Epanọ Akpọ Nana O Ti Ro Kuhọ

“Wha [rrọ] ebi hi, re ẹdẹ ọyena ọ te ruọ owhai ọza wọhọ oji.”​—1 TẸS. 5:4.

KỌ WHỌ SAE K’IYO ENỌ NANA VEVẸ?

Eware vẹ nọ e te via evaọ obaro a jọ eria Ebaibol nana t’ẹme kpahe?

1 Ahwo Tẹsalonika 5:3

Eviavia 17:16

Daniẹl 2:44

1. Eme o ti fi obọ họ kẹ omai jaja aro vi je thihakọ edawọ?

EWARE imuozọ nọ i ti nuhu akpọ na e te via kẹle. Eruẹaruẹ Ebaibol nọ i bi rugba e kẹ imuẹro onana, fikiere o gwọlọ nọ ma rẹ jaja aro vi. Eme o ti fi obọ họ kẹ omai jaja aro vi? Pọl ukọ na ọ tuduhọ omai awọ nọ ma ‘riwi eware nọ a re ruẹ hẹ.’ Ẹhẹ, u fo nọ ma rẹ tẹrovi ẹruore uzuazọ ebẹdẹ bẹdẹ mai, o make rrọ ẹruore obọ odhiwu hayo ọrọ otọakpọ. Eme nọ e wariẹ oria ikere yena họ i dhesẹ nọ Pọl ọ jẹ rọ eme nana tuduhọ ibe Ileleikristi riẹ awọ inọ a tẹrovi oghale nọ u ti te ai fiki ẹrọwọ rai nọ a kru. Ere oruo u ti fi obọ họ kẹ ae thihakọ edawọ gbe ukpokpoma.—2 Kọr. 4:8, 9, 16-18; 5:7.

2. (a) Re ma ruẹse tẹrovi ẹruore mai, eme o gwọlọ nọ ma re ru? (b) Eme ma te ta kpahe evaọ uzoẹme nana gbe onọ u lele i rie?

² Pọl ọ fodẹ oware jọ nọ u wuzou gaga evaọ uduotahawọ riẹ na: Re ma ruẹse tẹrovi ẹruore mai, o gwọlọ nọ ma re rri thabọ vrẹ eware nọ ma be rẹriẹ ovao ku nẹnẹ. Ma rẹ tẹrovi eware ilogbo nọ e rrọ obaro tha nọ ma re ruẹ hẹ. (Hib. 11:1; 12:1, 2) Fikiere, joma ta ẹme kpahe eware ikpe jọ nọ i w’obọ kugbe ẹruore uzuazọ ebẹdẹ bẹdẹ mai. *

EME Ọ TE NWANE VIA NO TAURE URERE NA O TẸ ZE?

3. (a) Oware jọ vẹ nọ o te via evaọ obaro a fodẹ evaọ obe 1 Ahwo Tẹsalonika 5:2, 3? (b) Didi owọ isu erẹwho a te jẹ, kọ ẹsejọhọ amono a ti kuomagbe ai?

³ Pọl ọ fodẹ oware jọ nọ o te via evaọ obaro evaọ ileta riẹ nọ o kere se Ileleikristi obọ Tẹsalonika.  (Se 1 Ahwo Tẹsalonika 5:2, 3.) Ọ ta kpahe “ẹtha Ọnowo” hayo ẹdẹ Jihova. Wọhọ epanọ o rrọ oria ikere nana, “ẹtha Ọnowo” na u dhesẹ etoke nọ o te rọ ẹraha egagọ erue muhọ, kẹsena o vẹ te rọ ẹmo Amagẹdọn kuhọ. Rekọ taure ẹdẹ Jihova o te ti muhọ, isu akpọ na a ti bo nọ “udhedhẹ gbe omofọwẹ.” Ubo nana o sae roma via ẹsiẹvo hayo eware sa-sa e sae via unọjọ utọjọ nọ i re su kpohọ iẹe. Ẹsejọhọ erẹwho akpọ na a ti roro nọ a joma ku ebẹbẹ ilogbo jọ nọ e be kẹ ae idhọvẹ họ no. Kọ ẹvẹ kpahe isu-egagọ erue na? A w’obọ kugbe akpọ na, fikiere o sae jọnọ a ti kuomagbe isu akpọ na. (Evia. 17:1, 2) Isu-egagọ na a vẹ te rọ ere ru wọhọ eruẹaro erue erọ Juda oke anwae. Jihova ọ ta kpahe ae nọ: “A . . . be ta nọ, ‘Udhedhẹ, Udhedhẹ’, yọ udhedhẹ o riẹ e he.”—Jeri. 6:14; 23:16, 17.

