Iruẹru Mai Erọ Oke Nọ U Kpemu

“Ovuẹ nọ A re Ruẹ Ọkpọ Riẹ Ẹdẹvo Ho”

ẸDẸJỌ George Naish ọ ruẹ ire nọ a kwa kokohọ oria nọ a jẹ hai koko ekwakwa ẹmo họ evaọ etoke Ẹmo Akpọ Ọsosuọ evaọ ẹwho nọ a re se Saskatoon, Saskatchewan, obọ Canada. Nọ ọ ruẹ ire na nọ i kpehru te irula udhosa, ọ tẹ nọ inọ: “Kọ ire vẹ ena?” A tẹ ta kẹe nọ enana yọ ire nọ a rọ bọ eria nọ a jẹ hai fi oka họ rọkẹ egbaẹmo evaọ etoke ẹmo akpọ ọsosuọ. Brọda Naish ọ ta uwhremu na inọ: “Nọ me yo oware nọ a rehọ ire na ru, mẹ tẹ ruẹ nọ ma sae rọ ire nana bọ oria iredio. Enẹ ẹjiroro oria iredio nọ ma rẹ sae jọ whowho usiuwoma na o rọ romavia.” Nọ ukpe ovo o nwane ruọ emu no, evaọ ukpe 1924, oria iredio nọ inievo na a bọ, onọ a je se CHUC u te muọ iruo họ. Onana o jọ usu eria iredio ọsosuọ nọ a jẹ jọ whowho evuẹ kpahe egagọ evaọ Canada.

Canada ọ jọ oria nọ u kiehọ kẹ usiuwoma ota iredio keme ẹkwotọ na ọ jọ ruaro gaga. Oniọvo-ọmọtẹ jọ nọ a re se Florence Johnson nọ o je ru iruo evaọ oria iredio na ọ ta nọ: “Iredio nọ ma je ro whowho ovuẹ na u woma kẹhẹ keme u fi obọ họ k’omai ta usiuwoma kẹ ahwo nọ ma hẹ sai te oma ha. Yọ fikinọ ovuẹ iredio u kieze obọ, o jẹ hae were ahwo re a gaviezọ kẹ oware kpobi nọ a be jọ iredio ta.” Evaọ ukpe 1926, Isẹri Jihova (nọ a je se Emọ-Uwuhrẹ Ebaibol oke yena) a te ti wo eria iredio obọrai ene evaọ Canada. *

O hae jọnọ who rovie kpohọ oria iredio nana jọ, eme whọ hai ti yo? Inievo nọ e be rria kẹle eria iredio na a jẹ hai kpohọ etẹe nyae so ile avọ otu nọ ọ riẹ onaa ikporakporo ziezi. Inievo-emezae a jẹ hae kẹ ovuẹ jẹ ta kpahe izoẹme sa-sa nọ a rehọ no Ebaibol ze. Amy Jones nọ ọ jẹ hae ta ẹme evaọ oria iredio na ọ ta inọ, “Nọ mẹ tẹ rrọ usiuwoma, ẹsejọ ohwo uwou na ọ rẹ ta kẹ omẹ inọ, ‘O, mẹ gaviezọ kẹ ẹme ra no evaọ iredio.’”

Inievo nọ e jọ ẹwho ọ Halifax, Nova Scotia a jẹ rehọ oghẹrẹ onaa okpokpọ jọ whowho emamọ usi na evaọ iredio. A re zizie ahwo inọ a rọ ifonu se ze re a nọ enọ kpahe ẹme Ọghẹnẹ, kẹsena inievo na a vẹ k’iyo enọ rai. Oniọvo-ọmọzae jọ o kere nọ: “Ahwo  nọ a je se ze a bu thesiwa. Ma re k’uyo ọjọ no ho yọ omọfa o se no.”

