Jọ Ee Ra O Jọ ee
Jọ Ee Ra O Jọ ee
“Ru re ẹme ra ọjọ, ‘E’, ‘e’, ‘Ijo’, ‘ijo.’”—MAT. 5:37.
DAOMA SỌ WHỌ SAE K’UYO ENỌ NANA:
Eme Jesu ọ ta kpahe iyei-iduwo?
Ẹvẹ Jesu ọ rọ rrọ emamọ oriruo ohwo nọ Ee riẹ ọ jọ Ee?
Abọ sa-sa vẹ evaọ uzuazọ o jọ wuzou inọ Ee mai o rẹ jọ Ee?
1. Eme Jesu ọ ta kpahe iyei-iduwo, kọ fikieme?
ORRỌ ọgbahọ kẹ Ileleikristi uzẹme he re a hai duwu iyei. Onana o rrọ ere keme a bi ru lele ẹme Jesu nọ ọ ta nọ: ‘Ru re ẹme ra Ee ọ jọ Ee, Ijo, ijo.’ Otọ ẹme Jesu na họ, u fo nọ ohwo o re ru lele ẹme riẹ. Taure Jesu ọ tẹ te ta ẹme yena, ọ kake ta nọ: “Whọ bọwo ehao vievie he.” Ọ ta ẹme nana jẹ rọ whaha uruemu jọ nọ ahwo buobu a wo oke yena, a jẹ hai duwu iyei evaọ omoware kpobi, yọ a re tube ru oware nọ a ta ha. Fikinọ ahwo otiọye na a re duwu iyei evaọ oware kpobi ro dhesẹ nọ uzẹme a be ta ukpenọ a rẹ ta nọ Ee hayo Ijo ọvo, a jẹ hae rọ ere dhesẹ nọ a kare evaifihọ gbe nnọ a be rọ aro kele uruemu “oyoma na.”—Se Matiu 5:33-37.
2. Fikieme o gbẹ rọ thọ họ re a duwu iyei otiẹse? Ru ei vẹ.
2 Kọ ẹme Jesu na u dhesẹ nọ a re duwu iyei vievie he? O rrọ ere he. Wọhọ epanọ ma wuhrẹ evaọ uzoẹme nọ o vrẹ na, Jihova Ọghẹnẹ gbe Abraham odibo Riẹ nọ o kiẹrẹe a duwu iyei. Ofariẹ, Uzi Ọghẹnẹ o gwọlọ nọ a re duwu iyei nọ a tẹ gwọlọ ku oghẹrẹ ẹwhọ jọ họ evaọ oke nọ u kpemu. (Ọny. 22:10, 11; Ik. 5:21, 22) Fikiere, Oleleikristi ọ rẹ sai duwu iyei rọ ta uzẹme evaọ ẹdhọ okọto. Oleleikristi ọ rẹ sai je duwu iyei ẹsejọ rọ ta uzẹme hayo ku ẹbẹbe họ nọ o tẹ gwọlọ ere. Jesu ọ ta uzẹme kẹ ogbẹgwae Sanhẹdrin na okenọ olori izerẹ na ọ ta kẹe nọ jọ ọ rehọ odẹ Ọghẹnẹ duwu iyei. (Mat. 26:63, 64, NW) Dede na, o roja ha re Jesu o duwu iyei kẹ ohwo jọ. O make rrọ ere na, Jesu ọ jẹ hae rọ edhere obọdẹ nana mu ẹme riẹ họ ro fi ẹgba họ uzẹme oware nọ ọ be ta: “Uzẹme, uzẹme, mẹ ta kẹ owhai.” (Jọn 1:51; 13:16, 20, 21, 38) Joma ruẹ eware efa nọ ma re sai wuhrẹ no oriruo Jesu, Pọl gbe amọfa ze, enọ Ee rai e jọ Ee.