4. Wo ohẹriẹ no amọfa buobu, eme ma riẹ?

⁴ Oghẹrẹ ahwo nọ a ti bo ubo “udhedhẹ gbe omofọwẹ” na kẹhẹ, ubo yena u ti dhesẹ nọ ẹdẹ Jihova o bi ti muhọ. Oyejabọ nọ Pọl ukọ na ọ rọ ta nọ: “Imoni, wha [rrọ] eva ebi hi, re ẹdẹ ọyena ọ te ruọ owhai ọza wọhọ oji. Keme whai kpobi emọ elo.” (1 Tẹs. 5:4, 5) Wo ohẹriẹ no amọfa buobu, ma riẹ ẹme nọ Ikereakere na e ta kpahe eware nọ e be via nẹnẹ. Oghẹrẹ vẹ eruẹaruẹ kpahe ubo “udhedhẹ gbe omofọwẹ” na u ti ro rugba dẹẹ? Ma sae nwane ta gbiae obọnana ha. Fikiere joma gbaemu inọ ma rẹ “siọ owezẹ ba re ma jọ aruro.”—1 Tẹs. 5:6; Zef. 3:8.

“OVIE-AYE” NỌ O RORO THỌ

5. (a) Ẹvẹ ‘uye ulogbo’ na u ti ro muhọ? (b) “Ovie-aye” vẹ o ti roro thọ?

⁵ Oware ofa vẹ o te jọ obaro via? Pọl ọ ta nọ: ‘Oke nọ a te ta nọ, “Oke onana oke udhedhẹ gbe omofọwẹ,” idudhe na ọraha ọ vẹ nwani bru ae ze.’ ‘Ọraha idudhe’ nana ọ te rọ ẹraha “Babilọn ologbo na” muhọ, koyehọ egagọ erue akpọ-soso nọ a se “ogberẹ” na. (Evia. 17:5, 6, 15) Ọraha nana nọ o ti te egagọ erue kpobi, gbe Kristẹndọm na oye o te jọ emuhọ ‘uye ulogbo na.’ (Mat. 24:21; 2 Tẹs. 2:8) Oware nana u ti gbe ahwo buobu unu. Fikieme? Fikinọ rite oke ọraha na, ogberẹ na o ti gbe rri omariẹ wọhọ “ovie-aye” nọ ‘uweri ovo o te jọ kẹ hẹ.’ Rekọ idudhe na ọ te ruẹ nọ o roro thọ gaga. A te raha iẹe no ababọ  oke oraha, wọhọ ẹsenọ uwhu riẹ o te romavia ‘ẹdọvo-idudhe.’—Evia. 18:7, 8.

6. Ono ọ te raha egagọ erue?

⁶ Ebaibol ọ ta nọ ‘arao ojihẹ’ nọ o wo “izei ikpe” ọ te raha ogberẹ na. Ọkiẹriwo obe Eviavia u dhesẹ nọ arao ojihẹ na o dikihẹ kẹ United Nations (Okugbe Erẹwho). “Izei ikpe” arao na i dikihẹ kẹ isuẹsu kpobi evaọ oke mai na nọ e be rọ uketha kẹ ‘arao ojihẹ ọwawae’ nana. * (Evia. 17:3, 5, 11, 12) Ẹvẹ ọraha na o ti yoma te? Okugbe Erẹwho o ti mi ei efe riẹ kpobi, fere oghẹrẹ ohwo nọ ọ ginẹ rrọ via, kpei, ọ vẹ te jẹ “rehọ erae mahe iẹ.” A te raha iẹe muotọ.—Se Eviavia 17:16.

