Kọ Whọ Kareghẹhọ?

Kọ whọ reawere isase Uwou-Eroro nọ i kpozi kẹle na? Dai rri sọ whọ sae kẹ iyo enọ nọ e rrọ obotọ na:

Ẹvẹ ma sai ro furie erae ogbẹta?

U fo nọ ma rẹ kiẹ udu mai riwi. Ukpenọ ma re viẹro ku inievo mai, u fo re ma kiẹ omamai riwi kpahe oware nọ o be wọ omai rọ oghẹrẹ ubiẹro jọ rri rai. Kọ o sae jọnọ ma bi ru ere re amọfa a roro nọ ma mai woma? Nọ ma tẹ be rọ ubiẹro uyoma rri amọfa, u re ru ẹbẹbẹ nọ ọ r’otọ ga vi epanọ o ginẹ rrọ.—8/15, ẹwẹ-obe avọ 21.

Ẹvẹ izi nọ Ọghẹnẹ ọ kẹ emọ Izrẹl i ro dhesẹ oghẹrẹ nọ ọ gwọlọ nọ a yerikugbe eyae na?

Eyae orẹwho Izrẹl a wo ufuoma ziezi, a jẹ hai wuhrẹ ae re a riẹ obe, a jẹ kẹ ae ọghọ gbe adhẹẹ, yọ a jẹ hae thọ ae ziezi.—10/1, ẹwẹ-obe avọ 5-7.

Nọ ẹdẹ Jihova o t’otọ no na, eme ọ te nwane via no taure urere na o tẹ ze?

Isu akpọ na a ti bo nọ “udhedhẹ gbe omofọwẹ.” Erẹwho na a vẹ te họre jẹ raha Babilọn Ologbo na. A te jẹ họre idibo Ọghẹnẹ. Ẹmo Amagẹdọn o ve ti muhọ, kẹsena a ve ti gbolo Setan avọ ikọ-muomu riẹ fihọ ọgọdọ nọ o wo oba ha.—9/15, ẹwẹ-obe avọ 4.

Ẹvẹ oke nọ urere na o te rọ ze nọ ma riẹ hẹ na o rọ rrọ erere k’omai?

Ẹdẹ gbe oke nọ urere na o te rọ ze nọ ma riẹ hẹ na u re dhesẹ oghẹrẹ ohwo nọ ma rrọ evaọ obeva. O k’omai uvẹ nọ ma re ro ru Jihova eva were. U ru nọ ma rẹ rọ rehọ uzuazọ mai gọ Ọghẹnẹ je fi obọ họ kẹ amọfa, u te je ru nọ ma rẹ rọ rẹroso Jihova ziezi jẹ romatotọ fi ẹme riẹ h’iruo evaọ uzuazọ mai. U te no ere no, u ru nọ ma re ro thihakọ ebẹbẹ, yọ onana u re ru ẹrọwọ mai ga.—9/15, ẹwẹ-obe avọ 24-25.

Amono “isi ihrẹ” nọ a ta evaọ obe Eviavia 1:16, 20 inọ e rrọ obọze Jesu na i dikihẹ kẹ?

I dikihẹ kẹ esẹro nọ a rọ ẹzi wholo na, yọ onana o kẹre te esẹro kpobi nọ e rrọ ukoko na.—10/15, ẹwẹ-obe avọ 13-14.

Ẹvẹ Jesu o ro dhesẹ omaurokpotọ wọhọ epanọ Ebaibol na ọ ta evaọ obe Aizaya 50:4, 5?

Oria ikere yena o ta nọ ohwo nọ o wo “ẹrọwo-unu otu nọ a wuhrẹ” o re “zihe oma kpemu hu.” Jesu o dhesẹ uruemu omaurokpotọ jẹ gaviezọ ziezi kẹ eware nọ Ọsẹ riẹ o je wuhrẹ iẹe. O jọ isiuru riẹ gaga re o wuhrẹ mi Jihova, ọ romatotọ muẹrohọ oghẹrẹ nọ Jihova ọ rọ rehọ omaurokpotọ reohrọ ahwo-akpọ nọ a gba ha.—11/15, ẹwẹ-obe avọ 11.