Enọ Ahwo Nọ A S’ebe

Kọ ẹme ọ Jesu nọ ọ rrọ obe Matiu 19:10-12 na u dhesẹ nọ ahwo nọ a salọ nọ a be rọo ho a wo okẹ seba-ẹrọo evaọ edhere igbunu jọ?

▪ Joma ta kpahe oware nọ o wọ Jesu ta ẹme yena. Nọ ahwo Farisi a wha ẹme orọo nọ a rẹ fa bru Jesu ze, Jesu ọ tẹ ta kẹ ae kpahe oghẹrẹ nọ Jihova o rri orọo. Dede nọ Uzi Mosis na o kuvẹ inọ ọzae ọ sai si obe orọo-ofa nọ ọ tẹ jọ obọ aye riẹ “ruẹ egbegbe” jọ, orọnikọ ere o jọ no emuhọ ze he. (Izie. 24:1, 2) Kẹsena Jesu ọ tẹ ta nọ: “Kohwo kohwo nọ o siobọno aye riẹ o gbẹrọ fiki ẹnwae-obro ho, ọ jẹ rehọ ọfa, o bruẹnwae.”—Mat. 19:3-9.

Nọ ilele riẹ a yo onana, a tẹ ta nọ: “Ẹme ọzae avọ aye o tẹrọ ere u gbe fo re a rọwo ho.” Jesu ọ tẹ kpahe kẹ ae nọ: “Ahwo kpobi a sae rehọ ẹme ọnana ha, ajokpa enọ a rehọ e riẹ kẹ ọvo. Keme ewharọ jọ e rọ nọ ini rai i yẹ no eva ze ere, ewharọ jọ e rọ nọ ahwo a whare, ejọ e rọ nọ e whare oma rai fiki uvie odhiwu. Ọnọ ọ sae rehọ [okẹ na], ọ rehọ.”—Mat. 19:10-12.

Ahwo nọ a ginẹ rrọ ewharọ yọ enọ a yẹ ere hayo enọ i zihe ruọ ere fiki omonwa hayo enọ a whare. Rekọ ahwo jọ a riẹ nọ ae ọvo a salọ inọ a rẹ rria wọhọ ewharọ. Dede nọ otu nana a sae rọo, a salọ nọ a rẹ rọo ho “fiki uvie odhiwu.” A gba riẹ mu inọ a rẹ seba ẹrọo re a rọ omarai kpobi kẹ iruẹru Uvie na wọhọ epanọ Jesu o ru. Orọnikọ a yẹ ahwo nana avọ okẹ seba-ẹrọo ho yọ orọnikọ a kẹ rai okẹ nana ha. Ae ọvo a gba riẹ mu inọ a rẹ jọ ere.

Pọl ukọ na o fiba ẹme nọ Jesu ọ ta na inọ, Ileleikristi kpobi, te enọ e rọo gbe enọ e rọo ho, a sae gọ Ọghẹnẹ ziezi. Rekọ, ọnọ ọ rọo ho, nọ ọ “ma onana kiete evaọ eva riẹ” o rẹ mai ‘woma kẹ.’ Fikieme? Fikinọ ahwo nọ a rọo no a rẹ rehọ abọjọ oke gbe ẹgba rai ru erivẹ-orọo rai eva were jẹ rẹrote ai. Rekọ, Ileleikristi nọ e rọo ho a rẹ sae rehọ oke rai kpobi kẹ iruo Olori na ababọ oware ovuovo nọ o rẹ rehọ iroro rai. A rri uvẹ nana wọhọ “okẹ” nọ u no obọ Ọghẹnẹ ze.—1 Kọr. 7:7, 32-38.

Fikiere, Ebaibol na ọ ta nọ Oleleikristi ọvuọvo o wo okẹ seba-ẹrọo evaọ edhere igbunu jọ họ. Ukpoye, ọye ọvo ọ rẹ gbaemu inọ ọ rẹ seba ẹrọo re ọ sae rọ oke riẹ kpobi kẹ iruo Uvie na ababọ uvumọ oware nọ o rẹ rehọ iroro riẹ. Ahwo buobu nẹnẹ a jọ udu rai gbaemu inọ a rẹ seba ẹrọo fiki ẹjiroro nana, yọ u fo nọ amọfa a rẹ tuduhọ ae awọ evaọ ọtamuo nana nọ a ru na.