7. Eme ọ te wọ ‘arao ojihẹ’ na họre ogberẹ na?

⁷ Eruẹaruẹ Ebaibol e tẹ jẹ fodẹ oware nọ o te wha ọraha nana ze. Jihova ọ te rọ oghẹrẹ jọ fi iroro na họ isu egọmeti udu, “re a ruẹse ru orọ eva riẹ,” koyehọ re a raha ogberẹ na. (Evia. 17:17) Egagọ i bi w’obọ evaọ ẹmo, onọ o be wha ebẹbẹ fihọ akpọ na nẹnẹ; fikiere o sae jọnọ erẹwho na a ti roro nọ ewoma o ti noi ze nọ a tẹ raha ogberẹ na no. Evaọ uzẹme, nọ isu egọmeti a ti kpe ogberẹ na, a ti roro nọ ẹjiroro “eva” rai a bi ro ru oyena. Rekọ evaọ uzẹme, Ọghẹnẹ ọ be rehọ ae raha egagọ erue. Oware nọ a rẹro riẹ ẹdẹvo ho o vẹ te romavia, abọ jọ ukoko Setan ọ te họre abọ ọfa ukoko ovona, yọ Setan ọ te sae whaha onana ha.—Mat. 12:25, 26.

A TE HỌRE IDIBO ỌGHẸNẸ

8. Eme họ ohọre “Gọg, nọ ọ rọ obọ otọ Magọg” na?

⁸ Nọ a tẹ raha egagọ erue no, yọ idibo Ọghẹnẹ a gbẹ be ‘rria dhedhẹ ababọ igbẹhẹ.’ (Izik. 38:11, 14) Eme ọ te via kẹ utu ahwo nana nọ o wọhọ nọ a wo ọthọwẹ hẹ nọ a gbẹ be ruabọhọ egagọ Jihova na? O wọhọ nọ ‘ogbotu ahwo’ a te wọ ohọre bru ai. Ebaibol ọ ta nọ onana họ ohọre “Gọg, nọ ọ rọ obọ otọ Magọg.” (Se Izikiẹl 38:2, 15, 16.) Iroro vẹ u fo nọ ma re wo kpahe ohọre yena?

9. (a) Eme ọ mae rrọ Ileleikristi oja? (b) Re ẹrọwọ mai ọ ruẹse ga ziezi, eme ma re ru enẹna?

⁹ U fo re ma ruawa ha inọ a te wọ ohọre utiona bru idibo Ọghẹnẹ.  Ukpoye, oware nọ o mae rrọ omai oja họ, erufo odẹ Jihova gbe ẹkpare kpehru udu-esuo riẹ, orọnikọ esiwo mai hi. Ẹhẹ, Jihova ọ ta unuẹse nọ o vrẹ udhosa inọ: “Wha [te] riẹ nọ mẹ họ ỌNOWO na.” (Izik. 6:7) Fikiere, ma be rọ ọwhọ rẹro orugba eruẹaruẹ Izikiẹl yena avọ evaifihọ inọ “Ọnowo ọ riẹ epanọ o re ro siwẹ ahwo-Ọghẹnẹ no edawọ.” (2 Pita 2:9) Bọwo oke yena, o gwọlọ nọ ma rẹ rọ uvẹ kpobi nọ u rovie fihọ bọ ẹrọwọ mai ga re ma sai kru ẹgbakiete mai ghelọ edawọ kpobi nọ ma rẹriẹ ovao dhe. Eme ma re ru? Ma rẹ lẹ, wuhrẹ Ebaibol je roro didi kpahe eware nọ ma wuhrẹ, ma vẹ jẹ ta usiuwoma Uvie na kẹ amọfa. Ma te bi ru ere, ẹruore mai ọrọ uzuazọ ebẹdẹ bẹdẹ o ve ti ‘mu omai ẹro’ vi epaọ ọsosuọ.—Hib. 6:19; Ol. 25:21.

ERẸWHO NA A TE RIẸ OGHẸRẸ NỌ JIHOVA Ọ RRỌ

10, 11. Ẹvẹ ẹmo Amagẹdọn o ti ro muhọ, kọ eme ọ te via evaọ etoke yena?

¹⁰ Oware imuozọ vẹ o te romavia okenọ a te họre idibo Jihova? Jihova ọ te rọ ẹkwoma Jesu avọ egbaẹmo obọ odhiwu riẹ thọ idibo Riẹ. (Evia. 19:11-16) Ohọre yena họ Amagẹdọn, “ẹmo ologbo Ọghẹnẹ Erumeru na.”—Evia. 16:14, 16.

