Otu nọ U Woma kẹ A Kẹ Enọ O Kare

EVAỌ ukpe 49 C.E., Pita, Jemis, gbe Jọn nọ a jọ “uvi ahwo nọ i dikihẹ,” a kẹ Pọl ukọ na avọ Banabas ibe oruiruo riẹ owha-iruo jọ. Nọ a rrọ iruo usiuwoma ota na, a re wo Ileleikristi nọ ọbẹwẹ ọ rrọ oma họ iroro. (Gal. 2:9, 10) Ẹvẹ a ro ru iruo nana nọ a kẹ rai na?

Ileta nọ Pọl o kere u dhesẹ epanọ o se iruo nana gboja te. Wọhọ oriruo, o kere se Ileleikristi obọ Kọrint nọ: ‘Kpahọ azọhọ ọjẹ rọ kẹ erezi na, wọhọ epanọ me dhesẹ rọ kẹ ikoko nọ e rọ obọ Galesha, ere wha re ru re. Ẹdẹ ọsosuọ ẹkpoka, jọ kohwo kohwo ọ rehọ oware jọ kpahe, ọ ruẹrẹ iẹe kpahe obei wọhọ epanọ o wo, re a se azọhọ ba ẹjẹ oke nọ mẹ nyaze. Oke nọ mẹ nyaze, mẹ vẹ rọ ileta kẹ enọ wha sanọ avọ ekẹ rai kpobọ Jerusalẹm.’—1 Kọr. 16:1-3.

Evaọ ileta avivẹ nọ Pọl o kere se inievo obọ Kọrint, ọ wariẹ fodẹ ẹjiroro nọ a be rọ kẹ okẹ unevaze na. Ẹjiroro na họ “re o jọ ẹrẹrẹe, oke onana nọ o ro owhai oma ziezi na, wha kae onọ o kare rae.”—2 Kọr. 8:12-15.

Oke nọ Pọl o kere se Ileleikristi nọ e jọ obọ Rom evaọ ukpe 56 C.E., yọ a joma ku okẹ unevaze na họ no. Ọ ta nọ: “Me bi kpo obọ Jerusalem avọ oboufihọ rọ kẹ erezi na. Keme Masedonia avọ Akaya o were rai nọ a rẹ ko umuko ro se erezi nọ ọbẹwẹ ọ rọ oma obọ Jerusalem.” (Rom 15:25, 26) Pọl o ru iruo nọ a kẹ riẹ na gba keme okenọ ọ wariẹ te obọ Jerusalẹm no, nọ a jọ obei mu ei, ọ vuẹ Fẹliks, Ọba Rom inọ: ‘Mẹ nyaze re mẹ rọ eware ọghọ se orẹwho mẹ.’—Iruẹru 24:17.

Oghẹrẹ ẹzi nọ Ileleikristi ikpe-udhusoi ọsosuọ a wo u dhesẹ oma via evaọ ẹme nọ Pọl ọ ta kpahe inievo obọ Masidonia. Pọl ọ ta nọ “a be lẹ omai re [a] jọ obufihọ kẹ erezi na.” Pọl ọ tuduhọ inievo obọ Kọrint awọ inọ a rọ aro kele oriruo yena. Ọ ta nọ: “Ohwo o re ru wọhọ epanọ o roro evaọ eva riẹ, o jọ o rọ obọ okẹkẹ hẹ hayo ọgbahọ họ, keme Ọghẹnẹ o re you ohwo nọ ọ rẹ kẹ okẹ-evawere.” Eme ọ wọ ikoko na dhesẹ ẹzi ọghoruo otiọye? Orọnikọ fiki “obufihọ rọ kẹ ẹguọlọ ahwo Ọghẹnẹ ọvo ho, rekọ o be rehọ ajiri buobu rọ kẹ Ọghẹnẹ.” (2 Kọr. 8:4; 9:7, 12) Ọghoruo mai ọ rẹ sai ru ẹjiroro ọvona gba. Ababọ avro, Jihova Ọghẹnẹ ọ te ghale ẹzi owoma otiọye, oghale riẹ u re ru ohwo fe.—Itẹ 10:22.