Rekọ, wọhọ epanọ o jọ kẹ Pọl ukọ na, ovuẹ na o jẹ were ahwo jọ rekọ o jẹ were ejọ họ. (Iruẹru 17:1-5) Wọhọ oriruo, nọ Hector Marshall o yo evaọ iredio nọ inievo na a fodẹ obe ọ Studies in the Scriptures na, ọ tẹ yare inọ a vi iko ezeza sei. O kere uwhremu na inọ: “Mẹ jẹ yare ebe na re mẹ rehọ ae wuhrẹ ahwo evaọ obọ ichọche.” Rekọ nọ Hector o se uko ọsosuọ obe na re no, o te no ichọche na. O te kurẹriẹ ziọ ukoko na jẹ jọ owhowho-uvie nọ o wo ajọwha, yọ ọ gọ Jihova bẹsenọ o ro whu evaọ 1998. Inievo na a jọ ẹwho ọ Nova Scotia kẹ ovuẹ jọ evaọ iredio nọ uzoẹme riẹ o ta nọ “Uvie na Họ Ẹruore nọ Akpọ na O Wo.” Okiokiọ riẹ, alakpa jọ nọ a re se J. A. MacDonald ọ tẹ ta kẹ oniọvo jọ evaọ ẹwho na inọ: “Ahwo nọ a rrọ ukoliko Cape Breton a yo ovuẹ jọ odẹnukpo, ovuẹ nọ a re ruẹ ọkpọ riẹ ẹdẹvo ho evaọ ubrotọ mai na.”

Rekọ ovuẹ iredio na u je ru eva dha isu egagọ na. Ahwo Kathọlik jọ evaọ Halifax a je seha inọ a te raha oria iredio nọ Emọ-Uwuhrẹ Ebaibol a be jọ kẹ ovuẹ rai na. Evaọ ukpe 1928, isu egagọ a te ru nọ egọmeti ọ rọ ta inọ a gbẹ te kẹ Emọ-Uwuhrẹ Ebaibol udu vievie he nọ a rẹ rọ jọ oria iredio na whowho ovuẹ rai. Fiki onana inievo na a te muọ omobe jọ nọ uzoẹme riẹ o rrọ, Ono O Wo Ofou Na? (Who Owns the Air?) họ ẹghale kẹ ahwo onọ o ta inọ oware nọ egọmeti o ru rai na yọ okienyẹ. Ghele onana, egọmeti ọ rọwo kẹ ae he inọ a jọ iredio whowho usi Uvie na.

Kọ onana u ru nọ inievo obọ Canada a gbe ro wo ọwhọ kẹ iruo usiuwoma ota na ha? Oniọvo-ọmọtẹ jọ nọ a re se Isabel Wainwright ọ ta nọ: “Nọ a whaha omai usiuwoma ota iredio na no, o tẹ wọhọ ẹsenọ ewegrẹ na a fi kparobọ no. Rekọ mẹ riẹ nọ o hae jọnọ Jihova ọ gwọlọ nọ ma ruabọhọ usiuwoma ota iredio na ọ hae te kuvẹ re a whaha omai hi. Fikiere onana u dhesẹ nọ Jihova ọ gwọlọ nọ ma rọ emamọ edhere ọfa wha usiuwoma Uvie na te ahwo oma.” Inievo nọ e jọ obọ Canada a te muọ ahwo họ ẹnyabru evaọ obọ uwou re a ta usiuwoma kẹ ae, a gbẹ jẹ rẹroso usiuwoma ota iredio ọvo ho. Rekọ umutho oke nọ a rọ rehọ iredio ta usiuwoma na, o jọ etoke nọ a je ro whowho “ovuẹ nọ a re ruẹ ọkpọ riẹ ẹdẹvo ho.”—Iruẹru mai erọ oke nọ u kpemu evaọ obọ Canada.

[Oruvẹ-obotọ]

[Ẹme nọ a fi ẹgba họ nọ ọ rrọ ẹwẹ-obe avọ 32]

“Ma re k’uyo ọjọ no ho yọ omọfa o se no”

[Uwoho nọ e rrọ ẹwẹ-obe avọ 32]

(1) Oria iredio evaọ Edmonton, Alberta (2) Oniọvo-ọmọzae nọ ọ be rẹrote oware nọ o rẹ wha ovuẹ iredio na evaọ Toronto, Ontario (3) Oria ẹmeọta iredio nọ a re se CHUC evaọ Saskatoon, obọ Saskatchewan