JESU—ORIRUO NỌ Ọ MAI WOMA
3. Eme Jesu ọ ya eyaa riẹ kẹ Ọghẹnẹ evaọ olẹ, kọ eme Ọsẹ obọ odhiwu riẹ o ru kpahe onana?
3“Rri, mẹ ze ti ru o rọ eva ra, O Ọghẹnẹ.” (Hib. 10:7) Jesu ọ rehọ ẹkwoma ẹme nana nọ ọ vọ avọ otofa na dhesẹ nọ ọ rehọ oma riẹ kẹ Ọghẹnẹ, re o ru eware kpobi nọ a ta kpahe Ubi nọ a ya eyaa riẹ na gba, gbe uvẹ nọ ọ te kẹ Setan re ọ “royẹe ithihrawọ.” (Emu. 3:15) Ohwo-akpọ ọvuọvo ọ re roma kẹ ewha-iruo ilogbo itiena ẹdẹvo ho. Jihova ọ ta ẹme no obọ odhiwu ze ro dhesẹ evaifihọ nọ o wo kpahe Ọmọ riẹ, dede nọ Jesu o duwu iyei hi inọ o ti ru lele ẹme riẹ.—Luk 3:21, 22.
4. Ẹvẹ Jesu ọ daoma te re Ee riẹ o jọ Ee?
4 Jesu o re ru lele oware kpobi nọ ọ ta, Ee riẹ e jọ Ee. Ọ kẹ uvẹ hẹ re oware jọ u si iroro riẹ no iruo nọ Ọsẹ riẹ ọ kẹ riẹ inọ ọ ta usiuwoma Uvie na je ru re ahwo nọ Ọsẹ na o si a jọ ilele riẹ. (Jọn 6:44) Ebaibol o dhesẹ epanọ Jesu o ru lele ewha-iruo riẹ te, inọ: “Utho eya kpobi nọ Ọghẹnẹ ọ ya, eva riẹ a je ru ai gba.” (2 Kọr. 1:20) Evaọ uzẹme, Jesu họ oriruo nọ ọ mai woma ọrọ ohwo nọ o ru lele eyaa riẹ kẹ Ọsẹ riẹ. Obọnana, joma ta kpahe ohwo jọ nọ ọ daoma gaga rọ aro kele Jesu.
PỌL—ỌZAE NỌ O RU LELE ẸME RIẸ
5. Oriruo vẹ Pọl ukọ na o fihotọ k’omai?
5“Ovẹ me re ruẹ, Ọnowo?” (Iruẹru 22:10) Pọl nọ a jẹ hai se Sọl oke yena ọ kpahe ẹme yena kẹ Olori na Jesu Kristi, ọnọ ọ romavia kẹe evaọ eruẹaruẹ jẹ ta kẹe inọ ọ siọ Ileleikristi ba ekpokpo. Fiki oware nana nọ o via na, Sọl o te kurẹriẹ, họ-ame, jẹ rehọ owha-iruo obọdẹ nọ a kẹ riẹ re o se isẹri kpahe Jesu evaọ erẹwho na. Nọ umuo oke yena vrẹ, Pọl o te mu Jesu họ ese “Ọnowo” riẹ, jẹ roma kpotọ kẹe wọhọ Ọnowo riẹ bẹsenọ o ro ku iruo otọakpọ riẹ họ. (Iruẹru 22:6-16; 2 Kọr. 4:5; 2 Tim. 4:8) Pọl o ru wọhọ amọfa ha, enọ Jesu ọ ta kpahe nọ: “Fikieme wha je bi se omẹ ‘Olori, Olori,’ yọ wha ru onọ mẹ ta na ha?” (Luk 6:46) Ẹhẹ, Jesu o rẹro nọ ahwo kpobi nọ a rehọ e riẹ wọhọ Olori rai, Ee rai ọ rẹ jọ Ee wọhọ epanọ Pọl ukọ na o ru na.
6, 7. (a) Fikieme Pọl o ro nwene omaa riẹ nọ o je ti ro zihe kpohọ Kọrint, kọ fikieme u gbe ro fo ho re otu nọ ọ jẹ wọso Pọl a nọe unu kpahe epanọ o gbe ro koko eyaa riẹ hẹ? (b) Kọ ẹvẹ u fo nọ ma re rri esẹro nọ a ro mu evaọ ukoko na?
