Whẹ Yọ Odibo Nọ A Fievahọ
Whẹ Yọ Odibo Nọ A Fievahọ
“Whai ọvo a wo oma rai hi.”—1 KỌR. 6:19.
ẸVẸ WHỌ TE K’IYO ENỌ NANA?
Didi iruo idibo hayo irieyero oke anwae a jẹ hae ru?
Didi iruo idibo Ọghẹnẹ kpobi nẹnẹ a wo?
Ẹvẹ u fo nọ ma re rri iruo usiuwoma ota nọ a kẹ omai na?
1. Nọ ahwo a te yo ẹme na ọrigbo, bovẹ iroro rai i re kpohọ?
EVAỌ ikpe idu ivẹ gbe egba isoi (2,500) nọ ikpemu, ohwo Griki jọ nọ o re kere ebe o kere nọ: “Ohwo ọvo nọ u no eva ze inọ ọ rẹ jọ ọrigbo ọ rrọ họ.” Ahwo buobu nẹnẹ a rọwo kugbe ẹme ọyena. Nọ a te yo ẹme na ọrigbo, oria nọ iroro ahwo i re kpohọ họ, ahwo nọ a bi kienyẹ, nọ a wo ufuoma ha, ahwo nọ a rẹ gbahọ ru iruo nọ e rẹ wha erere se ilori rai ọvo.
2, 3. (a) Ewha-iruo vẹ a rọ kẹ idibo Kristi? (b) Didi enọ kpahe iruo odibo ma te kẹ iyo rai?
2 Jesu ọ ta nọ ilele riẹ a te jọ erigbo hayo idibo nọ i wo omaurokpotọ. Dede na, orọnikọ Ileleikristi uzẹme a te jọ erigbo nọ a re kienyẹ hayo nọ a ti ru iruo nọ i re si ọghọ no ai oma ha. A te jọ erigbo hayo idibo nọ i wo adhẹe nọ a re fievahọ. Wọhọ oriruo, taure Jesu o te ti whu, muẹrohọ ẹme nọ ọ ta kpahe “odibo” jọ. Jesu ọ ta inọ ọ te rọ ewha-iruo kẹ “odibo oruọzewọ, nọ o wo areghẹ.”—Mat. 24:45-47.
3 A jọ obe Luk se utu ọrigbo nana “odibo” re. (Se Luk 12:42-44.) Ileleikristi buobu nẹnẹ a rọ utu odibo oruọzewọ nana ha. Rekọ Ebaibol na ọ ta nọ Ileleikristi kpobi a wo iruo odibo. Ewha-iruo vẹ ahwo nana a wo? Ẹvẹ u fo nọ ma re rri ewha-iruo nana? Re ma sae k’iyo enọ na, joma ta kpahe ewha-iruo idibo hayo irieyero evaọ oke anwae.
EWHA-IRUO ORIEYERO
4, 5. Ewha-iruo vẹ irieyero e jẹ hai wo evaọ anwae? Kẹ oriruo.
4 Evaọ oke anwae, orieyero yọ ọrigbo nọ olori riẹ o fievahọ, nọ o ro mu re ọ rẹrote eyero uwou rie hayo ekwakwa riẹ kpobi. A kẹ riẹ udu esuo nọ ọ rẹ rọ sẹro eware olori riẹ kpobi, te igho gbe idibo olori riẹ nọ i kiọkọ. Oriruo Ẹlieza, odibo Abraham nọ ọ jẹ rẹrote ekwakwa Abraham kpobi o kẹ imuẹro onana. Ẹsejọhọ, Ẹlieza họ odibo nọ Abraham o vi rie kpobọ Mẹsopotemia re ọ nyai wo aye kẹ ọmọ riẹ Aiziki. Oyena yọ owha-iruo ulogbo, o tẹ jẹ rrọ uvẹ-ọghọ.—Emu 13:2; 15:2; 24:2-4.
5 Josẹf, ọmọ-oruọmọ avivẹ Abraham ọ jẹ rẹrote uwou Pọtifa kpobi. (Emu. 39:1, 2) Evaọ oke ofa Josẹf o te ti wo orieyero obọriẹ, ọnọ a ro mu re ọ rẹrote “uwou riẹ.” Orieyero yena ọ rẹrote inievo ikpe Josẹf okenọ a nyaze te dẹ emu evaọ Ijipti. Ọye Josẹf ọ gba ẹgwae kugbe inọ o fi egho isiliva riẹ họ ẹkpa inievo riẹ re ọ rọ ere dawo ai. Onana u dhesẹ epanọ a jẹ hai fievahọ irieyero te evaọ oke anwae.—Emu. 43:19-25; 44:1-12.
