Uwou-Eroro Oyibo nọ A Ru Eme Riẹ Lọhọ Fikieme A ro Mu Ei Họ Ekere?

ANWỌ ikpe buobu ze na, ahwo buobu evaọ akpọ na soso a wo erere no emagazini Uwou-Eroro Na ze no. Evaọ July 2011, a te siobọno uvitha ọsosuọ orọ emagazini Uwou-Eroro nọ a ru eme riẹ lọhọ evaọ ẹvẹrẹ Oyibo. Uvitha yena o ta nọ: “Ma be dawo uvitha okpokpọ nana ukpe ovo, nọ u te fi obọ họ, ma vẹ te ruabọhọ ekere riẹ.”

Enẹna, eva e were omai gaga nọ ma be rọ jẹ owhai riẹ inọ ma te ruabọhọ ekere riẹ. U te no ere no, nọ oke o be nyaharo na a ti kere emagazini nọ a ru eme riẹ lọhọ na evaọ ẹvẹrẹ France, Portugal, gbe Spain.

OWARE NỌ O RỌ WERE AHWO GAGA

Nọ Uwou-Eroro nana u te ahwo obọ evaọ obọ South Pacific, ibuobu e ta nọ: “Enẹna inievo na a bi wo otoriẹ Uwou-Eroro Na ziezi.” Ileta ọfa jọ nọ a kere kpahe iẹe o ta nọ: “Okenọ ma jẹ hae raha rọ gwọlọ otofa eme, enẹna ma be rehọ oke yena roro didi kpahe ikereakere nọ a fodẹ evaọ idhe-eme na gbe epanọ i ro kie kpahe uzoẹme uwuhrẹ na.”

Oniọvo-ọmọtẹ jọ nọ o nwrotọ no isukulu ikpehru ze evaọ obọ America ọ ta nọ: “Ikpe ikpegberee mẹ ta je kere iyibo nọ ahwo nọ a kpohọ isukulu ikpehru ọvo a rẹ sae wo otoriẹ rai. Onana u te zihe ruọ uruemu mẹ. Rekọ uwhremu na, mẹ tẹ ruẹ nọ o gwọlọ re me ru inwene ilogbo evaọ iroro gbe ẹmeọta mẹ.” Enẹna nọ o bi wuhrẹ amọfa ziezi evaọ iruo usiuwoma ota na, ọ ta nọ: “Uwou-Eroro nana nọ a ru eme riẹ lọhọ na u fi obọ họ kẹ omẹ gaga no. U wuhrẹ omẹ epanọ a rẹ rọ ta ẹme  kẹ ohwo evaọ edhere nọ o re ro wo otoriẹ riẹ lọlọhọ.”

Oniọvo-ọmọtẹ jọ evaọ obọ England nọ ọ họ-ame evaọ ukpe 1972 o kere kpahe Uwou-Eroro nọ a ru lọhọ na inọ: “Nọ me je se uvitha ọsosuọ Uwou-Eroro na, o jọ omẹ oma wọhọ ẹsenọ Jihova ọ keria gb’omẹ avọ obọ nọ ọ rọ kpahe omẹ ẹkoko bi lele omẹ sei. O jọ omẹ oma wọhọ ẹsenọ ọsẹ o bi se ikuigbe kẹ ọmọ riẹ re a te kiẹzẹ.”

Oniọvo-ọmọtẹ mai jọ nọ o bi ru iruo evaọ Ebẹtẹle obọ United States nọ ọ họ-ame ikpe udhuvẹ gbọ nọ i kpemu ọ ta inọ Uwou-Eroro nọ a ru lọhọ na o be hai fi obọ họ kẹe wo otoriẹ eware ekpokpọ ẹsejọ. Wọhọ oriruo, evaọ uvitha ọ September 15, 2011, a jọ ẹkpẹti na “Eme jọ nọ A Ru Vẹ” fotọ isisẹri nọ e “wọhọ ẹgho” nọ a ta ẹme te evaọ obe Hibru 12:1 na inọ oware nọ a rọ rehọ ẹgho dhesẹ ai họ, “a bu vi epanọ a sai ro kele ai.” Oniọvo-ọmọtẹ na ọ ta re inọ: “Onana u ru oria ikere yena vẹ k’omẹ ziezi.” Ọ tẹ jẹ ta kpahe edhere ọfa nọ Uwou-Eroro nana u bi ro fi obọ họ evaọ etoke uwuhrẹ inọ: “Nọ ọmaha ọ tẹ maki se uyo riẹ no Uwou-Eroro nọ eme riẹ e rẹ lọlọhọ na ze, eme na i wo ohẹriẹ no orọ uvitha odekọ nọ amọfa a kru na. E vẹ be wọhọ eme ekpokpọ evaọ ezọ ogbotu na.”