¹¹ Jihova ọ rọ ẹkwoma Izikiẹl ta kpahe ẹmo yena inọ: “Mẹ rẹ te rehọ idudu oghoghẹrẹ kẹ Gọg, Ere ỌGHẸNẸ Ọnowo na ọ tae; inievo e rẹ te rehọ epia họre inievo.” Fiki idudu, enọ e rrọ ofẹ Setan a ve ti reghe no, a vẹ te rehọ epia hayo ekwakwa ẹmo họre omoma rai. Okpẹtu o ti te Setan omariẹ re. Jihova ọ ta nọ: “Me re ti si oso [rrọ Gọg] avọ ahwo nọ a ghoro bru ei ze gbe ahwo nọ a bi lele iei ria kpobi, ọwhibo avọ osoitho, erae nọ i re fuẹ hẹ.” (Izik. 38:21, 22) Eme o ti no owojẹ Ọghẹnẹ nana ze?

12. Eme erẹwho na a te riẹ?

¹² Erẹwho na a vẹ te riẹ nọ obọ Jihova ọraha rai o bi no ze na. Wọhọ epanọ o jọ kẹ ahwo Ijipti nọ a le emọ Izrẹl te Abade Ọwawae na, ogbaẹmo Setan u ve ti bo nọ: “ỌNOWO na o bi lele ai họre” omai! (Ọny. 14:25) Ẹhẹ, onana o te gba orẹwho na họ riẹ oghẹrẹ nọ Jihova ọ rrọ. (Se Izikiẹl 38:23.) Oke vẹ eware nana i ti ro muhọ ẹvia?

OGAGA-ESUO ỌFA Ọ GBẸ TE ROMAVIA HA

13. Eme ma riẹ kpahe abọ avọ isoi ọrọ ẹmema nọ Daniẹl ọ ta kpahe na?

¹³ Eruẹaruẹ jọ evaọ obe Daniẹl i fi obọ họ k’omai riẹ oke nọ ma rrọ na. Daniẹl o dhesẹ ẹmema ohwo nọ o wo abọ sa-sa. (Dan. 2:28, 31-33) Ẹmema na o dikihẹ kẹ egaga-esuo akpọ sa-sa nọ e họre wọso idibo Ọghẹnẹ evaọ oke nọ u kpemu, gbe oke mai na. Egaga-esuo na họ Babilọn, Midia gbe Pasia, Grisi, Rom, gbe ọrọ urere nọ o bi su evaọ oke mai na. Ọkiẹriwo eruẹaruẹ Daniẹl u ru omai riẹ inọ ogaga-esuo akpọ urere nana a rehọ awọ gbe iziawọ ẹmema na dhesẹ. Evaọ etoke Ẹmo Akpọ I, Britain avọ America a mu obọdẹ usu jọ. Ẹhẹ, abọ avọ isoi ọrọ ẹmema Daniẹl na họ Ogaga-Esuo Akpọ orọ Britain gbe America. Awọ na họ abọ urere ẹmema na, onọ u dhesẹ nọ ogaga-esuo akpọ ọfa ọ gbẹ te romavia ha. Isuẹsu Britain gbe America ọ be ga te epanọ a gwọlọ họ, onọ u dhesẹ awọ gbe iziawọ ẹmema na nọ a rọ ogbokọ gbe ọviẹ ru na.

14. Ogaga-esuo akpọ vẹ ọ te jọ evaọ okenọ Amagẹdọn ọ te ze?

 ¹⁴ Eruẹaruẹ evona i dhesẹ nọ Uvie Ọghẹnẹ, onọ a rọ utho ulogbo dhesẹ na, u bru no ugbehru esuo Jihova ze evaọ ukpe 1914. Obọnana utho yena o be tehe bru awọ ẹmema na. O te whọlọ awọ gbe oma ẹmema na kpobi no evaọ Amagẹdọn. (Se Daniẹl 2:44, 45.) Onana u dhesẹ nọ Ogaga-Esuo Akpọ orọ Britain gbe America na o te gbẹ jọ nọ Amagẹdọn ọ te ze. Re ma ruẹ orugba eruẹaruẹ nana o te were oma kẹhẹ! * Rekọ, ẹvẹ Jihova o ti ru Ẹdhọ omariẹ?

