A Rọ Unevaze Fialoma Via​—evaọ obọ Brazil

EVAỌ ikpe jọ nọ i kpemu, oniọvo-ọmọtẹ jọ nọ a re se Rúbia (1), nọ ọ kpako te ikpe 30 no enẹna, o te kperẹ nyae ruẹ Sandra (2), ọkobaro jọ nọ ọ rrọ ukoko osese jọ evaọ obọ Brazil. Nọ Rúbia ọ jọ kugbe Sandra, oware jọ o via nọ u duobọte Rúbia te epanọ u ro nwene omaa uzuazọ riẹ. Eme ọ via? Jọ Rúbia ọvo ọ ta kẹ omai.

“ẸME NA O GBE OMẸ UNU”

“Me lele Sandra kpohọ obọ aye jọ nọ o bi wuhrẹ Ebaibol kugbe. Nọ o bi wuhrẹ kugbei na, aye na ọ tẹ ta nọ: ‘Sandra, emetẹ esa jọ evaọ oria iruo mẹ a gwọlọ wuhrẹ Ebaibol, rekọ mẹ ta kẹ ae nọ jọ a hẹrẹ bọwo ẹdẹ nọ u re te ai. Mẹ riẹ nọ ahwo nọ who ti wuhrẹ kugbe ukpe nana soso a riẹ no nọ a be hẹrẹ.’ Ẹme na o gbe omẹ unu. Kọ ahwo nọ a gwọlọ wuhrẹ kpahe Jihova a rẹ hẹrẹ bẹsenọ u re  te ai? Whaọ evaọ obonọ me no ze, udugaga mẹ rẹ rọ ruẹ omọvo nọ me re wuhrẹ Ebaibol kugbe. Okioke yena iroro jọ e tẹ ziọ omẹ udu evaọ uwou aye na inọ me re fi obọ họ kẹ ahwo nọ a rrọ ẹmẹwho yena. U kri hi, mẹ tẹ kwa no ẹwho nọ mẹ jọ kpohọ ẹmẹwho nọ Sandra ọ be jọ ru iruo ọkobaro na.”

Ẹvẹ eware e jọ kẹ Rúbia evaọ obei? Ọ ta nọ: “Nọ mẹ kwa kpohọ obei te emerae ivẹ ọvo no, me te ti wo emọ-uwuhrẹ Ebaibol nọ i bu te 15 je wo ahwo buobu nọ a be hẹrẹ omẹ kẹ uwuhrẹ rai wọhọ epanọ o rrọ kẹ Sandra!”

Ọ WARIẸ KIẸ IRUO ODIBỌGBA RIẸ RIWI

Diego (3), oniọvo-ọmọzae nọ ọ rrọ ikpe udhegbọ enẹna, o weze bru inievo jọ nọ e rrọ iruo ọkobaro evaọ obọ Prudentópolis, ẹmẹwho ọkakao jọ evaọ obọ Brazil. Iweze na i duobọ tei gaga; evaọ uzẹme, e wọ riẹ kiẹ iruo odibọgba riẹ riwi. Ọ ta nọ: “Me je wo ajọwha tere he evaọ ukoko na, umutho euwa jọ ọvo mẹ jẹ hae sae niyẹrẹ rai evaọ usiuwoma ota nọ amara o te re. Rekọ nọ me weze bru ekobaro na jẹ gaviezọ kẹ ikuigbe evawere erọ eware nọ a rọ ẹro ruẹ evaọ iruo usiuwoma ota na, mẹ tẹ rọ evawere nọ a bi wo evaọ iruo na wawo usiuwoma ota mẹ nọ o kare ajọwha. Nọ mẹ ruẹ epanọ eva e be were ai te, me te roro nọ dodokọ ere o rrọ k’omẹ re.” Nọ Diego ọ nwani no iweze na t’uwou no, o te muọ iruo ọkobaro họ.

Wọhọ epanọ o jọ kẹ Diego na, kọ whẹ yọ uzoge nọ o re kpohọ iwuhrẹ ukoko gbe usiuwoma ota rekiyọ who wo ajọwha gbe evawere evaọ iruo usiuwoma ota na ha? O tẹ rrọ ere, kọ whọ sai ru inwene evaọ uzuazọ ra re who kpohọ oria nọ ẹgwọlọ ọ mae rrọ kẹ iwhowho-uvie je wo evawere nọ i re noi ze? Uzẹme riẹ họ, o lọhọ tere he re whọ nya siọ eware jọ nọ whọ jẹ reawere rai ba. Ghele na, izoge buobu i ru ere no. A nwene utee gbe omaa rai evaọ uzuazọ re a ruẹsi w’obọ ziezi evaọ egagọ Jihova. Joma ta kpahe oriruo ọfa, orọ Bruno.

ỌGBA-OLE MANIKỌ ỌGBODIBO?

