EVA e be were omai gaga inọ izoge buobu evaọ ukoko na a bi ru uzuazọ rai lọhọ re a sai ru vi epaọ ọsosuọ evaọ iruo Uvie na. (Mat. 6:22) Inwene vẹ a ru no? Ebẹbẹ vẹ a nyaku? Re ma sae k’iyo enọ nana, joma ta kpahe inievo jọ nọ e rrọ obọ Mexico ta usiuwoma enẹna.

Inievo ivẹ jọ evaọ obọ United States nọ a re se Dustin avọ Jassa a ruọ orọo evaọ January 2007. Nọ omoke jọ o ruemu no, a tẹ dẹ okọ oyibo nọ a jẹ rria eva riẹ wọhọ uwou. A bi okọ rai na kpahe oria jọ kẹle ẹwho nọ a re se Astoria, obọ Oregon evaọ America, ẹwho owoma nọ igbehru avọ owhawho e wariẹ họ kẹle Abade ọ Pacific. Dustin ọ ta nọ, “Oria kpobi nọ who rri, o rrọ wowoma.” Ọzae-avọ-aye nana a je roro nọ a ru uzuazọ rai lọhọ no je fievahọ Jihova. A jẹ hae jọ eva rai ta nọ, ‘Evaọ okọ ma be rria, iruo ubroke ma bi ru, ukoko ẹvẹrẹ ọfa ma rrọ, yọ ẹsejọ ma rẹ rehọ ọkobaro obufihọ.’ Rekọ u kri hi, a tẹ ruẹ nọ kpakọ iroro e be viẹ ae họ. Dustin ọ ta nọ: “Ukpenọ ma w’obọ ziezi evaọ iruo ukoko na, okọ na nọ ma be hae ruẹrẹ n’oke t’oke o jẹ rehọ oke mai kpobi no. Ma vuhumu nọ ma tẹ gwọlọ rọ Jihova karo evaọ uzuazọ, o gwọlọ nọ ma re ru inwene jọ.”

 Aye riẹ Jassa ọ ta nọ: “Taure ma tẹ te rọo, mẹ jọ ukoko Oyibo evaọ obọ Mexico. Mẹ jẹ reawere iruo usiuwoma ota gaga evaọ obei, yọ mẹ jẹ gwọlọ epanọ me re ro zihe.” Re a sae bọ isiuru nana ga, Dustin avọ Jassa a rẹ jọ etoke egagọ uviuwou rai se iku inievo nọ e kwa kpohọ ekwotọ nọ idhu e jọ fa no kẹ evuo. (Jọn 4:35) Dustin ọ ta nọ, “Ma gwọlọ wo oghọghọ utioye re.” Okenọ inievo obọ Mexico a vuẹ Dustin avọ Jassa nọ a gwọlọ ahwo nọ a re fi obọ họ evaọ ukoko jọ nọ a tohọ obọ, a tẹ gbaemu nọ a rẹ kwa kpohọ obei. A te no iruo nọ a jọ, zẹ okọ rai, kẹsena a tẹ kwa kpohọ Mexico.

Ẹwho Tecomán nọ o kẹle Abade Pacific, rekọ nọ o rehọ emaele idu ivẹ gbe egba ihrẹ (2,700) thabọ no ẹwho Astoria, oye Dustin avọ Jassa a wohọ evaọ Mexico. Dustin ọ ta nọ: “Viukpọ ofou odhedhẹ nọ o re fou ku owhẹ gbe igbehru iwoma nọ whọ rẹ ruẹ, uvo ogaga u re mu owhẹ yọ ire ọgo-ọgaga ọvo whọ rẹ ruẹ evaọ oria kpobi.” Nọ a te obei, a jẹ kake ruẹ iruo ho. Oghẹrẹ emu ọvona a jẹ hae dẹ re kẹdẹ kẹdẹ fikinọ ugho nọ a sae rọ dẹ oghẹrẹ emu ọfa o jariẹ hẹ. Jassa ọ ta nọ: “Rekọ nọ o wọhọ nọ emu nana ọ be bẹ omai t’unu no, emọ-uwuhrẹ Ebaibol mai a tẹ jẹ hae kwa iruwo, emagoro, ito gbe eghẹrẹ eware itieye na efa ro ru omai ọghọ.” Kẹsena, ọzae-avọ-aye nana a tẹ ruẹ iruo Itanẹte jọ nọ ehri riẹ ọ rrọ obọ Taiwan, onọ ae omarai a jẹ hae jọ oria nọ a rrọ kpobi wuhrẹ emọ isukulu ẹvẹrẹ jọ evaọ Itanẹte. Osa nọ a be hwae u bi te ae rẹrote ẹgwọlọ rai enẹna.