 [Ẹkpẹti nọ o rrọ ẹwẹ-obe avọ 9]

IDHERE NỌ OTUJỌ A BI RO RU AZỌHỌ UNEVAZE KẸ IRUO AKPỌ-SOSO

Wọhọ epanọ o jọ evaọ oke Pọl ukọ na, ahwo buobu nẹnẹ a rẹ ruẹrẹ “oware jọ kpahe,” hayo ma omaa ugho nọ a re fihọ ẹkpẹti unevaze ukoko na nọ a kere fihọ nọ “Worldwide Work” (Iruo Akpọ-Soso). (1 Kọr. 16:2) Ikoko sa-sa a re vi ugho nana se uwou ogha Isẹri Jihova nọ o be rẹrote iruo usiuwoma ota orẹwho rai kamara kamara. Omomọvo ọ rẹ sai vi ugho unevaze se uwou ogha Isẹri Jihova nọ o rrọ orẹwho rai re. Re whọ sae riẹ epanọ who re ro ru onana, iviena se hayo kere se uwou ogha Isẹri Jihova nọ o rrọ orẹwho ra. Whọ rẹ sae ruẹ adrẹse uwou ogha nọ o rrọ orẹwho ra evaọ oria evuẹ Itanẹte na www.pr418.com. Oghẹrẹ sa-sa nọ whọ sai ro ru unevaze ena:

OKẸ NỌ A RẸ KẸ OVAVO

• Ugho, ivie gbe ifiare, hayo eware eghaghae efa.

• Kere ileta lele ugho hayo okẹ na ro dhesẹ nọ onana yọ okẹ unevaze.

OKẸ NỌ A KẸ OVAVO HO

• Ohwo ọ rẹ sae kẹ okẹ ugho avọ ẹjiroro inọ a re zihe iei kẹe evaọ okenọ ọ gwọlọ e riẹ.

• Kere ileta lele iei ro dhesẹ nọ onana yọ okẹ nọ whọ kẹ ovavo ho.

OMAA ỌGHORUO

U te no ugho gbe eware eghaghae nọ ohwo ọ sae rọ kẹ okẹ no, idhere efa e riẹ nọ a re ro ru azọhọ unevaze nọ a rẹ rọ wha iruo Uvie na haro evaọ akpọ-soso. Ejọ rai e rrọ obotọ na. Oghẹrẹ kpobi nọ whọ gwọlọ rọ kẹ okẹ ra, iviena kere se uwou ogha nọ o rrọ orẹwho ra sọ a rẹ sae rọ oghẹrẹ utioye kẹ okẹ. Nọ orọnọ izi erẹwho sa-sa i wo ohẹriẹ no ohwohwo na, u wuzou re whọ nọ mi eriẹ-izi nọ e rrọ orẹwho ra re whọ sae riẹ edhere nọ ọ mai woma nọ whọ rẹ rọ kẹ okẹ ra.

Insurance [Azọhọ kẹ Okpẹtu Idudhe]: Ahwo jọ a rẹ hwa igho fihọ ekọmpene Ishọranse n’oke t’oke re a te whu ekọmpene na e vẹ hwa unuigho nọ a ta mu kẹ ohwo nọ a kere nọ a hwa igho na kẹ. Ahwo jọ a rẹ sai kere inọ jọ a hwa igho na kẹ Watch Tower. Amọfa a rẹ sai je kere inọ jọ a hwa igho arutẹriọ rai kẹ Watch Tower.

Igho nọ A Fihọ Ebanke: Ahwo jọ a re kere inọ a te whu a hwa igho jọ nọ a wo fihọ ebanke hayo erere nọ o bi no igho rai jọ ze kẹ Watch Tower.

Stocks gbe Bonds: Ahwo jọ a rẹ jẹ igho fihọ ebanke, ekọmpene, hayo iruẹru egọmeti jọ nọ ebanke hayo ekọmpene itieye a re kugbe rọ thueki rai, a ve kere inọ a hwa erere nọ o ti te ai kẹ Watch Tower hayo a rẹ sae ta inọ a hwa erere rai kẹ Watch Tower nọ uwhu u te kpe ai.

Etọ Hayo Iwou: A rẹ sae zọhọ etọ hayo iwou nọ a rẹ sae zẹ; kpahe otọ nọ a bọ iwou fihọ no, ohwo ọ rẹ sae rehọ iwou na ru azọhọ unevaze kẹ ukoko na ọ vẹ nya siọ ofẹ nọ ọ gwọlọ rria ba bẹsenọ o re whu, o je whu no a vẹ rehọ uwou nọ ọ jẹ rria na kugbe.

Obe Uku-Oghale gbe Oware nọ A Rọ Kẹ Ohwo Kru: Ohwo ọ rẹ sai kere inọ o te whu no jọ a rehọ igho hayo ekwakwa riẹ jọ kẹ Watch Tower.

Rọkẹ evuẹ efa, whọ rẹ sae rehọ adrẹse nọ ọ rrọ obotọ na kere se Uwou Ogha Isẹri Jihova nọ o rrọ Nigeria hayo rehọ ifonu lele ai t’ẹme hayo kere se uwou ogha nọ o rrọ orẹwho ra.

JEHOVAH’S WITNESSES

P.M.B. 1090,

Benin City 300001,

Edo State, Nigeria.

Telephone: 07080662020