Oware jọ nọ u re fi obọ họ gaga evaọ oke utiona họ, omosasọ nọ ma re wo no obọ ahwo uviuwou, egbẹnyusu gbe ibe Ileleikristi mai ze.

Ẹme owowolẹ ọrọ ogbẹnyusu ọ rẹ sasa ohwo oma, wọhọ udẹ esiwo. (Itẹ 16:24; 18:24; 25:11) Rekọ orọnọ epanọ a re ro wo omosasọ kẹ omarai ọvo o rrọ Ileleikristi uzẹme oja ha. A rẹ gwọlọ edhere nọ a rẹ rọ “sasa enọ erọ eva uye kpobi oma, fiki omosasọ nọ . . . a jọ obọ Ọghẹnẹ wo.” (2 Kọr. 1:4; Luk 6:31) Ọsẹro ubrotọ jọ nọ a re se Antonio o vuhu onana mu.

Nọ edọkita ọ vuẹ Antonio nọ o wo ẹyao ọta, onana o wha ọkora ologbo sei. Rekọ ọ jẹ daoma gaga thihakọ ọkora nọ ẹbẹbẹ na ọ wha sei. Oghẹrẹ vẹ? Ọ jẹ hae daoma kareghẹhọ jẹ so ile ukoko na, o ve roro kpahe eme ile na. Olẹ nọ ọ jẹ hae lẹ do via gbe Ebaibol na nọ ọ jẹ hai se u fi obọ họ kẹe wo omosasọ.

Rekọ Antonio o muẹrohọ nọ omosasọ nọ u no obọ ibe Ileleikristi riẹ ze o jọ ruaro re. Ọ ta nọ: “Nọ iroro e tẹ gba omẹ avọ aye mẹ udu, ma re zizie omoni mai jọ nọ ọ rrọ ọkpako ukoko re ọ nya ze te lẹ kugbe omai. Onana o kẹ omai omosasọ jẹ ru udu kie omai vi. Ma yere Ọghẹnẹ kẹ obufihọ ahwo uviuwou gbe ibe Ileleikristi mai nọ u ru nọ ma ro fi ọkora na kparobọ evaọ omoke kpẹkpẹe.” Antonio o yere Ọghẹnẹ gaga nọ o ro wo egbẹnyusu ezi itieye na.

Oware ofa nọ u re fi obọ họ evaọ etoke ẹbẹbẹ họ, ẹzi ọfuafo na. Pita ukọ na ọ ta nọ ẹzi Ọghẹnẹ yọ “okẹ.” (Iruẹru 2:38) Yọ okẹ nana u te Ileleikristi buobu obọ evaọ Pẹntikọst 33 C.E. Mai kpobi ma rẹ sai wo okẹ ẹzi ọfuafo na re. Okẹ nana u re re he, fikiere hae yare iẹe mi Ọghẹnẹ ẹsikpobi.—Aiz. 40:28-31.

Pọl ukọ na o thihakọ ebẹbẹ buobu, yọ ọ rẹriẹ ovao dhe uwhu ẹsejọ re. (2 Kọr. 1:8-10) Ghele na, Pọl ọ jẹ ruawa uwhu hu. O kẹ riẹ omosasọ nọ ọ riẹ nọ Ọghẹnẹ ọ rrọ kugbei. O kere nọ: “Arọ ujiro kẹ Ọghẹnẹ jegbe Ọsẹ Ọnowo mai Jesu Kristi, Ọsẹ ohrọ kpobi jegbe Ọghẹnẹ omosasọ kpobi; ọnọ o ru omai wo omosasọ eva uye mai.” (2 Kọr. 1:3, 4) Pọl ọ k’uvẹ re ebẹbẹ riẹ e wha ọkora sei hi. Ukpoye, ebẹbẹ nọ o thihakọ rai i ru rie wo ọdawẹ, onọ u fi obọ họ kẹe sasa amọfa oma evaọ etoke ebẹbẹ rai.

Nọ ẹyao Antonio o kpo no, ọ tẹ wariẹ mu iruo ọsẹro ubrotọ nọ ọ jọ họ. O wo isiuru kẹ ibe Ileleikristi riẹ vẹre anwẹdẹ, rekọ avọ aye riẹ a be hae nyae sasa ahwo nọ a be mọ oma evaọ iwou rai. Wọhọ oriruo, nọ a nya bru Oleleikristi jọ nọ ọ jẹ mọ okpẹyao, Antonio ọ tẹ ruẹ nọ oniọvo nana ọ gbẹ gwọlọ kpohọ iwuhrẹ hẹ. Antonio ọ ta nọ: “Orọnikọ oniọvo na o wo uyoyou kẹ Jihova gbe ibe Ileleikristi riẹ hẹ o soriẹ hẹ, rekọ ẹyao na ọ lẹliẹ oniọvo na je roro nọ o gbe fioka ha.”

Oware jọ nọ Antonio o ru ro fi obọ họ kẹ oniọvo na họ, ọ ta kẹe nọ ọ lẹ ze evaọ etoke arozaha omakugbe jọ nọ a ru. Dede nọ oniọvo na o roro nọ o te he, ọ jẹ uvẹ na rehọ. Antonio ọ ta nọ: “Ọ riẹ olẹ na lẹ kẹhẹ, nọ ọ lẹ kuhọ no, o tẹ wọhọ nọ o zihe ro omọfa no, enẹna o rri omariẹ nọ o wo iruo no evaọ ukoko na.”

Ẹhẹ, mai kpobi ma bi thihakọ ebẹbẹ, te ilogbo te esese. Rekọ wọhọ epanọ Pọl ọ ta, onana u re ru nọ ma sai ro fi obọ họ kẹ amọfa wo omosasọ nọ a te wo ẹbẹbẹ. Fikiere, joma hai wo ọdawẹ kẹ ibe Ileleikristi mai nọ e be ruẹ uye jẹ sasa ai oma, re ma rọ ere rọ aro kele Jihova Ọghẹnẹ mai.