Evaọ ikpe jọ nọ i kpemu, Bruno (4), nọ ọ rrọ ikpe 28 enẹna o kpohọ isukulu ile-iwuhrẹ jọ nọ e viodẹ, yọ o  je le utee epanọ ọ rẹ rọ jọ osu ikporakporo. Ọ jọ isukulu na wo ẹnyaharo te epanọ a jẹ hai ro zizie ei nyae kpọ utu ilesuọ. Iruo nana i ti ru ei jọ ọdafe evaọ obaro. Bruno ọ ta nọ: “Rekọ o jọ omẹ oma inọ oware jọ o kare omẹ evaọ uzuazọ. Mẹ roma mudhe kẹ Jihova no, rekọ mẹ riẹ nọ mẹ be rọ eva mẹ kpobi gọe he, onana o tẹ jẹ kẹ omẹ uye. Mẹ lẹ se Jihova kpahe onana, mẹ tẹ jẹ t’ẹme kugbe inievo-emezae nọ i kri ukoko na no. Nọ mẹ romatotọ roro kpahe onana no, mẹ tẹ gbaemu inọ mẹ rẹ rọ iruo odibọgba na karo kẹ iruo ile na, me te no isukulu na, jẹ kwa kpohọ oria nọ ẹgwọlọ ọ mae rrọ kẹ iwhowho-uvie.” Eme o ru?

Bruno ọ tẹ kwa kpohọ ẹwho nọ a re se Guapiara (ahwo nọ a bu te idu ihrẹ [7,000] e riẹ), nọ o rehọ emaele udhoree (160) thabọ no okpẹwho São Paulo. O jọ enwene ologbo. Ọ ta nọ: “Mẹ kwa ruọ umuwou jọ nọ ifriji, etẹlẹvisiọno, hayo Itanẹte e rrọ họ. Ghele na, eware jọ e rrọ evaọ ighẹ na nọ me wo vẹre he, wọhọ ọgbọ ekakọ gbe ọrọ ibi-ire.” Nọ Bruno ọ jọ kugbe ukoko osese nọ o rrọ ẹwho na, ẹsiẹvo ẹkpoka o re fi emu, ame, gbe ebe ukoko na họ ẹkpa riẹ, ọ vẹ dhẹ imotosaikoro riẹ kpohọ iwhre nọ e kẹle oyena nyae ta usiuwoma. Ahwo buobu evaọ eria yena a ri yo usiuwoma na ẹdẹvo ho. Ọ ta nọ: “Me wo emọ-uwuhrẹ Ebaibol nọ i bu te 18 soso. Inwene nọ emọ-uwuhrẹ nana a bi ru evaọ uzuazọ rai o be kẹ omẹ evawere.” Ọ ta re inọ: “Obọnana, me wo oware nọ o kare omẹ vẹre na no, evawere nọ i re te ohwo nọ ọ rehọ iruo Uvie na karo. Mẹ hai wo evawere nana ha o hae jọnọ me le efe.” Ẹvẹ Bruno ọ sae jẹ rọ ko omariẹ evaọ obọ Guapiara? Avọ ovao ohwohwẹ ọ ta nọ: “Me re wuhrẹ ahwo epanọ a re kporo agita.” Ọ nwane nya siọ ole ba no riẹriẹriẹ hẹ.

“MẸ TẸ NWANE DAJI”

Mariana (5), nọ ọ rrọ ikpe udhegbọ enẹna ọ rẹriẹ ovao dhe use-abọ ovona wọhọ Bruno. Ọ jọ elọya, rekọ dede nọ iruo na e jẹ kẹe igho buobu, o je wo uvi evawere evaọ uzuazọ họ. Ọ ta nọ: “O jọ omẹ oma inọ ‘ofou gheghe me je le.’” (Ọtausi. 1:17) Inievo buobu e tuduhọ iẹe awọ inọ jọ o ru iruo ọkobaro. Nọ o roro kpahe iẹe no, Mariana avọ egbẹnyusu  riẹ, Bianca (6), Caroline (7), gbe Juliana (8), a tẹ kwa kpohọ Barra do Bugres, ẹwho jọ nọ ọ kẹle Bolivia nọ o rehọ emaele idu buobu thabọ no oria nọ a be rria re a nyai fi obọ họ kẹ ukoko jọ. Eme ọ via nọ a te obei?

Mariana ọ ta nọ: “Emerae esa me wo họ iroro inọ mẹ rẹ jọ obei. Rekọ evaọ etoke emerae esa yena me wo emọ-uwuhrẹ Ebaibol nọ i bu te 15 soso! Yọ emọ-uwuhrẹ Ebaibol nana a gbẹ gwọlọ obufihọ re a sai wo ẹnyaharo evaọ uzẹme na. Fikiere, mẹ sae gbaudu ta kẹ ai nọ me bi zihe kpo ho. Mẹ tẹ nwane daji.” Yọ ere inievo-emetẹ esa nọ i kiọkọ a ru re. Kọ iruo ọkobaro nana nọ Mariana o muhọ na o wha uvi evawere sei evaọ uzuazọ? Ọ ta nọ: “Eva e be were omẹ inọ Jihova ọ be rọ omẹ fi obọ họ kẹ ahwo nwene uzuazọ rai wowoma. O rrọ erere k’omẹ inọ mẹ be rọ oke gbe ẹgba mẹ ru oware nọ o rẹ kẹ uvi evawere.” Caroline ọ ta epanọ o jarai inievo-emetẹ ene na oma inọ: “Nọ me te kiẹzẹ evaọ aso, udu u re te omẹ otọ avọ evevọwẹ keme mẹ be rọ oke mẹ kpobi ru iruo Uvie na. Oware nọ o mae rrọ omẹ oja kpobi họ epanọ me re ro fi obọ họ kẹ emọ-uwuhrẹ Ebaibol mẹ. O rẹ kẹ evawere gaga nọ whọ tẹ be ruẹ ẹnyaharo emọ-uwuhrẹ Ebaibol ra. Mẹ be ruẹ orugba ẹme nana evaọ uzuazọ mẹ inọ: ‘Jawo, re whọ ruẹ nọ ỌNOWO na o woma!’”—Ol. 34:8.

