Yọroma kẹ Ebaibol nọ A re ro Ruiruo Thọthọ

“ẸME Ọghẹnẹ ọ rẹjọ bẹdẹ, avọ iruo.” (Hib. 4:12) Pọl ukọ na ọ rehọ ẹme yena dhesẹ ẹgba nọ ẹme Ọghẹnẹ ọ rẹ rọ nyate ohwo udu je nwene uzuazọ ohwo.

Uwhremu na nọ ikọ na a whu no, nọ ikọ erue nọ a ruẹaro rai inọ e te romavia na e wha iwuhrẹ erue rai ze no, ahwo a te ti rri ẹme yena nọ Pọl ukọ na ọ ta na thọ. (2 Pita 2:1-3) Nọ oke o be nya haro na, ilorida ichọche a te muhọ ewuhrẹ inọ ẹme Ọghẹnẹ o wo ẹgba emajiki. Profẹsọ jọ nọ a re se Harry Y. Gamble, ọ ta “oghẹrẹ nọ Ikereakere [Griki] Ileleikristi na u ro wo ẹgba emajiki” evaọ obe riẹ jọ nọ o kere. O kere nọ evaọ ikpe-udhusoi avọ esa, olorida ichọche jọ nọ a re se Origen ọ ta nọ “u wo erere nọ ma re wo no ubiẹme kpobi nọ o rrọ Ikereakere na ze: otẹrọnọ ẹme kpobi nọ ọgẹdhọ nọ o re ru emajiki ọ ta u wo ẹgba, kiyọ ẹme Ọghẹnẹ nọ ọ rrọ Ikereakere efuafo na ọ mai wo ẹgba.” Evaọ ikpe-udhusoi avọ ene, olorida ichọche jọ nọ a re se John Chrysostom o kere inọ “ẹdhọ o wo udu nọ ọ rẹ rọ rueva uwou nọ ebe Usiuwoma na e rrọ họ.” Ọ tẹ jẹ ta nọ ahwo jọ a jẹ hai kere eme erọ ebe Usiuwoma na jọ fihọ oware nọ a rẹ gba si urru wọhọ ẹgbelẹ hayo ekpọfia. Profẹsọ Gamble ọ ta re inọ owuhrẹ-egagọ Kathọlik nọ a re se Augustine “ọ rọwo nọ u kiehọ re ohwo o fi obe Usiuwoma Jọn họ otọ othuzou kiẹzẹ nọ uzou o tẹ be tehe iẹe.” Fikiere ahwo a tẹ jẹ rọ Ebaibol na ru eware sa-sa wọhọ ẹsenọ u wo ẹgba emajiki. Kọ who roro nọ Ebaibol na yọ obe nọ u wo ẹgba emajiki hayo obe nọ o rẹ rọ edhere igbunu jọ thọ ohwo?

Ahwo buobu a wo uruemu ogbẹrọwọ jọ, inọ a te rovie Ebaibol na idudhe, oria ikere kpobi nọ a ruẹ o rẹ kẹ ai uthubro nọ a gwọlọ oke yena. Wọhọ oriruo, Prọfẹsọ Gamble ọ ta inọ, ẹdẹjọ nọ Augustine o yo urru ọmọ jọ nọ ọ be ta evaọ ighẹ nọ e kẹle riẹ inọ: “Tọlọ who se, tọlọ who se,” Augustine ọ tẹ rehọ iẹe nọ Ọghẹnẹ ọ be ta kẹe inọ o rovie Ebaibol re o se oria ọsosuọ nọ ọ ruẹ.

Ahwo jọ a te wo ẹbẹbẹ a rẹ lẹ se Ọghẹnẹ kẹsena a ve rovie Ebaibol ẹsiẹvo bi roro nọ oria ikere ọsosuọ nọ a te ruẹ u ti fi obọ họ kẹ ai ku ẹbẹbẹ na họ. Dede nọ a riẹ ru nọ a be rọ gwọlọ obufihọ Ebaibol, orọnikọ ere a re ro ru ei hi.

Jesu ọ ta kẹ ilele riẹ inọ o ti vi “Ọthuke na, Ẹzi Ẹri na” se ai. Ọ ta re inọ: “O re ti wuhrẹ owhai eware kpobi, ọ vẹ te rehọ eware nọ mẹ ta kẹ owhai kpobi [kareghẹhọ] owhai.” (Jọn 14:26) Onana u dhesẹ nọ ma te wuhrẹ Ebaibol na ma re jo wo erere noi ze orọnikọ nọ ma te mu rovie oria jọ se idudhe he.

Ebaibol nọ a re rovie idudhe avọ irẹro inọ oria nọ a rovie ku u re fi obọ họ ku ẹbẹbẹ jọ họ gbe iruemu ogbẹrọwọ itieye na efa e da oria kpobi fia. Rekọ Ebaibol na omariẹ o mukpahe iruemu itienana. (Izerẹ 19:26; Izie. 18:9-12; Iruẹru 19:19) “Ẹme Ọghẹnẹ ọ rẹjọ bẹdẹ, avọ iruo” rekọ o gwọlọ nọ ma rẹ rehọ iẹe ru iruo evaọ emamọ edhere. Eriariẹ egbagba Ebaibol na nọ a re wo je fihọ iruo oye u re nwene uzuazọ ohwo orọnikọ a tẹ be rehọ iẹe ru iruo evaọ edhere ọthọthọ họ. Eriariẹ egbagba Ebaibol u ru nọ ahwo buobu a ro wo iruemu ezi, whaha iruemu iyoma, je ru uzuazọ iviuwou rai woma no. Maero na, u fi obọ họ kẹ ai wo usu okpekpe kugbe Jihova Ọghẹnẹ nọ o wo eme nọ e rrọ Ebaibol na no.