ewhariọ hayo gele omai ruọ ọfariẹ-ogbe. Emọ isukulu a re tunye ibe rai tho kere evaọ ẹdawọ, rri ifoto ẹbẹba, vovo isigareti, lọ imu egaga, da idi thomawa, hayo dhomahọ ọfariẹ-ogbe. Nọ o rrọ ere na, eme ọ sai fi obọ họ k’omai dhẹ vabọ no ẹta ozọ gbe otunyẹ re ma ru oware nọ o rẹ dha Jihova eva?
12. Eme ma rẹ sai wuhrẹ no ikuigbe Pailet avọ Pita na ze?
12 Joma ta kpahe oware nọ ma rẹ sai wuhrẹ no ikuigbe Pailet avọ Pita na ze. Pailet ọ riẹ kpahe Kristi tere he. Dede na, ọ riẹ nọ Jesu o ru oware ovo thọ họ, gbe nnọ Jesu yọ ohwo-akpọ gheghe he. Rekọ Pailet ọ kare omaurokpotọ yọ o wo uyoyou kẹ Ọghẹnẹ uzẹme na ha. Ẹdhọ o mu rie t’obọ ọkpokpọ. Pita o wo eriariẹ egbagba kpahe Ọghẹnẹ, o te je wo uyoyou kẹe. Rekọ evaọ omoke jọ, o fievahọ omobọ riẹ ga hrọ, ọ dhozọ, je kie kẹ otunyẹ. Taure a te ti mu Jesu, Pita o je seha inọ: “Makọ ai kpobi a reti zoruẹ, mẹ hẹ.” (Mak 14:29) Ukọ na ọ hae ruẹrẹ oma kpahe ziezi kẹ odawọ na o hae jọnọ o fievahọ Ọghẹnẹ wọhọ epanọ ọso-ilezi na o ru nọ ọ so nọ: “Eme ohwo ọ sai ru omẹ? Re ỌNOWO ọ tẹ rọ abọ mẹ ozọ u gbe mu omẹ hẹ.” (Ol. 118:6) Evaọ aso urere nọ Jesu ọ jọ otọakpọ, ọ rehọ Pita avọ ikọ ivẹ efa lele oma kpohọ obeva ọgbọ Getsemane. Ukpenọ a rẹ jaja aro vi, Pita avọ ikọ edekọ na a te kie ruọ owezẹ. Jesu ọ tẹ rọwo ae jẹ ta nọ: “Roro wha lẹ re wha siọ ẹdawọ ba ẹruọ.” (Mak 14:38) Rekọ Pita ọ tẹ wariẹ kie ruọ owezẹ, uwhremu na ọ tẹ dhozọ je kie kẹ otunyẹ.
13. Ẹvẹ ma sai ro dikihẹ ga nọ amọfa a tẹ gwọlọ tunye omai ruọ eyoma?
13 Oware nọ o via kẹ Pailet avọ Pita na o rẹ sai je wuhrẹ omai oware ofa jọ nọ u wuzou gaga: Re ma sai mugba kẹ otunyẹ, o gwọlọ nọ ma re wo eriariẹ egbagba, omaurokpotọ, rẹroso Ọghẹnẹ, you rie, jẹ dhozọ riẹ, orọnikọ ohwo-akpọ họ. Nọ eriariẹ egbagba i te ru omai wo ẹrọwọ ọgaga, ma rẹ sae ta ẹme kẹ amọfa kpahe ẹrọwọ mai ududu. Onana u ti fi obọ họ k’omai mugba kẹ otunyẹ je fi ozodhẹ kparobọ. U fo ho re ma fievahọ omobọ mai thesiwa. Ukpoye, ma rẹ rọ oma kpotọ vuhumu inọ re ma sai fi otunyẹ kparobọ, ma gwọlọ obufihọ Ọghẹnẹ. U fo re ma lẹ kẹ ẹzi Jihova je ru re uyoyou nọ ma wo kẹe o wọ omai kpare odẹ riẹ kpehru je koko izi riẹ. U te no ere no, o gwọlọ nọ ma rẹ ruẹrẹ oma kpahe kẹ otunyẹ taure ma tẹ te rẹriẹ ovao dhe odawọ utioye. Wọhọ oriruo, nọ ma tẹ be hae lẹ kugbe emọ mai je fi obọ họ kẹ ae ruẹrẹ oma kpahe kẹ otunyẹ ọhwa, u re fi obọ họ kẹ ae ru oware nọ u fo nọ ibe rai a tẹ be gwọlọ gele ai ruọ oware uyoma.—2 Kọr. 13:7. *