Kọ ẹvẹ a ta kpahe uzuazọ okpokpọ nana nọ a bi yeri na? A ta nọ: “Ẹkwa nana họ oware nọ o mai woma kpaobọ nọ ma ru no. Usu mai kugbe Jihova gbe ohwohwo o ga vi epanọ ma rẹro riẹ. Kẹdẹ kẹdẹ ma re ru eware buobu kugbe—ma re kpohọ usiuwoma ota kugbe, jiroro kugbe kpahe epanọ ma sai ro fi obọ họ kẹ emọ-uwuhrẹ Ebaibol mai, jẹ ruẹrẹ oma kpahe kẹ iwuhrẹ kugbe. U te no ere no, oma u voro omai gaga evaọ abọ iruẹru uzuazọ ikẹdẹ kẹdẹ vi epaọ anwẹdẹ.” A ta re nọ: “Enẹna, ma wo otoriẹ oware jọ vi epaọ anwẹdẹ kpobi no—otoriẹ ẹme nọ ọ rrọ obe Olezi 34:8 inọ: ‘Jawo, re whọ ruẹ nọ ỌNOWO na o woma!’”

Inievo emezae gbe emetẹ nọ i bu vi idu ivẹ gbe egba izii (2,900) nọ ejọ rai e rọo no, nọ ibuobu rai a rrọ ikpe udhegbọ hayo ọgba-gbọ, a kwa kpohọ  ofẹ sa-sa Mexico nọ a jọ mae gwọlọ iwhowho-uvie. Eme ọ wọ rai? Okenọ a nọ ejọ rai, a fodẹ ugogo eware esa. Eware esa vẹ?

Re a sai dhesẹ uyoyou nọ a wo kẹ Jihova gbe amọfa. Ikpe ikpegberee Leticia ọ jọ okenọ ọ họ-ame. Ọ ta nọ: “Nọ mẹ roma mudhe kẹ Jihova, mẹ riẹ nọ onana u dhesẹ nọ mẹ rẹ roma gbe udu mẹ kpobi gọe. Fikiere, re mẹ sai dhesẹ nọ mẹ rọ eva mẹ kpobi you Jihova, mẹ gwọlọ nọ mẹ rẹ rehọ oke gbe ẹgba mẹ ruiruo ziezi evaọ egagọ riẹ.” (Mak 12:30) Hermilo nọ ọ rrọ ọzae Leticia enẹna, ọ jọ ikpe udhegbọ okenọ ọ kwa kpohọ obonọ a jọ mae gwọlọ iwhowho-uvie. Ọ ta nọ: “Mẹ ruẹ nọ re me fi obọ họ kẹ ahwo riẹ Ọghẹnẹ họ edhere nọ ọ mai woma nọ me re ro dhesẹ uyoyou nọ me wo kẹ ae.” (Mak 12:31) Fikiere o te no okpẹwho Monterrey nọ ọ jẹ jọ ru iruo ebanke avọ uzuazọ akpọriọ, jẹ kwa kpohọ ẹwho ọsese jọ.

Re a ruẹsi wo uvi evawere nọ o rẹ tọ. Nọ Leticia ọ nwane họ-ame no, o te lele oniọvo-ọmọtẹ jọ nọ ọ rrọ ọkobaro kpohọ usiuwoma ota amara ọvo evaọ ẹwho jọ nọ o siomano. Leticia ọ ta nọ: “U gb’omẹ unu. Eva e were omẹ gaga nọ mẹ ruẹ oghẹrẹ nọ ahwo a jẹ gaviezọ kẹ usiuwoma na. Evaọ ekuhọ amara yena, mẹ ta kẹ omamẹ nọ, ‘Onana họ oware nọ mẹ gwọlọ ru evaọ uzuazọ.’” Epọvo na, oniọvo-ọmọtẹ jọ nọ ọ rrọ ikpe udhegbọ nọ a re se Essly o wo isiuru kẹ iruo na nọ ọ ruẹ oghọghọ nọ inievo jọ a be jariẹ wo. Nọ ọ gbẹ jọ isukulu, ọ jẹ ruẹ inievo sa-sa nọ e be ta usiuwoma evaọ oria nọ ẹgwọlọ ọ mae rrọ. Ọ ta nọ: “Nọ mẹ ruẹ epanọ eva e be were inievo yena te, o tẹ lẹliẹ omẹ gwọlọ nọ me re yeri oghẹrẹ uzuazọ utioye.” Inievo-emetẹ buobu a jowọ utiona no re. Wọhọ oriruo, evaọ Mexico, inievo-emetẹ nọ e re rọo ho nọ i bu te egba ezeza gbe ikpe eree (680) a be ta usiuwoma evaọ eria nọ a jọ mae gwọlọ iwhowho-uvie. A fi emamọ oriruo h’otọ kẹ emaha te ekpako.