6. Ewha-iruo sa-sa vẹ esẹro evaọ ukoko Ileleikristi a wo?
6 Nọ ikpe-udhusoi buobu e vrẹ no, Pọl ukọ na o kere nọ esẹro yọ ‘iruiruo Ọghẹnẹ.’ (Taitọs 1:7) A rọ esẹro na mu re a sẹro “uthuru Ọghẹnẹ,” fikiere a rẹ kẹ uthubro jẹ kobaro evaọ iruẹru ukoko na. (1 Pita 5:1, 2) Dede na, ewha-iruo esẹro i wo ohẹriẹ no ohwohwo. Wọhọ oriruo, esẹro buobu nẹnẹ a be rẹrote iruẹru ukoko ovo. Esẹro ọnyawariẹ a be rẹrote iruẹru ikoko sa-sa. Esẹro nọ e rrọ usu Ogbẹgwae Uwou-Ogha a be rẹrote iruẹru ikoko orẹwho soso. O make rrọ ere na, o gwọlọ nọ esẹro na kpobi a rẹ rọ oruọzewọ ru iruo rai keme a te “niyẹrẹ” kẹ Ọghẹnẹ.—Hib.13:17.
7. Ẹvẹ ma rọ riẹ nọ mai Ileleikristi kpobi yọ irieyero?
7 Kọ Ileleikristi buobu nọ e rrọ esẹro ho? Pita ukọ na o kere se Ileleikristi kpobi inọ: “Wọhọ epanọ omomọvo o wo okẹ no, rehọ iẹ ru iruo kẹ ohwo ohwo, wọhọ irieyero oghoghẹrẹ aruoriwo Ọghẹnẹ.” (1 Pita 1:1; 4:10) Ọghẹnẹ ọ kẹ omai ekẹ sa-sa nọ ma sai ro fi obọ họ kẹ inievo Ileleikristi mai. Fikiere mai kpobi yọ irieyero Ọghẹnẹ. Ọ kẹ omai kpobi ewha-iruo sa-sa nọ i bru ọghọ họ omai oma fikinọ o fievahọ omai.
ỌGHẸNẸ O WO OMAI KPOBI
8. Eme u fo nọ mai idibo Ọghẹnẹ kpobi ma rẹ kareghẹhọ?
8 Eware esa jọ e riẹ nọ u fo nọ mai Ileleikristi ma rẹ kareghẹhọ, nọ ma rrọ irieyero na. Orọ ọsosuọ: Ọghẹnẹ o wo omai kpobi yọ ma te niyẹrẹ kẹe. Pọl o kere nọ: “Whai ọvo a wo oma rai hi; keme a dẹ owhai” ẹkwoma azẹ Jesu. (1 Kọr. 6:19, 20) Nọ orọnọ Jihova o wo mai na, o gwọlọ nọ ma re koko ijaje riẹ, ijaje riẹ e rrọ owha ogbẹgbẹdẹ hẹ. (Rom 14:8; 1 Jọn 5:3) Ma zihe ruọ erigbo kristi no re. Wọhọ irieyero oke anwae, ma wo ufuoma, rekọ orọnọ onọ ma re ro yeri uzuazọ epanọ u j’omai hi. O gba omai họ nọ ma re ru iruo lele ọkpọvio nọ a kẹ omai. Oghẹrẹ uvẹ iruo kpobi nọ ma wo kẹhẹ, ma rẹ kareghẹhọ inọ mai kpobi yọ idibo Ọghẹnẹ gbe Jesu kristi.
9. Ẹvẹ Jesu o ro dhesẹ oware nọ olori ọ rẹ gwọlọ mi odibo riẹ?
9 Jesu ọ kẹ oriruo nọ u dhesẹ oware nọ olori ọ rẹ gwọlọ mi odibo riẹ. O gbiku jọ kẹ ilele riẹ kpahe odibo jọ nọ o ru iruo kẹ olori riẹ no ohiohiẹ rite owọwọ. Kọ olori na ọ ta nọ: “Nyaze enẹna, re whọ keria whọ re emu?” Ijo. Ukpoye ọ ta nọ: “Ruẹrẹ emu nọ mẹ rẹ ria kẹ omẹ, mu ohọ ra ga who ru iruo kẹ omẹ, bẹsenọ mẹ rẹ re da no; kẹsena whọ tẹ re da.” Eme Jesu ọ rọ ọtadhesẹ nana wuhrẹ? Ọ ta nọ: “Whaọ ere whai re, nọ wha ru eware kpobi nọ a ta kẹ owhai [no], wha vẹ ta nọ, ‘Mai idibo nọ ifiokaha ma ru umutho iruo mai ọvo.’”—Luk 17:7-10.