Oniọvo-ọmọtẹ ọfa jọ nọ ọ rrọ Ebẹtẹle re o kere nọ: “Mẹ rẹ gwọlọ nọ oke ewuhrẹ u te vẹrẹ re mẹ te gaviezọ kẹ uyo emaha evaọ ukoko mai. Uwou-Eroro nọ a ru eme riẹ lọhọ na u bi fi obọ họ kẹ ae kiyo n’eva ze. Uyo rai o be hae k’omẹ uduotahawọ gaga.”

 Oniọvo-ọmọtẹ ọfa nọ ọ họ-ame evaọ ukpe 1984 ọ ta epanọ uvitha nọ a ru eme riẹ lọhọ na o were riẹ te inọ: “O wọhọ nọ fiki mẹ a ro kere iei. O be ginẹ lẹliẹ omẹ wo otoriẹ oware nọ me bi se vevẹ. Obọnana mẹ riẹ nọ evaọ uwuhrẹ Uwou-Eroro kpobi mẹ rẹ siọ uyo ba ẹkẹ hẹ.”

UVITHA NỌ O WERE ESẸGBINI GAGA

Oniọvo-ọmọtẹ jọ nọ o wo ọmọ ikpe ihrẹ ọ ta nọ: “O jẹ hae raha oke jẹ jọ bẹbẹ re me ru eme buobu vẹ kẹe nọ ma tẹ be rọ uvitha odekọ na ruẹrẹ oma kpahe kẹ uwuhrẹ.” Ẹvẹ uvitha orọ eme elọlọhọ na u ro fi obọ họ kẹe? O kere nọ: “U gbunu kẹhẹ, enẹna ọyọvo ọ be sai se idhe-eme na je wo otoriẹ rai. Fikinọ eme na e ga ha yọ idhe-eme na e rrọ kpẹkpẹe, isase Uwou-Eroro na e tẹ be hae were iẹe oma. Ọyọvo ọ be hae ruẹrẹ iyo na kpahotọ ababọ obufihọ mẹ, yọ ọ rẹ tẹrovi emagazini na no emuhọ rite ekuhọ uwuhrẹ na.”

Oniọvo-ọmọtẹ jọ nọ o wo ọmọtẹ ikpe izii o kere nọ: “Mai ma jẹ hae fi obọ họ kẹe ruẹrẹ iyo nọ ọ te kẹ kpahe. Enẹna ọyọvo ọ be ruẹrẹ iyo riẹ kpahe. Ẹsejọ ọvo o rẹ gwọlọ nọ ma gbe ru eme na vẹ kẹe. Enẹna nọ eme na e rẹ lọlọhọ kẹe na, o bi wo otoriẹ Uwou-Eroro na jẹ kiyo ziezi.”

EME EMAHA NA OMARAI A TA?

O rrọ emaha buobu oma inọ fiki rai a bi ro kere uvitha Uwou-Eroro nọ a ru lọhọ na. Rebecca nọ ọ rrọ ikpe ikpegbivẹ ọ yare nọ: “Ivie, wha he kere Uwou-Eroro nana se omai ẹsikpobi.” Ọ ta re inọ: “Oria ‘Eme jọ nọ A Ru Vẹ’ na o were omẹ gaga.” Etẹe na u ru eme buobu lọlọhọ kẹ omai emaha na.”

Epọvo na o rrọ ọmọ ikpe ihrẹ nọ a re se Nicolette oma, ọ ta nọ: “Mẹ jẹ hae kake riẹ otọ eme buobu nọ a kere fihọ Uwou-Eroro na anwẹdẹ hẹ. Obọnana mẹ be sai kiyo vi epanọ o jọ vẹre.” Emma nọ ọ rrọ ikpe izii o kere nọ: “U bi fi obọ họ kẹ omẹ avọ oniọvo ọmaha mẹ nọ ọ rrọ ikpe ezeza gaga. Ma be sae riẹ otọ eware buobu enẹna. Ma yere owhai.”

O rrọ vevẹ inọ ahwo buobu a bi wo erere no Uwou-Eroro nọ a rọ eme elọlọhọ kere na ze. U bi ru obọdẹ ẹgwọlọ jọ gba, yọ ma te gbẹ ruabọhọ ekere Uwou-Eroro nana, kugbe uvitha odekọ nọ a muhọ ekere anwọ ukpe 1879 ze na.

[Ẹme nọ a fi ẹgba họ nọ ọ rrọ ẹwẹ-obe avọ 30]

“Okenọ ma jẹ hae raha rọ gwọlọ otofa eme, enẹna ma be rehọ oke yena roro didi kpahe ikereakere nọ a fodẹ evaọ idhe-eme na gbe epanọ i ro kie kpahe uzoẹme uwuhrẹ na”

[Ẹme nọ a fi ẹgba họ nọ ọ rrọ ẹwẹ-obe avọ 31]

“U gbunu kẹhẹ, enẹna ọyọvo ọ be sai se idhe-eme na je wo otoriẹ rai”