Re a sai yeri emamọ uzuazọ nọ u wo ẹjiroro. Okenọ Essly o nwrotọ no isukulu no, a tẹ gwọlọ nọ a rẹ kẹe okẹ-ewuhrẹ-ọvọvẹ kpohọ isukulu ikpehru. Ehwa riẹ a jẹ tuduhọ iẹe awọ nọ o mi okẹ na re ọ sai le eware nọ ahwo kpobi a bi le, wo idigri isukulu ikpehru, omoto, emamọ iruo, je wo uvẹ nọ o re ro kperẹ epanọ u je rie. Rekọ, Essly o ru lele ẹme rai hi. Ọ ta nọ: “Me muẹrohọ nọ inievo jọ evaọ ukoko na nọ i bi le eware nana, a gbe bi se egagọ Jihova gboja ha. Me te je muẹrohọ nọ a bi wo idhọvẹ buobu fiki epanọ a  bi dhomahọ eware akpọ na te. Mẹ gwọlọ rehọ oke uzoge mẹ kpobi gọ Jihova.”

Essly o te kpohọ isukulu efa jọ nọ i fi obọ họ kẹe ruẹ iruo nọ ọ rọ rẹrote oma riẹ evaọ iruo ọkobaro, kẹsena ọ tẹ kwa kpohọ oria nọ a jọ mae gwọlọ iwhowho-uvie. O tube wuhrẹ evẹrẹ ahwo Otomi gbe Tlapanec. Nọ o roro kpahe iruẹru riẹ anwọ ikpe esa nọ ọ rrọ ẹkwotọ nọ ẹgwọlọ ọ mae rrọ ta usiuwoma na, ọ ta nọ: “Iruo usiuwoma ota mẹ evaọ ẹkwotọ nana o be lẹliẹ omẹ yeri emamọ uzuazọ nọ u wo ẹjiroro. Maero na, o lẹliẹ usu mẹ kugbe Jihova kpekpe gaga no.” Imava-orọo jọ evaọ United States nọ e rrọ ikpe ọgba-gbọ, Phillip avọ Racquel, a rọwokugbe ẹme nọ Essly ọ ta na. A ta nọ: “Akpọ na o bi dhe enwenwene, fikiere ahwo buobu a riẹ epanọ odẹnotha ọ te jọ họ. Rekọ usiuwoma nọ ma be ta evaọ oria nọ ahwo a jẹ be gaviezọ k’omai o be lẹliẹ omai ruẹ nọ ma bi yeri emamọ uzuazọ. A rẹ ruẹ obọ riẹ hẹ.”

Evaọ uzẹme, usiuwoma ota evaọ oria nọ ẹgwọlọ ọ mae rrọ u wo ebẹbẹ riẹ. Ojọ rai họ, epanọ ohwo ọ sae rọ ruẹ ugho rẹrote omariẹ. Re onana o sae lọhọ, o gwọlọ nọ who re nwene kpohọ oghẹrẹ uzuazọ uyero oria na. Ọkobaro jọ nọ a re se Verónica ọ ta nọ: “Evaọ oria jọ nọ me kpohọ, mẹ jẹ hai there emu zẹ. Evaọ oria ofa, mẹ jẹ zẹ iwu, jẹ nware eto ahwo. Evaọ oria nọ mẹ rọ obọnana, mẹ be rẹrote uwou ohwo jọ, me bi je wuhrẹ ahwo nọ a yẹ obọ epanọ a sai ro lele emọ rai ta ẹme.”