10. Eme u dhesẹ nọ Jihova o wo edẹro kẹ oma nọ ma be dawo evaọ egagọ riẹ?
10 Jihova o wo edẹro kẹ oma nọ ma be dawo evaọ egagọ riẹ. Ebaibol na ọ kẹ omai imuẹro inọ: “Ọghẹnẹ ọ kare ọ rọ ẹrẹreokie he nọ iruo rai i re vẹro ho gbe uyoyou nọ owha be rehọ fiki riẹ ruẹ.” (Hib. 6:10) Ọ rẹ gwọlọ oware nọ ma rẹ sai ru hu mi omai hi. Yọ oware kpobi nọ ọ gwọlọ nọ ma ru o rrọ kẹ ewoma mai, e rrọ owha ogbẹgbẹdẹ hẹ. Dede na, wọhọ epanọ ma ruẹ evaọ ọtadhesẹ Jesu na, odibo ọ rẹ rọ ẹgwọlọ obọriẹ karo ho rekọ ọrọ olori riẹ. Ẹme na họ, oreva Ọghẹnẹ ma ta nọ ma rẹ rọ karo okenọ ma r’oma mudhe kẹe. Manikọ ere he?
OWARE NỌ JIHOVA Ọ GWỌLỌ MI OMAI KPOBI
11, 12. Uruemu vẹ o gwọlọ nọ mai idibo hayo irieyero ma re dhesẹ, kọ evẹ ma rẹ whaha?
11 Oware avivẹ họ: Mai idibo Ọghẹnẹ kpobi ijaje evona ma bi koko. Uzẹme, u wo ewha-iruo jọ nọ a rẹ rọ kẹ umutho ahwo jọ ọvo evaọ ukoko na. Ghele na, ewha-iruo buobu e rrọ rọkẹ omai kpobi. Wọhọ oriruo, u wuzou gaga inọ mai Ileleikristi ma wo uyoyou kẹ ohwohwo. Jesu ọ ta nọ oyena họ oka nọ a ti ro vuhu Ileleikristi uzẹme. (Jọn 13:35) Dede na, orọnikọ inievo Ileleikristi mai ọvo ma re you hu. U fo nọ ma re you amọfa nọ a rrọ ukoko na ha. Onana yọ oware nọ ma rẹ sai ru yọ u fo nọ ma ru ere.
12 O gwọlọ nọ ma re dhesẹ emamọ uruemu re. Ma rẹ daoma whaha oghẹrẹ uruemu gbe uzuazọ uyero nọ Ọghẹnẹ o mukpahe. Pọl o kere nọ: “Ibruẹnwae, hayo igberedha, hayo iji, hayo imuọwhọ, hayo egbidi, hayo elahwo-eka, hayo igbulegbu, e rẹ sae reuku uvie Ọghẹnẹ hẹ.” (1 Kọr. 6:9, 10) Ma riẹ nọ o gwọlọ omadawọ re ma sae koko izi Ọghẹnẹ. Rekọ omadawọ utioye u fo keme o te wha irere buobu se omai, onọ o kẹre te omokpokpọ, emamọ usu kugbe amọfa, u ve ti je ru nọ ma re ro wo ọjẹrehọ Ọghẹnẹ.—Se Aizaya 48:17, 18.
13, 14. Iruo vẹ a rọkẹ Ileleikristi kpobi, kọ ẹvẹ u fo nọ ma re rri onana?
13 Joma kareghẹhọ re inọ odibo o wo iruo nọ o re ru. Yọ ma wo iruo re. Ọghẹnẹ o wuhrẹ omai eriariẹ egbagba Ebaibol na, yọ ọ gwọlọ nọ ma rọ eriariẹ nana wuhrẹ amọfa. (Mat. 28:19, 20) Pọl o kere nọ: “Ufore ahwo a roro omai enẹ, wọhọ idibo Kristi gbe irieyero eware ididi Ọghẹnẹ.” (1 Kọr. 4:1) Pọl ọ riẹ nọ iruo orieyero nana o gwọlọ nọ ọyomariẹ ọ rẹ romatotọ rẹrote “eware ididi” Ọghẹnẹ je ru amọfa riẹ kpahe eware nana wọhọ epanọ Olori riẹ Jesu Kristi ọ gwọlọ nọ o re ru.—1 Kọr. 9:16.