6 Pọl ọ rehọ ọwhọ ta usiuwoma Uvie na nya ekwotọ Esia Minor duwu jẹ ruọ ẹkwotọ Europe, ọ jẹ rehọ ikoko buobu mu je zihe bru inievo na. Evaọ okejọ, ọ ruẹ nọ u fo re o duwu iyei rọ kẹ imuẹro oware nọ o kere se inievo na. (Gal. 1:20) Evaọ okejọ nọ otujọ evaọ Kọrint a bọwo Pọl ota inọ ọ be ta uzẹme he, o kere ẹkẹ unu riẹ inọ: ‘Epanọ Ọghẹnẹ ọ vọ avọ ẹrẹreokie, ẹme mai rọkẹ owhai ọ rẹ jọ Ee re o jọ Ijo ho.’ (2 Kọr. 1:18) Okenọ Pọl o ro kere ẹme yena yọ o no Ẹfẹsọs no be nya Masidonia vrẹ kpohọ Kọrint. Ọ ma omaa vẹre inọ ọ te wariẹ zihe kpohọ obọ Kọrint taure o te ti te Masidonia. (2 Kọr. 1:15, 16) Rekọ wọhọ epanọ o rẹ jọ kẹ esẹro ọnyawariẹ nẹnẹ, omaa iweze rai u re nwene ẹsejọ. Orọnọ fiki oriobọ hayo eware nọ i tulo ho a re ro nwene omaa iweze rai hi, rekọ fiki eware idudhe nọ e rẹ sae romavia ẹsejọ. Oware nọ o lẹliẹ Pọl raha oke taure ọ tẹ te wariẹ weze bru inievo obọ Kọrint na o jọ rọkẹ ewoma rai. Ẹvẹ o rọ rrọ ere?
7 Nọ ọ ma omaa riẹ no, Pọl o te yo inọ ẹwhọ ọ rrọ udevie inievo obọ Kọrint yọ a be kuvẹ kẹ ẹnwae-obro evaọ udevie rai. (1 Kọr. 1:11; 5:1) Re ọ ruẹse kpọ eware vi, o te kere ileta ọsosuọ riẹ se inievo obọ Kọrint rọ kẹ ae ohrẹ. Kẹsena, ukpenọ o re no Ẹfẹsọs kpohọ Kọrint ovavo, Pọl ọ tẹ jiroro nọ ọ rẹ kẹ inievo Ileleikristi na oke nọ a re ro ru lele ọkpọvio nọ o kere se ai na, kẹsena uduotahawọ nọ ọ te kẹ ae evaọ iweze riẹ u ve wo ẹgba ziezi. Pọl ọ tẹ vuẹ ae oware nọ o soriẹ nọ o ro nwene omaa iweze riẹ evaọ ileta avivẹ nọ o kere se ai inọ: “Me se Ọghẹnẹ re o se isẹi kpahe omẹ, re wha se awa bẹ ruọ oye mẹ gbẹ ze obọ Kọrint he.” (2 Kọr. 1:23) U fo ho re ma jọ wọhọ ahwo nọ a jẹ hae rehọ eme rai wọso Pọl; ukpoye joma rọ adhẹẹ odidi kẹ inievo nọ a ro mu esẹro evaọ ukoko na. Uzẹme riẹ họ, u fo re ma rọ aro kele oriruo Pọl wọhọ epanọ ọyomariẹ ọ rọ aro kele oriruo Jesu na.—1 Kọr. 11:1; Hib. 13:7.
IRIRUO IWOMA EFA
8. Emamọ oriruo vẹ Rebeka o fihotọ k’omai?
8“Me re lele ie kpo.” (Emu. 24:58) Rebeka ọ kpahe ẹme nana kẹ oni riẹ, gbe inievo emezae riẹ evaọ okenọ a nọe sọ o ro riẹ inọ o re lele erara nọ i weze bru rai ze kpo ẹdẹ yena re ọ te jọ aye Aiziki, ọmọ Abraham, yọ ugbo nọ a no ze u thabọ te emaele egba isoi (500). (Emu. 24:50-58) Ee Rebeka o jọ Ee, yọ ọ jọ emamọ aye nọ o wo ozodhẹ Ọghẹnẹ. Evaọ edẹ uzuazọ riẹ nọ i kiọkọ kpobi, iwou-udhu ọ rria wọhọ ọrara evaọ Ẹkwotọ Eyaa na. Fiki ẹrọwọ riẹ, o wo uvẹ-ọghọ ulogbo nọ ọ rọ jọ oniode jọ ọrọ Jesu Kristi, ubi nọ a ya eyaa riẹ na.—Hib. 11:9, 13.