Avro ọ riẹ hẹ, eva e be were Jihova gaga nọ ọ be ruẹ izoge emetẹ gbe emezae buobu evaọ akpọ na soso nọ a be rọ unevaze fialoma via kẹ iruo usiuwoma ota Uvie na evaọ eria nọ i siomano. (Ol. 110:3; Itẹ 27:11) Inievo nana nọ e fialoma via na a be reawere eghale Jihova.—Itẹ 10:22.

[Ẹkpẹti/Uwoho nọ e rrọ ẹwẹ-obe avọ 5]

“Oware Ovo O Kare Omai Hi”

Okenọ João Paulo avọ aye riẹ, Noemi a gwọlọ nọ a rẹ kwa kpohọ ẹkwotọ nọ a jọ gwọlọ iwhowho-uvie, eme jọ nọ a ta kẹ ae e kẹ rai uduotahawọ họ. Inievo jọ dede evaọ ukoko na a jẹ ta nọ: “Ẹwho ọsese nọ wha be gwọlọ kwa nya na o sai fi uvuhu họ owhai oma.” “Fikieme wha be rọ kwa? Eware buobu e riẹ nọ wha rẹ sai ru evaọ ẹkwotọ ukoko mai.” João Paulo ọ ta nọ: “O lọhọ tere he re ma kru udu ga ghelọ eme elọhoma itieye nọ ahwo nọ a wo emamọ eva kpahe omai a be ta.” Rekọ, anwọ ikpe jọ ze na nọ a rọ rrọ ẹkwotọ na, eva e be were João Paulo avọ Noemi inọ a ru lele omaa rai nọ a rọ kwa kpohọ ẹkwotọ nọ ẹgwọlọ ọ rrọ kẹ iwhowho-uvie. João Paulo ọ ta nọ: “Anwẹnọ mẹ avọ aye mẹ ma rọ rrọ obonẹ na, oware ovo o re kare omai hi. Ma tube wo eware nọ i gine wuzou enẹna vi epanọ o jọ vẹre.” Noemi o fibae nọ: “Omodawọ mai o jọ uvrẹvru hu.”

Re ohwo ọ sae kuọ omariẹ evaọ ẹwho ọsese o rrọ oware use-abọ. Ẹvẹ inievo nọ e kwa kpohọ ekwotọ nọ i siomano a be sae rọ ruẹ ugho nọ a be rọ rẹrote omarai? Ẹkwoma eroro kpahe oware jọ nọ a rẹ sai ru. Ejọ i re wuhrẹ ahwo ẹvẹrẹ Oyibo hayo ẹvẹrẹ ọfa, efa i re wuhrẹ emọ isukulu eware isukulu rai, efa i re ko iwu, hayo ralọ iwou ahwo, hayo oware ofa kpobi nọ a rẹ sae rọ omoke jọ ru re a sai wo ugho. Eme inievo kpobi nọ e kwa kpohọ eria nọ ẹgwọlọ ọ mai rrọ kẹ iwhowho-uvie a ruẹ vuhumu no? A vuhumu inọ oghale nọ u bi te ai o rro vi use-abọ kpobi nọ a rẹriẹ ovao dhe.

[Ẹkpẹti/Uwoho nọ e rrọ ẹwẹ-obe avọ 6]

Ẹro Ahwo Uviuwou Ohwo nọ O re Vo Ohwo

Tiago ọ ta nọ: “Nọ mẹ nwani te ukoko okpokpọ na no, mẹ tẹ jọ ọkọkora. Iwhowho-uvie nọ e jọ ẹwho na a bu hu yọ oware aruọzaha omaweromẹ ọvuọvo ọ jariẹ hẹ. Ẹro ahwo mẹ o te mu omẹ họ evo. Mẹ tẹ ruẹ nọ u fo re me ru oware jọ nọ o rẹ kẹ omẹ omosasọ. Fikiere me te muọ oma họ ẹdawọ re mẹ riẹ inievo nọ e rrọ ukoko na ziezi, yọ onana u gine fi obọ họ. Me mu egbẹnyusu ekpokpọ, yọ u kri hi, me te muọ eva họ ẹwere, ọkora ọ gbẹ jọ omẹ oma ha.”

[Uwoho nọ o rrọ ẹwẹ-obe avọ 3]

Noemi avọ João Paulo, obọ Ascurra, Santa Catarina