YỌROMA KPAHE ẸTA NỌ Ọ RẸ WHỌLỌ OHWO, UDU NỌ U RE BRUKPE OHWO VRẸTA
14. Iroro vẹ Ẹdhọ ọ rẹ gwọlọ fihọ omai udu kpahe eware nọ e thọ omai obọ evaọ oke nọ u kpemu?
14 Ẹsejọ utho hayo ete ure ọgbẹgbẹdẹ a rẹ rọ kpahe ẹta fihọ ehru oria nọ arao ọ rẹ nya otọ riẹ vrẹ. Nọ arao o te thihi ufi ẹta na, utho hayo ete ure na u ve kie ruru ei. Udu nọ u re brukpe ohwo vrẹta o wọhọ oware ogbẹgbẹdẹ nọ u re kie whọlọ ohwo. Nọ ma te bi roro kpahe oware nọ o thọ omai obọ evaọ oke nọ u kpemu, ma sai “horie oma na kpobi no” wọhọ ohwo nọ oware ogbẹgbẹdẹ o kie fihọ. (Se Olezi 38:3-5, 8.) Setan ọ rẹ gwọlọ ru omai roro nọ Jihova ọ gbẹ sai dhesẹ ohrọ kẹ omai hi gbe nnọ ma gbẹ sai koko izi Riẹ hẹ.
15, 16. Ẹvẹ whọ sae rọ whaha ẹta ọrọ udu nọ u re brukpe ohwo vrẹta?
15 Ẹvẹ whọ sae rọ whaha ẹta nọ ọ rẹ whọlọ ohwo na? Otẹrọnọ whọ thọ uzi ulogbo jọ, daoma enẹna re whọ ruẹrẹ usu ra họ kugbe Jihova. Nya bru ekpako na re whọ ta kẹ ae inọ jọ a fi obọ họ k’owhẹ. (Jem. 5:14-16) Daoma siọ oware uyoma na ba re who ru oware ezi. (2 Kọr. 7:11) Nọ a tẹ whọku owhẹ, whọ jọ udu u whrehe owhẹ hẹ. Ọwhọkuo o re dhesẹ nọ Jihova o you owhẹ. (Hib. 12:6) Gbaemu inọ who re gbe ru oware nọ u su kpohọ uzioraha na ha, who ve je ru lele ọtamuo ra. Nọ who te siobọno eyoma na je muọ ewoma họ eru no, jọ u mu owhẹ ẹro inọ idhe ẹtanigbo Jesu Kristi e rẹ sai ru nọ a rẹ rọ rehọ izieraha ra vrẹ owhẹ.—1 Jọn 4:9, 14.
16 Udu u re gbe brukpe ahwo jọ kpahe izieraha nọ a rọ vrẹ rai no. Otẹrọnọ ere o rrọ rọkẹ owhẹ, kareghẹhọ inọ Jihova ọ rọ vrẹ Pita gbe ikọ edekọ nọ e dhẹ siọ Jesu, Ọmọ ọghaghae riẹ ba evaọ okenọ ọ jọ ẹbẹbẹ. Jihova ọ rọ vrẹ ọzae nọ a sino ukoko obọ Kọrint fiki ọfariẹ-ogbe ọtọtọ nọ o kurẹriẹ uwhremu na. (1 Kọr. 5:1-5; 2 Kọr. 2:6-8) Ebaibol na ọ fodẹ ahwo jọ nọ a thọ izi ilogbo rekọ nọ a kurẹriẹ, kẹsena Ọghẹnẹ ọ tẹ rọ vrẹ rai.—2 Irv. 33:2, 10-13; 1 Kọr. 6:9-11.