Oghẹrẹ uzuazọ uyero gbe uruemu oria okpokpọ nọ ohwo o kpohọ, nọ o rẹ jọ ohwo oma thọhọ thọhọ evaọ oke ọsosuọ yọ ẹbẹbẹ ọfa. Ere o jọ kẹ Phillip avọ Racquel nọ a jọ ẹkwotọ ahwo nọ a rẹ ta ẹvẹrẹ Nahuatl. Phillip ọ ta nọ: “Oghẹrẹ uzuazọ uyero ahwo na u wo ohẹriẹ gaga.” Eme o fi obọ họ kẹ ae? Phillip ọ ta re nọ: “Ma tẹrovi iruemu iwoma ahwo Nahuatl, a kpekpe ohwohwo oma gaga, a rẹ wha ohwohwo re he, yọ a re ru ọghọ gaga.” Racquel ọ ta re nọ: “Ma wuhrẹ eware buobu mi ahwo na gbe ibe Ileleikristi mai nọ e rrọ ẹkwotọ na.”

Whọ tẹ gwọlọ kwa kpohọ ẹkwotọ nọ a jọ mae gwọlọ iwhowho-uvie, ẹvẹ whọ sae rọ ruẹrẹ oma kpahe? Inievo nọ i ru iruo nana no a ta nọ: Taure whọ tẹ te kwa, daoma epanọ who re ro ru uzuazọ ra lọhọ, re whọ jẹ hai wo edẹro kpahe umutho eware nọ who wo. (Fil. 4:11, 12) Eme ọfa whọ rẹ sai ru? Leticia ọ ta nọ: “Mẹ daoma whaha iruo nọ i re kru omẹ fihọ oria ovo oke lelehie. Keme mẹ gwọlọ nọ mẹ rẹ kwa oke kpobi nọ uvẹ na u te rovie.” Hermilo ọ ta nọ: “Me wuhrẹ epanọ a re there emu, fọrọ jẹ kpa iwu.” Verónica ọ ta nọ: “Okenọ mẹ jọ kugbe ọsẹgboni gbe inievo mẹ, mẹ jẹ hai ru uwou mai fo je wuhrẹ epanọ a rẹ rọ umutho ugho there emu nọ ọ were. Me te je wuhrẹ epanọ a re koko ugho.”

Levi avọ Amelia nọ a rrọ ahwo America nọ a rọo te ikpe eree no a ta epanọ olẹ u ro fi obọ họ kẹ ae ruẹrẹ oma kpahe re a sae kwa kpohọ Mexico. Levi ọ ta nọ: “Ma roro unuigho nọ ma sae rọ rẹrote omamai ẹgbukpe evaọ obonọ ma gwọlọ kwa kpohọ, kẹsena ma tẹ lẹ se Jihova nọ o fi obọ họ k’omai wo utho ugho yena.” Nọ emerae jọ e ruemu no, a sai koko ugho nọ a lẹ kpahe na, kẹsena a tẹ kwa. Levi ọ ta re nọ: “Jihova o yo olẹ mai no, enẹna ẹkabọ mai o kiọkọ.” Amelia o fibae nọ: “Ma je roro nọ ukpe ovo ma te sae rria, rekọ ma rria etenẹ te ikpe ihrẹ no yọ ma bi tube wo iroro ezihe he. Etenẹ nọ ma rrọ na u bi fi obọ họ k’omai ruẹ imuẹro obufihọ Jihova. Kẹdẹ kẹdẹ ma be rọ ẹro ruẹ epanọ Jihova o woma te.”

Adam avọ Jennifer yọ imava-orọo nọ a kwa no obọ America kpobọ Mexico re. Olẹ u fi obọ họ kẹ ae gaga re. A ta nọ: “Whọ hẹrẹ re eware i woma tao ho. Lẹ se Jihova nọ whọ tẹ gwọlọ kwa kpohọ orẹwho ofa kẹ iruo usiuwoma ota na re who je ru lele olẹ ra. Ru uzuazọ ra lọhọ, kere se uwou ogha orọ orẹwho nọ whọ gwọlọ kwa kpohọ na, re whọ jẹ kwa nọ whọ tẹ ma omaa na ziezi no.” * Who te ru ere, who ti yeri uzuazọ evawere evaọ obei keme usu ra kugbe Jihova o te jọ gaga.