OWARE NỌ A TI RU ỌWEGRẸ OLOGBO ỌGHẸNẸ

15. Nọ a te fi ẹmo Amagẹdọn no, eme ọ te via kẹ Setan avọ ikọ-muomu riẹ?

¹⁵ Orọ ọsosuọ, Setan ọ te rọ ẹro ruẹ nọ a be te raha ukoko riẹ kpobi muotọ evaọ otọakpọ na. Kẹsena a vẹ te rẹriẹ ovao ku Setan omariẹ. Jọn ukọ na ọ ta oware nọ u ti lele iei. (Se Eviavia 20:1-3.) Jesu Kristi, “ukọ-odhiwu [avọ] usiavẹ ẹri-igbolẹvẹe” nọ o kru ọ vẹ te gba Setan avọ ikọ-muomu riẹ fihọ ẹri-igbolẹvẹe koyehọ ọgọdọ nọ o wo oba ha re a jọ etẹe odu ikpe. (Luk 8:30, 31; 1 Jọn 3:8) Oyena o te jọ emuhọ ọrọ ẹpẹhẹ uzou araomuomu na. *—Emu. 3:15.

16. Setan nọ a ti fihọ “ẹri-igbolẹvẹe” na, eme u dhesẹ?

¹⁶ Eme họ “ẹri-igbolẹvẹe” nọ a jọ ikere na ta nọ a ti mu Setan avọ ikọ-muomu riẹ fihọ na? Ẹme Griki nọ Jọn o ro ruiruo evaọ etenẹ na họ aʹbys·sos, yọ u dhesẹ “ọgọdọ nọ o diwi gaga hayo nọ o diwi thesiwa.” A tẹ jẹ fa ẹme yena oware nọ “a rẹ ruẹ oba riẹ hẹ, nọ o wo umuo ho.” Fikiere, oyena yọ oria nọ ohwo ọvo ọ rẹ sai te he ajokpaọ Jihova avọ ukọ-odhiwu nọ o ro mu nọ “usiavẹ ẹri-igbolẹvẹe” na o rrọ obọ. Evaọ etẹe, Setan ọ te jọ wọhọ ohwo nọ o whu no, o gbe ti wo uvumọ ogaga ha “re ọ siọ erẹwho na ba ẹviẹhọ.” Ẹhẹ, a te fare unu ‘okpohrokpo yena nọ o bi do enu’ na.—1 Pita 5:8.

EWARE NỌ E TE VIA TAURE UDHEDHẸ O TẸ ZE

17, 18. (a) Eware vẹ nọ e te via evaọ obaro ma t’ẹme te no na? (b) Nọ eware nana e tẹ via vrẹ no, eme ma te reawere riẹ?

¹⁷ Eware imuozọ nọ i ti nuhu akpọ na e rrọ obaro tha. Ma bi rẹro okenọ ahwo a ti ro bo nọ “udhedhẹ gbe omofọwẹ.” Kẹsena ma vẹ te ruẹ ọraha Babilọn Ologbo na, ohọre Gọg obọ Magọg na, ẹmo Amagẹdọn, gbe Setan avọ ikọ-muomu riẹ nọ a ti gbolo fihọ ọgọdọ nọ o wo oba ha na. Nọ eware nana e tẹ via vrẹ no, nọ emuemu kpobi o je no otọ no, uzuazọ okpokpọ u ve ti muhọ, koyehọ Esuo Odu-Ikpe Kristi, okenọ ma te rọ reawere “omofọwẹ.”—Ol. 37:10, 11.

¹⁸ U te no eware isoi nọ e te via nọ ma t’ẹme te no na, eware efa e riẹ nọ ‘ma re ruẹ hẹ’ nọ u fo nọ ma re “riwẹ.” Ma te ta kpahe eware nana evaọ uzoẹme nọ o rrọ aro na.

[Oruvẹ-obotọ]

[Enọ Uwuhrẹ]

[Ẹkpẹti/Uwoho nọ o rrọ ẹwẹ-obe avọ 4, 5]

EWARE ISOI NỌ E TE VIA EVAỌ OBARO:

1 Ubo “udhedhẹ gbe omofọwẹ”

2 Erẹwho na a rẹ te họre jẹ raha “Babilọn ologbo na”

3 A te họre idibo Jihova

4 Ẹmo Amagẹdọn

5 A ti fi Setan avọ ikọ-muomu riẹ họ ọgọdọ nọ o wo oba ha