14 Avro ọ riẹ hẹ, ma te bi wuhrẹ amọfa uzẹme Ebaibol na yọ ma bi dhesẹ nọ ma you rai. Dede na, ma riẹ nọ eware jọ e rẹ sae whae ze nọ Ileleikristi kpobi a gbẹ sai ro ru epọvo na ha evaọ iruo usiuwoma ota na. Jihova ọ riẹ ere. Oware nọ o mai wuzou họ, ẹgba mai kpobi nọ ma re ro ru iruo usiuwoma ota na. Onana u re dhesẹ nọ ma you Jihova gbe erivẹ mai.
EPANỌ U WUZUO TE RE MA JỌ AHWO ORUỌZEWỌ
15-17. (a) Fikieme u ro wuzou re odibo ọ jọ ohwo oruọzewọ? (b) Oriruo vẹ Jesu ọ kẹ ro dhesẹ oware nọ o rẹ via nọ odibo ọ gbẹ rrọ ohwo oruọzewọ họ?
15 Oware avọ esa họ: Ma rẹ jọ ahwo oruọzewọ nọ a re fievahọ. Odibo ọ rẹ sai wo onaa gbe eghẹrẹ iruemu ezi sa-sa, rekọ enana kpobi i fioka ha nọ ọ gbẹ rọ ohwo oruọzewọ nọ ọ rẹ romakpotọ kẹ olori riẹ ẹsikpobi hi. Re odibo ọ sai wo ọjẹrehọ olori riẹ ọ rẹ jọ ohwo oruọzewọ. Kareghẹhọ nọ Pọl o kere nọ: “A gwọlọ nọ irieyero na a rẹ jọ ahwo eva-ifihọ.”—1 Kọr. 4:2.
16 Avro ọ riẹ hẹ, ma ti wo eghale Jihova nọ ma tẹ rọ ahwo oruọzewọ. Rekọ ma gbẹ rrọ ahwo otiọye he ma ti wo ọjẹrehọ riẹ hẹ. Ma rẹ ruẹ onana vuhumu evaọ ọtadhesẹ Jesu ọrọ etalẹnte na. Idibo nọ e rehọ etalẹnte nọ a kẹ rai na “kpo eki-ọthuọ,” olori rai o jiri rai, a te je wo eghale buobu. Rekọ olori na o bruoziẹ kpe odibo nọ ọ rehọ etalẹnte nọ a kẹ riẹ thueki hi na jẹ ta kẹe nọ: “Whẹ odibo omuomu avọ oyẹlẹ” gbe “odibo nọ o fioka ha.” A te mi ei etalẹnte nọ a kẹ riẹ na je gbolo odibo na fihọ otafe.—Se Matiu 25:14-18, 23, 26, 28-30.
17 Evaọ oke ofa jọ Jesu o dhesẹ oware nọ o rẹ sae via nọ ma gbẹ rrọ ahwo oruọzewọ họ. Ọ ta nọ: “Ọdafe jọ ọ jarọ, nọ o wo orieyero jọ, a te gu ei kẹ e nọ, ọ be raha eware riẹ. O te se ei, ọ tẹ ta kẹ e nọ, ‘Nọ didi ẹme me yo kpahe owhẹ na? Mo kele eware nọ e rọ owhẹ obọ; keme whọ gbẹ sae te jọ orieyero ofa ha.’” (Luk 16:1, 2) Fikinọ odibo na ọ jọ ohwo oruọzewọ họ, olori riẹ o te le ei. Ọtadhesẹ nana o wuhrẹ mai okpoware jọ, inọ u fo re ma jọ ahwo oruọzewọ nọ e rẹ romatotọ rẹrote owha-iruo kpobi nọ a kẹ omai evaọ egagọ Jihova.
O RRỌ OWARE AREGHẸ HẸ RE MA RỌ OMAMAI WAWO AMỌFA
18. Fikieme u gbe fo ho re ma rọ omamai wawọ amọfa?
18 U fo nọ mai omomọvo ma nọ omamai nọ, ‘Oghẹrẹ odibo vẹ mẹ rọ?’ Nọ ma tẹ be rọ omamai wawọ amọfa o rẹ sae wha ebẹbẹ ze. Ebaibol na ọ hrẹ omai nọ: “Jọ kohwo kohwo o dhesẹ iruo riẹ via, kẹsena o ve ti wo a jiri eva oma [obọriẹ] ọvo, o gbẹjọ orọ [ẹwawọ kugbe] omọfa ha.” (Gal. 6:4) Ukpenọ ma rẹ rọ eware nọ ma bi ru wawọ erọ amọfa, u fo nọ ma tẹrovi eware nọ mai omomọvo ọ be sai ru. Onana u ti ru nọ ma gbẹ te rọ wọ oma kpehru hu, yọ udu u ti whrehe omai hi. U fo nọ ma rẹ kareghẹhọ inọ eware wọhọ ẹyao, owho hayo ewha-iruo efa sa-sa e rẹ sai ru nọ ma gbe ru te epanọ ma gwọlọ họ. Evaọ abọdekọ riẹ, ẹsejọhọ ma wo uvẹ nọ ma sai ro ru vi epanọ ma bi ru te enẹna. O tẹ rrọ ere, kọ u gbe fo re ma fiba iruo odibọgba mai?