9. Ẹvẹ Ijo Rut o rọ jọ Ijo?
9“Ijo, ma re lele owhẹ kpo bru ahwo ra.” (Rut 1:10) Eya-uku obọ Moab na, Rut avọ Ọpa a ta ẹme yena kẹ Naomi oniọrọ rai nọ ọ rrọ aye-uku re evaọ okenọ o je zihe no Moab kpohọ Bẹtlẹhẹm. Fikinọ Naomi ọ be tẹzẹ ae inọ a zihe kpohọ ọvuọ ẹwho riẹ, Ọpa o te zihe bru ahwo riẹ. Rekọ Ijo Rut o jọ Ijo. (Se Rut 1:16, 17.) Ọ dadamu usu riẹ kugbe Naomi nyasiọ ahwo riẹ gbe egagọ erue obọ Moab ba. Ọ jọ ohwo nọ o tilẹmu egagọ Jihova jẹ rọ ere wo uvẹ-ọghọ ulogbo nọ ọ rọ jọ omọvo eyae isoi nọ Matiu ọ fodẹ evaọ uyẹ Jesu Kristi.—Mat. 1:1, 3, 5, 6, 16.
10. Fikieme Aizaya ọ rọ rrọ emamọ oriruo k’omai?
10“Mẹ na! Vi omẹ.” (Aiz. 6:8) Taure ọ tẹ te ta ẹme ọnana, Aizaya ọ jọ eruẹaruẹ igbunu ruẹ Jihova nọ ọ keria agbara Uvie riẹ evaọ ehru etẹmpol Izrẹl. Nọ o bi rri oware igbunu nana, Aizaya o te yo urru Jihova nọ ọ ta nọ: “Ono me re viẹ, ono ọ rẹ nya kẹ omai?” Onana o jọ uzizie nọ Jihova ọ be rọ gwọlọ ohwo nọ ọ rẹ wha ovuẹ riẹ se idibo riẹ nọ e be ghẹmeeyo. Aizaya o ru ẹme riẹ gba, Ee riẹ o jọ Ee. O ru iruo ọruẹaro jẹ vuẹ ahwo ẹdhoguo Ọghẹnẹ gbe eyaa Riẹ kpahe epanọ a ti ro zihe egagọ uzẹme ze, yọ o ru onana vrẹ ikpe udhuvẹ gbe ezeza.
11. (a) Fikieme u ro wuzou gaga re Ee mai o jọ Ee? (b) Amono jọ Ee rai o jọ Ee he nọ o rrọ unuovẹvẹ k’omai?
11 Fikieme Jihova o ro ru re a kere iriruo yena fihọ Ebaibol na k’omai? Kọ fikieme ẹme Ee mai o jọ Ee na o rọ rrọ okpẹme? Ebaibol ọ vẹvẹ omai unu inọ ohwo nọ ọ rẹ “raha ọvọ” ọ rrọ usu ahwo nọ “a fo uwhu.” (Rom 1:31, 32) Fẹro ovie Ijipti, Zẹdikaya ovie Juda, gbe Ananias avọ Safaira a rrọ usu ahwo nọ Ebaibol ọ ta nọ Ee rai o jọ Ee he. Okpẹtu o te rai yọ oyena o rrọ unuovẹvẹ k’omai.—Ọny. 9:27, 28, 34, 35; Izik. 17:13-15, 19, 20; Iruẹru 5:1-10.
12. Eme o re fi obọ họ k’omai nọ Ee mai o sae rọ jọ Ee?
12 Fikinọ ma be rria “edẹ urere,” ahwo nọ “a re koko eya ha,” gbe ahwo nọ “a rẹ yọrọ oghẹrẹ egagọ a vẹ vro ogaga nọ o rọ eva riẹ” a wariẹ omai họ. (2 Tim. 3:1-5) Ma rẹ daoma kpobi re ma siomano ahwo yoma itieye. Ukpenọ ma ku usu kugbe ai, joma hai kuomagbe ahwo nọ a be daoma ẹsikpobi re a ruẹ nọ Ee rai yọ Ee.—Hib. 10:24, 25.
