María Isabel yọ uzoge nọ ọ rrọ owhowho-uvie nọ o wo ajọwha gaga evaọ okpẹwho San Bernardo obọ Chile evaọ South America. Ọsẹgboni riẹ yọ emotọ Mapuche. Ahwo uviuwou riẹ soso a be daoma re a ruẹ nọ a rọ ukoko okpokpọ orọ ẹvẹrẹ Mapuche nọ a re se Mapudungun mu evaọ ẹwho na.

Nọ a jọ ukoko nọ a rrọ whowho inọ a te rọ ẹvẹrẹ Mapudungun ru Ekareghẹhọ uwhu Jesu yọ a fa obe-uzizie na fihọ ẹvẹrẹ na jẹ ta nọ a wo enọ i bu te idu ivẹ (2,000) nọ a ti ro zizie ahwo no, onana o tẹ wọ María roro kpahe oware nọ o ti ru. Kọ eme o ti ru? Ọ kareghẹhọ ikuigbe izoge Isẹri Jihova jọ nọ e ta usiuwoma kẹ iticha gbe ibe emọ eklase rai. Nọ María ọ ta kẹ ọsẹgboni riẹ kpahe onana, a tẹ vuẹe nọ jọ ọ ma omaa epanọ ọ te rọ ghale obe-uzizie na evaọ obọ isukulu. Kọ omaa vẹ o roro ku?

Oware ọsosuọ nọ María o ru họ, o mi otu nọ i wuzou isukulu na uvẹ re ọ ta obe-uzizie na mu unuighẹ isukulu na. A rọwo kẹe nọ ọ sai ru ere je jiri iei kẹ oware nọ ọ gwọlọ ru na. Evaọ ohiohiẹ ẹdẹjọ nọ emọ isukulu na kpobi a koko họ, ọnọ o wuzou isukulu na ọ tẹ rọ ọgba ru owhowhovia kpahe uzizie na.

María ọ tẹ jẹ yare nọ a kẹe uvẹ re o zizie emọ isukulu na no eklase ruọ eklase. Nọ a rọwo kẹe nọ ọ sai ru ere no, María ọ tẹ jẹ nọ emọ eklase kpobi nọ o te sọ ọjọ evaọ usu rai yọ ohwo Mapuche. Ọ ta nọ: “Me je roro nọ mẹ te jọ isukulu na ruẹ emọ ikpe hayo ikpegbisoi nọ e rrọ emotọ Mapuche he, rekọ u gb’omẹ unu nọ mẹ ruẹ nọ a riẹ buobu, mẹ ghale ebe-uzizie nọ i bu te udhuhrẹ gbe ikpe (150).”

Aye jọ nọ ọ ruẹ obe-uzizie nọ a tamu unuighẹ isukulu na ọ jẹ gwọlọ ohwo nọ ọ te nọ mi kpahe uzizie na. Akpọ o gbe rie unu nọ a dhesẹ ọmọtẹ nọ ọ rrọ ikpikpe kẹe. María o te kp’ohwẹ ku unu jẹ tanọ: “Aye na o je roro nọ ọkpako soso jọ ọ te ruẹ.” Nọ María ọ kẹe obe-uzi na jẹ ta ẹme kẹe kpahe iẹe no, ọ tẹ nọ aye na oria nọ ọ be rria re tei te ọsẹgboni riẹ a nya bru rie oke ofa nyae ta kẹe kpahe Uvie Ọghẹnẹ. Aye na gbe ahwo udhegbezeza efa evaọ ẹwho Mapuche a ziọ Ekareghẹhọ na. Onana u ru eva were iwhowho-uvie udhe nọ e be ta usiuwoma evaọ ẹkwotọ yena nọ a be jọ ta ẹvẹrẹ Mapudungun na gaga. Enẹna ukoko ẹvẹrẹ Mapudungun nọ a romu no o be riẹ ru ziezi.

Whọ tẹ make rrọ ọmaha hayo ọkpako, kọ whọ sai ru ọkpọ oware utiona ro zizie ibe emọ isukulu hayo ibe iruiruo ra ziọ Ekareghẹhọ uwhu Jesu, ovuẹ ogbotu, hayo okokohọ? Ẹsejọhọ nọ who te ru ekiakiẹ kpahe ikuigbe inievo mai nọ i ru ọkpọ oware utiona u ti fi bọ họ k’owhẹ ru ere re. U te no ere no, yare ẹzi Jihova re o fi obọ họ k’owhẹ wo udu nọ whọ rẹ rọ ta usiuwoma na. (Luk 11:13) Who te ru ere, ẹsejọhọ iyẹrẹ nọ i ti no omaa ra na ze i ti gb’owhẹ unu jẹ k’owhẹ uduotahawọ.