19. Nọ uvẹ-iruo jọ u gbe t’omai obọ evaọ oke nọ ma roro ho, fikieme ma gbẹ k’uvẹ re udu u whrehe omai hi?
19 Oware ofa jọ nọ u fo nọ ma re muẹrohọ họ, oghẹrẹ nọ ma bi rri ewha-iruo nọ ma wo enẹna hayo enọ ma gwọlọ wo. Wọhọ oriruo, o sae jọnọ oniọvo ọmọzae jọ o bi le utee ọkpako ukoko hayo ọ gwọlọ jọ omọvo inievo nọ i re ru ẹme evaọ ikokohọ. U yoma ha re ma hae daoma epanọ ma re ro le itee nana t’obọ, rekọ ma rẹ k’uvẹ hẹ re udu u whrehe omai nọ uvẹ iruo nana u gbe bi te omai obọ họ evaọ oke nọ ma roro. Ẹsejọ re uvẹ-iruo u te ti te omai obọ, o rẹ dina lehie fiki eware jọ nọ ma riẹ hẹ. Kareghẹhọ inọ Mosis o roro nọ ọ ruẹrẹ oma kpahe no re o su emọ Izrẹl no igbo Ijipti, rekọ ọ hẹrẹ ikpe udhuvẹ efa re o te ti ru ere. Oke nana kpobi o kẹ Mosis uvẹ wuhrẹ uruemu nọ u ti fi obọ họ kẹe su emọ Izrẹl nọ e vọ avọ uzou-uveghe na.—Iruẹru 7:22-25, 30-34.
20. Eme ma rẹ sai wuhrẹ no oware nọ o via kẹ Jonatan ze?
20 Ẹsejọ, uvẹ-iruo jọ nọ ma bi rẹro riẹ u re t’omai obọ vievie he. Ere o via kẹ Jonatan. Ọ jọ ọmọ Sọl nọ ọ hae te reuku uvie Izrẹl. Rekọ Ọghẹnẹ ọ tẹ salọ omọfa, Devidi nọ ọ jọ ọmaha kẹ Jonatan inọ ọye ọ te rehọ ẹta Sọl. Eme Jonatan o ru? Ọ rọwo kugbe onana je fi obọ họ kẹ Devidi te epanọ o ro fi uzuazọ obọriẹ họ ọza. Ọ ta kẹ Devidi nọ: “Whọ rẹ te jọ ovie Izrẹl, mẹ vẹ te jọ ethabọ ra.” (1 Sam. 23:17) Eme onana u wuhrẹ owhẹ? Jonatan ọ re Devidi ihri wọhọ ọsẹ riẹ hẹ, ọ rọwokugbe ọruẹrẹfihotọ na. Ukpenọ ma re amọfa ihri fiki iruo nọ a kẹ rai evaọ ukoko na, jọ mai omomọvo ọ tẹrovi iruo nọ a kẹ omai. Evaọ akpọ ọkpokpọ nọ a ya eyaa riẹ na, Jihova o ti ru uvi ẹgwọlọ idibo riẹ kpobi gba.
21. Ẹvẹ u fo nọ ma re rri iruo odibọgba mai na?
21 Joma hae kareghẹhọ nọ mai yọ idibo nọ a fievahọ, orọnikọ erigbo nọ e be reoja ha, enọ a bi kienyẹ. Ukpoye, Jihova o bru ọghọ họ omai oma nọ ọ rọ k’omai iruo usiuwoma ota nọ a te wariẹ hẹ na, nọ ma bi ru evaọ edẹ urere nana. Ma wo ufuoma nọ ma rẹ rọ salọ oghẹrẹ nọ ma re ro ru iruo nana. Fikiere joma daoma jọ idibo oruọzewọ, re ma je rri uvẹ nọ ma be rọ gbodibo kẹ Ọnọ ọ mae rro evaọ ehrugbakpọ na ghaghae.
[Enọ Uwuhrẹ]
[Iwoho nọ e rrọ ẹwẹ-obe avọ 12]
Joma rọ oruọzewọ ru iruo kpobi nọ a kẹ omai