EE RA NỌ O MAI WUZOU
13. Evaọ Ee kpobi nọ Oleleikristi o re yo, evẹ e mai wuzou?
13 Eyaa nọ e mai wuzou nọ ohwo ọ rẹ sae ya họ, eyaa nọ i w’obọ kugbe omauromudhe riẹ kẹ Ọghẹnẹ. U wo etoke esa jọ nọ i wuzou gaga nọ ahwo nọ a gwọlọ rọ uzuazọ rai kpobi kẹ egagọ Ọghẹnẹ re a zihe ruọ ilele Jesu a ro wo uvẹ-ọghọ nọ a rẹ rọ ta nọ Ee rọkẹ oware nọ o rrọ udu rai. (Mat. 16:24) Nọ ekpako ivẹ a tẹ be kiẹ ohwo nọ ọ gwọlọ jọ owhowho-uvie nọ ọ re họ-ame he riwi, a rẹ nọe nọ, “Kọ whọ ginẹ gwọlọ jọ omọvo Isẹri Jihova?” Uwhremu na, nọ ohwo na o te wo ẹnyaharo ziezi evaọ usu riẹ kugbe Ọghẹnẹ no jẹ gwọlọ nọ ọ rẹ họ-ame, ekpako na a rẹ wariẹ sei keria a vẹ nọe nọ, “Kọ whọ rehọ oma ra mudhe kẹ Jihova no evaọ olẹ?” Ukuhọ riẹ, evaọ ẹdẹ ame-ọhọ na, a vẹ nọ ohwo nọ ọ gwọlọ họ-ame na inọ, “Fiki idhe Jesu Kristi, kọ who kurẹriẹ no izieraha ra no jẹ roma mudhe kẹ Jihova no re who ru oreva riẹ?” Ohwo na ọ vẹ jọ iraro ogbotu nọ i kokohọ na yo inọ Ee rọkẹ eyaa riẹ inọ ọ rẹ gọ Ọghẹnẹ bẹdẹ bẹdẹ.
14. Enọ jọ vẹ u fo nọ ma rẹ rọ kiẹ omamai riwi n’oke t’oke?
14 O tẹ make rọnọ whọ họ-ame obọ hayo whọ rrọ ukoko na kri no, u fo nọ whọ hae rọ enọ nana kiẹ omara riwi n’oke t’oke: ‘Kọ mẹ be rọ aro kele Jesu Kristi ru re Ee mẹ nọ e mai wuzou e hae jọ Ee ẹsikpobi? Kọ mẹ be ruabọhọ yoẹme kẹ Jesu ẹkwoma iruo usiuwoma Uvie na gbe ilele-iruo nọ mẹ be rọ karo evaọ uzuazọ mẹ?’—Se 2 Ahwo Kọrint 13:5.
15. Abọ sa-sa vẹ evaọ uzuazọ o jọ wuzou inọ Ee mai o rẹ jọ Ee?
15 Re u dhesẹ nọ ma be rria te eyaa omauromudhe mai, o gwọlọ nọ Ee mai o rẹ jọ Ee re evaọ eware efa nọ i wuzou. Wọhọ oriruo: Kọ whọ rọo no? O tẹ rrọ ere, rehọ adhẹẹ kẹ eyaa nọ whọ ya inọ who re you je tete ọrivẹ-orọo ra. Kọ whọ whobọhọ obe iruo jọ nọ a k’owhẹ hayo kere eme fihọ efọmo ọrọ uvẹ iruo ukoko na jọ? O tẹ rrọ ere, ru lele owha-iruo nọ whọ rọwo fihọ re who ru eyaa ra gba. Kọ whọ rọwo kẹ uzizie owhrori jọ inọ whọ te nyae re emu evaọ uwou riẹ? Kọ ẹvẹ otẹrọnọ omọfa nọ ọ be ruẹ re kiọkọ ọ wariẹ zizie owhẹ fihọ oke ovona? Whọ kpairoro vrẹ uzizie ọsosuọ na ha fikinọ whọ ruẹ onọ u woma vi oyena. Kọ whọ ya eyaa kẹ ohwo jọ nọ whọ nyaku evaọ usiuwoma ota n’uwou ruọ uwou inọ who ti zihe bru ei? O tẹ rrọ ere, daoma kpobi re whọ ruẹ nọ Ee ra yọ Ee, Jihova ọ te ghale iruo odibọgba ra.—Se Luk 16:10.
