JESU ọ ta nọ a te raha etẹmpol Jihova, inọ a te siọ utho ba ehru utho ho. Yọ ere o ginẹ via okenọ Titus ọ wha ogbaẹmo Rom ze te raha Jerusalẹm evaọ ukpe 70 C.E. (Mat. 24:2) Uwhremu na, ọba Rom nọ a re se Julian ọ tẹ ma omaa nọ ọ rẹ wariẹ bọ etẹmpol na.

A se Julian ọba urere Rom nọ ọ jọ ọgẹdhọ. A wuhrẹ Julian nọ ọ rrọ ọmọ-oniọvo Constantine ologbo na iwuhrẹ Ileleikristi. Rekọ nọ a rehọ Julian mu ọba evaọ ukpe 361 C.E., ọ tẹ siọ iwuhrẹ Ileleikristi je mu ẹdhọ họ ẹgọ. A jọ ebe ikuigbe sei “Ọnọ ọ siọ ẹrọwọ na.”

Julian o mukpahe Ileleikristi. Oware jọ nọ o sae jọnọ o wha riẹ ze họ, okenọ ọ jọ ikpe ezeza, Ileleikristi jọ a kpe ọsẹ gbe imoni ọsẹ riẹ nọ e rrọ ezae. Wọhọ epanọ igbiku ahwo ichọche a ta, Julian ọ jẹ tuduhọ ahwo Ju awọ re a wariẹ bọ etẹmpol na, keme o roro nọ ọ te rọ ere dhesẹ nọ Jesu yọ ọruẹaro ọrue. *

Avro ọ riẹ hẹ, Julian ọ ginẹ ma omaa nọ ọ rẹ wariẹ bọ etẹmpol na. Oware nọ igbiku a be vravro riẹ họ, sọ Julian o mu ebabọ na họ, gbe oware nọ ọ gbẹ rọ bọe re he otẹrọnọ o gine mu ebabọ na họ. Rekọ oware jọ u muẹro. A kpe Julian oware wọhọ ikpe ivẹ nọ ọ nwani zihe ruọ Ọba no, yọ iruo ebabọ na i kuhọ nọ o whu no.