17. Eme idhe ẹtanigbo na o rẹ sai ru k’omai?
17 Jihova ọ te rọ vrẹ owhẹ jẹ kpairoro vrẹ izieraha ra erọ oke nọ u kpemu otẹrọnọ who gine kurẹriẹ jẹ jẹ obufihọ riẹ rehọ. Who du roro ho inọ izieraha ra i vi enọ a rẹ sae rọ ẹkwoma idhe ẹtanigbo Jesu rọ vrẹ. Who te bi roro ere, kiyọ ẹta Setan jọ who kie ro no na. Ghelọ oware nọ Ẹdhọ ọ be gwọlọ fihọ owhẹ udu kẹhẹ, a rẹ sae rọ ẹkwoma idhe ẹtanigbo na rọ vrẹ ohwo kpobi nọ ọ raha uzi nọ o kurẹriẹ. (Itẹ 24:16) Nọ who te fi ẹrọwọ họ idhe ẹtanigbo na, udu u re gbe brukpe owhẹ vrẹta ha, yọ whọ te sai wo ẹgba nọ whọ rẹ rọ rehọ udu, iroro, gbe ẹwẹ ra kpobi gọ Ọghẹnẹ.—Mat. 22:37.
MA RRỌ IGBORI KẸ EGHẸ SETAN HE
18. Ẹvẹ ma sae rọ whaha eta Ẹdhọ?
18 Oware nọ o rrọ Setan oja kpobi họ, orọnikọ oghẹrẹ ẹta nọ ọ kpahe he rekọ thakpinọ ẹta o mu omai. Nọ ma rrọ igbori kẹ eghẹ Setan he na, ma rẹ sae dhẹ se iẹe ba. (2 Kọr. 2:10, 11) Nọ ma tẹ lẹ se Ọghẹnẹ rọkẹ areghẹ nọ ma re ro fi edawọ kparobọ, eta Setan i ti mu omai hi. Jemis o kere nọ: “Otẹrọnọ areghẹ ọkare owhai ọjọ, jọ ọ yare Ọghẹnẹ nọ ọ rẹ kẹ ọvọvẹ nọ rẹ gboke he, a rẹ te rehiẹe kẹe.” (Jem. 1:5) U fo nọ ma re ru lele elẹ mai ẹkwoma Ebaibol na nọ ma re wuhrẹ ẹsikpobi ma ve je fi eware nọ ma wuhrẹ họ iruo. Ebe nọ ọrigbo nọ o wo ẹrọwọ avọ areghẹ na a bi kere no Ebaibol na ze i bi fi obọ họ k’omai vuhu eta sa-sa nọ Ẹdhọ ọ be kpahe gbe oghẹrẹ nọ ma rẹ rọ whahae.
19, 20. Fikieme ma re ro mukpahe oware uyoma?
19 Olẹ gbe uwuhrẹ Ebaibol u re fi obọ họ k’omai wo isiuru kẹ oware nọ u woma. Rekọ u fo nọ ma re mukpahe oware uyoma. (Ol. 97:10) Nọ ma te bi roro kpahe uye nọ u re no eyoma oruo ze, u re fi obọ họ k’omai whaha owojẹ utioye. (Jem. 1:14, 15) Nọ ma tẹ be daoma mukpahe oware uyoma je wo isiuru kẹ oware uwoma, eware nọ Setan ọ rọ kpahe ẹta i ti gbe si omai urru hu.
20 Ma re yere Ọghẹnẹ gaga inọ o bi fi obọ họ k’omai dhẹ siọ Setan ba. Jihova ọ be rọ ẹkwoma ẹzi riẹ, Ebaibol na, gbe ukoko riẹ si omai no obọ ‘oyoma na.’ (Mat. 6:13) Evaọ uzoẹme nọ o rrọ aro na, ma ti wuhrẹ kpahe epanọ ma rẹ rọ yọroma kẹ eta ivẹ efa nọ Ẹdhọ o bi ro mu idibo Ọghẹnẹ ọkpokpọ.
[Oruvẹ-obotọ]
^ edhe-ẹme 13 U fo re esẹgbini a lele emọ rai ta ẹme kpahe uzoẹme na “Peer-Pressure Planner” (Omaruẹrẹ Kpahe kẹ Otunyẹ Ọhwa) nọ o roma via evaọ obe na Questions Young People Ask—Answers That Work, Uko avọ 2, ẹwẹ-obe avọ 132-133. A rẹ sae rọ eme nana ru Egagọ Uviuwou.
[Enọ Uwuhrẹ]
[Uwoho nọ o rrọ ẹwẹ-obe avọ 21]
Ogbẹta o rẹ sai tu erae họ ukoko na jẹ wha ebẹbẹ ze
[Uwoho nọ o rrọ ẹwẹ-obe avọ 24]
Whọ sai siobọno owha orọ udu nọ u re brukpe ohwo vrẹta