JOMA WO ERERE NO OBỌ OZERẸ OKPEHRU GBE OVIE MAI ZE
16. Otẹrọnọ ma gbẹ sai ru ẹme nọ ma ta gba ha, eme u fo nọ ma re ru?
16 Ebaibol na ọ ta nọ fikinọ ma gba ha, “idhere buobu ma bi ro ru thọ,” maero evaọ ẹmeọta mai. (Jem. 3:2) Eme u fo nọ ma re ru nọ ma tẹ ta ẹme jọ nọ ma sai rugba ha? Evaọ izi nọ Ọghẹnẹ o jie kẹ emọ Izrẹl, ọruẹrẹfihotọ ohrọ-oriọ o jọ rọkẹ ohwo nọ ọ rehọ igbenu riẹ ta thọ. (Izerẹ 5:4-7, 11) Ọruẹrẹfihotọ oyoyou ọ rọ rọkẹ Ileleikristi nọ e thuzi utioye nẹnẹ re. Ma tẹ ta ugogo uzioraha mai na via kẹ Jihova, ọ te rọ ẹkwoma Ozerẹ Okpehru na, Jesu Kristi re ohrọ mai jẹ rọ vrẹ omai. (1 Jọn 2:1, 2) Dede na, re ma sai wo aruoriwo Ọghẹnẹ, o gwọlọ nọ ma rẹ whaha uzioraha na jẹ rọ uruemu mai dhesẹ nọ ma kurẹriẹ, ma vẹ jẹ daoma kpọ oware kpobi nọ ma rọ igbenu mai ta thọ vi. (Itẹ 6:2, 3) Rekọ, o rẹ mai woma re ma rorote re ma tẹ te ya eyaa ukpenọ ma rẹ ya eyaa nọ ma rẹ sai koko ho.—Se Ọtausiuwoma Na 5:2.
17, 18. Eware iwoma vẹ e rrọ obaro hẹrẹ ahwo kpobi nọ a be daoma re Ee rai e jọ Ee?
17 Eware iwoma buobu e rrọ obaro hẹrẹ idibo Jihova kpobi nọ e be daoma re Ee rai e jọ Ee. Rọkẹ ahwo idu udhuhrẹ gbe ene (144,000) nọ a rọ ẹzi wholo na, a ti wo uzuazọ sebaewhuo evaọ obọ odhiwu “a ve ti lele Kristi re uvie na odu ikpe.” (Evia. 20:6) Rọkẹ ima ahwo buobu efa nọ a sai kele he, a ti wo erere no esuo Kristi ze evaọ aparadase otọakpọ. A ti fi obọ họ kẹ ae te ẹgbagba evaọ ugboma gbe iroro.—Evia. 21:3-5.
18 Nọ ma te kru ẹrọwọ mai evaọ etoke odawọ urere nọ o te romavia evaọ ekuhọ esuo Odu Ikpe Kristi na, ẹjiroro ọvuọvo ọ te gbẹ jariẹ hẹ nọ ma rẹ rọ vro ẹme ohwo jọ. (Evia. 20:7-10) Ee kpobi ọ rẹ te jọ Ee, Ijo kpobi ọ vẹ te jọ Ijo. Keme ohwo kpobi nọ ọ te jariẹ oke yena ọ te rọ aro kele Jihova Ọsẹ obọ odhiwu mai, ‘Ọghẹnẹ uzẹme na,’ gbagba.—Ol. 31:5.
[Enọ Uwuhrẹ]
[Uwoho nọ o rrọ ẹwẹ-obe avọ 28]
No oke ame-ọhọ riẹ rite oke uwhu, Jesu o ru eyaa nọ ọ ya kẹ Ọsẹ riẹ gba
[Uwoho nọ o rrọ ẹwẹ-obe avọ 30]
Kọ Ee nọ o mai wuzou nọ who yo na, who bi ru lele iei?
