Erẹwho buobu evaọ oke nọ u kpemu a jẹ hae kare igbulegbu fihọ ure nọ a tẹ gwọlọ kpe ai. Ahwo Rom a re thuru hayo rọ ububẹ tehe ogbulegbu yawo ure, yọ ọ rẹ gbẹ jọ uzuazọ te edẹ jọ, bẹsenọ oma o rẹ lọhọ iẹe no fiki edada, uruame, ohọo, gbe uvo hayo oso nọ o bi kpei, kẹsena o ve whu. Ahwo Rom a rri rie nọ oghẹrẹ uwhu utiona u fo kẹ ogbulegbu.

Kọ ẹvẹ o jọ evaọ Izrẹl oke anwae? Kọ emọ Izrẹl a jẹ hae kare igbulegbu fihọ ure nọ a tẹ gwọlọ kpe ai no? Uzi Mosis o ta nọ: “Otẹrọnọ ohwo jọ ọ thọ uzi nọ uye riẹ u te uwhu no a je kpe ei no, wha tẹ rehọ iẹe hwa ehru ure, oma riẹ o rẹ jọ ehru ure na horioke he, rekọ wha re ki iei ẹdẹdẹ ọyena.” (Izie. 21:22, 23) Onana u dhesẹ nọ evaọ etoke iruẹru emọ Izrẹl nọ a gbiku rai fihọ Ikereakere Hibru na, a rẹ kaki kpe ohwo nọ a bruoziẹ uwhu kpe tao, kẹsena a vẹ rehọ ori riẹ hwa ehru ure.

Fiki uzi nana, obe Iruo-Izerẹ 20:2 o ta nọ: “Ohwo Izrẹl kpobi, hayo ọrara kpobi nọ ọ ze te ria Izrẹl, nọ ọ rehọ ọmọ riẹ rọ kẹ Molẹk a re kpe i. Ahwo otọ na a rẹ rehọ itho fie i.” A re kpe ohwo kpobi nọ ọ rrọ “[ẹjile] hayo ọrieda” re. Ẹvẹ a re ro kpe ai? ‘A rẹ rehọ itho fi ei kpe.’—Izerẹ 20:27.

Obe Iziewariẹ 22:23, 24, o ta nọ: “Otẹrọnọ ọmọtẹ nọ a sahotọ, nọ ọzae jọ ọ jẹ rue riẹ eva otafe o te lele iei wezẹ, wha vẹ rehọ ae imava na ze unuẹwho wha vẹ rehọ itho fi ai kpe, fiki epanọ ọmọtẹ na o bo se ahwo ho yọ ọ jọ eva ẹwho, gbe ọrọ ọmọzae na ọ raha aye [ọrivẹ] riẹ; ere wha re ro voro umuomu na no udevie rai.” Fikiere, nọ ohwo Izrẹl oke anwae o te ru oware nọ a ro bruoziẹ uwhu kpei, itho a re ro fi ei kpe. *

Obe Iziewariẹ 21:23 o ta nọ, “ọnọ a rehọ hwa ehru ure yọ Ọghẹnẹ ọ bọwo riẹ ehao.” Ababọ avro, ori ohwo omuomu nọ Ọghẹnẹ ọ ‘bọwo ehao’ nọ a rẹ rọ hwa ehru ure, o jọ oware ozọ-usio kẹ emọ Izrẹl.